Part 1

In this sitting

1. 1.1विवेकचुडामणि सर्व-वेदान्त-सिद्धान्त-गोचरं तमगोचरम् & गोविन्दं परमानन्दं सद्-गुरुं प्रणतो ऽस्म्य् अहम्
2. 1.2जन्तूनां नरजन्म दुर्लभमतः पुंस्त्वं ततो विप्रता तस्माद्वैदिकधर्ममार्गपरता विद्वत्त्वमस्मात्परम् & आत्मानात्म-विवेचनं स्वनुभवो ब्रह्मात्मना संस्थितिः मुक्तिर् नो शत-जन्म-कोटि-सुकृतैः पुण्यैर् विना लभ्यते
3. 1.3दुर्लभं त्रयम् एवैतद्देवानुग्रहहेतुकम् & मनुष्यत्वं मुमुक्षुत्वं महापुरुषसंश्रयः
4. 1.4लब्ध्वा कथंचिन् नरजन्म दुर्लभं तत्रापि पुंस्त्वं श्रुतिपारदर्शनम् & यस्त्व् आत्म-मुक्तौ न यतेत मूढधीः स ह्य् आत्म-हा स्वं विनिहन्त्यसद्ग्रहात्
5. 1.5इतः को न्वस्ति मूढात्मा यस् तु स्वार्थे प्रमाद्यति & दुर्लभं मानुषं देहं प्राप्य तत्रापि पौरुषम्
6. 1.6वदन्तु शास्त्राणि यजन्तु देवान् कुर्वन्तु कर्माणि भजन्तु देवताः & आत्मैक्यबोधेन विनापि मुक्तिः न सिध्यति ब्रह्मशतान्तरे ऽपि
7. 1.7अमृतत्वस्य नाशास्ति वित्तेनेत्य् एव हि श्रुतिः & ब्रवीति कर्मणो मुक्तेरहेतुत्वं स्फुटं यतः
8. 1.8अतो विमुक्त्यै प्रयतेत् विद्वान् संन्यस्तबाह्यार्थसुखस्पृहः सन् & सन्तं महान्तं समुपेत्य देशिकं तेनोपदिष्टार्थसमाहितात्मा
9. 1.9उद्धरेदात्मनात्मानं मग्नं संसारवारिधौ & योगारूढत्वमासाद्य सम्यग्दर्शननिष्ठया
10. 1.10संन्यस्य सर्वकर्माणि भवबन्धविमुक्तये & यत्यतां पण्डितैर् धीरैर् आत्माभ्यास उपस्थितैः
11. 1.11चित्तस्य शुद्धये कर्म न तु वस्तूपलब्धये & वस्तुसिद्धिर्विचारेण न किंचित् कर्मकोटिभिः
12. 1.12सम्यग्विचारतः सिद्धा रज्जुतत्त्वावधारणा & भ्रान्तोदितमहासर्पभयदुःखविनाशिनी
13. 1.13अर्थस्य निश्चयो दृष्टो विचारेण हितोक्तितः & न स्नानेन न दानेन प्राणायमशतेन वा
14. 1.14अधिकारिणमाशास्ते फलसिद्धिर्विशेषतः & उपाया देशकालाद्याः सन्त्यस्मिन्सहकारिणः
15. 1.15अतो विचारः कर्तव्यो जिज्ञासोर् आत्मवस्तुनः & समासाद्य दयासिन्धुं गुरुं ब्रह्मविदुत्तमम्
16. 1.16मेधावी पुरुषो विद्वानुहापोहविचक्षणः & अधिकार्यात्मविद्यायामुक्तलक्षणलक्षितः
17. 1.17विवेकिनो विरक्तस्य शमादिगुणशालिनः & मुमुक्षोर् एव हि ब्रह्मजिज्ञासायोग्यता मता
18. 1.18साधनान्यत्र चत्वारि कथितानि मनीषिभिः & येषु सत्स्व् एव सन्निष्ठा यदभावे न सिध्यति
19. 1.19आदौ नित्यानित्यवस्तुविवेकः परिगम्यते & इहामुत्रफलभोगविरागस्तदनन्तरम् \ शमादिषट्कसम्पत्तिर्मुमुक्षुत्वमिति स्फुटम्
20. 1.20ब्रह्म सत्यं जगन्मिथ्येत्य् एवंरूपो विनिश्चयः & सो ऽयं नित्यानित्यवस्तुविवेकः समुदाहृतः
21. 1.21तद्वैराग्यं जिहासा या दर्शनश्रवणादिभिः & देहादिब्रह्मपर्यन्ते ह्यनित्ये भोगवस्तुनि
22. 1.22विरज्य विषयव्राताद्दोषदृष्ट्या मुहुर्मुहुः & स्वलक्ष्ये नियतावस्था मनसः शम उच्यते
23. 1.23विषयेभ्यः परावर्त्य स्थापनं स्वस्वगोलके & उभयेषामिन्द्रियाणां स दमः परिकीर्तितः \ बाह्यानालम्बनं वृत्तेरेषोपरतिरुत्तमा
24. 1.24सहनं सर्वदुःखानामप्रतीकारपूर्वकम् & चिन्ताविलापरहितं सा तितिक्षा निगद्यते
25. 1.25शास्त्रस्य गुरुवाक्यस्य सत्यबुद्ध्यवधारणम् & सा श्रद्धा कथिता सद्भिर्यया वस्तूपलभ्यते
26. 1.26सर्वदा स्थापनं बुद्धेः शुद्धे ब्रह्मणि सर्वदा & तत्समाधानमित्युक्तं न तु चित्तस्य लालनम्
27. 1.27अहंकारादिदेहान्तान् बन्धानज्ञानकल्पितान् & स्वस्वरूपावबोधेन मोक्तुमिच्छा मुमुक्षुता
28. 1.28मन्दमध्यमरूपापि वैराग्येण शमादिना & प्रसादेन गुरोः सेयं प्रवृद्धा सूयते फलम्
29. 1.29वैराग्यं च मुमुक्षुत्वं तीव्रं यस्य तु विद्यते & तस्मिन्नेवार्थवन्तः स्युः फलवन्तः शमादयः
30. 1.30एतयोर् मन्दता यत्र विरक्तत्वमुमुक्षयोः & मरौ सलीलवत्तत्र शमादेर्भानमात्रता
31. 1.31मोक्षकारणसामग्र्यां भक्तिर् एव गरीयसी & स्वस्वरूपानुसन्धानं भक्तिरित्यभिधीयते
32. 1.32स्वात्मतत्त्वानुसन्धानं भक्तिरित्यपरे जगुः & उक्तसाधनसंपन्नस्तत्त्वजिज्ञासुरात्मनः \ उपसीदेद्गुरुं प्राज्ञ्यं यस्माद्बन्धविमोक्षणम्
33. 1.33श्रोत्रियो ऽवृजिनो ऽकामहतो यो ब्रह्मवित्तमः & ब्रह्मण्य् उपरतः शान्तो निरिन्धन इवानलः \ अहेतुकदयासिन्धुर्बन्धुरानमतां सताम्
34. 1.34तमाराध्य गुरुं भक्त्या प्रह्वप्रश्रयसेवनैः & प्रसन्नं तमनुप्राप्य पृच्छेज्ज्ञातव्यमात्मनः
35. 1.35स्वामिन् नमस्ते नतलोकबन्धो कारुण्यसिन्धो पतितं भवाब्धौ & मामुद्धरात्मीयकटाक्षदृष्ट्या ऋज्व्यातिकारुण्यसुधाभिवृष्ट्या
36. 1.36दुर्वारसंसारदवाग्नितप्तं दोधूयमानं दुरदृष्टवातैः & भीतं प्रपन्नं परिपाहि मृत्योः शरण्यमन्यद्यदहं न जाने
37. 1.37शान्ता महान्तो निवसन्ति सन्तो वसन्तवल्लोकहितं चरन्तः & तीर्णाः स्वयं भीमभवार्णवं जनान् अहेतुनान् यान् अपि तारयन्तः
38. 1.38अयं स्वभावः स्वत एव यत्पर- श्रमापनोदप्रवणं महात्मनाम् & सुधांशुरेष स्वयमर्ककर्कश- प्रभाभितप्तामवति क्षितिं किल
39. 1.39ब्रह्मानन्दरसानुभूतिकलितैः पूर्तैः सुशीतैर् युतैः युष्मद्वाक्कलशोज्झितैः श्रुतिसुखैर् वाक्यामृतैः सेचय & संतप्तं भवतापदावदहनज्वालाभिरेनं प्रभो धन्यास्ते भवदीक्षणक्षणगतेः पात्रीकृताः स्वीकृताः
40. 1.40कथं तरेयं भवसिन्धुमेतं का वा गतिर्मे कतमो ऽस्त्य् उपायः & जाने न किञ्ज्चित्कृपयाव मां प्रभो संसारदुःखक्षतिमातनुष्व
41. 1.41तथा वदन्तं शरणागतं स्वं संसारदावानलतापतप्तम् & निरीक्ष्य कारुण्यरसार्द्रदृष्ट्या दद्यादभीतिं सहसा महात्मा
42. 1.42विद्वान् स तस्मा उपसत्तिमीयुषे मुमुक्षवे साधु यथोक्तकारिणे & प्रशान्तचित्ताय शमान्विताय तत्त्वोपदेशं कृपयैव कुर्यात्
43. 1.43मा भैष्ट विद्वंस्तव नास्त्य् अपायः संसारसिन्धोस्तरणे ऽस्त्य् उपायः & येनैव याता यतयो ऽस्य पारं तम् एव मार्गं तव निर्दिशामि
44. 1.44अस्त्य् उपायो महान् कश्चित्संसारभयनाशनः & तेन तीर्त्वा भवाम्भोधिं परमानन्दमाप्स्यसि
45. 1.45वेदान्तार्थविचारेण जायते ज्ञानमुत्तमम् & तेनात्यन्तिकसंसारदुःखनाशो भवत्यनु
46. 1.46श्रद्धाभक्तिध्यानयोगाम्मुमुक्षोः मुक्तेर्हेतून्वक्ति साक्षाच्छ्रुतेर्गीः & यो वा एतेष्व् एव तिष्ठत्यमुष्य मोक्षो ऽविद्याकल्पिताद्देहबन्धात्
47. 1.47अज्ञानयोगात्परमात्मनस्तव ह्यनात्मबन्धस्तत एव संसृतिः & तयोर् विवेकोदितबोधवन्हिः अज्ञानकार्यं प्रदहेत्समूलम्
48. 1.48शिष्य उवाच कृपया श्रूयतां स्वामिन् प्रश्नो ऽयं क्रियते मया & यदुत्तरमहं श्रुत्वा कृतार्थः स्यां भवन्मुखात्
49. 1.49को नाम बन्धः कथम् एष आगतः कथं प्रतिष्ठास्य कथं विमोक्षः & को ऽसावनात्मा परमः क आत्मा तयोर् विवेकः कथम् एतदुच्यताम्
50. 1.50श्रीगुरुवाच धन्यो ऽसि कृतकृत्यो ऽसि पावित ते कुलं त्वया & यदविद्याबन्धमुक्त्या ब्रह्मीभवितुमिच्छसि
51. 1.51ऋणमोचनकर्तारः पितुः सन्ति सुतादयः & बन्धमोचनकर्ता तु स्वस्मादन्यो न कश्चन
52. 1.52मस्तकन्यस्तभारादेर्दुःखमन्यैर् निवार्यते & क्षुधादिकृतदुःखं तु विना स्वेन न केनचित्
53. 1.53पथ्यमौषधसेवा च क्रियते येन रोगिणा & आरोग्यसिद्धिर्दृष्टास्य नान्यानुष्ठितकर्मणा
54. 1.54वस्तुस्वरूपं स्फुटबोधचक्षुषा स्वेनैव वेद्यं न तु पण्डितेन & चन्द्रस्वरूपं निजचक्षुषैव ज्ञातव्यमन्यैर् अवगम्यते किम्
55. 1.55अविद्याकामकर्मादिपाशबन्धं विमोचितुम् & कः शक्नुयाद्विनात्मानं कल्पकोटिशतैर् अपि
56. 1.56न योगेन न सांख्येन कर्मणा नो न विद्यया & ब्रह्मात्मैकत्वबोधेन मोक्षः सिध्यति नान्यथा
57. 1.57वीणाया रूपसौन्दर्यं तन्त्रीवादनसौष्ठवम् & प्रजारञ्ज्जनमात्रं तन् न साम्राज्याय कल्पते
58. 1.58वाग्वैखरी शब्दझरी शास्त्रव्याख्यानकौशलम् & वैदुष्यं विदुषां तद्वद्भुक्तये न तु मुक्तये
59. 1.59अविज्ञाते परे तत्त्वे शास्त्राधीतिस्तु निष्फला & विज्ञाते ऽपि परे तत्त्वे शास्त्राधीतिस्तु निष्फला
60. 1.60शब्दजालं महारण्यं चित्तभ्रमणकारणम् & अतः प्रयत्नाज्ज्ञातव्यं तत्त्वज्ञैस्तत्त्वम् आत्मनः
61. 1.61अज्ञानसर्पदष्टस्य ब्रह्मज्ञानौषधं विना & किमु वेदैश्च शास्त्रैश्च किमु मन्त्रैः किमौषधैः
62. 1.62न गच्छति विना पानं व्याधिरौषधशब्दतः & विनापरोक्षानुभवं ब्रह्मशब्दैर् न मुच्यते
63. 1.63अकृत्वा दृश्यविलयमज्ञात्वा तत्त्वम् आत्मनः & ब्रह्मशब्दैः कुतो मुक्तिरुक्तिमात्रफलैर् नृणाम्
64. 1.64अकृत्वा शत्रुसंहारमगत्वाखिलभूश्रियम् & राजाहमिति शब्दान्नो राजा भवितुमर्हति
65. 1.65आप्तोक्तिं खननं तथोपरिशिलाद्युत्कर्षणं स्वीकृतिं निक्षेपः समपेक्षते नहि बहिः शब्दैस्तु निर्गच्छति & तद्वद्ब्रह्मविदोपदेशमननध्यानादिभिर्लभ्यते मायाकार्यतिरोहितं स्वममलं तत्त्वं न दुर्युक्तिभिः
66. 1.66तस्मात्सर्वप्रयत्नेन भवबन्धविमुक्तये & स्वैर् एव यत्नः कर्तव्यो रोगादाव् इव पण्डितैः
67. 1.67यस्त्वयाद्य कृतः प्रश्नो वरीयाञ्ज्छास्त्रविन्मतः & सूत्रप्रायो निगूढार्थो ज्ञातव्यश्च मुमुक्षुभिः
68. 1.68शृणुष्वावहितो विद्वन्यन्मया समुदीर्यते & तदेतच्छ्रवणात्सद्यो भवबन्धाद्विमोक्ष्यसे
69. 1.69मोक्षस्य हेतुः प्रथमो निगद्यते वैराग्यमत्यन्तमनित्यवस्तुषु & ततः शमश्चापि दमस्तितिक्षा न्यासः प्रसक्ताखिलकर्मणां भृशम्
70. 1.70ततः श्रुतिस् तन्मननं सतत्त्व- ध्यानं चिरं नित्यनिरन्तरं मुनेः & ततो ऽविकल्पं परमेत्य विद्वान् इहैव निर्वाणसुखं समृच्छति
71. 1.71यद्बोद्धव्यं तवेदानीमात्मान् आत्मविवेचनम् & तदुच्यते मया सम्यक् श्रुत्वात्मन्यवधारय
72. 1.72मज्जास्थिमेदःपलरक्तचर्म- त्वगाह्वयैर् धातुभिरेभिरन्वितम् & पादोर् उवक्षोभुजपृष्ठमस्तकैः अङ्गैर् उपाङ्गैर् उपयुक्तमेतत्
73. 1.73अहंममेतिप्रथितं शरीरं मोहास्पदं स्थूलमितीर्यते बुधैः & नभोनभस्वद्दहनाम्बुभूमयः सूक्ष्माणि भूतानि भवन्ति तानि
74. 1.74परस्परांशैर् मिलितानि भूत्वा स्थूलानि च स्थूलशरीरहेतवः & मात्रास्तदीया विषया भवन्ति शब्दादयः पञ्च सुखाय भोक्तुः
75. 1.75य एषु मूढा विषयेषु बद्धा रागोरुपाशेन सुदुर्दमेन & आयान्ति निर्यान्त्यध ऊर्ध्वमुच्चैः स्वकर्मदूतेन जवेन नीताः
76. 1.76शब्दादिभिः पञ्चभिर् एव पञ्च पञ्चत्वमापुः स्वगुणेन बद्धाः & कुरङ्गमातङ्गपतङ्गमीन- भृङ्गा नरः पञ्चभिरञ्चितः किम्
77. 1.77दोषेण तीव्रो विषयः कृष्णसर्पविषाद् अपि & विषं निहन्ति भोक्तारं द्रष्टारं चक्षुषाप्ययम्
78. 1.78विषयाशामहापाशाद्यो विमुक्तः सुदुस्त्यजात् & स एव कल्पते मुक्त्यै नान्यः षट्शास्त्रवेद्य् अपि
79. 1.79आपातवैराग्यवतो मुमुक्षून् भवाब्धिपारं प्रतियातुमुद्यतान् & आशाग्रहो मज्जयते ऽन्तराले निगृह्य कण्ठे विनिवर्त्य वेगात्
80. 1.80विषयाख्यग्रहो येन सुविरक्त्यसिना हतः & स गच्छति भवाम्भोधेः पारं प्रत्यूहवर्जितः
81. 1.81विषमविषयमार्गैर् गच्छतो ऽनच्छबुद्धेः प्रतिपदमभियातो मृत्युरप्येष विद्धि & हितसुजनगुरुक्त्या गच्छतः स्वस्य युक्त्या प्रभवति फलसिद्धिः सत्यम् इत्य् एव विद्धि
82. 1.82मोक्षस्य कांक्षा यदि वै तवास्ति त्यजातिदूराद्विषयान्विषं यथा & पीयूषवत्तोषदयाक्षमार्जव- प्रशान्तिदान्तीर्भज नित्यमादरात्
83. 1.83अनुक्षणं यत्परिहृत्य कृत्यं अनाद्यविद्याकृतबन्धमोक्षणम् & देहः परार्थो ऽयममुष्य पोषणे यः सज्जते स स्वमनेन हन्ति
84. 1.84शरीरपोषणार्थी सन् य आत्मानं दिदृक्षति & ग्राहं दारुधिया धृत्वा नदि तर्तुं स गच्छति
85. 1.85मोह एव महामृत्युर्मुमुक्षोर्वपुरादिषु & मोहो विनिर्जितो येन स मुक्तिपदमर्हति
86. 1.86मोहं जहि महामृत्युं देहदारसुतादिषु & यं जित्वा मुनयो यान्ति तद्विष्णोः परमं पदम्
87. 1.87त्वङ्मांसरुधिरस्नायुमेदोमज्जास्थिसंकुलम् & पूर्णं मूत्रपुरीषाभ्यां स्थूलं निन्द्यमिदं वपुः
88. 1.88पञ्चीकृतेभ्यो भूतेभ्यः स्थूलेभ्यः पूर्वकर्मणा & समुत्पन्नमिदं स्थूलं भोगायतनम् आत्मनः \ अवस्था जागरस्तस्य स्थूलार्थानुभवो यतः
89. 1.89बाह्येन्द्रियैः स्थूलपदार्थसेवां स्रक्चन्दनस्त्र्यादिविचित्ररूपाम् & करोति जीवः स्वयमेतद् आत्मना तस्मात्प्रशस्तिर्वपुषो ऽस्य जागरे
90. 1.90सर्वापि बाह्यसंसारः पुरुषस्य यदाश्रयः & विद्धि देहमिदं स्थूलं गृहवद्गृहमेधिनः
91. 1.91स्थूलस्य संभवजरामरणानि धर्माः स्थौल्यादयो बहुविधाः शिशुताद्यवस्थाः & वर्णाश्रमादिनियमा बहुधामयाः स्युः पूजावमानबहुमानमुखा विशेषाः
92. 1.92बुद्धीन्द्रियाणि श्रवणं त्वगक्षि घ्राणं च जिव्हा विषयावबोधनात् & वाक्पाणिपादा गुदमप्युपस्थः कर्मेन्द्रियाणि प्रवणेन कर्मसु
93. 1.93निगद्यते ऽन्तःकरणं मनोधीः अहंकृतिश्चित्तमिति स्ववृत्तिभिः & मनस्तु संकल्पविकल्पनादिभिः बुद्धिः पदार्थाध्यवसायधर्मतः
94. 1.94अत्राभिमानादहमित्यहंकृतिः & स्वार्थानुसन्धानगुणेन चित्तम्
95. 1.95प्राणापानव्यानोदानसमाना भवत्यसौ प्राणः & स्वयम् एव वृत्तिभेदाद्विकृतिभेदात्सुवर्णसलिलादिवत्
96. 1.96वागादि पञ्च श्रवणादि पञ्च प्राणादि पञ्चाभ्रमुखानि पञ्च & बुद्ध्याद्यविद्यापि च कामकर्मणी पुर्यष्टकं सूक्ष्मशरीरमाहुः
97. 1.97इदं शरीरं शृणु सूक्ष्मसंज्ञितं लिङ्गं त्वपञ्चीकृतसंभवम् & सवासनं कर्मफलानुभावकं स्वाज्ञानतो ऽनादिरुपाधिर् आत्मनः
98. 1.98स्वप्नो भवत्यस्य विभक्त्यवस्था स्वमात्रशेषेण विभाति यत्र & स्वप्ने तु बुद्धिः स्वयम् एव जाग्रत् कालीननानाविधवासनाभिः
99. 1.99कर्त्रादिभावं प्रतिपद्य राजते यत्र स्वयं भाति ह्ययं परात्मा & धीमात्रकोपाधिरशेषसाक्षी न लिप्यते तत्कृतकर्मलेशैः \ यस्मादसङ्गस्तत एव कर्मभिः न लिप्यते किंचिद् उपाधिना कृतैः
100. 1.100सर्वव्यापृतिकरणं लिङ्गमिदं स्याच्चिद् आत्मनः पुंसः & वास्यादिकम् इव तक्ष्णस्तेनैवात्मा भवत्यसङ्गो ऽयम्
101. 1.101अन्धत्वमन्दत्वपटुत्वधर्माः सौगुण्यवैगुण्यवशाद्धि चक्षुषः & बाधिर्यमूकत्वमुखास्तथैव श्रोत्रादिधर्मा न तु वेत्तुर् आत्मनः
102. 1.102उच्छ्वासनिःश्वासविजृम्भणक्षुत् प्रस्यन्दनाद्युत्क्रमणादिकाः क्रियाः & प्राणादिकर्माणि वदन्ति तज्ञाः प्राणस्य धर्मावशनापिपासे
103. 1.103अन्तःकरणमेतेषु चक्षुरादिषु वर्ष्मणि & अहमित्यभिमानेन तिष्ठत्याभासतेजसा
104. 1.104अहंकारः स विज्ञेयः कर्ता भोक्ताभिमान्ययम् & सत्त्वादिगुणयोगेन चावस्थात्रयमश्नुते
105. 1.105विषयाणामानुकूल्ये सुखी दुःखी विपर्यये & सुखं दुःखं च तद्धर्मः सदानन्दस्य नात्मनः
106. 1.106आत्मार्थत्वेन हि प्रेयान्विषयो न स्वतः प्रियः & स्वत एव हि सर्वेषामात्मा प्रियतमो यतः \ तत आत्मा सदानन्दो नास्य दुःखं कदाचन
107. 1.107यत्सुषुप्तौ निर्विषय आत्मानन्दो ऽनुभूयते & श्रुतिः प्रत्यक्षमैतिह्यमनुमानं च जाग्रति
108. 1.108अव्यक्तनाम्नी परमेशशक्तिः अनाद्यविद्या त्रिगुणात्मिका परा & कार्यानुमेया सुधियैव माया यया जगत्सर्वमिदं प्रसूयते
109. 1.109सन्नाप्यसन्नाप्युभयात्मिका नो भिन्नाप्यभिन्नाप्युभयात्मिका नो & साङ्गाप्यनङ्गा ह्युभयात्मिका नो महाद्भुतानिर्वचनीयरूपा
110. 1.110शुद्धाद्वयब्रह्मविभोधनाश्या सर्पभ्रमो रज्जुविवेकतो यथा & रजस्तमःसत्त्वमिति प्रसिद्धा गुणास्तदीयाः प्रथितैः स्वकार्यैः
111. 1.111विक्षेपशक्ती रजसः क्रियात्मिका यतः प्रवृत्तिः प्रसृता पुराणी & रागादयो ऽस्याः प्रभवन्ति नित्यं दुःखादयो ये मनसो विकाराः
112. 1.112कामः क्रोधो लोभदम्भाद्यसूया अहंकारेर्ष्यामत्सराद्यास्तु घोराः & धर्मा एते राजसाः पुम्प्रवृत्तिः यस्मादेषा तद्रजो बन्धहेतुः
113. 1.113एषावृतिर्नाम तमोगुणस्य शक्तिर्मया वस्त्ववभासते ऽन्यथा & सैषा निदानं पुरुषस्य संसृतेः विक्षेपशक्तेः प्रवणस्य हेतुः
114. 1.114प्रज्ञावान् अपि पण्डितो ऽपि चतुरो ऽप्य् अत्यन्तसूक्ष्मात्मदृग्- व्यालीढस् तमसा न वेत्ति बहुधा संबोधितो ऽपि स्फुटम् & भ्रान्त्यारोपितम् एव साधु कलयत्यालम्बते तद्गुणान् हन्तासौ प्रबला दुरन्ततमसः शक्तिर्महत्यावृतिः
115. 1.115अभावना वा विपरीतभावना असंभावना विप्रतिपत्तिरस्याः & संसर्गयुक्तं न विमुञ्चति ध्रुवं विक्षेपशक्तिः क्षपयत्यजस्रम्
116. 1.116अज्ञानमालस्यजडत्वनिद्रा- प्रमादमूढत्वमुखास्तमोगुणाः & एतैः प्रयुक्तो नहि वेत्ति किंचिन् निद्रालुवत्स्तम्भवद् एव तिष्ठति
117. 1.117सत्त्वं विशुद्धं जलवत्तथापि ताभ्यां मिलित्वा सरणाय कल्पते & यत्रात्मबिम्बः प्रतिबिम्बितः सन् प्रकाशयत्यर्क इवाखिलं जडम्
118. 1.118मिश्रस्य सत्त्वस्य भवन्ति धर्माः त्वमानिताद्या नियमा यमाद्याः & श्रद्धा च भक्तिश्च मुमुक्षता च दैवी च सम्पत्तिरसन्निवृत्तिः
119. 1.119विशुद्धसत्त्वस्य गुणाः प्रसादः स्वात्मानुभूतिः परमा प्रशान्तिः & तृप्तिः प्रहर्षः परमात्मनिष्ठा यया सदानन्दरसं समृच्छति
120. 1.120अव्यक्तमेतत्त्रिगुणैर् निरुक्तं तत्कारणं नाम शरीरम् आत्मनः & सुषुप्तिरेतस्य विभक्त्यवस्था प्रलीनसर्वेन्द्रियबुद्धिवृत्तिः
121. 1.121सर्वप्रकारप्रमितिप्रशान्तिः बीजात्मनावस्थितिर् एव बुद्धेः & सुषुप्तिरेतस्य किल प्रतीतिः किंचिन् न वेद्मीति जगत्प्रसिद्धेः
122. 1.122देहेन्द्रियप्राणमनो ऽहम् आदयः सर्वे विकारा विषयाः सुखादयः & व्योमादिभूतान्यखिलं न विश्वं अव्यक्तपर्यन्तमिदं ह्यनात्मा
123. 1.123माया मायाकार्यं सर्वं महदादिदेहपर्यन्तम् & असदिदमनात्मतत्त्वं विद्धि त्वं मरुमरीचिकाकल्पम्
124. 1.124अथ ते संप्रवक्ष्यामि स्वरूपं परम् आत्मनः & यद्विज्ञाय नरो बन्धान्मुक्तः कैवल्यमश्नुते
125. 1.125अस्ति कश्चित्स्वयं नित्यमहंप्रत्ययलम्बनः & अवस्थात्रयसाक्षी संपञ्चकोशविलक्षणः
126. 1.126यो विजानाति सकलं जाग्रत्स्वप्नसुषुप्तिषु & बुद्धितद्वृत्तिसद्भावमभावमहमित्ययम्
127. 1.127यः पश्यति स्वयं सर्वं यं न पश्यति कश्चन & यश्चेतयति बुद्ध्यादि न तद्यं चेतयत्ययम्
128. 1.128येन विश्वमिदं व्याप्तं यं न व्याप्नोति किंचन & अभारूपमिदं सर्वं यं भान्त्यमनुभात्ययम्
129. 1.129यस्य सन्निधिमात्रेण देहेन्द्रियमनोधियः & विषयेषु स्वकीयेषु वर्तन्ते प्रेरिता इव
130. 1.130अहङ्कारादिदेहान्ता विषयाश्च सुखादयः & वेद्यन्ते घटवद् येन नित्यबोधस्वरूपिणा
131. 1.131एषो ऽन्तरात्मा पुरुषः पुराणो निरन्तराखण्डसुखानुभूतिः & सदैकरूपः प्रतिबोधमात्रो येनेषिता वागसवश्चरन्ति
132. 1.132अत्रैव सत्त्वात्मनि धीगुहायां अव्याकृताकाश उशत्प्रकाशः & आकाश उच्चै रविवत्प्रकाशते स्वतेजसा विश्वमिदं प्रकाशयन्
133. 1.133ज्ञाता मनो ऽहंकृतिविक्रियाणां देहेन्द्रियप्राणकृतक्रियाणाम् & अयो ऽग्निवत्ताननुवर्तमानो न चेष्टते नो विकरोति किंचन
134. 1.134न जायते नो म्रियते न वर्धते न क्षीयते नो विकरोति नित्यः & विलीयमाने ऽपि वपुष्यमुष्मिन् न लीयते कुम्भ इवाम्बरं स्वयम्
135. 1.135प्रकृतिविकृतिभिन्नः शुद्धबोधस्वभावः सदसदिदमशेषं भासयन्निर्विशेषः & विलसति परमात्मा जाग्रदादिष्ववस्था- स्वहमहमिति साक्षात्साक्षिरूपेण बुद्धेः
136. 1.136नियमितमनसामुं त्वं स्वमात्मानम् आत्मन्य् अयमहमिति साक्षाद्विद्धि बुद्धिप्रसादात् & जनिमरणतरङ्गापारसंसारसिन्धुं प्रतर भव कृतार्थो ब्रह्मरूपेण संस्थः
137. 1.137अत्रानात्मन्यहमिति मतिर्बन्ध एषो ऽस्य पुंसः प्राप्तो ऽज्ञानाज्जननमरणक्लेशसंपातहेतुः & येनैवायं वपुरिदमसत्सत्यमित्य् आत्मबुद्ध्या पुष्यत्युक्षत्यवति विषयैस्तन्तुभिः कोशकृद्वत्
138. 1.138अतस्मिंस्तद्बुद्धिः प्रभवति विमूढस्य तमसा विवेकाभावाद्वै स्फुरति भुजगे रज्जुधिषणा & ततो ऽनर्थव्रातो निपतति समादातुरधिकः ततो यो ऽसद्ग्राहः स हि भवति बन्धः शृणु सखे
139. 1.139अखण्डनित्याद्वयबोधशक्त्या स्फुरन्तमात्मानमनन्तवैभवम् & समावृणोत्यावृतिशक्तिरेषा तमोमयी राहुरिवार्कबिम्बम्
140. 1.140तिरोभूते स्वात्मन्यमलतरतेजोवति पुमान् अनात्मानं मोहादहमिति शरीरं कलयति & ततः कामक्रोधप्रभृतिभिरमुं बन्धनगुणैः परं विक्षेपाख्या रजस उरुशक्तिर्व्यथयति
141. 1.141महामोहग्राहग्रसनगलितात्मावगमनो धियो नानावस्थां स्वयमभिनयंस्तद्गुणतया & अपारे संसरे विषयविषपूरे जलनिधौ निमज्योन्मज्यायं भ्रमति कुमतिः कुत्सितगतिः
142. 1.142भानुप्रभासंजनिताभ्रपङ्क्तिः भानुं तिरोधाय विजृम्भते यथा & आत्मोदिताहंकृतिर् आत्मतत्त्वं तथा तिरोधाय विजृम्भते स्वयम्
143. 1.143कवलितदिननार्थे दुर्दिने सान्द्रमेघैः व्यथयति हिमझंझावायुरुग्रो यथैतान् & अविरततमसात्मन्यावृते मूढबुद्धिं क्षपयति बहुदुःखैस्तीव्रविक्षेपशक्तिः
144. 1.144एताभ्याम् एव शक्तिभ्यां बन्धः पुंसः समागतः & याभ्यां विमोहितो देहं मत्वात्मानं भ्रमत्ययम्
145. 1.145बीजं संसृतिभूमिजस्य तु तमो देहात्मधीरङ्कुरो रागः पल्लवमम्बु कर्म तु वपुः स्कन्धोओ ऽसवः शाखिकाः & अग्राणीन्द्रियसंहतिश्च विषयाः पुष्पाणि दुःखं फलं नानाकर्मसमुद्भवं बहुविधं भोक्तात्र जीवः खगः
146. 1.146अज्ञानमूलो ऽयमनात्मबन्धो नैसर्गिको ऽनादिरनन्त ईरितः & जन्माप्ययव्याधिजरादिदुःख- प्रवाहपातं जनयत्यमुष्य
147. 1.147नास्त्रैर् न शस्त्रैर् अनिलेन वन्हिना छेत्तुं न शक्यो न च कर्मकोटिभिः & विवेकविज्ञानमहासिना विना धातुः प्रसादेन शितेन मञ्जुना
148. 1.148श्रुतिप्रमाणैकमतेः स्वधर्म निष्ठा तयैवात्मविशुद्धिरस्य & विशुद्धबुद्धेः परम् आत्मवेदनं तेनैव संसारसमूलनाशः
149. 1.149कोशैर् अन्नमयाद्यैः पञ्चभिरात्मा न संवृतो भाति & निजशक्तिसमुत्पन्नैः शैवालपटलैर् इवाम्बु वापीस्थम्
150. 1.150तच्छैवालापनये सम्यक् सलिलं प्रतीयते शुद्धम् & तृष्णासन्तापहरं सद्यः सौख्यप्रदं परं पुंसः
151. 1.151पञ्चानाम् अपि कोशानामपवादे विभात्ययं शुद्धः & नित्यानन्दैकरसः प्रत्यग्रूपः परः स्वयंज्योतिः
152. 1.152आत्मानात्मविवेकः कर्तव्यो बन्धमुक्तये विदुषा & तेनैवानन्दी भवति स्वं विज्ञाय सच्चिदानन्दम्
153. 1.153मुञ्जादिषीकाम् इव दृश्यवर्गात् प्रत्यञ्चमात्मानमसङ्गमक्रियम् & विविच्य तत्र प्रविलाप्य सर्वं तद् आत्मना तिष्ठति यः स मुक्तः
154. 1.154देहो ऽयमन्नभवनो ऽन्नमयस्तु कोशः चान्नेन जीवति विनश्यति तद्विहीनः & त्वक्चर्ममांसरुधिरास्थिपुरीषराशिः नायं स्वयं भवितुमर्हति नित्यशुद्धः
155. 1.155पूर्वं जनेरधिमृतेर् अपि नायमस्ति जातक्षणः क्षणगुणो ऽनियतस्वभावः & नैको जडश्च घटवत्परिदृश्यमानः स्वात्मा कथं भवति भावविकारवेत्ता
156. 1.156पाणिपादादिमान्देहो नात्मा व्यङ्गे ऽपि जीवनात् & तत्तच्छक्तेरनाशाच्च न नियम्यो नियामकः
157. 1.157देहतद्धर्मतत्कर्मतदवस्थादिसाक्षिणः & सत एव स्वतःसिद्धं तद्वैलक्षण्यम् आत्मनः
158. 1.158शल्यराशिर्मांसलिप्तो मलपूर्णो ऽतिकश्मलः & कथं भवेदयं वेत्ता स्वयमेतद्विलक्षणः
159. 1.159त्वङ्मांसमेदो ऽस्थिपुरीषराशा- वहंमतिं मूढजनः करोति & विलक्षणं वेत्ति विचारशीलो निजस्वरूपं परमार्थ भूतम्
160. 1.160देहो ऽहम् इत्य् एव जडस्य बुद्धिः देहे च जीवे विदुषस्त्वहंधीः & विवेकविज्ञानवतो महात्मनो ब्रह्माहम् इत्य् एव मतिः सदात्मनि
161. 1.161अत्रात्मबुद्धिं त्यज मूढबुद्धे त्वङ्मांसमेदो ऽस्थिपुरीषराशौ & सर्वात्मनि ब्रह्मणि निर्विकल्पे कुरुष्व शान्ति परमां भजस्व
162. 1.162देहेन्द्रियादावसति भ्रमोदितां विद्वानहं तां न जहाति यावत् & तावन् न तस्यास्ति विमुक्तिवार्ताप्य् अस्त्वेष वेदान्तनयान्तदर्शी
163. 1.163छायाशरीरे प्रतिबिम्बगात्रे यत्स्वप्नदेहे हृदि कल्पिताङ्गे & यथात्मबुद्धिस्तव नास्ति काचिज् जीवच्छरीरे च तथैव मास्तु
164. 1.164देहात्मधीर् एव नृणामसद्धियां जन्मादिदुःखप्रभवस्य बीजम् & यतस्ततस्त्वं जहि तां प्रयत्नात् त्यक्ते तु चित्ते न पुनर्भवाशा
165. 1.165कर्मेन्द्रियैः पञ्चभिरञ्चितो ऽयं प्राणो भवेत्प्राणमयस्तु कोशः & येनात्मवानन्नमयो ऽनुपूर्णः प्रवर्तते ऽसौ सकलक्रियासु
166. 1.166नैवात्मापि प्राणमयो वायुविकारो गन्तागन्ता वायुवदन्तर्बहिरेषः & यस्मात् किंचित् क्वापि न वेत्तीष्टमनिष्टं स्वं वान्यं वा किंचन नित्यं परतन्त्रः
167. 1.167ज्ञानेन्द्रियाणि च मनश्च मनोमयः स्यात् कोशो ममाहमिति वस्तुविकल्पहेतुः & संज्ञादिभेदकलनाकलितो बलीयांस् तत्पूर्वकोशमभिपूर्य विजृम्भते यः
168. 1.168पञ्चेन्द्रियैः पञ्चभिर् एव होतृभिः प्रचीयमानो विषयाज्यधारया & जाज्वल्यमानो बहुवासनेन्धनैः मनोमयाग्निर्दहति प्रपञ्चम्
169. 1.169न ह्यस्त्य् अविद्या मनसो ऽतिरिक्ता मनो ह्यविद्या भवबन्धहेतुः & तस्मिन्विनष्टे सकलं विनष्टं विजृम्भिते ऽस्मिन्सकलं विजृम्भते
170. 1.170स्वप्ने ऽर्थशून्ये सृजति स्वशक्त्या भोक्त्रादिविश्वं मन एव सर्वम् & तथैव जाग्रत्य् अपि नो विशेषः तत्सर्वमेतन्मनसो विजृम्भणम्
171. 1.171सुषुप्तिकाले मनसि प्रलीने नैवास्ति किंचित् सकलप्रसिद्धेः & अतो मनःकल्पित् एव पुंसः संसार एतस्य न वस्तुतो ऽस्ति
172. 1.172वायुनानीयते मेधः पुनस्तेनैव नीयते & मनसा कल्प्यते बन्धो मोक्षस्तेनैव कल्प्यते
173. 1.173देहादिसर्वविषये परिकल्प्य रागं बध्नाति तेन पुरुषं पशुवद्गुणेन & वैरस्यमत्र विषवत् सुवुधाय पश्चाद् एनं विमोचयति तन्मन एव बन्धात्
174. 1.174तस्मान्मनः कारणमस्य जन्तोः बन्धस्य मोक्षस्य च वा विधाने & बन्धस्य हेतुर्मलिनं रजोगुणैः मोक्षस्य शुद्धं विरजस्तमस्कम्
175. 1.175विवेकवैराग्यगुणातिरेकाच् छुद्धत्वमासाद्य मनो विमुक्त्यै & भवत्यतो बुद्धिमतो मुमुक्षोस् ताभ्यां दृढाभ्यां भवितव्यमग्रे
176. 1.176मनो नाम महाव्याघ्रो विषयारण्यभूमिषु & चरत्यत्र न गच्छन्तु साधवो ये मुमुक्षवः
177. 1.177मनः प्रसूते विषयानशेषान् स्थूलात्मना सूक्ष्मतया च भोक्तुः & शरीरवर्णाश्रमजातिभेदान् गुणक्रियाहेतुफलानि नित्यम्
178. 1.178असङ्गचिद्रूपममुं विमोह्य देहेन्द्रियप्राणगुणैर् निबद्ध्य & अहंममेति भ्रमयत्यजस्रं मनः स्वकृत्येषु फलोपभुक्तिषु
179. 1.179अध्यासदोषात्पुरुषस्य संसृतिः अध्यासबन्धस्त्वमुनैव कल्पितः & रजस्तमोदोषवतो ऽविवेकिनो जन्मादिदुःखस्य निदानमेतत्
180. 1.180अतः प्राहुर्मनो ऽविद्यां पण्डितास्तत्त्वदर्शिनः & येनैव भ्राम्यते विश्वं वायुनेवाभ्रमण्डलम्
181. 1.181तन्मनःशोधनं कार्यं प्रयत्नेन मुमुक्षुणा & विशुद्धे सति चैतस्मिन्मुक्तिः करफलायते
182. 1.182मोक्षैकसक्त्या विषयेषु रागं निर्मूल्य संन्यस्य च सर्वकर्म & सच्छ्रद्धया यः श्रवणादिनिष्ठो रजःस्वभावं स धुनोति बुद्धेः
183. 1.183मनोमयो नापि भवेत्परात्मा ह्याद्यन्तवत्त्वात्परिणामिभावात् & दुःखात्मकत्वाद्विषयत्वहेतोः द्रष्टा हि दृश्यात्मतया न दृष्टः
184. 1.184बुद्धिर्बुद्धीन्द्रियैः सार्धं सवृत्तिः कर्तृलक्षणः & विज्ञानमयकोशः स्यात्पुंसः संसारकारणम्
185. 1.185अनुव्रजच्चित्प्रतिबिम्बशक्तिः विज्ञानसंज्ञः प्रकृतेर्विकारः & ज्ञानक्रियावानहमित्यजस्रं देहेन्द्रियादिष्वभिमन्यते भृशम्
186. 1.186अनादिकालो ऽयमहंस्वभावो जीवः समस्तव्यवहारवोढा & करोति कर्माण्य् अपि पूर्ववासनः पुण्यान्यपुण्यानि च तत्फलानि
187. 1.187भुङ्क्ते विचित्रास्व् अपि योनिषु व्रजन् नायाति निर्यात्यध ऊर्ध्वमेषः & अस्यैव विज्ञानमयस्य जाग्रत्- स्वप्नाद्यवस्थाः सुखदुःखभोगः
188. 1.188देहादिनिष्ठाश्रमधर्मकर्म- गुणाभिमानः सततं ममेति & विज्ञानकोशो ऽयमतिप्रकाशः प्रकृष्टसान्निध्यवशात्परात्मनः & अतो भवत्येष उपाधिरस्य यद् आत्मधीः संसरति भ्रमेण
189. 1.189यो ऽयं विज्ञानमयः प्राणेषु हृदि स्फुरत्ययं ज्योतिः & कूटस्थः सन्नात्मा कर्ता भोक्ता भवत्युपाधिस्थः
190. 1.190स्वयं परिच्छेदमुपेत्य बुद्धेः तादात्म्यदोषेण परं मृषात्मनः & सर्वात्मकः सन्न् अपि वीक्षते स्वयं स्वतः पृथक्त्वेन मृदो घटान् इव
191. 1.191उपाधिसंबन्धवशात्परात्मा ह्युपाधिधर्माननुभाति तद्गुणः & अयोविकारानविकारिवन्हिवत् सदैकरूपो ऽपि परः स्वभावात्
192. 1.192शिष्य उवाच भ्रमेणाप्यन्यथा वास्तु जीवभावः परात्मनः & तदुपाधेरनादित्वान्नानादेर्नाश इष्यते
193. 1.193अतो ऽस्य जीवभावो ऽपि नित्या भवति संसृतिः & न निवर्तेत तन्मोक्षः कथं मे श्रीगुरो वद
194. 1.194श्रीगुरुरुवाच सम्यक्पृष्टं त्वया विद्वन्सावधानेन तच्छृणु & प्रामाणिकी न भवति भ्रान्त्या मोहितकल्पना
195. 1.195भ्रान्तिं विना त्वसङ्गस्य निष्क्रियस्य निराकृतेः & न घटेतार्थसंबन्धो नभसो नीलतादिवत्
196. 1.196स्वस्य द्रष्टुर्निर्गुणस्याक्रियस्य प्रत्यग्बोधानन्दरूपस्य बुद्धेः & भ्रान्त्या प्राप्तो जीवभावो न सत्यो मोहापाये नास्त्य् अवस्तुस्वभावात्
197. 1.197यावद्भ्रान्तिस्तावदेवास्य सत्ता मिथ्याज्ञानोज्जृम्भितस्य प्रमादात् & रज्ज्वां सर्पो भ्रान्तिकालीन एव भ्रान्तेर्नाशे नैव सर्पो ऽपि तद्वत्
198. 1.198अनादित्वमविद्यायाः कार्यस्यापि तथेष्यते & उत्पन्नायां तु विद्यायामाविद्यकमनाद्य् अपि
199. 1.199प्रबोधे स्वप्नवत्सर्वं सहमूलं विनश्यति & अनाद्यपीदं नो नित्यं प्रागभाव इव स्फुटम्
200. 1.200अनादेर् अपि विध्वंसः प्रागभावस्य वीक्षितः & यद्बुद्ध्युपाधिसंबन्धात्परिकल्पितम् आत्मनि
201. 1.201जीवत्वं न ततो ऽन्यस्तु स्वरूपेण विलक्षणः & संबन्धस्त्व् आत्मनो बुद्ध्या मिथ्याज्ञानपुरःसरः
202. 1.202विनिवृत्तिर्भवेत्तस्य सम्यग्ज्ञानेन नान्यथा & ब्रह्मात्मैकत्वविज्ञानं सम्यग्ज्ञानं श्रुतेर्मतम्
203. 1.203तदात्मानात्मनोः सम्यग्विवेकेनैव सिध्यति & ततो विवेकः कर्तव्यः प्रत्यगात्मसदात्मनोः
204. 1.204जलं पङ्कवदत्यन्तं पङ्कापाये जलं स्फुटम् & यथा भाति तथात्मापि दोषाभावे स्फुटप्रभः
205. 1.205असन्निवृत्तौ तु सदात्मना स्फुटं प्रतीतिरेतस्य भवेत्प्रतीचः & ततो निरासः करणीय एव सदात्मनः साध्वहमादिवस्तुनः
206. 1.206अतो नायं परात्मा स्याद्विज्ञानमयशब्दभाक् & विकारित्वाज्जडत्वाच्च परिच्छिन्नत्वहेतुतः & दृश्यत्वाद्व्यभिचारित्वान्नानित्यो नित्य इष्यते
207. 1.207आनन्दप्रतिबिम्बचुम्बिततनुर्वृत्तिस्तमोजृम्भिता स्यादानन्दमयः प्रियादिगुणकः स्वेष्टार्थलाभोदयः & पुण्यस्यानुभवे विभाति कृतिनामानन्दरूपः स्वयं सर्वो नन्दति यत्र साधु तनुभृन्मात्रः प्रयत्नं विना
208. 1.208आनन्दमयकोशस्य सुषुप्तौ स्फूर्तिरुत्कटा & स्वप्नजागरयोरीषदिष्टसंदर्शनाविना
209. 1.209नैवायमानन्दमयः परात्मा सोपाधिकत्वात्प्रकृतेर्विकारात् & कार्यत्वहेतोः सुकृतक्रियाया विकारसङ्घातसमाहितत्वात्
210. 1.210पञ्चानाम् अपि कोशानां निषेधे युक्तितः श्रुतेः & तन्निषेधावधि साक्षी बोधरूपो ऽवशिष्यते
211. 1.211यो ऽयमात्मा स्वयंज्योतिः पञ्चकोशविलक्षणः & अवस्थात्रयसाक्षी सन्निर्विकारो निरञ्जनः \ सदानन्दः स विज्ञेयः स्वात्मत्वेन विपश्चिता
212. 1.212शिष्य उवाच मिथ्यात्वेन निषिद्धेषु कोशेष्वेतेषु पञ्चसु & सर्वाभावं विना किंचिन् न पश्याम्यत्र हे गुरो \ विज्ञेयं किमु वस्त्वस्ति स्वात्मनात्मविपश्चिता
213. 1.213श्रीगुरुरुवाच सत्यमुक्तं त्वया विदन्निपुणो ऽसि विचारणे & अहमादिविकारास्ते तदभावो ऽयमप्यनु
214. 1.214सर्वे येनानुभूयन्ते यः स्वयं नानुभूयते & तमात्मानं वेदितारं विद्दि बुद्ध्या सुसूक्ष्मया
215. 1.215तत्साक्षिकं भवेत्तत्तद्यद्यद्येनानुभूयते & कस्याप्यननुभूतार्थे साक्षित्वं नोपयुज्यते
216. 1.216असौ स्वसाक्षिको भावो यतः स्वेनानुभूयते & अतः परं स्वयं साक्षात्प्रत्यगात्मा न चेतरः
217. 1.217जाग्रत्स्वप्नसुषुप्तिषु स्फुटतरं यो ऽसौ समुज्जृम्भते प्रत्यग्रूपतया सदाहमहमित्यन्तः स्फुरन्नैकधा & नानाकारविकारभागिन इमान् पश्यन्नहंधीमुखान् नित्यानन्दचिद् आत्मना स्फुरति तं विद्धि स्वमेतं हृदि
218. 1.218घटोदके बिम्बितमर्कबिम्बम् आलोक्य मूढो रविम् एव मन्यते & तथा चिदाभासमुपाधिसंस्थं भ्रान्त्याहम् इत्य् एव जडो ऽभिमन्यते
219. 1.219घटं जलं तद्गतमर्कबिम्बं विहाय सर्वं विनिरीक्ष्यते ऽर्कः & तटस्थ एतत्त्रितयावभासकः स्वयंप्रकाशो विदुषा यथा तथा
220. 1.220देहं धियं चित्प्रतिबिम्बम् एवं विसृज्य बुद्धौ निहितं गुहायाम् & द्रष्टारमात्मानमखण्डबोधं सर्वप्रकाशं सदसद्विलक्षणम्
221. 1.221नित्यं विभुं सर्वगतं सुसूक्ष्मं अन्तर्बहिःशून्यमनन्यम् आत्मनः & विज्ञाय सम्यङ्निजरूपमेतत् पुमान् विपाप्मा विरजो विमृत्युः
222. 1.222विशोक आनन्दघनो विपश्चित् स्वयं कुतश्चिन् न बिभेति कश्चित् & नान्यो ऽस्ति पन्था भवबन्धमुक्तेः विना स्वतत्त्वावगमं मुमुक्षोः
223. 1.223ब्रह्माभिन्नत्वविज्ञानं भवमोक्षस्य कारणम् & येनाद्वितीयमानन्दं ब्रह्म सम्पद्यते बुधैः
224. 1.224ब्रह्मभूतस्तु संसृत्यै विद्वान्नावर्तते पुनः & विज्ञातव्यमतः सम्यग्ब्रह्माभिन्नत्वम् आत्मनः
225. 1.225सत्यं ज्ञानमनन्तं ब्रह्म विशुद्धं परं स्वतःसिद्धम् & नित्यानन्दैकरसं प्रत्यगभिन्नं निरन्तरं जयति
226. 1.226सदिदं परमाद्वैतं स्वस्मादन्यस्य वस्तुनो ऽभावात् & न ह्यन्यदस्ति किंचित् सम्यक् परमार्थतत्त्वबोधदशायाम्
227. 1.227यदिदं सकलं विश्वं नानारूपं प्रतीतमज्ञानात् & तत्सर्वं ब्रह्मैव प्रत्यस्ताशेषभावनादोषम्
228. 1.228मृत्कार्यभूतो ऽपि मृदो न भिन्नः कुम्भो ऽस्ति सर्वत्र तु मृत्स्वरूपात् & न कुम्भरूपं पृथगस्ति कुम्भः कुतो मृषा कल्पितनाममात्रः
229. 1.229केनापि मृद्भिन्नतया स्वरूपं घटस्य संदर्शयितुं न शक्यते & अतो घटः कल्पित एव मोहान् मृद् एव सत्यं परमार्थभूतम्
230. 1.230सद्ब्रह्मकार्यं सकलं सदेवं तन्मात्रमेतन् न ततो ऽन्यदस्ति & अस्तीति यो वक्ति न तस्य मोहो विनिर्गतो निद्रितवत्प्रजल्पः
231. 1.231ब्रह्मैवेदं विश्वम् इत्य् एव वाणी श्रौती ब्रूते ऽथर्वनिष्ठा वरिष्ठा & तस्मादेतद्ब्रह्ममात्रं हि विश्वं नाधिष्ठानाद्भिन्नतारोपितस्य
232. 1.232सत्यं यदि स्याज्जगदेतद् आत्मनो ऽनन्तत्त्वहानिर्निगमाप्रमाणता & असत्यवादित्वमपीशितुः स्यान् नैतत्त्रयं साधु हितं महात्मनाम्
233. 1.233ईश्वरो वस्तुतत्त्वज्ञो न चाहं तेष्ववस्थितः & न च मत्स्थानि भूतानीत्य् एवम् एव व्यचीकॢपत्
234. 1.234यदि सत्यं भवेद्विश्वं सुषुप्तामुपलभ्यताम् & यन्नोपलभ्यते किंचिद् अतो ऽसत्स्वप्नवन्मृषा
235. 1.235अतः पृथङ्नास्ति जगत्परात्मनः पृथक्प्रतीतिस्तु मृषा गुणादिवत् & आरोपितस्यास्ति किमर्थवत्ताद् धिष्ठानमाभाति तथा भ्रमेण
236. 1.236भ्रान्तस्य यद्य् अद्भ्रमतः प्रतीतं भ्रामैव तत्तद्रजतं हि शुक्तिः & इदंतया ब्रह्म सदैव रूप्यते त्वारोपितं ब्रह्मणि नाममात्रम्
237. 1.237अतः परं ब्रह्म सदद्वितीयं विशुद्धविज्ञानघनं निरञ्जनम् & प्राशान्तमाद्यन्तविहीनमक्रियं निरन्तरानन्दरसस्वरूपम्
238. 1.238निरस्तमायाकृतसर्वभेदं नित्यं सुखं निष्कलमप्रमेयम् & अरूपमव्यक्तमनाख्यमव्ययं ज्योतिः स्वयं किंचिद् इदं चकास्ति
239. 1.239ज्ञातृज्ञेयज्ञानशून्यमनन्तं निर्विकल्पकम् & केवलाखण्डचिन्मात्रं परं तत्त्वं विदुर्बुधाः
240. 1.240अहेयमनुपादेयं मनोवाचामगोचरम् & अप्रमेयमनाद्यन्तं ब्रह्म पूर्णमहं महः
241. 1.242तत्त्वंपदाभ्यामभिधीयमानयोः ब्रह्मात्मनोः शोधितयोर्यदीत्थम् & श्रुत्या तयोस्तत्त्वमसीति सम्यग् एकत्वम् एव प्रतिपाद्यते मुहुः ॥ २४१। ऐक्यं तयोर् लक्षितयोर् न वाच्ययोः निगद्यते ऽन्योन्यविरुद्धधर्मिणोः & खद्योतभान्वोर् इव राजभृत्ययोः कूपाम्बुराश्योः परमाणुमेर्वोः
242. 1.243तयोर् विरोधो ऽयमुपाधिकल्पितो न वास्तवः कश्चिदुपाधिरेषः & ईशस्य माया महदादिकारणं जीवस्य कार्यं शृणु पञ्चकोशम्
243. 1.244एतावुपाधी परजीवयोस्तयोः सम्यङ्निरासे न परो न जीवः & राज्यं नरेन्द्रस्य भटस्य खेटक् तयोर् अपोहे न भटो न राजा
244. 1.245अथात आदेश इति श्रुतिः स्वयं निषेधति ब्रह्मणि कल्पितं द्वयम् & श्रुतिप्रमाणानुगृहीतबोधात् तयोर् निरासः करणीय एव
245. 1.246नेदं नेदं कल्पितत्वान् न सत्यं रज्जुदृष्टव्यालवत्स्वप्नवच्च & इत्थं दृश्यं साधुयुक्त्या व्यपोह्य ज्ञेयः पश्चादेकभावस्तयोर् यः
246. 1.247ततस्तु तौ लक्षणया सुलक्ष्यौ तयोर् अखण्डैकरसत्वसिद्धये & नालं जहत्या न तथाजहत्या किन्तूभयार्थात्मिकयैव भाव्यम्
247. 1.248स देवदत्तो ऽयमितीह चैकता विरुद्धधर्मांशमपास्य कथ्यते & यथा तथा तत्त्वमसीतिवाक्ये विरुद्धधर्मानुभयत्र हित्वा
248. 1.249संलक्ष्य चिन्मात्रतया सदात्मनोः अखण्डभावः परिचीयते बुधैः & एवं महावाक्यशतेन कथ्यते ब्रह्मात्मनोर् ऐक्यमखण्डभावः
249. 1.250अस्थूलमित्येतदसन्निरस्य सिद्धं स्वतो व्योमवदप्रतर्क्यम् & अतो मृषामात्रमिदं प्रतीतं जहीहि यत्स्वात्मतया गृहीतम् \ ब्रह्माहम् इत्य् एव विशुद्धबुद्ध्या विद्धि स्वमात्मानमखण्डबोधम्
250. 1.251मृत्कार्यं सकलं घटादि सततं मृन्मात्रमेवाहितं तद्वत्सज्जनितं सदात्मकमिदं सन्मात्रमेवाखिलम् & यस्मान्नास्ति सतः परं किम् अपि तत्सत्यं स आत्मा स्वयं तस्मात्तत्त्वमसि प्रशान्तममलं ब्रह्माद्वयं यत्परम्
251. 1.252निद्राकल्पितदेशकालविषयज्ञात्रादि सर्वं यथा मिथ्या तद्वदिहापि जाग्रति जगत्स्वाज्ञानकार्यत्वतः & यस्माद् एवमिदं शरीरकरणप्राणाहमाद्यप्यसत् तस्मात्तत्त्वमसि प्रशान्तममलं ब्रह्माद्वयं यत्परम्
252. 1.253यत्र भ्रान्त्या कल्पित तद्विवेके तत्तन्मात्रं नैव तस्माद्विभिन्नम् & स्वप्ने नष्टं स्वप्नविश्वं विचित्रं स्वस्माद्भिन्नं किन्नु दृष्टं प्रबोधे
253. 1.254जातिनीतिकुलगोत्रदूरगं नामरूपगुणदोषवर्जितम् & देशकालविषयातिवर्ति यद् ब्रह्म तत्त्वमसि भावयात्मनि
254. 1.255यत्परं सकलवागगोचरं गोचरं विमलबोधचक्षुषः & शुद्धचिद्घनमनादि वस्तु यद् ब्रह्म तत्त्वमसि भावयात्मनि
255. 1.256षड्भिरूर्मिभिरयोगि योगिहृद्- भावितं न करणैर् विभावितम् & बुद्ध्यवेद्यमनवद्यमस्ति यद् ब्रह्म तत्त्वमसि भावयात्मनि
256. 1.257भ्रान्तिकल्पितजगत्कलाश्रयं स्वाश्रयं च सदसद्विलक्षणम् & निष्कलं निरुपमानवद्धि यद् ब्रह्म तत्त्वमसि भावयात्मनि
257. 1.258जन्मवृद्धिपरिणत्यपक्षय- व्याधिनाशनविहीनमव्ययम् & विश्वसृष्ट्यवविघातकारणं ब्रह्म तत्त्वमसि भावयात्मनि
258. 1.259अस्तभेदमनपास्तलक्षणं निस्तरङ्गजलराशिनिश्चलम् & नित्यमुक्तमविभक्तमूर्ति यद् ब्रह्म तत्त्वमसि भावयात्मनि
259. 1.260एकम् एव सदनेककारणं कारणान्तरनिरास्यकारणम् & कार्यकारणविलक्षणं स्वयं ब्रह्म तत्त्वमसि भावयात्मनि
260. 1.261निर्विकल्पकमनल्पमक्षरं यत्क्षराक्षरविलक्षणं परम् & नित्यमव्ययसुखं निरञ्जनं ब्रह्म तत्त्वमसि भावयात्मनि
261. 1.262यद्विभाति सदनेकधा भ्रमान् नामरूपगुणविक्रियात्मना & हेमवत्स्वयमविक्रियं सदा ब्रह्म तत्त्वमसि भावयात्मनि
262. 1.263यच्चकास्त्यनपरं परात्परं प्रत्यगेकरसम् आत्मलक्षणम् & सत्यचित्सुखमनन्तमव्ययं ब्रह्म तत्त्वमसि भावयात्मनि
263. 1.264उक्तमर्थमिमम् आत्मनि स्वयं भावयेत्प्रथितयुक्तिभिर्धिया & संशयादिरहितं कराम्बुवत् तेन तत्त्वनिगमो भविष्यति
264. 1.265संबोधमात्रं परिशुद्धतत्त्वं विज्ञाय सङ्घे नृपवच्च सैन्ये & तदाश्रयः स्वात्मनि सर्वदा स्थितो विलापय ब्रह्मणि विश्वजातम्
265. 1.266बुद्धौ गुहायां सदसद्विलक्षणं ब्रह्मास्ति सत्यं परमद्वितीयम् & तद् आत्मना यो ऽत्र वसेद्गुहायां पुनर्न तस्याङ्गगुहाप्रवेशः
266. 1.267ज्ञाते वस्तुन्य् अपि बलवती वासनानादिरेषा कर्ता भोक्ताप्यहमिति दृढा यास्य संसारहेतुः & प्रत्यग्दृष्ट्यात्मनि निवसता सापनेया प्रयत्नान् मुक्तिं प्राहुस्तदिह मुनयो वासनातानवं यत्
267. 1.268अहं ममेति यो भावो देहाक्षादावनात्मनि & अध्यासो ऽयं निरस्तव्यो विदुषा स्वात्मनिष्ठया
268. 1.269ज्ञात्वा स्वं प्रत्यगात्मानं बुद्धितद्वृत्तिसाक्षिणम् & सो ऽहम् इत्य् एव सद्वृत्त्यानात्मन्यात्ममतिं जहि
269. 1.270लोकानुवर्तनं त्यक्त्वा त्यक्त्वा देहानुवर्तनम् & शास्त्रानुवर्तनं त्यक्त्वा स्वाध्यासापनयं कुरु
270. 1.271लोकवासनया जन्तोः शास्त्रवासनयापि च & देहवासनया ज्ञानं यथावन्नैव जायते
271. 1.272संसारकारागृहमोक्षमिच्छोर् अयोमयं पादनिबन्धशृङ्खलम् & वदन्ति तज्ज्ञाः पटु वासनात्रयं यो ऽस्माद्विमुक्तः समुपैति मुक्तिम्
272. 1.273जलादिसंसर्गवशात्प्रभूत- दुर्गन्धधूतागरुदिव्यवासना & संघर्षणेनैव विभाति सम्यग्- विधूयमाने सति बाह्यगन्धे
273. 1.274अन्तःश्रितानन्तदूरन्तवासना- धूलीविलिप्ता परम् आत्मवासना & प्रज्ञातिसंघर्षणतो विशुद्धा प्रतीयते चन्दनगन्धवत् स्फुटम्
274. 1.275अनात्मवासनाजालैस्तिरोभूतात्मवासना & नित्यात्मनिष्ठया तेषां नाशे भाति स्वयं स्फुटम्
275. 1.276यथा यथा प्रत्यगवस्थितं मनः तथा तथा मुञ्चति बाह्यवासनाम् & निःशेषमोक्षे सति वासनानां आत्मानुभूतिः प्रतिबन्धशून्या
276. 1.277स्वात्मन्य् एव सदा स्थित्वा मनो नश्यति योगिनः & वासनानां क्षयश्चातः स्वाध्यासापनयं कुरु
277. 1.278तमो द्वाभ्यां रजः सत्त्वात्सत्त्वं शुद्धेन नश्यति & तस्मात्सत्त्वमवष्टभ्य स्वाध्यासापनयं कुरु
278. 1.279प्रारब्धं पुष्यति वपुरिति निश्चित्य निश्चलः & धैर्यमालम्ब्य यत्नेन स्वाध्यासापनयं कुरु
279. 1.280नाहं जीवः परं ब्रह्मेत्यतद्व्यावृत्तिपूर्वकम् & वासनावेगतः प्राप्तस्वाध्यासापनयं कुरु
280. 1.281श्रुत्या युक्त्या स्वानुभूत्या ज्ञात्वा सार्वात्म्यम् आत्मनः & क्वचिदाभासतः प्राप्तस्वाध्यासापनयं कुरु
281. 1.282अनादानविसर्गाभ्यामीषन्नास्ति क्रिया मुनेः & तदेकनिष्ठया नित्यं स्वाध्यासापनयं कुरु
282. 1.283तत्त्वमस्यादिवाक्योत्थब्रह्मात्मैकत्वबोधतः & ब्रह्मण्य् आत्मत्वदार्ढ्याय स्वाध्यासापनयं कुरु
283. 1.284अहंभावस्य देहे ऽस्मिन्निःशेषविलयावधि & सावधानेन युक्तात्मा स्वाध्यासापनयं कुरु
284. 1.285प्रतीतिर्जीवजगतोः स्वप्नवद्भाति यावता & तावन्निरन्तरं विद्वन्स्वाध्यासापनयं कुरु
285. 1.286निद्राया लोकवार्तायाः शब्दादेर् अपि विस्मृतेः & क्वचिन्नावसरं दत्त्वा चिन्तयात्मानम् आत्मनि
286. 1.287मातापित्रोर् मलोद्भूतं मलमांसमयं वपुः & त्यक्त्वा चाण्डालवद्दूरं ब्रह्मीभूय कृती भव
287. 1.288घटाकाशं महाकाश इवात्मानं परात्मनि & विलाप्याखण्डभावेन तूष्णी भव सदा मुने
288. 1.289स्वप्रकाशमधिष्ठानं स्वयंभूय सदात्मना & ब्रह्माण्डम् अपि पिण्डाण्डं त्यज्यतां मलभाण्डवत्
289. 1.290चिदात्मनि सदानन्दे देहारूढामहंधियम् & निवेश्य लिङ्गमुत्सृज्य केवलो भव सर्वदा
290. 1.291यत्रैष जगदाभासो दर्पणान्तः पुरं यथा & तद्ब्रह्माहमिति ज्ञात्वा कृतकृत्यो भविष्यसि
291. 1.292यत्सत्यभूतं निजरूपमाद्यं चिदद्वयानन्दमरूपमक्रियम् & तदेत्य मिथ्यावपुरुत्सृजेत शैलूषवद्वेषमुपात्तमात्मनः
292. 1.293सर्वात्मना दृश्यमिदं मृषैव नैवाहमर्थः क्षणिकत्वदर्शनात् & जानाम्यहं सर्वमिति प्रतीतिः कुतो ऽहम् आदेः क्षणिकस्य सिध्येत्
293. 1.294अहंपदार्थस्त्वहमादिसाक्षी नित्यं सुषुप्ताव् अपि भावदर्शनात् & ब्रूते ह्यजो नित्य इति श्रुतिः स्वयं तत्प्रत्यगात्मा सदसद्विलक्षणः
294. 1.295विकारिणां सर्वविकारवेत्ता नित्याविकारो भवितुं समर्हति & मनोरथस्वप्नसुषुप्तिषु स्फुटं पुनः पुनर्दृष्टमसत्त्वमेतयोः
295. 1.296अतो ऽभिमानं त्यज मांसपिण्डे पिण्डाभिमानिन्य् अपि बुद्धिकल्पिते & कालत्रयाबाध्यमखण्डबोधं ज्ञात्वा स्वमात्मानमुपैहि शान्तिम्
296. 1.297त्यजाभिमानं कुलगोत्रनाम- रूपाश्रमेष्वार्द्रशवाश्रितेषु & लिङ्गस्य धर्मान् अपि कर्तृतादिंस् त्यक्ता भवाखण्डसुखस्वरूपः
297. 1.298सन्त्यन्ये प्रतिबन्धाः पुंसः संसारहेतवो दृष्टाः & तेषाम् एवं मूलं प्रथमविकारो भवत्यहंकारः
298. 1.299यावत्स्यात्स्वस्य संबन्धो ऽहंकारेण दुरात्मना & तावन् न लेशमात्रापि मुक्तिवार्ता विलक्षणा
299. 1.300अहंकारग्रहान्मुक्तः स्वरूपमुपपद्यते & चन्द्रवद्विमलः पूर्णः सदानन्दः स्वयंप्रभः
300. 1.301यो वा पुरे सो ऽहम् इति प्रतीतो बुद्ध्या प्रकॢप्तस्तमसातिमूढया & तस्यैव निःशेषतया विनाशे ब्रह्मात्मभावः प्रतिबन्धशून्यः
301. 1.302ब्रह्मानन्दनिधिर्महाबलवताहंकारघोराहिना संवेष्ट्य् आत्मनि रक्ष्यते गुणमयैश्चण्डेस्त्रिभिर्मस्तकैः & विज्ञानाख्यमहासिना श्रुतिमता विच्छिद्य शीर्षत्रयं निर्मूल्याहिमिमं निधिं सुखकरं धीरो ऽनुभोक्तुंक्षमः
302. 1.303यावद्वा यत् किंचिद् विषदोषस्फूर्तिरस्ति चेद्देहे & कथम् आरोग्याय भवेत्तद्वदहन्तापि योगिनो मुक्त्यै
303. 1.304अहमो ऽत्यन्तनिवृत्त्या तत्कृतनानाविकल्पसंहृत्या & प्रत्यक्तत्त्वविवेकादिदमहमस्मीति विन्दते तत्त्वम्
304. 1.305अहंकारे कर्तर्यहमिति मतिं मुञ्च सहसा विकारात्मन्य् आत्मप्रतिफलजुषि स्वस्थितिमुषि & यदध्यासात्प्राप्ता जनिमृतिजरादुःखबहुला प्रतीचश्चिन्मूर्तेस्तव सुखतनोः संसृतिरियम्
305. 1.306सदैकरूपस्य चिदात्मनो विभोर् आनन्दमूर्तेरनवद्यकीर्तेः & नैवान्यथा क्वाप्यविकारिणस्ते विनाहमध्यासममुष्य संसृतिः
306. 1.307तस्मादहंकारमिमं स्वशत्रुं भोक्तुर्गले कण्टकवत्प्रतीतम् & विच्छिद्य विज्ञानमहासिना स्फुटं भुङ्क्ष्वात्मसाम्राज्यसुखं यथेष्टम्
307. 1.308ततो ऽहम् आदेर्विनिवर्त्य वृत्तिं संत्यक्तरागः परमार्थलाभात् & तूष्णीं समास्स्वात्मसुखानुभूत्या पूर्णात्मना ब्रह्मणि निर्विकल्पः
308. 1.309समूलकृत्तो ऽपि महानहं पुनः व्युल्लेखितः स्याद्यदि चेतसा क्षणम् & संजीव्य विक्षेपशतं करोति नभस्वता प्रावृषि वारिदो यथा
309. 1.310निगृह्य शत्रोरहमो ऽवकाशः क्वचिन् न देयो विषयानुचिन्तया & स एव संजीवनहेतुरस्य प्रक्षीणजम्बीरतरोर् इवाम्बु
310. 1.311देहात्मना संस्थित एव कामी विलक्षणः कामयिता कथं स्यात् & अतो ऽर्थसन्धानपरत्वम् एव भेदप्रसक्त्या भवबन्धहेतुः
311. 1.312कार्यप्रवर्धनाद्बीजप्रवृद्धिः परिदृश्यते & कार्यनाशाद्बीजनाशस्तस्मात्कार्यं निरोधयेत्
312. 1.313वासनावृद्धितः कार्यं कार्यवृद्ध्या च वासना & वर्धते सर्वथा पुंसः संसारो न निवर्तते
313. 1.314संसारबन्धविच्छित्त्यै तद् द्वयं प्रदहेद्यतिः & वासनावृद्धिरेताभ्यां चिन्तया क्रियया बहिः
314. 1.315ताभ्यां प्रवर्धमाना सा सूते संसृतिम् आत्मनः & त्रयाणां च क्षयोपायः सर्वावस्थासु सर्वदा
315. 1.316सर्वत्र सर्वतः सर्वब्रह्ममात्रावलोकनैः & सद्भाववासनादार्ढ्यात्तत्त्रयं लयमश्नुते
316. 1.317क्रियानाशे भवेच्चिन्तानाशो ऽस्माद्वासनाक्षयः & वासनाप्रक्षयो मोक्षः सा जीवन्मुक्तिरिष्यते
317. 1.318सद्वासनास्फूर्तिविजृम्भणे सति ह्यसौ विलीनाप्यहमादिवासना & अतिप्रकृष्टाप्यरुणप्रभायां विलीयते साधु यथा तमिस्रा
318. 1.319तमस्तमःकार्यमनर्थजालं न दृश्यते सत्युदिते दिनेशे & तथाद्वयानन्दरसानुभूतौ न वास्ति बन्धो न च दुःखगन्धः
319. 1.320दृश्यं प्रतीतं प्रविलापयन्सन् सन्मात्रमानन्दघनं विभावयन् & समाहितः सन्बहिरन्तरं वा कालं नयेथाः सति कर्मबन्धे
320. 1.321प्रमादो ब्रह्मनिष्ठायां न कर्तव्यः कदाचन & प्रमादो मृत्युरित्याह भगवान्ब्रह्मणः सुतः
321. 1.322न प्रमादादनर्थो ऽन्यो ज्ञानिनः स्वस्वरूपतः & ततो मोहस्ततो ऽहंधीस्ततो बन्धस्ततो व्यथा
322. 1.323विषयाभिमुखं दृष्ट्वा विद्वांसम् अपि विस्मृतिः & विक्षेपयति धीदोषैर् योषा जारम् इव प्रियम्
323. 1.324यथापकृष्टं शैवालं क्षणमात्रं न तिष्ठति & आवृणोति तथा माया प्राज्ञं वापि पराङ्मुखम्
324. 1.325लक्ष्यच्युतं चेद्यदि चित्तमीषद् बहिर्मुखं सन्निपतेत्ततस्ततः & प्रमादतः प्रच्युतकेलिकन्दुकः सोपानपङ्क्तौ पतितो यथा तथा
325. 1.326विषयेष्वाविशच्चेतः संकल्पयति तद्गुणान् & सम्यक्संकल्पनात्कामः कामात्पुंसः प्रवर्तनम्
326. 1.327अतः प्रमादान् न परो ऽस्ति मृत्युः विवेकिनो ब्रह्मविदः समाधौ & समाहितः सिद्धिमुपैति सम्यक् समाहितात्मा भव सावधानः
327. 1.328ततः स्वरूपविभ्रंशो विभ्रष्टस्तु पतत्यधः & पतितस्य विना नाशं पुनर्नारोह ईक्ष्यते
328. 1.329संकल्पं वर्जयेत्तस्मात्सर्वानर्थस्य कारणम् & जीवतो यस्य कैवल्यं विदेहे स च केवलः \ यत् किंचित् पश्यतो भेदं भयं ब्रूते यजुःश्रुतिः
329. 1.330यदा कदा वापि विपश्चिदेष ब्रह्मण्य् अनन्ते ऽप्य् अणुमात्रभेदम् & पश्यत्यथामुष्य भयं तदैव यद्वीक्षितं भिन्नतया प्रमादात्
330. 1.331श्रुतिस्मृतिन्यायशतैर् निषिद्धे दृश्ये ऽत्र यः स्वात्ममतिं करोति & उपैति दुःखोपरि दुःखजातं निषिद्धकर्ता स मलिम्लुचो यथा
331. 1.332सत्याभिसंधानरतो विमुक्तो महत्त्वमात्मीयमुपैति नित्यम् & मिथ्याभिसन्धानरतस्तु नश्येद् दृष्टं तदेतद्यदचौरचौरयोः
332. 1.333यतिरसदनुसन्धिं बन्धहेतुं विहाय स्वयमयमहमस्मीत्य् आत्मदृष्ट्यैव तिष्ठेत् & सुखयति ननु निष्ठा ब्रह्मणि स्वानुभूत्या हरति परमविद्याकार्यदुःखं प्रतीतम्
333. 1.334बाह्यानुसन्धिः परिवर्धयेत्फलं दुर्वासनाम् एव ततस्ततो ऽधिकाम् & ज्ञात्वा विवेकैः परिहृत्य बाह्यं स्वात्मानुसन्धिं विदधीत नित्यम्
334. 1.335बाह्ये निरुद्धे मनसः प्रसन्नता मनःप्रसादे परमात्मदर्शनम् & तस्मिन्सुदृष्टे भवबन्धनाशो बहिर्निरोधः पदवी विमुक्तेः
335. 1.336कः पण्डितः सन्सदसद्विवेकी श्रुतिप्रमाणः परमार्थदर्शी & जानन्हि कुर्यादसतो ऽवलम्बं स्वपातहेतोः शिशुवन्मुमुक्षुः
336. 1.337देहादिसंसक्तिमतो न मुक्तिः मुक्तस्य देहाद्यभिमत्यभावः & सुप्तस्य नो जागरणं न जाग्रतः स्वप्नस्तयोर् भिन्नगुणाश्रयत्वात्
337. 1.338अन्तर्बहिः स्वं स्थिरजङ्गमेषु ज्ञात्वात्मनाधारतया विलोक्य & त्यक्ताखिलोपाधिरखण्डरूपः पूर्णात्मना यः स्थित एष मुक्तः
338. 1.339सर्वात्मना बन्धविमुक्तिहेतुः सर्वात्मभावान् न परो ऽस्ति कश्चित् & दृश्याग्रहे सत्युपपद्यते ऽसौ सर्वात्मभावो ऽस्य सदात्मनिष्ठया
339. 1.340दृश्यस्याग्रहणं कथं नु घटते देहात्मना तिष्ठतो बाह्यार्थानुभवप्रसक्तमनसस्तत्तत्क्रियां कुर्वतः & संन्यस्ताखिल-धर्म-कर्म-विषयैर् नित्यात्मनिष्ठापरैः तत्त्वज्ञैः करणीयम् आत्मनि सदानन्देच्छुभिर्यत्नतः
340. 1.341सर्वात्मसिद्धये भिक्षोः कृतश्रवणकर्मणः & समाधिं विदधात्येषा शान्तो दान्त इति श्रुतिः
341. 1.342आरूढशक्तेरहमो विनाशः कर्तुन् न शक्य सहसापि पण्डितैः & ये निर्विकल्पाख्यसमाधिनिश्चलाः तानन्तरानन्तभवा हि वासनाः
342. 1.343अहंबुद्ध्यैव मोहिन्या योजयित्वावृतेर्बलात् & विक्षेपशक्तिः पुरुषं विक्षेपयति तद्गुणैः
343. 1.344विक्षेपशक्तिविजयो विषमो विधातुं निःशेषमावरणशक्तिनिवृत्त्यभावे & दृग्दृश्ययोः स्फुटपयोजलवद्विभागे नश्येत्तदावरणम् आत्मनि च स्वभावात् \ निःसंशयेन भवति प्रतिबन्धशून्यो विक्षेपणं नहिं तदा यदि चेन्मृषार्थे
344. 1.345सम्यग्विवेकः स्फुटबोधजन्यो विभज्य दृग्दृश्यपदार्थतत्त्वम् & छिनत्ति मायाकृतमोहबन्धं यस्माद्विमुक्तस्तु पुनर्न संसृतिः
345. 1.346परावरैकत्वविवेकवन्हिः दहत्यविद्यागहनं ह्यशेषम् & किं स्यात्पुनः संसरणस्य बीजं अद्वैतभावं समुपेयुषो ऽस्य
346. 1.347आवरणस्य निवृत्तिर्भवति हि सम्यक्पदार्थदर्शनतः & मिथ्याज्ञानविनाशस्तद्विक्षेपजनितदुःखनिवृत्तिः
347. 1.348एतत्त्रितयं दृष्टं सम्यग्रज्जुस्वरूपविज्ञानात् & तस्माद्वस्तुसतत्त्वं ज्ञातव्यं बन्धमुक्तये विदुषा
348. 1.349अयो ऽग्नियोगाद् इव सत्समन्वयान् मात्रादिरूपेण विजृम्भते धीः & तत्कार्यमेतद्द्वितयं यतो मृषा दृष्टं भ्रमस्वप्नमनोरथेषु
349. 1.350ततो विकाराः प्रकृतेरहंमुखा देहावसाना विषयाश्च सर्वे & क्षणे ऽन्यथाभावितया ह्यमीषाम् असत्त्वमात्मा तु कदापि नान्यथा
350. 1.351नित्याद्वयाखण्डचिदेकरूपो बुद्ध्यादिसाक्षी सदसद्विलक्षणः & अहंपदप्रत्ययलक्षितार्थः प्रत्यक् सदानन्दघनः परात्मा
351. 1.352इत्थं विपश्चित्सदसद्विभज्य निश्चित्य तत्त्वं निजबोधदृष्ट्या & ज्ञात्वा स्वमात्मानमखण्डबोधं तेभ्यो विमुक्तः स्वयम् एव शाम्यति
352. 1.353अज्ञानहृदयग्रन्थेर्निःशेषविलयस्तदा & समाधिनाविकल्पेन यदाद्वैतात्मदर्शनम्
353. 1.354त्वमहमिदमितीयं कल्पना बुद्धिदोषात् प्रभवति परमात्मन्यद्वये निर्विशेषे & प्रविलसति समाधावस्य सर्वो विकल्पो विलयनमुपगच्छेद्वस्तुतत्त्वावधृत्या
354. 1.355शान्तो दान्तः परमुपरतः क्षान्तियुक्तः समाधिं कुर्वन्नित्यं कलयति यतिः स्वस्य सर्वात्मभावम् & तेनाविद्यातिमिरजनितान्साधु दग्ध्वा विकल्पान् ब्रह्माकृत्या निवसति सुखं निष्क्रियो निर्विकल्पः
355. 1.356समाहिता ये प्रविलाप्य बाह्यं श्रोत्रादि चेतः स्वमहं चिदात्मनि & त एव मुक्ता भवपाशबन्धैः नान्ये तु पारोक्ष्यकथाभिधायिनः
356. 1.357उपाधिभेदात्स्वयम् एव भिद्यते चोपाध्यपोहे स्वयम् एव केवलः & तस्मादुपाधेर्विलयाय विद्वान् वसेत्सदाकल्पसमाधिनिष्ठया
357. 1.358सति सक्तो नरो याति सद्भावं ह्येकनिष्ठया & कीटको भ्रमरं ध्यायन् भ्रमरत्वाय कल्पते
358. 1.359क्रियान्तरासक्तिमपास्य कीटको ध्यायन्नलित्वं ह्यलिभावमृच्छति & तथैव योगी परमात्मतत्त्वं ध्यात्वा समायाति तदेकनिष्ठया
359. 1.360अतीव सूक्ष्मं परमात्मतत्त्वं न स्थूलदृष्ट्या प्रतिपत्तुमर्हति & समाधिनात्यन्तसुसूक्ष्मवृत्या ज्ञातव्यमार्यैर् अतिशुद्धबुद्धिभिः
360. 1.361यथा सुवर्णं पुटपाकशोधितं त्यक्त्वा मलं स्वात्मगुणं समृच्छति & तथा मनः सत्त्वरजस्तमोमलं ध्यानेन सन्त्यज्य समेति तत्त्वम्
361. 1.362निरन्तराभ्यासवशात्तदित्थं पक्वं मनो ब्रह्मणि लीयते यदा & तदा समाधिः सविकल्पवर्जितः स्वतो ऽद्वयानन्दरसानुभावकः
362. 1.363समाधिनानेन समस्तवासना- ग्रन्थेर्विनाशो ऽखिलकर्मनाशः & अन्तर्बहिः सर्वत एव सर्वदा स्वरूपविस्फूर्तिरयत्नतः स्यात्
363. 1.364श्रुतेः शतगुणं विद्यान्मननं मननाद् अपि & निदिंध्यासं लक्षगुणमनन्तं निर्विकल्पकम्
364. 1.365निर्विकल्पकसमाधिना स्फुटं ब्रह्मतत्त्वमवगम्यते ध्रुवम् & नान्यथा चलतया मनोगतेः प्रत्ययान्तरविमिश्रितं भवेत्
365. 1.366अतः समाधत्स्व यतेन्द्रियः सन् निरन्तरं शान्तमनाः प्रतीचि & विध्वंसय ध्वान्तमनाद्यविद्यया कृतं सदेकत्वविलोकनेन
366. 1.367योगस्य प्रथमद्वारं वाङ्निरोधो ऽपरिग्रहः & निराशा च निरीहा च नित्यमेकान्तशीलता
367. 1.368एकान्तस्थितिरिन्द्रियोपरमणे हेनुर्दमश्चेतसः संरोधे करणं शमेन विलयं यायादहंवासना & तेनानन्दरसानुभूतिरचला ब्राह्मी सदा योगिनः तस्माच्चित्तनिरोध एव सततं कार्यः प्रयत्नो मुनेः
368. 1.369वाचं नियच्छात्मनि तं नियच्छ बुद्धौ धियं यच्छ च बुद्धिसाक्षिणि & तं चापि पूर्णात्मनि निर्विकल्पे विलाप्य शान्तिं परमां भजस्व
369. 1.370देहप्राणेन्द्रियमनोबुद्ध्यादिभिरुपाधिभिः & यैर् यैर् वृत्तेःसमायोगस्ततद्भावो ऽस्य योगिनः
370. 1.371तन्निवृत्त्या मुनेः सम्यक् सर्वोपरमणं सुखम् & संदृश्यते सदानन्दरसानुभवविप्लवः
371. 1.372अन्तस्त्यागो बहिस्त्यागो विरक्तस्यैव युज्यते & त्यजत्यन्तर्बहिःसङ्गं विरक्तस्तु मुमुक्षया
372. 1.373बहिस्तु विषयैः सङ्गं तथान्तरहमादिभिः & विरक्त एव शक्नोति त्यक्तुं ब्रह्मणि निष्ठितः
373. 1.374वैराग्यबोधौ पुरुषस्य पक्षिवत् पक्षौ विजानीहि विचक्षण त्वम् & विमुक्तिसौधाग्रलताधिरोहणं ताभ्यां विना नान्यतरेण सिध्यति
374. 1.375अत्यन्तवैराग्यवतः समाधिः समाहितस्यैव दृढप्रबोधः & प्रबुद्धतत्त्वस्य हि बन्धमुक्तिः मुक्तात्मनो नित्यसुखानुभूतिः
375. 1.376वैराग्यान् न परं सुखस्य जनकं पश्यामि वश्यात्मनः तच्चेच्छुद्धतरात्मबोधसहितं स्वाराज्यसाम्राज्यधुक् & एतद्द्वारमजस्रमुक्तियुवतेर्यस्मात्त्वमस्मात्परं सर्वत्रास्पृहया सदात्मनि सदा प्रज्ञां कुरु श्रेयसे
376. 1.377आशां छिन्द्धि विषोपमेषु विषयेष्वेषैव मृत्योः कृतिस् त्यक्त्वा जातिकुलाश्रमेष्वभिमतिं मुञ्चातिदूरात्क्रियाः & देहादावसति त्यजात्मधिषणां प्रज्ञां कुरुष्वात्मनि त्वं द्रष्टास्यमनो ऽसि निर्द्वयपरं ब्रह्मासि यद्वस्तुतः
377. 1.378लक्ष्ये ब्रह्मणि मानसं दृढतरं संस्थाप्य बाह्येन्द्रियं स्वस्थाने विनिवेश्य निश्चलतनुश्चोपेक्ष्य देहस्थितिम् & ब्रह्मात्मैक्यमुपेत्य तन्मयतया चाखण्डवृत्त्यानिशं ब्रह्मानन्दरसं पिबात्मनि मुदा शून्यैः किमन्यैर् भृशम्
378. 1.379अनात्मचिन्तनं त्यक्त्वा कश्मलं दुःखकारणम् & चिन्तयात्मानमानन्दरूपं यन्मुक्तिकारणम्
379. 1.380एष स्वयंज्योतिरशेषसाक्षी विज्ञानकोशो विलसत्यजस्रम् & लक्ष्यं विधायैनमसद्विलक्षणम् अखण्डवृत्त्यात्मतयानुभावय
380. 1.381एतमच्छीन्नया वृत्त्या प्रत्ययान्तरशून्यया & उल्लेखयन्विजानीयात्स्वस्वरूपतया स्फुटम्
381. 1.382अत्रात्मत्वं दृढीकुर्वन्नहमादिषु संत्यजन् & उदासीनतया तेषु तिष्ठेत्स्फुटघटादिवत्
382. 1.383विशुद्धमन्तःकरणं स्वरूपे निवेश्य साक्षिण्य् अवबोधमात्रे & शनैः शनैर् निश्चलतामुपानयन् पूर्णं स्वमेवानुविलोकयेत्ततः
383. 1.384देहेन्द्रियप्राणमनो ऽहम् आदिभिः स्वाज्ञानकॢप्तैर् अखिलैर् उपाधिभिः & विमुक्तमात्मानमखण्डरूपं पूर्णं महाकाशमिवावलोकयेत्
384. 1.385घटकलशकुसूलसूचिमुख्यैः गगनमुपाधिशतैर् विमुक्तमेकम् & भवति न विविधं तथैव शुद्धं परमहमादिविमुक्तमेकम् एव
385. 1.386ब्रह्मादिस्तम्बपर्यन्ता मृषामात्रा उपाधयः & ततः पूर्णं स्वमात्मानं पश्येदेकात्मना स्थितम्
386. 1.387यत्र भ्रान्त्या कल्पितं तद्विवेके तत्तन्मात्रं नैव तस्माद्विभिन्नम् & भ्रान्तेर्नाशे भाति दृष्टाहितत्त्वं रज्जुस्तद्वद्विश्वम् आत्मस्वरूपम्
387. 1.388स्वयं ब्रह्मा स्वयं विष्णुः स्वयमिन्द्रः स्वयं शिवः & स्वयं विश्वमिदं सर्वं स्वस्मादन्यन् न किंचन
388. 1.389अन्तः स्वयं चापि बहिः स्वयं च स्वयं पुरस्तात् स्वयम् एव पश्चात् & स्वयं ह्यावाच्यां स्वयमप्युदीच्यां तथोपरिष्टात्स्वयमप्यधस्तात्
389. 1.390तरङ्गफेनभ्रमबुद्बुदादि सर्वं स्वरूपेण जलं यथा तथा & चिद् एव देहाद्यहमन्तमेतत् सर्वं चिद् एवैकरसं विशुद्धम्
390. 1.391सदेवेदं सर्वं जगदवगतं वाङ्मनसयोः सतो ऽन्यन्नास्त्य् एव प्रकृतिपरसीम्नि स्थितवतः & पृथक् किं मृत्स्नायाः कलशघटकुम्भाद्यवगतं वदत्येष भ्रान्तस्त्वमहमिति मायामदिरया
391. 1.392क्रियासमभिहारेण यत्र नान्यदिति श्रुतिः & ब्रवीति द्वैतराहित्यं मिथ्याध्यासनिवृत्तये
392. 1.393आकाशवन्निर्मलनिर्विकल्पं निःसीमनिःस्पन्दननिर्विकारम् & अन्तर्बहिःशून्यमनन्यमद्वयं स्वयं परं ब्रह्म किमस्ति बोध्यम्
393. 1.394वक्तव्यं किमु विद्यते ऽत्र बहुधा ब्रह्मैव जीवः स्वयं ब्रह्मैतज्जगदाततं नु सकलं ब्रह्माद्वितीयं श्रुतिः & ब्रह्मैवाहमिति प्रबुद्धमतयः संत्यक्तबाह्याः स्फुटं ब्रह्मीभूय वसन्ति सन्ततचिदानन्दात्मनैतद्ध्रुवम्
394. 1.395जहि मलमयकोशे ऽहंधियोत्थापिताशां प्रसभमनिलकल्पे लिङ्गदेहे ऽपि पश्चात् & निगमगदितकीर्तिं नित्यमानन्दमूर्तिं स्वयमिति परिचीय ब्रह्मरूपेण तिष्ठ
395. 1.396शवाकारं यावद्भजति मनुजस्तावदशुचिः परेभ्यः स्यात्क्लेशो जननमरणव्याधिनिलयः & यदात्मानं शुद्धं कलयति शिवाकारमचलम् तदा तेभ्यो मुक्तो भवति हि तदाह श्रुतिर् अपि
396. 1.397स्वात्मन्यारोपिताशेषाभासर्वस्तुनिरासतः & स्वयम् एव परं ब्रह्म पूर्णमद्वयमक्रियम्
397. 1.398समाहितायां सति चित्तवृत्तौ परात्मनि ब्रह्मणि निर्विकल्पे & न दृश्यते कश्चिदयं विकल्पः प्रजल्पमात्रः परिशिष्यते यतः
398. 1.399असत्कल्पो विकल्पो ऽयं विश्वमित्येकवस्तुनि & निर्विकारे निराकारे निर्विशेषे भिदा कुतः
399. 1.400द्रष्टुदर्शनदृश्यादिभावशून्यैकवस्तुनि & निर्विकारे निराकारे निर्विशेषे भिदा कुतः
400. 1.401कल्पार्णव इवात्यन्तपरिपूर्णैकवस्तुनि & निर्विकारे निराकारे निर्विशेषे भिदा कुतः
401. 1.402तेजसीव तमो यत्र प्रलीनं भ्रान्तिकारणम् & अद्वितीये परे तत्त्वे निर्विशेषे भिदा कुतः
402. 1.403एकात्मके परे तत्त्वे भेदवार्ता कथं वसेत् & सुषुप्तौ सुखमात्रायां भेदः केनावलोकितः
403. 1.404न ह्यस्ति विश्वं परतत्त्वबोधात् सदात्मनि ब्रह्मणि निर्विकल्पे & कालत्रये नाप्यहिरीक्षितो गुणे न ह्यम्बुबिन्दुर्मृगतृष्णिकायाम्
404. 1.405मायामात्रमिदं द्वैतमद्वैतं परमार्थतः & इति ब्रूते श्रुतिः साक्षात्सुषुप्तावनुभूयते
405. 1.406अनन्यत्वमधिष्ठानादारोप्यस्य निरीक्षितम् & पण्डितै रज्जुसर्पादौ विकल्पो भ्रान्तिजीवनः
406. 1.407चित्तमूलो विकल्पो ऽयं चित्ताभावे न कश्चन & अतश्चित्तं समाधेहि प्रत्यग्रूपे परात्मनि
407. 1.408किम् अपि सततबोधं केवलानन्दरूपं निरुपममतिवेलं नित्यमुक्तं निरीहम् & निरवधिगगनाभं निष्कलं निर्विकल्पं हृदि कलयति विद्वान् ब्रह्म पूर्णं समाधौ
408. 1.409प्रकृतिविकृतिशून्यं भावनातीतभावं समरसमसमानं मानसं बन्धदूरम् & निगमवचनसिद्धं नित्यमस्मत्प्रसिद्धं हृदि कलयति विद्वान् ब्रह्म पूर्णं समाधौ
409. 1.410अजरममरमस्ताभाववस्तुस्वरूपं स्तिमितसलिलराशिप्रख्यमाख्याविहीनम् & शमितगुणविकारं शाश्वतं शान्तमेकं हृदि कलयति विद्वान् ब्रह्म पूर्णं समाधौ
410. 1.412समाहितान्तःकरणः स्वरूपे विलोकयात्मानमखण्डवैभवम् & विच्छिन्द्धि बन्धं भवगन्धगन्धितं यत्नेन पुंस्त्वं सफलीकुरुष्व ॥ ४११। सर्वोपाधिविनिर्मुक्तं सच्चिदानन्दमद्वयम्। भावयात्मानम् आत्मस्थं न भूयः कल्पसे ऽध्वने
411. 1.413छायेव पुंसः परिदृश्यमान् माभासरूपेण फलानुभूत्या & शरीरमाराच्छववन्निरस्तं पुनर्न संधत्त इदं महात्मा
412. 1.414सततविमलबोधानन्दरूपं समेत्य त्यज जडमलरूपोपाधिमेतं सुदूरे & अथ पुनर् अपि नैष स्मर्यतां वान्तवस्तु स्मरणविषयभूतं पल्पते कुत्सनाय
413. 1.415समूलमेतत्परिदाह्य वन्हौ सदात्मनि ब्रह्मणि निर्विकल्पे & ततः स्वयं नित्यविशुद्धबोधा नन्दात्मना तिष्ठति विद्वरिष्ठः
414. 1.416प्रारब्धसूत्रग्रथितं शरीरं प्रयातु वा तिष्ठतु गोर् इव स्रक् & न तत्पुनः पश्यति तत्त्ववेत्ता- (आ)नन्दात्मनि ब्रह्मणि लीनवृत्तिः
415. 1.417अखण्डानन्दमात्मानं विज्ञाय स्वस्वरूपतः & किमिच्छन् कस्य वा हेतोर् देहं पुष्णाति तत्त्ववित्
416. 1.418संसिद्धस्य फलं त्वेतज्जीवन्मुक्तस्य योगिनः & बहिरन्तः सदानन्दरसास्वादनम् आत्मनि
417. 1.419वैराग्यस्य फलं बोधो बोधस्योपरतिः फलम् & स्वानन्दानुभवाच्छान्तिरेषैवोपरतेः फलम्
418. 1.420यद्य् उत्तरोत्तराभावः पूर्वपूर्वन्तु निष्फलम् & निवृत्तिः परमा तृप्तिरानन्दो ऽनुपमः स्वतः
419. 1.421दृष्टदुःखेष्वनुद्वेगो विद्यायाः प्रस्तुतं फलम् & यत्कृतं भ्रान्तिवेलायां नाना कर्म जुगुप्सितम् \ पश्चान्नरो विवेकेन तत् कथं कर्तुम् अर्हति
420. 1.422विद्याफलं स्यादसतो निवृत्तिः प्रवृत्तिरज्ञानफलं तदीक्षितम् & तज्ज्ञाज्ञयोर् यन्मृगतृष्णिकादौ नोचेद्विदां दृष्टफलं किमस्मात्
421. 1.423अज्ञानहृदयग्रन्थेर्विनाशो यद्य् अशेषतः & अनिच्छोर्विषयः किं नु प्रवृत्तेः कारणं स्वतः
422. 1.424वासनानुदयो भोग्ये वैरागस्य तदावधिः & अहंभावोदयाभावो बोधस्य परमावधिः \ लीनवृत्तैर् अनुत्पत्तिर्मर्यादोपरतेस्तु सा
423. 1.425ब्रह्माकारतया सदा स्थिततया निर्मुक्तबाह्यार्थधीर् अन्यावेदितभोग्यभोगकलनो निद्रालुवद्बालवत् & स्वप्नालोकितलोकवज्जगदिदं पश्यन् क्वचिल् लब्धधीर् आस्ते कश्चिदनन्तपुण्यफलभुग्धन्यः स मान्यो भुवि
424. 1.426स्थितप्रज्ञो यतिरयं यः सदानन्दमश्नुते & ब्रह्मण्य् एव विलीनात्मा निर्विकारो विनिष्क्रियः
425. 1.427ब्रह्मात्मनोः शोधितयोर् एकभावावगाहिनी & निर्विकल्पा च चिन्मात्रा वृत्तिः प्रज्ञेति कथ्यते \ सुस्थितासौ भवेद्यस्य स्थितप्रज्ञः स उच्यते
426. 1.428यस्य स्थिता भवेत्प्रज्ञा यस्यानन्दो निरन्तरः & प्रपञ्चो विस्मृतप्रायः स जीवन्मुक्त इष्यते
427. 1.429लीनधीर् अपि जागर्ति जाग्रद्धर्मविवर्जितः & बोधो निर्वासनो यस्य स जीवन्मुक्त इष्यते
428. 1.430शान्तसंसारकलनः कलावान् अपि निष्कलः & यस्य चित्तं विनिश्चिन्तं स जीवन्मुक्त इष्यते
429. 1.431वर्तमाने ऽपि देहे ऽस्मिञ्छायावदनुवर्तिनि & अहन्ताममताभावो जीवन्मुक्तस्य लक्षणम्
430. 1.432अतीताननुसन्धानं भविष्यदविचारणम् & औदासीन्यम् अपि प्राप्तं जीवन्मुक्तस्य लक्षणम्
431. 1.433गुणदोषविशिष्टे ऽस्मिन्स्वभावेन विलक्षणे & सर्वत्र समदर्शित्वं जीवन्मुक्तस्य लक्षणम्
432. 1.434इष्टानिष्टार्थसम्प्राप्तौ समदर्शितयात्मनि & उभयत्राविकारित्वं जीवन्मुक्तस्य लक्षणम्
433. 1.435ब्रह्मानन्दरसास्वादासक्तचित्ततया यतेः & अन्तर्बहिरविज्ञानं जीवन्मुक्तस्य लक्षणम्
434. 1.436देहेन्द्रियादौ कर्तव्ये ममाहंभाववर्जितः & औदासीन्येन यस् तिष्ठेत्स जीवन्मुक्तलक्षणः
435. 1.437विज्ञात आत्मनो यस्य ब्रह्मभावः श्रुतेर्बलात् & भवबन्धविनिर्मुक्तः स जीवन्मुक्तलक्षणः
436. 1.438देहेन्द्रियेष्वहंभाव इदंभावस्तदन्यके & यस्य नो भवतः क्वापि स जीवन्मुक्त इष्यते
437. 1.439न प्रत्यग्ब्रह्मणोर् भेदं कदापि ब्रह्मसर्गयोः & प्रज्ञया यो विजानिति स जीवन्मुक्तलक्षणः
438. 1.440साधुभिः पूज्यमाने ऽस्मिन् पीड्यमाने ऽपि दुर्जनैः & समभावो भवेद्यस्य स जीवन्मुक्तलक्षणः
439. 1.441यत्र प्रविष्टा विषयाः परेरिता नदीप्रवाहा इव वारिराशौ & लिनन्ति सन्मात्रतया न विक्रियां उत्पादयन्त्येष यतिर्विमुक्तः
440. 1.442विज्ञातब्रह्मतत्त्वस्य यथापूर्वं न संसृतिः & अस्ति चेन् न स विज्ञातब्रह्मभावो बहिर्मुखः
441. 1.443प्राचीनवासनावेगादसौ संसरतीति चेत् & न सदेकत्वविज्ञानान्मन्दी भवति वासना
442. 1.444अत्यन्तकामुकस्यापि वृत्तिः कुण्ठति मातरि & तथैव ब्रह्मणि ज्ञाते पूर्णानन्दे मनीषिणः
443. 1.445निदिध्यासनशीलस्य बाह्यप्रत्यय ईक्ष्यते & ब्रवीति श्रुतिरेतस्य प्रारब्धं फलदर्शनात्
444. 1.446सुखाद्यनुभवो यावत्तावत्प्रारब्धमिष्यते & फलोदयः क्रियापूर्वो निष्क्रियो न हि कुत्रचित्
445. 1.447अहं ब्रह्मेति विज्ञानात् कल्पकोटिशतार्जितम् & सञ्चितं विलयं याति प्रबोधात्स्वप्नकर्मवत्
446. 1.448यत्कृतं स्वप्नवेलायां पुण्यं वा पापम् उल्बणम् & सुप्तोत्थितस्य किं तत् स्यात् स्वर्गाय नरकाय वा
447. 1.449स्वम् असङ्गम् उदासीनं परिज्ञाय नभो यथा & न श्लिष्यति च यत् किंचित् कदाचिद् भाविकर्मभिः
448. 1.450न नभो घटयोगेन सुरागन्धेन लिप्यते & तथात्मोपाधियोगेन तद्धर्मैर् नैव लिप्यते
449. 1.451ज्ञानोदयात्पुरारब्धं कर्मज्ञानान् न नश्यति & अदत्वा स्वफलं लक्ष्यमुद्दिश्योत्सृष्टबाणवत्
450. 1.452व्याघ्रबुद्ध्या विनिर्मुक्तो बाणः पश्चात्तु गोमतौ & न तिष्ठति छिनत्य् एव लक्ष्यं वेगेन निर्भरम्
451. 1.453प्राब्धं बलवत्तरं खलु विदां भोगेन तस्य क्षयः सम्यग्ज्ञानहुताशनेन विलयः प्राक्षंचितागामिनाम् & ब्रह्मात्मैक्यमवेक्ष्य तन्मयतया ये सर्वदा संस्थिताः तेषां तत्त्रितयं नहि क्वचिद् अपि ब्रह्मैव ते निर्गुणम्
452. 1.454उपाधितादात्म्यविहीनकेवल- ब्रह्मात्मनैवात्मनि तिष्ठतो मुनेः & प्रारब्धसद्भावकथा न युक्ता स्वप्नार्थसंबन्धकथेव जाग्रतः
453. 1.455न हि प्रबुद्धः प्रतिभासदेहे देहोपयोगिन्य् अपि च प्रपञ्चे & करोत्यहन्तां ममतानिदन्तां किन्तु स्वयं तिष्ठति जागरेण
454. 1.456न तस्य मिथ्यार्थसमर्थनेच्छा न संग्रहस्तज्जगतो ऽपि दृष्टः & तत्रानुवृत्तिर्यदि चेन्मृषार्थे न निद्रया मुक्त इतीष्यते ध्रुवम्
455. 1.457तद्वत्परे ब्रह्मणि वर्तमानः सदात्मना तिष्ठति नान्यदीक्षते & स्मृतिर्यथा स्वप्नविलोकितार्थे तथा विदः प्राशनमोचनादौ
456. 1.458कर्मणा निर्मितो देहः प्रारब्धं तस्य कल्प्यताम् & नानादेर् आत्मनो युक्तं नैवात्मा कर्मनिर्मितः
457. 1.459अजो नित्यः शाश्वत इति ब्रूते श्रुतिरमोघवाक् & तद् आत्मना तिष्ठतो ऽस्य कुतः प्रारब्धकल्पना
458. 1.460प्रारब्धं सिध्यति तदा यदा देहात्मना स्थितिः & देहात्मभावो नैवेष्टः प्रारब्धं त्यज्यतामतः
459. 1.461शरीरस्यापि प्रारब्धकल्पना भ्रान्तिर् एव हि & अध्यस्तस्य कुतः सत्त्वमसत्यस्य कुतो जनिः \ अजातस्य कुतो नाशः प्रारब्धमसतः कुतः
460. 1.462ज्ञानेनाज्ञानकार्यस्य समूलस्य लयो यदि & तिष्ठत्ययं कथं देह इति शङ्कावतो जडान्
461. 1.463समाधातुं बाह्यदृष्ट्या प्रारब्धं वदति श्रुतिः & न तु देहादिसत्यत्वबोधनाय विपश्चिताम्
462. 1.464परिपूर्णमनाद्यन्तमप्रमेयमविक्रियम् & एकमेवाद्वयं ब्रह्म नेह नानास्ति किंचन
463. 1.465सद्गनं चिद्घनं नित्यमानन्दघनमक्रियम् & एकमेवाद्वयं ब्रह्म नेह नानास्ति किंचन
464. 1.466प्रत्यगेकरसं पूर्णमनन्तं सर्वतोमुखम् & एकमेवाद्वयं ब्रह्म नेह नानास्ति किंचन
465. 1.467अहेयमनुपादेयमनादेयमनाश्रयम् & एकमेवाद्वयं ब्रह्म नेह नानास्ति किंचन
466. 1.468निर्गुणं निष्कलं सूक्ष्मं निर्विकल्पं निरञ्जनम् & एकमेवाद्वयं ब्रह्म नेह नानास्ति किंचन
467. 1.469अनिरूप्य स्वरूपं यन्मनोवाचामगोचरम् & एकमेवाद्वयं ब्रह्म नेह नानास्ति किंचन
468. 1.470सत्समृद्धं स्वतःसिद्धं शुद्धं बुद्धमनीदृशम् & एकमेवाद्वयं ब्रह्म नेह नानास्ति किंचन
469. 1.471निरस्तरागा विनिरस्तभोगाः शान्ताः सुदान्ता यतयो महान्तः & विज्ञाय तत्त्वं परमेतदन्ते प्राप्ताः परां निर्वृतिम् आत्मयोगात्
470. 1.472भवानपीदं परतत्त्वम् आत्मनः स्वरूपमानन्दघनं विचार्य & विधूय मोहं स्वमनःप्रकल्पितं मुक्तः कृतार्थो भवतु प्रबुद्धः
471. 1.473समाधिना साधुविनिश्चलात्मना पश्यात्मतत्त्वं स्फुटबोधचक्षुषा & निःसंशयं सम्यगवेक्षितश्चेच् छ्रुतः पदार्थो न पुनर्विकल्प्यते
472. 1.474स्वस्याविद्याबन्धसंबन्धमोक्षात् सत्यज्ञानानन्दरूपात्मलब्धौ & शास्त्रं युक्तिर्देशिकोक्तिः प्रमाणं चान्तःसिद्धा स्वानुभूतिः प्रमाणम्
473. 1.475बन्धो मोक्षश्च तृप्तिश्च चिन्तारोग्यक्षुदादयः & स्वेनैव वेद्या यज्ज्ञानं परेषामानुमानिकम्
474. 1.476तटस्थिता बोधयन्ति गुरवः श्रुतयो यथा & प्रज्ञयैव तरेद्विद्वानीश्वरानुगृहीतया
475. 1.477स्वानुभूत्या स्वयं ज्ञात्वा स्वमात्मानमखण्डितम् & संसिद्धः संमुखं तिष्ठेन्निर्विकल्पात्मनात्मनि
476. 1.478वेदान्तसिद्धान्तनिरुक्तिरेषा ब्रह्मैव जीवः सकलं जगच्च & अखण्डरूपस्थितिर् एव मोक्षो ब्रह्माद्वितीये श्रुतयः प्रमाणम्
477. 1.479इति गुरुवचनाच्छ्रुतिप्रमाणात् परमवगम्य सतत्त्वम् आत्मयुक्त्या & प्रशमितकरणः समाहितात्मा क्वचिदचलाकृतिर् आत्मनिष्ठतो ऽभूत्
478. 1.480किंचित् कालं समाधाय परे ब्रह्मणि मानसम् & उत्थाय परमानन्दादिदं वचनमब्रवीत्
479. 1.481बुद्धिर्विनष्टा गलिता प्रवृत्तिः ब्रह्मात्मनोर् एकतयाधिगत्या & इदं न जाने ऽप्य् अनिदं न जाने किं वा कियद्वा सुखमस्त्य् अपारम्
480. 1.482वाचा वक्तुमशक्यम् एव मनसा मन्तुं न वा शक्यते स्वानन्दामृतपूरपूरितपरब्रह्माम्बुधेर्वैभवम् & अम्भोराशिविशीर्णवार्षिकशिलाभावं भजन्मे मनो यस्यांशांशलवे विलीनमधुनानन्दात्मना निर्वृतम्
481. 1.483क्व गतं केन वा नीतं कुत्र लीनमिदं जगत् & अधुनैव मया दृष्टं नास्ति किं महदद्भुतम्
482. 1.484किं हेयं किमुपादेयं किमन्यत्किं विलक्षणम् & अखण्डानन्दपीयूषपूर्णे ब्रह्ममहार्णवे
483. 1.485न किंचिद् अत्र पश्यामि न शृणोमि न वेद्म्य् अहम् & स्वात्मनैव सदानन्दरूपेणास्मि विलक्षणः
484. 1.486नमो नमस्ते गुरवे महात्मने विमुक्तसङ्गाय सदुत्तमाय & नित्याद्वयानन्दरसस्वरूपिणे भूम्ने सदापारदयाम्बुधाम्ने
485. 1.487यत्कटाक्षशशिसान्द्रचन्द्रिका- पातधूतभवतापजश्रमः & प्राप्तवानहमखण्डवैभवा- नन्दम् आत्मपदमक्षयं क्षणात्
486. 1.488धन्यो ऽहं कृतकृत्यो ऽहं विमुक्तो ऽहं भवग्रहात् & नित्यानन्दस्वरूपो ऽहं पूर्णो ऽहं त्वदनुग्रहात्
487. 1.489असङ्गो ऽहम् अनङ्गो ऽहम् अलिङ्गो ऽहम् अभङ्गुरः & प्रशान्तो ऽहम् अनन्तो ऽहम् अमलो ऽहं चिरन्तनः
488. 1.490अकर्ताहमभोक्ताहमविकारो ऽहम् अक्रियः & शुद्धबोधस्वरूपो ऽहं केवलो ऽहं सदाशिवः
489. 1.491द्रष्टुः श्रोतुर्वक्तुः कर्तुर्भोक्तुर्विभिन्न एवाहम् & नित्यनिरन्तरनिष्क्रियनिःसीमासङ्गपूर्णबोधात्मा
490. 1.492नाहमिदं नाहमदो ऽप्य् उभयोर् अवभासकं परं शुद्धम् & बाह्याभ्यन्तरशून्यं पूर्णं ब्रह्माद्वितीयमेवाहम्
491. 1.493निरुपममनादितत्त्वं त्वमहमिदमद इति कल्पनादूरम् & नित्यानन्दैकरसं सत्यं ब्रह्माद्वितीयमेवाहम्
492. 1.494नारायणो ऽहं नरकान्तको ऽहं पुरान्तको ऽहं पुरुषो ऽहम् ईशः & अखण्डबोधो ऽहम् अशेषसाक्षी निरीश्वरो ऽहं निरहं च निर्ममः
493. 1.495सर्वेषु भूतेष्व् अहम् एव संस्थितो ज्ञानात्मनान्तर्बहिराश्रयः सन् & भोक्ता च भोग्यं स्वयम् एव सर्वं यद्यत्पृथग्दृष्टमिदन्तया पुरा
494. 1.496मय्यखण्डसुखाम्भोधौ बहुधा विश्ववीचयः & उत्पद्यन्ते विलीयन्ते मायामारुतविभ्रमात्
495. 1.497स्थुलादिभावा मयि कल्पिता भ्रमाद् आरोपितानुस्फुरणेन लोकैः & काले यथा कल्पकवत्सराय- णर्त्वादयो निष्कलनिर्विकल्पे
496. 1.498आरोपितं नाश्रयदूषकं भवेत् कदापि मूढैर् अतिदोषदूषितैः & नार्द्रिकरोत्यूषरभूमिभागं मरीचिकावारि महाप्रवाहः
497. 1.499आकाशवल्लेपविदूरगो ऽहं आदित्यवद्भास्यविलक्षणो ऽहम् & अहार्यवन्नित्यविनिश्चलो ऽहं अम्भोधिवत्पारविवर्जितो ऽहम्
498. 1.500न मे देहेन संबन्धो मेघेनेव विहायसः & अतः कुतो मे तद्धर्मा जाक्रत्स्वप्नसुषुप्तयः
499. 1.501उपाधिरायाति स एव गच्छति स एव कर्माणि करोति भुङ्क्ते & स एव जीर्यन् म्रियते सदाहं कुलाद्रिवन्निश्चल एव संस्थितः
500. 1.502न मे प्रवृत्तिर्न च मे निवृत्तिः सदैकरूपस्य निरंशकस्य & एकात्मको यो निविडो निरन्तरो व्योमेव पूर्णः स कथं नु चेष्टते
501. 1.503पुण्यानि पापानि निरिन्द्रियस्य निश्चेतसो निर्विकृतेर्निराकृतेः & कुतो ममाखण्डसुखानुभूतेः ब्रूते ह्यनन्वागतमित्य् अपि श्रुतिः
502. 1.504छायया स्पृष्टमुष्णं वा शीतं वा सुष्ठु दुःष्ठु वा & न स्पृशत्य् एव यत् किंचित् पुरुषं तद्विलक्षणम्
503. 1.505न साक्षिणं साक्ष्यधर्माः संस्पृशन्ति विलक्षणम् & अविकारमुदासीनं गृहधर्माः प्रदीपवत्
504. 1.506रवेर्यथा कर्मणि साक्षिभावो वन्हेर्यथा दाहनियामकत्वम् & रज्जोर्यथारोपितवस्तुसङ्गः तथैव कूटस्थचिदात्मनो मे
505. 1.507कर्तापि वा कारयितापि नाहं भोक्तापि वा भोजयितापि नाहम् & द्रष्टापि वा दर्शयितापि नाहं सो ऽहं स्वयंज्योतिरनीदृगात्मा
506. 1.508चलत्युपाधौ प्रतिबिम्बलौल्यम् औपाधिकं मूढधियो नयन्ति & स्वबिम्बभूतं रविवद्विनिष्क्रियं कर्तास्मि भोक्तास्मि हतो ऽस्मि हेति
507. 1.509जले वापि स्थले वापि लुठत्वेष जडात्मकः & नाहं विलिप्ये तद्धर्मैर् घटधर्मैर् नभो यथा
508. 1.510कर्तृत्वभोक्तृत्वखलत्वमत्तता- जडत्वबद्धत्वविमुक्ततादयः & बुद्धेर्विकल्पा न तु सन्ति वस्तुतः स्वस्मिन् परे ब्रह्मणि केवले ऽद्वये
509. 1.511सन्तु विकाराः प्रकृतेर्दशधा शतधा सहस्रधा वापि & किं मे ऽसङ्गचितस्तैर् न घनः क्वचिदम्बरं स्पृशति
510. 1.512अव्यक्तादिस्थूलपर्यन्तमेतत् विश्व यत्राभासमात्रं प्रतीतम् & व्योमप्रख्यं सूक्ष्ममाद्यन्तहीनं ब्रह्माद्वैतं यत्तदेवाहमस्मि
511. 1.513सर्वाधारं सर्ववस्तुप्रकाशं सर्वाकारं सर्वगं सर्वशून्यम् & नित्यं शुद्धं निश्चलं निर्विकल्पं ब्रह्माद्वैतं यत्तदेवाहमस्मि
512. 1.514यत्प्रत्यस्ताशेषमायाविशेषं प्रत्यग्रूपं प्रत्ययागम्यमानम् & सत्यज्ञानानन्तमानन्दरूपं ब्रह्माद्वैतं यत्तदेवाहमस्मि
513. 1.515निष्क्रियो ऽस्म्य् अविकारो ऽस्मि निष्कलो ऽस्मि निराकृतिः & निर्विकल्पो ऽस्मि नित्यो ऽस्मि निरालम्बो ऽस्मि निर्द्वयः
514. 1.516सर्वात्मको ऽहं सर्वो ऽहं सर्वातीतो ऽहम् अद्वयः & केवलाक्षण्डबोधो ऽहम् आनन्दो ऽहं निरन्तरः
515. 1.517स्वाराज्यसाम्राज्यविभूतिरेषा भवत्कृपाश्रीमहिमप्रसादात् & प्राप्ता मया श्रीगुरवे महात्मने नमो नमस्ते ऽस्तु पुनर्नमो ऽस्तु
516. 1.518महास्वप्ने मायाकृतजनिजरामृत्युगहने भ्रमन्तं क्लिश्यन्तं बहुलतरतापैर् अनुदिनम् & अहंकारव्याघ्रव्यथितमिममत्यन्तकृपया प्रबोध्य प्रस्वापात्परमवितवान्मामसि गुरो
517. 1.519नमस्तस्मै सदैकस्मै कस्मैचिन्महसे नमः & यदेतद्विश्वरूपेण राजते गुरुराज ते
518. 1.520इति नतमवलोक्य शिष्यवर्यं समधिगतात्मसुखं प्रबुद्धतत्त्वम् & प्रमुदितहृदयं स देशिकेन्द्रः पुनरिदमाह वचः परं महात्मा
519. 1.521ब्रह्मप्रत्ययसन्ततिर्जगदतो ब्रह्मैव तत्सर्वतः पश्याध्यात्मदृशा प्रशान्तमनसा सर्वास्ववस्थास्व् अपि & रूपादन्यदवेक्षितं किमभितश्चक्षुष्मतां दृश्यते तद्वद्ब्रह्मविदः सतः किमपरं बुद्धेर्विहारास्पदम्
520. 1.522कस्तां परानन्दरसानुभूति- मृत्सृज्य शून्येषु रमेत विद्वान् & चन्द्रे महाल्हादिनि दीप्यमाने चित्रेन्दुमालोकयितुं क इच्छेत्
521. 1.523असत्पदार्थानुभवेन किंचिन् न ह्यस्ति तृप्तिर्न च दुःखहानिः & तदद्वयानन्दरसानुभूत्या तृप्तः सुखं तिष्ठ सदात्मनिष्ठया
522. 1.524स्वम् एव सर्वथा पश्यन्मन्यमानः स्वमद्वयम् & स्वानन्दमनुभुञ्जानः कालं नय महामते
523. 1.525अखण्डबोधात्मनि निर्विकल्पे विकल्पनं व्योम्नि पुरप्रकल्पनम् & तदद्वयानन्दमयात्मना सदा शान्तिं परामेत्य भजस्व मौनम्
524. 1.526तूष्णीमवस्था परमोपशान्तिः बुद्धेरसत्कल्पविकल्पहेतोः & ब्रह्मात्मन ब्रह्मविदो महात्मनो यत्राद्वयानन्दसुखं निरन्तरम्
525. 1.527नास्ति निर्वासनान्मौनात्परं सुखकृदुत्तमम् & विज्ञातात्मस्वरूपस्य स्वानन्दरसपायिनः
526. 1.528गच्छंस्तिष्ठन्नुपविशञ्छयानो वान्यथापि वा & यथेच्छया वेसेद्विद्वानात्नारामः सदा मुनिः
527. 1.529न देशकालासनदिग्यमादि- लक्ष्याद्यपेक्षाप्रतिबद्धवृत्तेः & संसिद्धतत्त्वस्य महात्मनो ऽस्ति स्ववेदने का नियमाद्यवस्था
528. 1.530घटो ऽयमिति विज्ञातुं नियमः को ऽन्ववेक्षते & विना प्रमाणसुष्ठुत्वं यस्मिन् सति पदार्थधीः
529. 1.531अयमात्मा नित्यसिद्धः प्रमाणे सति भासते & न देशं नापि कालं न शुद्धिं वाप्यपेक्षते
530. 1.532देवदत्तो ऽहम् इत्य् एतद् विज्ञानं निरपेक्षकम् & तद्वद् ब्रह्मविदो ऽप्य् अस्य ब्रह्माहमिति वेदनम्
531. 1.533भानुनेव जगत्सर्वं भासते यस्य तेजसा & अनात्मकमसत्तुच्छं किं नु तस्यावभासकम्
532. 1.534वेदशास्त्रपुराणानि भूतानि सकलान्य् अपि & येनार्थवन्ति तं किन्नु विज्ञातारं प्रकाशयेत्
533. 1.535एष स्वयंज्योतिरनन्तशक्तिः आत्माप्रमेयः सकलानुभूतिः & यम् एव विज्ञाय विमुक्तबन्धो जयत्ययं ब्रह्मविदुत्तमोत्तमः
534. 1.536न खिद्यते नो विषयैः प्रमोदते न सज्जते नापि विरज्यते च & स्वस्मिन्सदा क्रीडति नन्दति स्वयं निरन्तरानन्दरसेन तृप्तः
535. 1.537क्षुधां देहव्यथां त्यक्त्वा बालः क्रीडति वस्तुनिः & तथैव विद्वान् रमते निर्ममो निरहं सुखी
536. 1.538चिन्ताशून्यमदैन्यभैक्षमशनं पानं सरिद्वारिषु स्वातन्त्र्येण निरङ्कुशा स्थितिरभीर्निद्रा श्मशाने वने & वस्त्रं क्षालनशोषणादिरहितं दिग्वास्तु शय्या मही संचारो निगमान्तवीथिषु विदां क्रीडा परे ब्रह्मणि
537. 1.539विमानमालम्ब्य शरीरमेतद् भुनक्त्यशेषान्विषयानुपस्थितान् & परेच्छया बालवद् आत्मवेत्ता यो ऽव्यक्तलिङ्गो ऽननुषक्तबाह्यः
538. 1.540दिगम्बरो वापि च साम्बरो वा त्वगम्बरो वापि चिदम्बरस्थः & उन्मत्तवद्वापि च बालवद्वा पिशाचवद्वापि चरत्यवन्याम्
539. 1.541कामान्निष्कामरूपी संश्चरत्येकचारो मुनिः & स्वात्मनैव सदा तुष्टः स्वयं सर्वात्मना स्थितः
540. 1.542क्वचिन्मूढो विद्वान् क्वचिद् अपि महाराजविभवः क्वचिद्भ्रान्तः सौम्यः क्वचिदजगराचारकलितः & क्वचित्पात्रीभूतः क्वचिदवमतः क्वाप्यविदितः चरत्य् एवं प्राज्ञः सततपरमानन्दसुखितः
541. 1.543निर्धनो ऽपि सदा तुष्टो ऽप्य् असहायो महाबलः & नित्यतृप्तो ऽप्य् अभुञ्जानो ऽप्य् असमः समदर्शनः
542. 1.544अपि कुर्वन्नकुर्वाणश्चाभोक्ता फलभोग्य् अपि & शरीर्यप्यशरीर्येष परिच्छिन्नो ऽपि सर्वगः
543. 1.545अशरीरं सदा सन्तमिमं ब्रह्मविदं क्वचित् & प्रियाप्रिये न स्पृशतस्तथैव च शुभाशुभे
544. 1.546स्थूलादिसंबन्धवतो ऽभिमानिनः सुखं च दुःखं च शुभाशुभे च & विध्वस्तबन्धस्य सदात्मनो मुनेः कुतः शुभं वाप्यशुभं फलं वा
545. 1.547तमसा ग्रस्तवद्भानादग्रस्तो ऽपि रविर्जनैः & ग्रस्त इत्युच्यते भ्रान्त्यां ह्यज्ञात्वा वस्तुलक्षणम्
546. 1.548तद्वद्देहादिबन्धेभ्यो विमुक्तं ब्रह्मवित्तमम् & पश्यन्ति देहिवन्मूढाः शरीराभासदर्शनात्
547. 1.549अहिर्निर्ल्वयनीं वायं मुक्त्वा देहं तु तिष्ठति & इतस्ततश्चाल्यमानो यत् किंचित् प्राणवायुना
548. 1.550स्त्रोतसा नीयते दारु यथा निम्नोन्नतस्थलम् & दैवेन नीयते देहो यथाकालोपभुक्तिषु
549. 1.551प्रारब्धकर्मपरिकल्पितवासनाभिः संसारिवच्चरति भुक्तिषु मुक्तदेहः & सिद्धः स्वयं वसति साक्षिवदत्र तूष्णीं चक्रस्य मूलम् इव कल्पविकल्पशून्यः
550. 1.552नैवेन्द्रियाणि विषयेषु नियुङ्क्त एष नैवापयुङ्क्त उप्दर्शनलक्षणस्थः & नैव क्रियाफलमपीषदवेक्षते स स्वानन्दसान्द्ररसपानसुमत्तचित्तः
551. 1.553लक्ष्यालक्ष्यगतिं त्यक्त्वा यस् तिष्ठेत् केवलात्मना & शिव एव स्वयं साक्षादयं ब्रह्मविदुत्तमः
552. 1.554जीवन्न् एव सदा मुक्तः कृतार्थो ब्रह्मवित्तमः & उपाधिनाशाद्ब्रह्मैव सन् ब्रह्माप्येति निर्द्वयम्
553. 1.555शैलूषो वेषसद्भावा- भावयोश् च यथा पुमान् & तथैव ब्रह्मविच् छ्रेष्ठः सदा ब्रह्मैव नापरः
554. 1.556यत्र क्वापि विशीर्णं सत्पर्णम् इव तरोर् वपुः पततात् & ब्रह्मीभूतस्य यतेः प्राग् एव तच्चिदग्निना दग्धम्
555. 1.557सदात्मनि ब्रह्मणि तिष्ठतो मुनेः पूर्णाद्वयानन्दमयात्मना सदा & न देशकालाद्युचितप्रतीक्षा त्वङ्मांसविट्पिण्डविसर्जनाय
556. 1.558देहस्य मोक्षो नो मोक्षो न दण्डस्य कमण्डलोः & अविद्याहृदयग्रन्थिमोक्षो मोक्षो यतस्ततः
557. 1.559कुल्यायामथ नद्यां वा शिवक्षेत्रे ऽपि चत्वरे & पर्णं पतति चेत्तेन तरोः किं नु शुभाशुभम्
558. 1.560पत्रस्य पुष्पस्य फलस्य नाशवद्- देहेन्द्रियप्राणधियां विनाशः & नैवात्मनः स्वस्य सदात्मकस्या- नन्दाकृतेर् वृक्षवद् अस्ति चैषः
559. 1.561प्रज्ञानघन इत्य् आत्मलक्षणं सत्यसूचकम् & अनूद्यौपाधिकस्यैव कथयन्ति विनाशनम्
560. 1.562अविनाशी वा अरे ऽयमात्मेति श्रुतिर् आत्मनः & प्रब्रवीत्यविनाशित्वं विनश्यत्सु विकारिषु
561. 1.563पाषाणवृक्षतृणधान्यकडङ्कराद्या दग्धा भवन्ति हि मृद् एव यथा तथैव & देहेन्द्रियासुमन आदि समस्तदृश्यं ज्ञानाग्निदग्धमुपयाति परात्मभावम्
562. 1.564विलक्षणं यथा ध्वान्तं लीयते भानुतेजसि & तथैव सकलं दृश्यं ब्रह्मणि प्रविलीयते
563. 1.565घटे नष्टे यथा व्योम व्योमैव भवति स्फुटम् & तथैवोपाधिविलये ब्रह्मैव ब्रह्मवित्स्वयम्
564. 1.566क्षीरं क्षीरे यथा क्षिप्तं तैलं तैले जलं जले & संयुक्तमेकतां याति तथात्मन्य् आत्मविन्मुनिः
565. 1.567एवं विदेहकैवल्यं सन्मात्रत्वमखण्डितम् & ब्रह्मभावं प्रपद्यैष यतिर्नावर्तते पुनः
566. 1.568सदात्मैकत्वविज्ञानदग्धाविद्यादिवर्ष्मणः & अमुष्य ब्रह्मभूतत्वाद् ब्रह्मणः कुत उद्भवः
567. 1.569मायाकॢप्तौ बन्धमोक्षौ न स्तः स्वात्मनि वस्तुतः & यथा रज्जौ निष्क्रियायां सर्पाभासविनिर्गमौ
568. 1.570आवृतेः सदसत्त्वाभ्यां वक्तव्ये बन्धमोक्षणे & नावृतिर्ब्रह्मणः काचिदन्याभावादनावृतम् \ यद्य् अस्त्य् अद्वैतहानिः स्याद् द्वैतं नो सहते श्रुतिः
569. 1.571बन्धञ्च मोक्षञ्च मृषैव मूढा बुद्धेर्गुणं वस्तुनि कल्पयन्ति & दृगावृतिं मेघकृतां यथा रवौ यतो ऽद्वयासङ्गचिदेतदक्षरम्
570. 1.572अस्तीति प्रत्ययो यश्च यश्च नास्तीति वस्तुनि & बुद्धेर् एव गुणावेतौ न तु नित्यस्य वस्तुनः
571. 1.573अतस्तौ मायया कॢप्तौ बन्धमोक्षौ न चात्मनि & निष्कले निष्क्रिये शान्ते निरवद्ये निरञ्जने \ अद्वितीये परे तत्त्वे व्योमवत्कल्पना कुतः
572. 1.574न निरोधो न चोत्पत्तिर्न बद्धो न च साधकः & न मुमुक्षुर्न वै मुक्त इत्येषा परमार्थता
573. 1.575सकलनिगमचूडास्वान्तसिद्धान्तरूपं परमिदमतिगुह्यं दर्शितं ते मयाद्य & अपगतकलिदोषं कामनिर्मुक्तबुद्धिं स्वसुतवदसकृत्त्वां भाव्यित्वा मुमुक्षुम्
574. 1.576इति श्रुत्वा गुरोर् वाक्यं प्रश्रयेण कृतानतिः & स तेन समनुज्ञातो ययौ निर्मुक्तबन्धनः
575. 1.577गुरुर् एव सदानन्दसिन्धौ निर्मग्नमानसः & पावयन्वसुधां सर्वाण् विचचार निरन्तरः
576. 1.578इत्याचार्यस्य शिष्यस्य संवादेनात्मलक्षणम् & निरूपितं मुमुक्षूणां सुखबोधोपपत्तये
577. 1.579हितमिदमुपदेशमाद्रियन्तां विहितनिरस्तसमस्तचित्तदोषाः & भवसुखविरताः प्रशान्तचित्ताः श्रुतिरसिका यतयो मुमुक्षवो ये
578. 1.580संसाराध्वनि तापभानुकिरणप्रोद्भूतदाहव्यथा- खिन्नानां जलकाङ्क्षया मरुभुवि भ्रान्त्या परिभ्राम्यताम् & अत्यासन्नसुधाम्बुधिं सुखकरं ब्रह्माद्वयं दर्शयत्य् एषा शंकरभारती विजयते निर्वाणसंदायिनी