Atharvaveda Saṃhitā (Śaunaka) 19.33

सहस्रार्घः शतकाण्डः पयस्वान् अपाम् अग्निर् वीरुधां राजसूयम् । स नो ऽयं दर्भः परि पातु विश्वतो देवो मणिर् आयुषा सं सृजाति नः ॥१॥

sahasrārghaḥ śatakāṇḍaḥ payasvān apām agnir vīrudhāṃ rājasūyam | sa no 'yaṃ darbhaḥ pari pātu viśvato devo maṇir āyuṣā saṃ sṛjāti naḥ ||1||

Sanskrit only: no published translation is held for this verse.

घृताद् उल्लुप्तो मधुमान् पयस्वान् भूमिदृंहो ऽच्युतश् च्यावयिष्णुः । नुदन्त् सपत्नान् अधरांश् च कृण्वन् दर्भा रोह महताम् इन्द्रियेण ॥२॥

ghṛtād ullupto madhumān payasvān bhūmidṛṃho 'cyutaś cyāvayiṣṇuḥ | nudant sapatnān adharāṃś ca kṛṇvan darbhā roha mahatām indriyeṇa ||2||

Sanskrit only: no published translation is held for this verse.

त्वं भूमिम् अत्य् एष्य् ओजसा त्वं वेद्यां सीदसि चारुर् अध्वरे । त्वां पवित्रम् ऋषयो ऽभरन्त त्वं पुनीहि दुरितान्य् अस्मत् ॥३॥

tvaṃ bhūmim aty eṣy ojasā tvaṃ vedyāṃ sīdasi cārur adhvare | tvāṃ pavitram ṛṣayo 'bharanta tvaṃ punīhi duritāny asmat ||3||

Sanskrit only: no published translation is held for this verse.

तीक्ष्णो राजा विषासही रक्षोहा विश्वचर्षणिः । ओजो देवानां बलम् उग्रम् एतत् तं ते बध्नामि जरसे स्वस्तये ॥४॥

tīkṣṇo rājā viṣāsahī rakṣohā viśvacarṣaṇiḥ | ojo devānāṃ balam ugram etat taṃ te badhnāmi jarase svastaye ||4||

Sanskrit only: no published translation is held for this verse.

दर्भेण त्वं कृणवद् वीर्याणि दर्भं बिभ्रद् आत्मना मा व्यथिष्ठाः । अतिष्ठाय वर्चसाधान्यान्त् सूर्य इवा भाहि प्रदिशश् चतस्रः ॥५॥

darbheṇa tvaṃ kṛṇavad vīryāṇi darbhaṃ bibhrad ātmanā mā vyathiṣṭhāḥ | atiṣṭhāya varcasādhānyānt sūrya ivā bhāhi pradiśaś catasraḥ ||5||

Sanskrit only: no published translation is held for this verse.