शतकाण्डो दुश्च्यवनः सहस्रपर्ण उत्तिरः । दर्भो य उग्र ओषधिस् तं ते बध्नाम्य् आयुषे ॥१॥
śatakāṇḍo duścyavanaḥ sahasraparṇa uttiraḥ | darbho ya ugra oṣadhis taṃ te badhnāmy āyuṣe ||1||
Sanskrit only: no published translation is held for this verse.
Library·Atharvaveda Saṃhitā (Śaunaka)·19·19.32
Atharvaveda Saṃhitā (Śaunaka) 19.32
नास्य केशान् प्र वपन्ति नोरसि ताडम् आ घ्नते । यस्मा अछिन्नपर्णेन दर्भेन शर्म यछति ॥२॥
nāsya keśān pra vapanti norasi tāḍam ā ghnate | yasmā achinnaparṇena darbhena śarma yachati ||2||
Sanskrit only: no published translation is held for this verse.
दिवि ते तूलम् ओषधे पृथिव्याम् असि निष्ठितः । त्वया सहस्रकाण्डेनायुः प्र वर्धयामहे ॥३॥
divi te tūlam oṣadhe pṛthivyām asi niṣṭhitaḥ | tvayā sahasrakāṇḍenāyuḥ pra vardhayāmahe ||3||
Sanskrit only: no published translation is held for this verse.
तिस्रो दिवो अत्य् अतृणत् तिस्र इमाः पृथिवीर् उत । त्वयाहं दुर्हार्दो जिह्वां नि तृणद्मि वचांसि ॥४॥
tisro divo aty atṛṇat tisra imāḥ pṛthivīr uta | tvayāhaṃ durhārdo jihvāṃ ni tṛṇadmi vacāṃsi ||4||
Sanskrit only: no published translation is held for this verse.
त्वम् असि सहमानो ऽहम् अस्मि सहस्वान् । उभौ सहस्वन्तौ भूत्वा सपत्नान् सहिषीवहि ॥५॥
tvam asi sahamāno 'ham asmi sahasvān | ubhau sahasvantau bhūtvā sapatnān sahiṣīvahi ||5||
Sanskrit only: no published translation is held for this verse.
सहस्व नो अभिमातिं सहस्व पृतनायतः । सहस्व सर्वान् दुर्हार्दः सुहार्दो मे बहून् कृधि ॥६॥
sahasva no abhimātiṃ sahasva pṛtanāyataḥ | sahasva sarvān durhārdaḥ suhārdo me bahūn kṛdhi ||6||
Sanskrit only: no published translation is held for this verse.
दर्भेण देवजातेन दिवि ष्टम्भेन शश्वद् इत् । तेनाहं शश्वतो जनां असनं सनवानि च ॥७॥
darbheṇa devajātena divi ṣṭambhena śaśvad it | tenāhaṃ śaśvato janāṃ asanaṃ sanavāni ca ||7||
Sanskrit only: no published translation is held for this verse.
प्रियं मा दर्भ कृणु ब्रह्मराजन्याभ्याम् शूद्राय चार्याय च । यस्मै च कामयामहे सर्वस्मै च विपश्यते ॥८॥
priyaṃ mā darbha kṛṇu brahmarājanyābhyām śūdrāya cāryāya ca | yasmai ca kāmayāmahe sarvasmai ca vipaśyate ||8||
Sanskrit only: no published translation is held for this verse.
यो जायमानः पृथिवीम् अदृंहद् यो अस्तभ्नाद् अन्तरिक्षं दिवं च । यं बिभ्रतं ननु पाप्मा विवेद स नो ऽयं दर्भो वरुणो दिवा कः ॥९॥
yo jāyamānaḥ pṛthivīm adṛṃhad yo astabhnād antarikṣaṃ divaṃ ca | yaṃ bibhrataṃ nanu pāpmā viveda sa no 'yaṃ darbho varuṇo divā kaḥ ||9||
Sanskrit only: no published translation is held for this verse.
सपत्नहा शतकाण्डः सहस्वान् ओषधीनां प्रथमः सं बभूव । स नो ऽयं दर्भः परि पातु विश्वतस् तेन साक्षीय पृतनाः पृतन्यतः ॥१०॥
sapatnahā śatakāṇḍaḥ sahasvān oṣadhīnāṃ prathamaḥ saṃ babhūva | sa no 'yaṃ darbhaḥ pari pātu viśvatas tena sākṣīya pṛtanāḥ pṛtanyataḥ ||10||
Sanskrit only: no published translation is held for this verse.