श्रीभैरवी । कीदृशी ओषधी नाथ रसकर्मकरी शुभा । केन वा भस्म सूतश्च केन वा खोटबन्धनम्
śrībhairavī / kīdṛśī oṣadhī nātha rasakarmakarī śubhā / kena vā bhasma sūtaśca kena vā khoṭabandhanam
Sanskrit only: no published translation is held for this verse.
निर्जीवत्वं गतः सूतः कथं जीवं ददाति सः । निर्जीवेन तु जीवत्वं कथं जीवति शङ्कर
nirjīvatvaṃ gataḥ sūtaḥ kathaṃ jīvaṃ dadāti saḥ / nirjīvena tu jīvatvaṃ kathaṃ jīvati śaṅkara
Sanskrit only: no published translation is held for this verse.
एतन्मे संशयं ब्रूहि यथा जानाम्यहं शिव । श्रीभैरवः । शृणु भैरवि तत्सर्वमपूर्वं कथयामि ते
etanme saṃśayaṃ brūhi yathā jānāmyahaṃ śiva / śrībhairavaḥ / śṛṇu bhairavi tatsarvamapūrvaṃ kathayāmi te
Sanskrit only: no published translation is held for this verse.
ब्रह्मविष्णुसुरेन्द्राद्यैर्न ज्ञातं वीरवन्दिते । वलीपलितरोगघ्ना मृत्युदारिद्र्यभञ्जनाः
brahmaviṣṇusurendrādyairna jñātaṃ vīravandite / valīpalitarogaghnā mṛtyudāridryabhañjanāḥ
Sanskrit only: no published translation is held for this verse.
रसकर्मकरा दिव्याः कुलौषध्यः सुसिद्धिदाः । भ्रमन्ति पशवो मूढाः कुलौषधिविवर्जिताः
rasakarmakarā divyāḥ kulauṣadhyaḥ susiddhidāḥ / bhramanti paśavo mūḍhāḥ kulauṣadhivivarjitāḥ
Sanskrit only: no published translation is held for this verse.
तृणौषधिरसानां च नैव सिद्धिः प्रजायते । तस्मात्सर्वप्रयत्नेन ज्ञातव्या तु कुलौषधिः
tṛṇauṣadhirasānāṃ ca naiva siddhiḥ prajāyate / tasmātsarvaprayatnena jñātavyā tu kulauṣadhiḥ
Sanskrit only: no published translation is held for this verse.
दिव्यौषध्यश्चतुःषष्टिः कुलमध्ये व्यवस्थिताः । नैव जानन्ति मूढास्ताः शिवमोहेन मोहिताः
divyauṣadhyaścatuḥṣaṣṭiḥ kulamadhye vyavasthitāḥ / naiva jānanti mūḍhāstāḥ śivamohena mohitāḥ
Sanskrit only: no published translation is held for this verse.
अदिव्यास्तु तृणौषध्यो जायन्ते गिरिगह्वरे । तृणौषध्या रसे सूतं नैव बन्धं कदाचन
adivyāstu tṛṇauṣadhyo jāyante girigahvare / tṛṇauṣadhyā rase sūtaṃ naiva bandhaṃ kadācana
Sanskrit only: no published translation is held for this verse.
अक्षयं नैव तिष्ठेत्तु कुलौषधिविवर्जितम् । कुलौषध्या विहीनास्तु गगनं च न हन्ति ते
akṣayaṃ naiva tiṣṭhettu kulauṣadhivivarjitam / kulauṣadhyā vihīnāstu gaganaṃ ca na hanti te
Sanskrit only: no published translation is held for this verse.
स रसस्तु वरारोहे वह्निमध्ये न तिष्ठति । न खोटो न च वा भस्म नैव द्रव्यं करोति सः
sa rasastu varārohe vahnimadhye na tiṣṭhati / na khoṭo na ca vā bhasma naiva dravyaṃ karoti saḥ
Sanskrit only: no published translation is held for this verse.
किंचिद्द्रव्यं प्रकुर्वन्ति धाम्यमानं न तिष्ठति । पत्रे पाके कषे छेदे नैव तिष्ठति काञ्चनम्
kiṃciddravyaṃ prakurvanti dhāmyamānaṃ na tiṣṭhati / patre pāke kaṣe chede naiva tiṣṭhati kāñcanam
Sanskrit only: no published translation is held for this verse.
नैव वेधं शतादूर्ध्वं करोति स रसः प्रिये । यावन्न चाब्दमेकं तु विक्रीतं तत्तु काञ्चनम्
naiva vedhaṃ śatādūrdhvaṃ karoti sa rasaḥ priye / yāvanna cābdamekaṃ tu vikrītaṃ tattu kāñcanam
Sanskrit only: no published translation is held for this verse.
धर्मार्थकाममोक्षेषु नैव दद्यात्तु तत्प्रिये । दिव्यौषध्या यदा देवि रसेन्द्रो मर्दितो भवेत्
dharmārthakāmamokṣeṣu naiva dadyāttu tatpriye / divyauṣadhyā yadā devi rasendro mardito bhavet
Sanskrit only: no published translation is held for this verse.
कालिकारहितः सूतः सदा भवति पार्वति । परस्य हरते कालं कालिकारहितो रसः
kālikārahitaḥ sūtaḥ sadā bhavati pārvati / parasya harate kālaṃ kālikārahito rasaḥ
Sanskrit only: no published translation is held for this verse.
अष्टानां चैव लोहानां मलं शमयति क्षणात् । महामूर्च्छागतं सूतं को वापि कथयेन्मृतम्
aṣṭānāṃ caiva lohānāṃ malaṃ śamayati kṣaṇāt / mahāmūrcchāgataṃ sūtaṃ ko vāpi kathayenmṛtam
Sanskrit only: no published translation is held for this verse.
दिव्यौषध्या रसेनैव जायते नष्टचेतनः । पञ्चभूतात्मकः सूतस्तिष्ठते च सदाशिवः
divyauṣadhyā rasenaiva jāyate naṣṭacetanaḥ / pañcabhūtātmakaḥ sūtastiṣṭhate ca sadāśivaḥ
Sanskrit only: no published translation is held for this verse.
रसौषध्यो महौषध्यः सिद्धौषध्यस्तथापराः । दिव्यौषध्य इति प्रोक्ता मया प्रोक्ताश्चतुर्विधाः
rasauṣadhyo mahauṣadhyaḥ siddhauṣadhyastathāparāḥ / divyauṣadhya iti proktā mayā proktāścaturvidhāḥ
Sanskrit only: no published translation is held for this verse.
दिव्यौषध्यो निगद्यन्ते तासु ता गुणवत्तराः । वृक्षवल्लीलतागुल्मतृणवन्दानिका इति
divyauṣadhyo nigadyante tāsu tā guṇavattarāḥ / vṛkṣavallīlatāgulmatṛṇavandānikā iti
Sanskrit only: no published translation is held for this verse.
रसबन्धकरौषध्यः षड्विधाः परिकीर्तिताः । <सोमवल्ली> सोमवल्ली महागुल्मा यक्षश्रेष्ठा धनुर्लता
rasabandhakarauṣadhyaḥ ṣaḍvidhāḥ parikīrtitāḥ / <somavallī> somavallī mahāgulmā yakṣaśreṣṭhā dhanurlatā
Sanskrit only: no published translation is held for this verse.
सोमाह्वा गुल्मवल्ली च यज्ञवल्ली द्विजप्रिया । सोमक्षीरा च सोमा च यज्ञा दिव्यलता स्मृता
somāhvā gulmavallī ca yajñavallī dvijapriyā / somakṣīrā ca somā ca yajñā divyalatā smṛtā
Sanskrit only: no published translation is held for this verse.
सोमवल्ली कटुः शीता मधुरा पित्तदाहनुत् । तृष्णाविशेषशमनी पाचनी च रसायनी
somavallī kaṭuḥ śītā madhurā pittadāhanut / tṛṣṇāviśeṣaśamanī pācanī ca rasāyanī
Sanskrit only: no published translation is held for this verse.
पञ्चाङ्गका पञ्चदशच्छदाढ्या सर्पाकृतिः शोणितपर्वदेशा । सा सोमवल्ली रसबन्धकर्म करोति राकादिवसोपनीता
pañcāṅgakā pañcadaśacchadāḍhyā sarpākṛtiḥ śoṇitaparvadeśā / sā somavallī rasabandhakarma karoti rākādivasopanītā
Sanskrit only: no published translation is held for this verse.
कृष्णे पक्षे प्रगलति दलं प्रत्यहं चैकमेकं शुक्ले पक्षे प्रभवति पुनर् लम्बमाना लता स्यात् । तस्याः कन्दः कलयतितरां पूर्णिमायां गृहीतो बद्ध्वा सूतं कनकसहितं देहलोहं विधत्ते
kṛṣṇe pakṣe pragalati dalaṃ pratyahaṃ caikamekaṃ śukle pakṣe prabhavati punar lambamānā latā syāt / tasyāḥ kandaḥ kalayatitarāṃ pūrṇimāyāṃ gṛhīto baddhvā sūtaṃ kanakasahitaṃ dehalohaṃ vidhatte
Sanskrit only: no published translation is held for this verse.
इयं सोमलता नाम वल्ली परमदुर्लभा । अनया बद्धसूतेन्द्रो लक्षवेधी प्रजायते
iyaṃ somalatā nāma vallī paramadurlabhā / anayā baddhasūtendro lakṣavedhī prajāyate
Sanskrit only: no published translation is held for this verse.
चतुर्विंशतिसोमानां लक्ष्म व्यक्तं रसायने । <सोमवृक्ष> करोति सोमवृक्षोऽपि रसबन्धवधादिकम्
caturviṃśatisomānāṃ lakṣma vyaktaṃ rasāyane / <somavṛkṣa> karoti somavṛkṣo'pi rasabandhavadhādikam
Sanskrit only: no published translation is held for this verse.
पूर्णिमादिवसानीतस्तयोर्वल्ली गुणाधिका । प्रोक्ता महिषवल्ली च प्रतिसोमान्त्रवल्लिका
pūrṇimādivasānītastayorvallī guṇādhikā / proktā mahiṣavallī ca pratisomāntravallikā
Sanskrit only: no published translation is held for this verse.
अपत्त्रवल्लिका प्रोक्ता काण्डशाखा पयस्विनी । रसवीर्यविपाकेषु सोमवल्लीसमा स्मृता
apattravallikā proktā kāṇḍaśākhā payasvinī / rasavīryavipākeṣu somavallīsamā smṛtā
Sanskrit only: no published translation is held for this verse.
<स्थलपद्मिनी> अथातः स्थलपद्मिन्या दिव्यौषध्या विधिं शृणु । पद्मिनीसदृशा पत्रैः पुष्पैरपि च तादृशी
<sthalapadminī> athātaḥ sthalapadminyā divyauṣadhyā vidhiṃ śṛṇu / padminīsadṛśā patraiḥ puṣpairapi ca tādṛśī
Sanskrit only: no published translation is held for this verse.
भङ्गे चैव स्रवेत्क्षीरं रक्तवर्णं सुशोभनम् । आक्रम्य वामपादेन पश्येद्गगनमण्डलम्
bhaṅge caiva sravetkṣīraṃ raktavarṇaṃ suśobhanam / ākramya vāmapādena paśyedgaganamaṇḍalam
Sanskrit only: no published translation is held for this verse.
पश्येच्च तारकायुक्तं ग्रहनक्षत्रमण्डलम् । लक्षयोजनतो देवि सा ज्ञेया स्थलपद्मिनी
paśyecca tārakāyuktaṃ grahanakṣatramaṇḍalam / lakṣayojanato devi sā jñeyā sthalapadminī
Sanskrit only: no published translation is held for this verse.
<गोनसा> गोनसाकारवल्ली स्याच्चित्रमण्डलमण्डिता । जरारुङ्मृत्युशमनी रसबन्धवधक्षमा
<gonasā> gonasākāravallī syāccitramaṇḍalamaṇḍitā / jarāruṅmṛtyuśamanī rasabandhavadhakṣamā
Sanskrit only: no published translation is held for this verse.
<उच्चटा> अथोच्चटां प्रवक्ष्यामि रसबन्धकरीं प्रिये । एकमेव भवेन्नालं तस्या रोमप्रवेष्टनम्
<uccaṭā> athoccaṭāṃ pravakṣyāmi rasabandhakarīṃ priye / ekameva bhavennālaṃ tasyā romapraveṣṭanam
Sanskrit only: no published translation is held for this verse.
तस्याग्रे च भवेत्पुष्पं शुकतुण्डस्य सन्निभम् । तत्पत्राणि च देवेशि शुकपिच्छनिभानि च
tasyāgre ca bhavetpuṣpaṃ śukatuṇḍasya sannibham / tatpatrāṇi ca deveśi śukapicchanibhāni ca
Sanskrit only: no published translation is held for this verse.
तत्कन्दं कूर्मसंस्थानं क्षीरं सिन्दूरसन्निभम् । जलं स्रवेन्मधूच्छिष्टे तत्समादाय पार्वति
tatkandaṃ kūrmasaṃsthānaṃ kṣīraṃ sindūrasannibham / jalaṃ sravenmadhūcchiṣṭe tatsamādāya pārvati
Sanskrit only: no published translation is held for this verse.
वेधयेत्सर्वलोहानि काञ्चनानि भवन्ति च । <ईश्वरी> ईश्वरीत्युच्यते काचिदीश्वरीतुल्यरूपिणी
vedhayetsarvalohāni kāñcanāni bhavanti ca / <īśvarī> īśvarītyucyate kācidīśvarītulyarūpiṇī
Sanskrit only: no published translation is held for this verse.
भूरिक्षीरपरिस्रावा सबीजरसबन्धिनी । <भूतकेशी> निम्बपत्रसदृक्पत्रा भूतकेशीति कथ्यते
bhūrikṣīraparisrāvā sabījarasabandhinī / <bhūtakeśī> nimbapatrasadṛkpatrā bhūtakeśīti kathyate
Sanskrit only: no published translation is held for this verse.
न वध्यते यया सूतः सूतोऽसौ हि निबन्धकः । <कृष्णलता> भिन्नकज्जलसङ्काशा लता कृष्णलतेत्यसौ
na vadhyate yayā sūtaḥ sūto'sau hi nibandhakaḥ / <kṛṣṇalatā> bhinnakajjalasaṅkāśā latā kṛṣṇalatetyasau
Sanskrit only: no published translation is held for this verse.
निर्बीजमपि बध्नाति रसं सर्वविषापहा । <लशुनवल्ली> नाम्ना लशुनवल्ली च तद्दलैः सदृशच्छदा
nirbījamapi badhnāti rasaṃ sarvaviṣāpahā / <laśunavallī> nāmnā laśunavallī ca taddalaiḥ sadṛśacchadā
Sanskrit only: no published translation is held for this verse.
क्षरत्क्षीरा सुकन्दा च रसं बध्नाति वेगतः । <रुदन्ती> चणपत्रोपमैः पत्रैः पुष्पैरपि च तादृशी
kṣaratkṣīrā sukandā ca rasaṃ badhnāti vegataḥ / <rudantī> caṇapatropamaiḥ patraiḥ puṣpairapi ca tādṛśī
Sanskrit only: no published translation is held for this verse.
रुदन्ती नाम विख्याता ह्यधस्ताज्जलवर्षिणी । रुदन्तीव जनान्दृष्ट्वा मृत्युदैन्यजराकुलान्
rudantī nāma vikhyātā hyadhastājjalavarṣiṇī / rudantīva janāndṛṣṭvā mṛtyudainyajarākulān
Sanskrit only: no published translation is held for this verse.
चतुर्विधा तु सा ज्ञेया पीता रक्ता सितासिता । जारिताभ्रं रसं हन्याद्बध्नाति च रसायनी
caturvidhā tu sā jñeyā pītā raktā sitāsitā / jāritābhraṃ rasaṃ hanyādbadhnāti ca rasāyanī
Sanskrit only: no published translation is held for this verse.
मुसलीकन्दवत्कन्दा तद्दलाकारवद्दला । सुक्षीरा रोमशा सोक्ता वाराही रसबन्धनी
musalīkandavatkandā taddalākāravaddalā / sukṣīrā romaśā soktā vārāhī rasabandhanī
Sanskrit only: no published translation is held for this verse.
<सप्तपत्त्री> सप्तपल्लवसम्पूर्णां सप्तपत्त्रीत्यसौ मता । रसायनी जराघ्नी च बध्यते पारदस्तया
<saptapattrī> saptapallavasampūrṇāṃ saptapattrītyasau matā / rasāyanī jarāghnī ca badhyate pāradastayā
Sanskrit only: no published translation is held for this verse.
<नागिनी> नागिनीत्युदिता वल्ली नागभोगसमाङ्गिका । सर्पादिकविषघ्नी च सा स्वच्छरसबन्धिनी
<nāginī> nāginītyuditā vallī nāgabhogasamāṅgikā / sarpādikaviṣaghnī ca sā svaccharasabandhinī
Sanskrit only: no published translation is held for this verse.
<सर्पिणी> सर्पिणी लतिका चान्या सर्पवद्वक्रयष्टिका । सक्षीरा स्निग्धपत्रा च बालपारदबन्धिनी
<sarpiṇī> sarpiṇī latikā cānyā sarpavadvakrayaṣṭikā / sakṣīrā snigdhapatrā ca bālapāradabandhinī
Sanskrit only: no published translation is held for this verse.
<छत्त्रिणी> छत्रवद्दण्डपत्रा या नातिनीचा न चोन्नता । सुक्षीरा छत्त्रिणी नाम रसबन्धकरी मता
<chattriṇī> chatravaddaṇḍapatrā yā nātinīcā na connatā / sukṣīrā chattriṇī nāma rasabandhakarī matā
Sanskrit only: no published translation is held for this verse.
<गोशृङ्गी> पर्वतेऽश्मसमुद्भूता गोकन्दाकृतिकन्दयुक् । क्षता मुञ्चति सा क्षीरं गोशृङ्गी रसबन्धिनी
<gośṛṅgī> parvate'śmasamudbhūtā gokandākṛtikandayuk / kṣatā muñcati sā kṣīraṃ gośṛṅgī rasabandhinī
Sanskrit only: no published translation is held for this verse.
<ज्योतिर्लता> ज्योतिर्नाम्नी त्रिधा प्रोक्ता वृक्षकन्दतृणात्मिका । गिरौ ज्वलति सा रात्रौ लतापारदबन्धिनी
<jyotirlatā> jyotirnāmnī tridhā proktā vṛkṣakandatṛṇātmikā / girau jvalati sā rātrau latāpāradabandhinī
Sanskrit only: no published translation is held for this verse.
<रक्तवल्ली> रक्तक्षीरदलाङ्गा या नातिविस्तरवल्लिका । रक्तवल्लीत्यसौ दिव्या निर्दिष्टा रसबन्धिनी
<raktavallī> raktakṣīradalāṅgā yā nātivistaravallikā / raktavallītyasau divyā nirdiṣṭā rasabandhinī
Sanskrit only: no published translation is held for this verse.
<पद्मवल्ली> या पद्मपत्राकृतिपत्रवल्ली सा पत्रवल्लीत्युदिता रसज्ञैः । सक्षीरकन्दा सलिलोद्भवा च क्षितौ न तिष्ठेद्रसबन्धनी सा
<padmavallī> yā padmapatrākṛtipatravallī sā patravallītyuditā rasajñaiḥ / sakṣīrakandā salilodbhavā ca kṣitau na tiṣṭhedrasabandhanī sā
Sanskrit only: no published translation is held for this verse.
<काकिनी> स्थूलकण्टकवर्णाढ्या सा प्रोक्ता काकिनी लता । रसबन्धकरी सैषा जरामृत्युविनाशिनी
<kākinī> sthūlakaṇṭakavarṇāḍhyā sā proktā kākinī latā / rasabandhakarī saiṣā jarāmṛtyuvināśinī
Sanskrit only: no published translation is held for this verse.
<चान्डाली> चाण्डालीति विनिर्दिष्टा त्रिचतुःपत्रधारिणी । सा च रक्ता क्षीरकन्दा तया सूतो निबध्यते
<cānḍālī> cāṇḍālīti vinirdiṣṭā tricatuḥpatradhāriṇī / sā ca raktā kṣīrakandā tayā sūto nibadhyate
Sanskrit only: no published translation is held for this verse.
प्रोक्तश् चण्डालकन्दः स्याद् एकपत्रो द्विपत्त्रकः । त्रिपत्त्रोऽथ चतुष्पत्त्रः पञ्चपत्त्रश्च भेदतः
proktaś caṇḍālakandaḥ syād ekapatro dvipattrakaḥ / tripattro'tha catuṣpattraḥ pañcapattraśca bhedataḥ
Sanskrit only: no published translation is held for this verse.
<ताम्रवल्ली> ताम्रवर्णलतापत्रपुष्पक्षीरसमन्विता । सा ताम्रवल्लिका प्रोक्ता रसलोहादिसाधनी
<tāmravallī> tāmravarṇalatāpatrapuṣpakṣīrasamanvitā / sā tāmravallikā proktā rasalohādisādhanī
Sanskrit only: no published translation is held for this verse.
<पीतवल्ली> पीतपत्रलतापुष्परसयुक्तातिदुर्लभा । सा पीतवल्लिकेत्युक्ता रसबन्धविधौ हिता
<pītavallī> pītapatralatāpuṣparasayuktātidurlabhā / sā pītavalliketyuktā rasabandhavidhau hitā
Sanskrit only: no published translation is held for this verse.
<विजया> सितक्षीराढकीपत्रछदना नातिविस्तृता । विख्याता विजयेत्येषा रसबन्धविधौ हिता
<vijayā> sitakṣīrāḍhakīpatrachadanā nātivistṛtā / vikhyātā vijayetyeṣā rasabandhavidhau hitā
Sanskrit only: no published translation is held for this verse.
<महौषधी> त्रिकोणकन्दसंयुक्ता चित्रकच्छदनच्छदा । महौषधीति सा प्रोक्ता रसबन्धे परं हिता
<mahauṣadhī> trikoṇakandasaṃyuktā citrakacchadanacchadā / mahauṣadhīti sā proktā rasabandhe paraṃ hitā
Sanskrit only: no published translation is held for this verse.
<देवदाली> शिखिकण्ठाभपत्राढ्या चन्दनामोदमेदुरा । देवदालीत्यसौ दिव्या रसं बध्नाति सा क्षणात्
<devadālī> śikhikaṇṭhābhapatrāḍhyā candanāmodamedurā / devadālītyasau divyā rasaṃ badhnāti sā kṣaṇāt
Sanskrit only: no published translation is held for this verse.
<नवनीतकगन्धी> नवनीतकगन्धीति तिक्ता म्रक्षणगन्धिनी । सक्षीरा रक्तपुष्पा च रसेन्द्रो बध्यते तया
<navanītakagandhī> navanītakagandhīti tiktā mrakṣaṇagandhinī / sakṣīrā raktapuṣpā ca rasendro badhyate tayā
Sanskrit only: no published translation is held for this verse.
<गरुडवल्ली> सक्षीरा रक्तपुष्पा च बदरीदलवद्दला । उक्ता गारुडवल्लीति शीघ्रं बध्नाति पारदम्
<garuḍavallī> sakṣīrā raktapuṣpā ca badarīdalavaddalā / uktā gāruḍavallīti śīghraṃ badhnāti pāradam
Sanskrit only: no published translation is held for this verse.
<तुम्बिनी> तुम्बिनीत्युदिता वल्ली तत्पत्रकुसुमान्विता । तिक्तरक्तपयोयुक्ता तत्फला रसबन्धिनी
<tumbinī> tumbinītyuditā vallī tatpatrakusumānvitā / tiktaraktapayoyuktā tatphalā rasabandhinī
Sanskrit only: no published translation is held for this verse.
<भूतुम्बिनी> या तुम्बिनीपत्रसमानपत्रा भूतुम्बिनी नातिविसर्पिणी सा । निम्बूसमानैश्च फलैरुपेता सर्वामयघ्नी रसबन्धनी च
<bhūtumbinī> yā tumbinīpatrasamānapatrā bhūtumbinī nātivisarpiṇī sā / nimbūsamānaiśca phalairupetā sarvāmayaghnī rasabandhanī ca
Sanskrit only: no published translation is held for this verse.
<गन्धर्वा> एरण्डपत्रवत्पत्रा सक्षीरा नातिविस्तृता । गन्धर्वेत्युदिता सा हि तया बन्धं रसो व्रजेत्
<gandharvā> eraṇḍapatravatpatrā sakṣīrā nātivistṛtā / gandharvetyuditā sā hi tayā bandhaṃ raso vrajet
Sanskrit only: no published translation is held for this verse.
<व्याघ्रपादी> व्याघ्राङ्घ्रिसमपत्रा या रक्तपुष्पा पयस्विनी । व्याघ्रपादीति निर्दिष्टा रसं बध्नाति निश्चितम्
<vyāghrapādī> vyāghrāṅghrisamapatrā yā raktapuṣpā payasvinī / vyāghrapādīti nirdiṣṭā rasaṃ badhnāti niścitam
Sanskrit only: no published translation is held for this verse.
<महौषधी> सप्तच्छदसदृक्पत्रा कृशाङ्गी नातिविस्तृता । महौषधीत्यसौ प्रोक्ता रसं बध्नाति हन्ति च
<mahauṣadhī> saptacchadasadṛkpatrā kṛśāṅgī nātivistṛtā / mahauṣadhītyasau proktā rasaṃ badhnāti hanti ca
Sanskrit only: no published translation is held for this verse.
<गोमारी> गोमारीनामिका वल्ली वेणुपत्रसमच्छदा । तस्या मूलं समासाद्य शस्तः सूतो निबध्यते
<gomārī> gomārīnāmikā vallī veṇupatrasamacchadā / tasyā mūlaṃ samāsādya śastaḥ sūto nibadhyate
Sanskrit only: no published translation is held for this verse.
<त्रिशूली> त्रिशूलाकारपत्रा या शम्याकफलवत्फला । त्रिशूलीति समाख्याता विख्याता रसबन्धने
<triśūlī> triśūlākārapatrā yā śamyākaphalavatphalā / triśūlīti samākhyātā vikhyātā rasabandhane
Sanskrit only: no published translation is held for this verse.
<रुतसी> रुतसीपत्रवत्पत्रफला सा क्षीरकन्दयुक् । रुतसी वल्लिकेत्युक्ता गिरिजा रसबन्धनी
<rutasī> rutasīpatravatpatraphalā sā kṣīrakandayuk / rutasī valliketyuktā girijā rasabandhanī
Sanskrit only: no published translation is held for this verse.
<त्रिदण्डी> सुपुष्पा तिलकोपेता रक्तत्यत्रिफलान्विता । रसबन्धविधौ प्रोक्ता त्रिदण्डीति कृताभिधा
<tridaṇḍī> supuṣpā tilakopetā raktatyatriphalānvitā / rasabandhavidhau proktā tridaṇḍīti kṛtābhidhā
Sanskrit only: no published translation is held for this verse.
<भृङ्गवल्ली> भृङ्गवद्वर्णपत्राढ्या क्षीरिणी पीतपुष्पिका । भृङ्गवल्लीति सा प्रोक्ता प्रयुक्ता रसबन्धने
<bhṛṅgavallī> bhṛṅgavadvarṇapatrāḍhyā kṣīriṇī pītapuṣpikā / bhṛṅgavallīti sā proktā prayuktā rasabandhane
Sanskrit only: no published translation is held for this verse.
<चमरिका> चमराकारपत्राढ्या क्षीरयुक्चन्द्रधारिणी । लता चमरिका नाम सा च बध्नाति पारदम्
<camarikā> camarākārapatrāḍhyā kṣīrayukcandradhāriṇī / latā camarikā nāma sā ca badhnāti pāradam
Sanskrit only: no published translation is held for this verse.
<करवीरलता> हयमारसमाकारदलपुष्पवती लता । करवीरलतेत्युक्ता नितरां सूतबन्धिनी
<karavīralatā> hayamārasamākāradalapuṣpavatī latā / karavīralatetyuktā nitarāṃ sūtabandhinī
Sanskrit only: no published translation is held for this verse.
<वज्रवल्ली> कोरण्डपत्रछदनोपमानप्रसूनपत्रा च सदुग्धकन्दा । सा वज्रवल्ली कटुतिक्तसारा वज्राङ्कपत्रा रसबन्धिनी च
<vajravallī> koraṇḍapatrachadanopamānaprasūnapatrā ca sadugdhakandā / sā vajravallī kaṭutiktasārā vajrāṅkapatrā rasabandhinī ca
Sanskrit only: no published translation is held for this verse.
<वारवल्ली> रक्तक्षीरवती बिल्वदलोपमदलान्विता । वारवल्लीति सा सूतबन्धनी रोगनाशिनी
<vāravallī> raktakṣīravatī bilvadalopamadalānvitā / vāravallīti sā sūtabandhanī roganāśinī
Sanskrit only: no published translation is held for this verse.
<रोहिणी> शणपुष्पदलाकारदशपुष्पा च दुग्धयुक् । सा रोहिणीति निर्दिष्टा रसराजस्य बन्धनी
<rohiṇī> śaṇapuṣpadalākāradaśapuṣpā ca dugdhayuk / sā rohiṇīti nirdiṣṭā rasarājasya bandhanī
Sanskrit only: no published translation is held for this verse.
<बिल्विनी> ज्योतिष्मतीदलाकारवर्णपर्णा यशस्विनी । रसबन्धविधौ प्रोक्ता बिल्विनीति निगद्यते
<bilvinī> jyotiṣmatīdalākāravarṇaparṇā yaśasvinī / rasabandhavidhau proktā bilvinīti nigadyate
Sanskrit only: no published translation is held for this verse.
<गोरोचनलता> गोरोचनप्रभायुक्तदलवल्लीसमन्विता । गोरोचनलता भूतमोचनी रसबन्धनी
<gorocanalatā> gorocanaprabhāyuktadalavallīsamanvitā / gorocanalatā bhūtamocanī rasabandhanī
Sanskrit only: no published translation is held for this verse.
<करीरी> श्रीशैलशिखरोद्भूता मार्कण्डीसदृशौषधी । रक्तं क्षीरं क्षता मुञ्चेत्करीरी रसबन्धिनी
<karīrī> śrīśailaśikharodbhūtā mārkaṇḍīsadṛśauṣadhī / raktaṃ kṣīraṃ kṣatā muñcetkarīrī rasabandhinī
Sanskrit only: no published translation is held for this verse.
<अक्षरा> पत्त्रसीसा पत्त्रवत्पत्रा त्रिवर्षात्फलदायिनी । अक्षरेति समाख्याता रसस्यातिनिबन्धिनी
<akṣarā> pattrasīsā pattravatpatrā trivarṣātphaladāyinī / akṣareti samākhyātā rasasyātinibandhinī
Sanskrit only: no published translation is held for this verse.
<अपत्त्रा> सोमवल्लीव निष्पत्रा कज्जलाभरसान्विता । अपत्त्रासौ भवेद् विन्ध्ये नात्युच्चा रसबन्धिनी
<apattrā> somavallīva niṣpatrā kajjalābharasānvitā / apattrāsau bhaved vindhye nātyuccā rasabandhinī
Sanskrit only: no published translation is held for this verse.
आद्ये वर्षे भवेदम्ला भवेत्तिक्ता द्वितीयके । तृतीयेऽब्दे च मधुरैः फलैर्युक्ता प्रजायते
ādye varṣe bhavedamlā bhavettiktā dvitīyake / tṛtīye'bde ca madhuraiḥ phalairyuktā prajāyate
Sanskrit only: no published translation is held for this verse.
पित्तज्वरहरा सद्यः सुपत्रफलसंयुता । <कुटजवल्ली> लता कुटजवल्लीति तत्फला तद्दलान्विता
pittajvaraharā sadyaḥ supatraphalasaṃyutā / <kuṭajavallī> latā kuṭajavallīti tatphalā taddalānvitā
Sanskrit only: no published translation is held for this verse.
मधुरा रुधिरग्रन्थिः सूतराजनिबन्धिनी । <मूलकन्दा> मूलकन्देति विख्याता मूलवत्फलपत्त्रिणी
madhurā rudhiragranthiḥ sūtarājanibandhinī / <mūlakandā> mūlakandeti vikhyātā mūlavatphalapattriṇī
Sanskrit only: no published translation is held for this verse.
लता क्षीरान्विता सूतबन्धनं कुरुते ध्रुवम् । <ब्राह्मणी> पारिजाताद्रिजा वल्ली शतपुष्पदलच्छदा
latā kṣīrānvitā sūtabandhanaṃ kurute dhruvam / <brāhmaṇī> pārijātādrijā vallī śatapuṣpadalacchadā
Sanskrit only: no published translation is held for this verse.
कृष्णक्षीरफला प्रोक्ता ब्राह्मणी रसबन्धिनी । <मुनिवल्ली> अगस्तिपत्रतत्पत्रा तद्रूपारुणपुष्पिणी
kṛṣṇakṣīraphalā proktā brāhmaṇī rasabandhinī / <munivallī> agastipatratatpatrā tadrūpāruṇapuṣpiṇī
Sanskrit only: no published translation is held for this verse.
घृतगन्धा रसघ्नी सा मुनिवल्लीति कथ्यते । <निम्बका> दलैः पुष्पैः फलैर्वल्ली निंबवृक्षस्य सन्निभा
ghṛtagandhā rasaghnī sā munivallīti kathyate / <nimbakā> dalaiḥ puṣpaiḥ phalairvallī niṃbavṛkṣasya sannibhā
Sanskrit only: no published translation is held for this verse.
तन्मूलैर्बध्यते सूतः सा प्रोक्ता निम्बका लता । <तिलकन्दा> तिलकन्देति विख्याता मूलवत्फलपत्त्रिणी
tanmūlairbadhyate sūtaḥ sā proktā nimbakā latā / <tilakandā> tilakandeti vikhyātā mūlavatphalapattriṇī
Sanskrit only: no published translation is held for this verse.
लता क्षीरवती सूतं निबध्नात्यातपे खरे । <अतसीवल्लिका> अतस्य इव पुष्पाणि फलानि च दलानि च
latā kṣīravatī sūtaṃ nibadhnātyātape khare / <atasīvallikā> atasya iva puṣpāṇi phalāni ca dalāni ca
Sanskrit only: no published translation is held for this verse.
अतसीवल्लिका सा हि पारदस्य निबन्धिनी । <बोधिलता> उक्ता बोधिलता बोधिपत्त्रदुग्धेन संयुता
atasīvallikā sā hi pāradasya nibandhinī / <bodhilatā> uktā bodhilatā bodhipattradugdhena saṃyutā
Sanskrit only: no published translation is held for this verse.
बध्नाति रसराजं सा दानवेन्द्रमिवाच्युतः । <मद्यगन्धा> मद्यगन्धेति विख्याता निष्पत्रा फलपत्रयुक्
badhnāti rasarājaṃ sā dānavendramivācyutaḥ / <madyagandhā> madyagandheti vikhyātā niṣpatrā phalapatrayuk
Sanskrit only: no published translation is held for this verse.
तस्याः कन्दो रसं शीघ्रं बन्धनं नयति ध्रुवम् । <कूर्मलता> उक्ता कूर्मलता कूर्मरूपकन्दा पयोऽन्विता
tasyāḥ kando rasaṃ śīghraṃ bandhanaṃ nayati dhruvam / <kūrmalatā> uktā kūrmalatā kūrmarūpakandā payo'nvitā
Sanskrit only: no published translation is held for this verse.
मल्लिकोपमतत्पत्रप्रसवा रसबन्धिनी । <माधवी> माधवीमूलवन्मूला नागवल्लीदलान्विता
mallikopamatatpatraprasavā rasabandhinī / <mādhavī> mādhavīmūlavanmūlā nāgavallīdalānvitā
Sanskrit only: no published translation is held for this verse.
माधवीत्युदिता वल्ली तन्मूलैर्बध्यते रसः । <विशाला> श्वेतपत्रतया वल्ली श्वेतपुष्पफला तथा
mādhavītyuditā vallī tanmūlairbadhyate rasaḥ / <viśālā> śvetapatratayā vallī śvetapuṣpaphalā tathā
Sanskrit only: no published translation is held for this verse.
विशालेति विनिर्दिष्टा सापि पारदबन्धिनी । <महानागा> नागकुण्डलवत्कन्दा तत्फणासदृशच्छदा
viśāleti vinirdiṣṭā sāpi pāradabandhinī / <mahānāgā> nāgakuṇḍalavatkandā tatphaṇāsadṛśacchadā
Sanskrit only: no published translation is held for this verse.
महानागेत्यसौ वल्ली विनिबध्नाति पारदम् । <मण्डूकलतिका> मण्डूकाकारवत्कन्दा मण्डूकीदलवद्दला
mahānāgetyasau vallī vinibadhnāti pāradam / <maṇḍūkalatikā> maṇḍūkākāravatkandā maṇḍūkīdalavaddalā
Sanskrit only: no published translation is held for this verse.
मण्डूकलतिकेत्येषा तन्मूलैर्बध्यते रसः । <उदुम्बरलता> उदुम्बरफलाकारफलवद्दलवद्दला
maṇḍūkalatiketyeṣā tanmūlairbadhyate rasaḥ / <udumbaralatā> udumbaraphalākāraphalavaddalavaddalā
Sanskrit only: no published translation is held for this verse.
सोदुम्बरलतेत्युक्ता सूतराजस्य बन्धिनी । <चित्रवल्ली> या दुग्धकन्दा वटपत्रपत्रा विचित्रपर्णोरुफला सुदीर्घा । सा चित्रवल्लीत्युदिता रसेन्द्रो निबध्यते तत्फलमध्यसंस्थः
sodumbaralatetyuktā sūtarājasya bandhinī / <citravallī> yā dugdhakandā vaṭapatrapatrā vicitraparṇoruphalā sudīrghā / sā citravallītyuditā rasendro nibadhyate tatphalamadhyasaṃsthaḥ
Sanskrit only: no published translation is held for this verse.
चतुःषष्टिरिति प्रोक्ता दिव्यौषध्यो महाबलाः
catuḥṣaṣṭiriti proktā divyauṣadhyo mahābalāḥ
Sanskrit only: no published translation is held for this verse.
आभिर्बद्धो रसो न्ःणां देहलोहार्थसाधकः । सोमवल्ली सोमवृक्षः स्थलपद्मिनिका ततः
ābhirbaddho raso nḥṇāṃ dehalohārthasādhakaḥ / somavallī somavṛkṣaḥ sthalapadminikā tataḥ
Sanskrit only: no published translation is held for this verse.
गोनसा कारवल्ली च उच्चटा ईश्वरी ततः । भूतकेशी कृष्णलता ज्ञेया लशुनवल्लरी
gonasā kāravallī ca uccaṭā īśvarī tataḥ / bhūtakeśī kṛṣṇalatā jñeyā laśunavallarī
Sanskrit only: no published translation is held for this verse.
रुदन्ती चैव वाराही सप्तपत्त्री च नागिनी । सर्पिणी छत्त्रिणी चैव गोशृङ्गी सर्वसिद्धिदा
rudantī caiva vārāhī saptapattrī ca nāginī / sarpiṇī chattriṇī caiva gośṛṅgī sarvasiddhidā
Sanskrit only: no published translation is held for this verse.
ज्योतिर्नाम्नी त्रिधा रक्तवल्लरी पत्रवल्लरी । काकिनी चैव चाण्डाली वल्लरी ताम्रवल्लरी
jyotirnāmnī tridhā raktavallarī patravallarī / kākinī caiva cāṇḍālī vallarī tāmravallarī
Sanskrit only: no published translation is held for this verse.
पीतवल्ली च विजया विज्ञेया च महौषधी । ज्ञातव्या देवदाली च स्यान्नवानीतगन्धिनी
pītavallī ca vijayā vijñeyā ca mahauṣadhī / jñātavyā devadālī ca syānnavānītagandhinī
Sanskrit only: no published translation is held for this verse.
ज्ञेया गरुडवल्ली च तुम्बिनी भूमितुंबिनी । गन्धर्वा व्याघ्रपादी च विज्ञेया च महौषधी
jñeyā garuḍavallī ca tumbinī bhūmituṃbinī / gandharvā vyāghrapādī ca vijñeyā ca mahauṣadhī
Sanskrit only: no published translation is held for this verse.
गोमारी च त्रिशूली च रुतसी च त्रिदण्डिका । भृङ्गवल्ली चमरिका करवीरलता ततः
gomārī ca triśūlī ca rutasī ca tridaṇḍikā / bhṛṅgavallī camarikā karavīralatā tataḥ
Sanskrit only: no published translation is held for this verse.
वज्रवल्ली वारवल्ली रोहिणी बिल्विनी तथा । गोरोचनलता चैव करीरी चाक्षरा तथा
vajravallī vāravallī rohiṇī bilvinī tathā / gorocanalatā caiva karīrī cākṣarā tathā
Sanskrit only: no published translation is held for this verse.
अपत्त्री कुटजा वल्ली मूलकन्दा च ब्राह्मणी । घृतगन्धा निम्बवल्ली तिलकन्दातसी तथा
apattrī kuṭajā vallī mūlakandā ca brāhmaṇī / ghṛtagandhā nimbavallī tilakandātasī tathā
Sanskrit only: no published translation is held for this verse.
बोधिवल्ली मद्यगन्धा कूर्मवल्ली च माधवी । विशाला च महानागा ज्ञेया मण्डूकवल्ली
bodhivallī madyagandhā kūrmavallī ca mādhavī / viśālā ca mahānāgā jñeyā maṇḍūkavallī
Sanskrit only: no published translation is held for this verse.
उदुम्बरलता चित्रवल्ली चैव सुरार्चिते । चतुःषष्टिरिति प्रोक्ता दिव्यौषध्यो महाबलाः
udumbaralatā citravallī caiva surārcite / catuḥṣaṣṭiriti proktā divyauṣadhyo mahābalāḥ
Sanskrit only: no published translation is held for this verse.