Verses 1–12

In this sitting

1. 1ॐ इत्य् एतद् अक्षरम् इदं सर्वं तस्योपव्याख्यानं भूतं भवद् भविष्यद् इति सर्वम् ॐकार एव । यच् चान्यत् त्रिकालातीतं तद् अप्य् ॐकार एव
2. 2सर्वं ह्य् एतद् ब्रह्मायम् आत्मा ब्रह्म सो ऽयम् आत्मा चतुष्पात्
3. 3जागरितस्थानो बहिःप्रज्ञः सप्ताङ्ग एकोनविंशतिमुखः स्थूलभुग् वैश्वानरः प्रथमः पादः
4. 4स्वप्रस्थानो ऽन्तःप्रज्ञः सप्ताङ्ग एकोनविंशतिमुखः प्रविविक्तभुक्तैजसो द्वितीयः पादः
5. 5यत्र सुप्तो न कञ्चन कामं कामयते न कञ्चन स्वप्नं पश्यति तत् सुषुप्तम् । सुषुप्तस्थान एकीभूतः प्रज्ञानघन एवान्दमयो ह्य् आनन्दभुक्चेतोमुखः प्राज्ञः तृतीयः पादः
6. 6एषः सर्वेश्वर एष सर्वज्ञ एषो ऽन्तर्याम्य् एष योनिः सर्वस्य प्रभवाप्ययौ हि भूतानाम्
7. 7नान्तःप्रज्ञं न बहिःप्रज्ञं नोभयतःप्रज्ञं न प्रज्ञानघनं न प्रज्ञं नाप्रज्ञम् । अदृष्टम् अव्यवहार्यम् अग्राह्यम् अलक्षणम् अचिन्त्यम् अव्यपदेश्यम् एकात्मप्रत्ययसारं प्रपञ्चोपशमं शान्तं शिवम् अद्वैतं चतुर्थं मन्यन्ते । स आत्मा स विज्ञेयः
8. 8सो ऽयम् आत्माध्यक्षरम् ॐकारः । अधिमात्रं पादा मात्रा मात्राश्च पादा अकार उकारो मकार इति
9. 9जागरितस्थानो वैश्वानरः अकारः प्रथमा मात्राप्तेरादिमत्त्वाद् वा । आप्नोति ह वै सर्वान् कामान् आदिश् च भवति य एवं वेद
10. 10स्वप्नस्थानस् तैजस उकारो द्वितीया मात्रोत्कर्षाद् उभयत्वाद् वा । उत्कर्षति ह वै ज्ञानसंततिं । समानश् च भवति । नास्याब्रह्मवित् कुले भवति य एवं वेद
11. 11सुषुप्तस्थानः प्राज्ञो मकारः तृतीया मात्रा मितेर् अपीतेर् वा । मिनोति ह वा इदं सर्वम् अपीतिश् च भवति य एवं वेद
12. 12अमात्रश् चतुर्थो ऽव्यवहार्यः प्रपञ्चोपशमः शिवो ऽद्वैतः । एवम् ॐकार आत्मैव । संविशत्य् आत्मनात्मानं य एवं वेद