Atharvaveda Saṃhitā (Śaunaka) 14

बृहस्पतिनावसृष्टां विश्वे देवा अधारयन् । पयो गोषु प्रविष्टं यत् तेनेमां सं सृजामसि ॥५७॥

bṛhaspatināvasṛṣṭāṃ viśve devā adhārayan | payo goṣu praviṣṭaṃ yat tenemāṃ saṃ sṛjāmasi ||57||

Sanskrit only: no published translation is held for this verse.

बृहस्पतिनावसृष्टां विश्वे देवा अधारयन् । रसो गोषु प्रविष्टो यस् तेनेमां सं सृजामसि ॥५८॥

bṛhaspatināvasṛṣṭāṃ viśve devā adhārayan | raso goṣu praviṣṭo yas tenemāṃ saṃ sṛjāmasi ||58||

Sanskrit only: no published translation is held for this verse.

यदीमे केशिनो जना गृहे ते समनर्तिषू रोदेन कृण्वन्तो ऽघम् । अग्निष् ट्वा तस्माद् एनसः सविता च प्र मुञ्चताम् ॥५९॥

yadīme keśino janā gṛhe te samanartiṣū rodena kṛṇvanto 'gham | agniṣ ṭvā tasmād enasaḥ savitā ca pra muñcatām ||59||

Sanskrit only: no published translation is held for this verse.

यदीयं दुहिता तव विकेश्य् अरुदद् गृहे रोदेन कृण्वत्य् अघम् । अग्निष् ट्वा तस्माद् एनसः सविता च प्र मुञ्चताम् ॥६०॥ १२

yadīyaṃ duhitā tava vikeśy arudad gṛhe rodena kṛṇvaty agham | agniṣ ṭvā tasmād enasaḥ savitā ca pra muñcatām ||60|| 12

Sanskrit only: no published translation is held for this verse.

यज् जामयो यद् युवतयो गृहे ते समनर्तिषू रोदेन कृण्वतीर् अघम् । अग्निष् ट्वा तस्माद् एनसः सविता च प्र मुञ्चताम् ॥६१॥

yaj jāmayo yad yuvatayo gṛhe te samanartiṣū rodena kṛṇvatīr agham | agniṣ ṭvā tasmād enasaḥ savitā ca pra muñcatām ||61||

Sanskrit only: no published translation is held for this verse.

यत् ते प्रजायां पशुषु यद् वा गृहेषु निष्ठितम् अघकृद्भिर् अघं कृतम् । अग्निष् ट्वा तस्माद् एनसः सविता च प्र मुञ्चताम् ॥६२॥

yat te prajāyāṃ paśuṣu yad vā gṛheṣu niṣṭhitam aghakṛdbhir aghaṃ kṛtam | agniṣ ṭvā tasmād enasaḥ savitā ca pra muñcatām ||62||

Sanskrit only: no published translation is held for this verse.

इयं नार्य् उप ब्रूते पूल्यान्य् आवपन्तिका । दीर्घायुर् अस्तु मे पतिर् जीवाति शरदः शतम् ॥६३॥

iyaṃ nāry upa brūte pūlyāny āvapantikā | dīrghāyur astu me patir jīvāti śaradaḥ śatam ||63||

Sanskrit only: no published translation is held for this verse.

इहेमाव् इन्द्र सं नुद चक्रवाकेव दंपती । प्रजयैनौ स्वस्तकौ विश्वम् आयुर् व्य् अश्नुताम् ॥६४॥

ihemāv indra saṃ nuda cakravākeva daṃpatī | prajayainau svastakau viśvam āyur vy aśnutām ||64||

Sanskrit only: no published translation is held for this verse.

यद् आसन्द्याम् उपधाने यद् वोपवासने कृतम् । विवाहे कृत्यां यां चक्रुर् आस्नाने तां नि दध्मसि ॥६५॥

yad āsandyām upadhāne yad vopavāsane kṛtam | vivāhe kṛtyāṃ yāṃ cakrur āsnāne tāṃ ni dadhmasi ||65||

Sanskrit only: no published translation is held for this verse.

यद् दुष्कृतं यच् छमलं विवाहे वहतौ च यत् । तत् संभलस्य कम्बले मृज्महे दुरितं वयम् ॥६६॥

yad duṣkṛtaṃ yac chamalaṃ vivāhe vahatau ca yat | tat saṃbhalasya kambale mṛjmahe duritaṃ vayam ||66||

Sanskrit only: no published translation is held for this verse.

संभले मलं सादयित्वा कम्बले दुरितं वयम् । अभूम यज्ञियाः शुद्धाः प्र ण आयूंषि तारिषत् ॥६७॥

saṃbhale malaṃ sādayitvā kambale duritaṃ vayam | abhūma yajñiyāḥ śuddhāḥ pra ṇa āyūṃṣi tāriṣat ||67||

Sanskrit only: no published translation is held for this verse.

कृत्रिमः कण्टकः शतदन् य एषः । अपास्याः केश्यं मलम् अप शीर्षण्यं लिखात् ॥६८॥

kṛtrimaḥ kaṇṭakaḥ śatadan ya eṣaḥ | apāsyāḥ keśyaṃ malam apa śīrṣaṇyaṃ likhāt ||68||

Sanskrit only: no published translation is held for this verse.

अङ्गादङ्गाद् वयम् अस्या अप यक्ष्मं नि दध्मसि । तन् मा प्रापत् पृथिवीं मोत देवान् दिवं मा प्रापद् उर्व् अन्तरिक्षम् । अपो मा प्रापन् मलम् एतद् अग्ने यमम् मा प्रापत् पितॄंश् च सर्वान् ॥६९॥

aṅgādaṅgād vayam asyā apa yakṣmaṃ ni dadhmasi | tan mā prāpat pṛthivīṃ mota devān divaṃ mā prāpad urv antarikṣam | apo mā prāpan malam etad agne yamam mā prāpat pitṝṃś ca sarvān ||69||

Sanskrit only: no published translation is held for this verse.

सं त्वा नह्यामि पयसा पृथिव्याः सं त्वा नह्यामि पयसौषधीनाम् । सं त्वा नह्यामि प्रजया धनेन सा संनद्धा सनुहि वाजम् एमम् ॥७०॥ १३

saṃ tvā nahyāmi payasā pṛthivyāḥ saṃ tvā nahyāmi payasauṣadhīnām | saṃ tvā nahyāmi prajayā dhanena sā saṃnaddhā sanuhi vājam emam ||70|| 13

Sanskrit only: no published translation is held for this verse.

अमो ऽहम् अस्मि सा त्वं सामाहम् अस्म्य् ऋक् त्वं द्यौर् अहं पृथिवी त्वम् । ताव् इह सं भवाव प्रजाम् आ जनयावहै ॥७१॥

amo 'ham asmi sā tvaṃ sāmāham asmy ṛk tvaṃ dyaur ahaṃ pṛthivī tvam | tāv iha saṃ bhavāva prajām ā janayāvahai ||71||

Sanskrit only: no published translation is held for this verse.

जनियन्ति नाव् अग्रवः पुत्रियन्ति सुदानवः । अरिष्टासू सचेवहि बृहते वाजसातये ॥७२॥

janiyanti nāv agravaḥ putriyanti sudānavaḥ | ariṣṭāsū sacevahi bṛhate vājasātaye ||72||

Sanskrit only: no published translation is held for this verse.

ये पितरो वधूदर्शा इमं वहतुम् आगमन् । ते अस्यै वध्वै संपत्न्यै प्रजावच् छर्म यछन्तु ॥७३॥

ye pitaro vadhūdarśā imaṃ vahatum āgaman | te asyai vadhvai saṃpatnyai prajāvac charma yachantu ||73||

Sanskrit only: no published translation is held for this verse.

येदं पूर्वागन् रशनायमाना प्रजाम् अस्यै द्रविणं चेह दत्त्वा । तां वहन्त्व् अगतस्यानु पन्थां विराड् इयं सुप्रजा अत्य् अजैषीत् ॥७४॥

yedaṃ pūrvāgan raśanāyamānā prajām asyai draviṇaṃ ceha dattvā | tāṃ vahantv agatasyānu panthāṃ virāḍ iyaṃ suprajā aty ajaiṣīt ||74||

Sanskrit only: no published translation is held for this verse.

प्र बुध्यस्व सुबुधा बुध्यमाना दीर्घायुत्वाय शतशारदाय । गृहान् गछ गृहपत्नी यथासो दीर्घं त आयुः सविता कृणोतु ॥७५॥ १४

pra budhyasva subudhā budhyamānā dīrghāyutvāya śataśāradāya | gṛhān gacha gṛhapatnī yathāso dīrghaṃ ta āyuḥ savitā kṛṇotu ||75|| 14

Sanskrit only: no published translation is held for this verse.