Atharvaveda Saṃhitā (Śaunaka) 19.56

यमस्य लोकाद् अध्य् आ बभूविथ प्रमदा मर्त्यान् प्र युनक्षि धीरः । एकाकिना सरथं यासि विद्वान्त् स्वप्नं मिमानो असुरस्य योनौ ॥१॥

yamasya lokād adhy ā babhūvitha pramadā martyān pra yunakṣi dhīraḥ | ekākinā sarathaṃ yāsi vidvānt svapnaṃ mimāno asurasya yonau ||1||

Sanskrit only: no published translation is held for this verse.

बन्धस् त्वाग्रे विश्वचया अपश्यत् पुरा रात्र्या जनितोर् एके अह्नि । ततः स्वप्नेदम् अध्य् आ बभूविथ भिषग्भ्यो रूपम् अपगूहमानः ॥२॥

bandhas tvāgre viśvacayā apaśyat purā rātryā janitor eke ahni | tataḥ svapnedam adhy ā babhūvitha bhiṣagbhyo rūpam apagūhamānaḥ ||2||

Sanskrit only: no published translation is held for this verse.

बृहद्गावासुरेभ्यो ऽधि देवान् उपावर्तत महिमानम् इछन् । तस्मै स्वप्नाय दधुर् आधिपत्यं त्रयस्त्रिंशासः स्वर् आनशानाः ॥३॥

bṛhadgāvāsurebhyo 'dhi devān upāvartata mahimānam ichan | tasmai svapnāya dadhur ādhipatyaṃ trayastriṃśāsaḥ svar ānaśānāḥ ||3||

Sanskrit only: no published translation is held for this verse.

नैतां विदुः पितरो नोत देवा येषां जल्पिश् चरत्य् अन्तरेदम् । त्रिते स्वप्नम् अदधुर् आप्त्ये नर आदित्यासो वरुणेनानुशिष्टाः ॥४॥

naitāṃ viduḥ pitaro nota devā yeṣāṃ jalpiś caraty antaredam | trite svapnam adadhur āptye nara ādityāso varuṇenānuśiṣṭāḥ ||4||

Sanskrit only: no published translation is held for this verse.

यस्य क्रूरम् अभजन्त दुष्कृतो ऽस्वप्नेन सुकृतः पुण्यम् आयुः । स्वर् मदसि परमेण बन्धुना तप्यमानस्य मनसो ऽधि जज्ञिषे ॥५॥

yasya krūram abhajanta duṣkṛto 'svapnena sukṛtaḥ puṇyam āyuḥ | svar madasi parameṇa bandhunā tapyamānasya manaso 'dhi jajñiṣe ||5||

Sanskrit only: no published translation is held for this verse.

विद्म ते सर्वाः परिजाः पुरस्ताद् विद्म स्वप्न यो अधिपा इहा ते । यशश्विनो नो यशसेह पाह्य् आराद् द्विषेभिर् अप याहि दूरम् ॥६॥

vidma te sarvāḥ parijāḥ purastād vidma svapna yo adhipā ihā te | yaśaśvino no yaśaseha pāhy ārād dviṣebhir apa yāhi dūram ||6||

Sanskrit only: no published translation is held for this verse.