Section 3.18

In this sitting

1. 3.18.1मनो ब्रह्मेत्य् उपासीत । इत्य् अध्यात्मम् । अथाधिदैवतम् । आकाशो ब्रह्म । इत्य् उभयम् आदिष्टं भवत्य् अध्यात्मं चाधिदैवतं च
2. 3.18.2तद् एतच् चतुष्पाद् ब्रह्म । वाक् पादः प्राणः पादश् चक्षुः पादः श्रोत्रं पादः । इत्य् अध्यात्मम् । अथाधिदैवतम् । अग्निः पादो वायुः पाद आदित्यः पादो दिशः पादः । इत्य् उभयम् एवादिष्टं भवत्य् अध्यात्मं चाधिदैवतं च
3. 3.18.3वाग् एव ब्रह्मणश् चतुर्थः पादः । सो ऽग्निना ज्योतिषा भाति च तपति च । भाति च तपति च कीर्त्या यशसा ब्रह्मवर्चसेन य एवं वेद
4. 3.18.4प्राण एव ब्रह्मणश् चतुर्थः पादः । स वायुना ज्योतिषा भाति च तपति च । भाति च तपति च कीर्त्या यशसा ब्रह्मवर्चसेन य एवं वेद
5. 3.18.5चक्षुर् एव ब्रह्मणश् चतुर्थः पादः । स आदित्येन ज्योतिषा भाति च तपति च । भाति च तपति च कीर्त्या यशसा ब्रह्मवर्चसेन य एवं वेद
6. 3.18.6श्रोत्रम् एव ब्रह्मणश् चतुर्थः पादः । स दिग्भिर् ज्योतिषा भाति च तपति च । भाति च तपति च कीर्त्या यशसा ब्रह्मवर्चसेन य एवं वेद य एवं वेद