पुरुषे ह वा अयम् आदितो गर्भो भवति यद् एतद् रेतः । तद् एतत् सर्वेभ्यो ऽङ्गेभ्यस् तेजः सम्भूतम् आत्मन्य् एवात्मानं बिभर्ति । तद् यदा स्त्रियां सिञ्चत्य् अथैनज् जनयति । तद् अस्य प्रथमं जन्म
puruṣe ha vā ayam ādito garbho bhavati yad etad retaḥ | tad etat sarvebhyo 'ṅgebhyas tejaḥ sambhūtam ātmany evātmānaṃ bibharti | tad yadā striyāṃ siñcaty athainaj janayati | tad asya prathamaṃ janma
Sanskrit only: no published translation is held for this verse.
तत् स्त्रिया आत्मभूयं गच्छति यथा स्वम् अङ्गं तथा । तस्माद् एनां न हिनस्ति । सास्यैतम् आत्मानम् अत्र गतं भावयति
tat striyā ātmabhūyaṃ gacchati yathā svam aṅgaṃ tathā | tasmād enāṃ na hinasti | sāsyaitam ātmānam atra gataṃ bhāvayati
Sanskrit only: no published translation is held for this verse.
सा भावयित्री भावयितव्या भवति । तं स्त्री गर्भं बिभर्ति । सो ऽग्र एव कुमारं जन्मनो ऽग्रे ऽधि भावयति । स यत् कुमारं जन्मनो ऽग्रे ऽधि भावयत्य् आत्मानम् एव तद् भावयत्य् एषां लोकानां सन्तत्यै । एवं सन्तता हीमे लोकाः । तद् अस्य द्वितीयं जन्म
sā bhāvayitrī bhāvayitavyā bhavati | taṃ strī garbhaṃ bibharti | so 'gra eva kumāraṃ janmano 'gre 'dhi bhāvayati | sa yat kumāraṃ janmano 'gre 'dhi bhāvayaty ātmānam eva tad bhāvayaty eṣāṃ lokānāṃ santatyai | evaṃ santatā hīme lokāḥ | tad asya dvitīyaṃ janma
Sanskrit only: no published translation is held for this verse.
सो ऽस्यायम् आत्मा पुण्येभ्यः कर्मेभ्यः प्रतिधीयते । अथास्यायम् इतर आत्मा कृतकृत्यो वयोगतः प्रैति । स इतः प्रयन्न् एव पुनर् जायते । तद् अस्य तृतीयं जन्म
so 'syāyam ātmā puṇyebhyaḥ karmebhyaḥ pratidhīyate | athāsyāyam itara ātmā kṛtakṛtyo vayogataḥ praiti | sa itaḥ prayann eva punar jāyate | tad asya tṛtīyaṃ janma
Sanskrit only: no published translation is held for this verse.
तद् उक्तम् ऋषिणा -- गर्भे नु सन्न् अन्व् एषाम् अवेदमहं देवानां जनिमानि विश्वा । शतं मा पुर आयसीर् अरक्षन्नध श्येनो जवसा निर् अदीयम् । इति । गर्भ एवैतच् छयानो वामदेव एवम् उवाच
tad uktam ṛṣiṇā -- garbhe nu sann anv eṣām avedamahaṃ devānāṃ janimāni viśvā | śataṃ mā pura āyasīr arakṣannadha śyeno javasā nir adīyam | iti | garbha evaitac chayāno vāmadeva evam uvāca
Sanskrit only: no published translation is held for this verse.
स एवं विद्वान् अस्माच् छरीरभेदाद् ऊर्ध्वम् उत्क्रम्यामुष्मिन् स्वर्गे लोके सर्वान् कामान् आप्त्वामृतः समभवत् समभवत्
sa evaṃ vidvān asmāc charīrabhedād ūrdhvam utkramyāmuṣmin svarge loke sarvān kāmān āptvāmṛtaḥ samabhavat samabhavat
Sanskrit only: no published translation is held for this verse.