Atharvaveda Saṃhitā (Śaunaka) 19.50

अध रात्रि तृष्टधूमम् अशीर्षाणम् अहिं कृणु । अक्षौ वृकस्य निर् जह्यास् तेन तं द्रुपदे जहि ॥१॥

adha rātri tṛṣṭadhūmam aśīrṣāṇam ahiṃ kṛṇu | akṣau vṛkasya nir jahyās tena taṃ drupade jahi ||1||

Sanskrit only: no published translation is held for this verse.

ये ते रात्र्य् अनड्वाहस् तीक्ष्णशृङ्गाः स्वाशवः । तेभिर् नो अद्य पारयाति दुर्गाणि विश्वहा ॥२॥

ye te rātry anaḍvāhas tīkṣṇaśṛṅgāḥ svāśavaḥ | tebhir no adya pārayāti durgāṇi viśvahā ||2||

Sanskrit only: no published translation is held for this verse.

रात्रिंरात्रिम् अरिष्यन्तस् तरेम तन्वा वयम् । गम्भीरम् अप्लवा इव न तरेयुर् अरातयः ॥३॥

rātriṃrātrim ariṣyantas tarema tanvā vayam | gambhīram aplavā iva na tareyur arātayaḥ ||3||

Sanskrit only: no published translation is held for this verse.

यथा शाम्याकः प्रपतन्न् अपवान् नानुविद्यते । एवा रात्रि प्र पातय यो अस्मां अभ्यघायति ॥४॥

yathā śāmyākaḥ prapatann apavān nānuvidyate | evā rātri pra pātaya yo asmāṃ abhyaghāyati ||4||

Sanskrit only: no published translation is held for this verse.

अप स्तेनं वासयो गोअजम् उत तस्करम् । अथो यो अर्वतः शिरो ऽभिधाय निनीषति ॥५॥

apa stenaṃ vāsayo goajam uta taskaram | atho yo arvataḥ śiro 'bhidhāya ninīṣati ||5||

Sanskrit only: no published translation is held for this verse.

यद् अद्य रात्रि सुभगे विभजन्त्य् अयो वसु । यद् एतद् अस्मान् भोजय यथेद् अन्यान् उपायसि ॥६॥

yad adya rātri subhage vibhajanty ayo vasu | yad etad asmān bhojaya yathed anyān upāyasi ||6||

Sanskrit only: no published translation is held for this verse.

उषसे नः परि देहि सर्वान् रात्र्य् अनागसः । उषा नो अह्ने आ भजाद् अहस् तुभ्यं विभावरि ॥७॥

uṣase naḥ pari dehi sarvān rātry anāgasaḥ | uṣā no ahne ā bhajād ahas tubhyaṃ vibhāvari ||7||

Sanskrit only: no published translation is held for this verse.