Library·Atharvaveda Saṃhitā (Śaunaka)·19·19.45
ऋणाद् ऋणम् इव सं नय कृत्यां कृत्याकृतो गृहम् । चक्षुर्मन्त्रस्य दुर्हार्दः पृष्टीर् अपि शृणाञ्जन ॥१॥
ṛṇād ṛṇam iva saṃ naya kṛtyāṃ kṛtyākṛto gṛham | cakṣurmantrasya durhārdaḥ pṛṣṭīr api śṛṇāñjana ||1||
Sanskrit only: no published translation is held for this verse.
यद् अस्मासु दुष्वप्न्यं यद् गोषु यच् च नो गृहे । अनामगस् तं च दुर्हार्दः प्रियः प्रति मुञ्चताम् ॥२॥
yad asmāsu duṣvapnyaṃ yad goṣu yac ca no gṛhe | anāmagas taṃ ca durhārdaḥ priyaḥ prati muñcatām ||2||
Sanskrit only: no published translation is held for this verse.
अपाम् ऊर्ज ओजसो वावृधानम् अग्नेर् जातम् अधि जातवेदसः । चतुर्वीरं पर्वतीयं यद् आञ्जनं दिशः प्रदिशः करद् इच् छिवास् ते ॥३॥
apām ūrja ojaso vāvṛdhānam agner jātam adhi jātavedasaḥ | caturvīraṃ parvatīyaṃ yad āñjanaṃ diśaḥ pradiśaḥ karad ic chivās te ||3||
Sanskrit only: no published translation is held for this verse.
चतुर्वीरं बध्यत आञ्जनं ते सर्वा दिशो अभयास् ते भवन्तु । ध्रुवस् तिष्ठासि सवितेव चार्य इमा विशो अभि हरन्तु ते बलिम् ॥४॥
caturvīraṃ badhyata āñjanaṃ te sarvā diśo abhayās te bhavantu | dhruvas tiṣṭhāsi saviteva cārya imā viśo abhi harantu te balim ||4||
Sanskrit only: no published translation is held for this verse.
आक्ष्वैकं मणिम् एकं क्र्णुष्व स्नाह्य् एकेना पिबैकम् एषाम् । चतुर्वीरं नैरृतेभ्यश् चतुर्भ्यो ग्राह्या बन्धेभ्यः परि पात्व् अस्मान् ॥५॥
ākṣvaikaṃ maṇim ekaṃ krṇuṣva snāhy ekenā pibaikam eṣām | caturvīraṃ nairṛtebhyaś caturbhyo grāhyā bandhebhyaḥ pari pātv asmān ||5||
Sanskrit only: no published translation is held for this verse.
अग्निर् माग्निनावतु प्राणायापानायायुषे वर्चस ओजसे । तेजसे स्वस्तये सुभूतये स्वाहा ॥६॥
agnir māgnināvatu prāṇāyāpānāyāyuṣe varcasa ojase | tejase svastaye subhūtaye svāhā ||6||
Sanskrit only: no published translation is held for this verse.
इन्द्रो मेन्द्रियेणावतु प्राणायापानायायुषे वर्चस ओजसे । तेजसे स्वस्तये सुभूतये स्वाहा ॥७॥
indro mendriyeṇāvatu prāṇāyāpānāyāyuṣe varcasa ojase | tejase svastaye subhūtaye svāhā ||7||
Sanskrit only: no published translation is held for this verse.
सोमो मा सौम्येनावतु प्राणायापानायायुषे वर्चस ओजसे । तेजसे स्वस्तये सुभूतये स्वाहा ॥८॥
somo mā saumyenāvatu prāṇāyāpānāyāyuṣe varcasa ojase | tejase svastaye subhūtaye svāhā ||8||
Sanskrit only: no published translation is held for this verse.
भगो म भगेनावतु प्राणायापानायायुषे वर्चस ओजसे । तेजसे स्वस्तये सुभूतये स्वाहा ॥९॥
bhago ma bhagenāvatu prāṇāyāpānāyāyuṣe varcasa ojase | tejase svastaye subhūtaye svāhā ||9||
Sanskrit only: no published translation is held for this verse.
मरुतो मा गणैर् अवन्तु प्राणायापानायुषे वर्चस ओजसे तेजसे । स्वस्तये सुभूतये स्वाहा ॥१०॥
maruto mā gaṇair avantu prāṇāyāpānāyuṣe varcasa ojase tejase | svastaye subhūtaye svāhā ||10||
Sanskrit only: no published translation is held for this verse.