Library·Atharvaveda Saṃhitā (Śaunaka)·16·16.7
तेनैनं विध्याम्य् अभूत्यैनं विध्यामि निर्भूत्यैनं विध्यामि पराभूत्यैनं विध्यामि ग्राह्यैनं विध्यामि तमसैनं विध्यामि ॥१॥
tenainaṃ vidhyāmy abhūtyainaṃ vidhyāmi nirbhūtyainaṃ vidhyāmi parābhūtyainaṃ vidhyāmi grāhyainaṃ vidhyāmi tamasainaṃ vidhyāmi ||1||
Sanskrit only: no published translation is held for this verse.
देवानाम् एनं घोरैः क्रूरैः प्रैषैर् अभिप्रेष्यामि ॥२॥
devānām enaṃ ghoraiḥ krūraiḥ praiṣair abhipreṣyāmi ||2||
Sanskrit only: no published translation is held for this verse.
वैश्वानरस्यैनं दंष्ट्रयोर् अपि दधामि ॥३॥
vaiśvānarasyainaṃ daṃṣṭrayor api dadhāmi ||3||
Sanskrit only: no published translation is held for this verse.
एवानेवाव सा गरत् ॥४॥
evānevāva sā garat ||4||
Sanskrit only: no published translation is held for this verse.
यो ऽस्मान् द्वेष्टि तम् आत्मा द्वेष्टु यं वयं द्विष्मः स आत्मानं द्वेष्टु ॥५॥
yo 'smān dveṣṭi tam ātmā dveṣṭu yaṃ vayaṃ dviṣmaḥ sa ātmānaṃ dveṣṭu ||5||
Sanskrit only: no published translation is held for this verse.
निर् द्विषन्तं दिवो निः पृथिव्या निर् अन्तरिक्षाद् भजाम ॥६॥
nir dviṣantaṃ divo niḥ pṛthivyā nir antarikṣād bhajāma ||6||
Sanskrit only: no published translation is held for this verse.
सुयामंश् चाक्षुष ॥७॥
suyāmaṃś cākṣuṣa ||7||
Sanskrit only: no published translation is held for this verse.
इदम् अहम् आमुष्यायणे ऽमुष्याः पुत्रे दुष्वप्न्यं मृजे ॥८॥
idam aham āmuṣyāyaṇe 'muṣyāḥ putre duṣvapnyaṃ mṛje ||8||
Sanskrit only: no published translation is held for this verse.
यद् अदोअदो अभ्यगछं यद् दोषा यत् पूर्वां रात्रिम् ॥९॥
yad adoado abhyagachaṃ yad doṣā yat pūrvāṃ rātrim ||9||
Sanskrit only: no published translation is held for this verse.
यज् जाग्रद् यत् सुप्तो यद् दिवा यन् नक्तम् ॥१०॥
yaj jāgrad yat supto yad divā yan naktam ||10||
Sanskrit only: no published translation is held for this verse.
यद् अहरहर् अभिगछामि तस्माद् एनम् अव दये ॥११॥
yad aharahar abhigachāmi tasmād enam ava daye ||11||
Sanskrit only: no published translation is held for this verse.
तं जहि तेन मन्दस्व तस्य पृष्टीर् अपि शृणीहि ॥१२॥
taṃ jahi tena mandasva tasya pṛṣṭīr api śṛṇīhi ||12||
Sanskrit only: no published translation is held for this verse.
स मा जीवीत् तं प्राणो जहातु ॥१३॥
sa mā jīvīt taṃ prāṇo jahātu ||13||
Sanskrit only: no published translation is held for this verse.