Atharvaveda Saṃhitā (Śaunaka) 19.57

यथा कलां यथा शफं यथा र्णं सम्नयन्ति । एवा दुष्वप्न्यं सर्वम् अप्रिये सं नयामसि ॥१॥

yathā kalāṃ yathā śaphaṃ yathā rṇaṃ samnayanti | evā duṣvapnyaṃ sarvam apriye saṃ nayāmasi ||1||

Sanskrit only: no published translation is held for this verse.

सं राजानो अगुः सम् ऋणाम्य् अगुः सं कुष्ठा अगुः सं कला अगुः । सम् अस्मासु यद् दुष्वप्न्यं निर् द्विषते दुष्वप्न्यं सुवाम ॥२॥

saṃ rājāno aguḥ sam ṛṇāmy aguḥ saṃ kuṣṭhā aguḥ saṃ kalā aguḥ | sam asmāsu yad duṣvapnyaṃ nir dviṣate duṣvapnyaṃ suvāma ||2||

Sanskrit only: no published translation is held for this verse.

देवानां पत्नीनां गर्भ यमस्य कर यो भद्रः स्वप्न । स मम यः पापस् तद् द्विषते प्र हिण्मः । मा तृष्टानाम् असि कृष्णशकुनेर् मुखम् ॥३॥

devānāṃ patnīnāṃ garbha yamasya kara yo bhadraḥ svapna | sa mama yaḥ pāpas tad dviṣate pra hiṇmaḥ | mā tṛṣṭānām asi kṛṣṇaśakuner mukham ||3||

Sanskrit only: no published translation is held for this verse.

तं त्वा स्वप्न तथा सं विद्म स त्वं स्वप्नाश्व इव कायम् अश्व इव नीनाहम् । अनास्माकं देवपीयुं पियारुं वप यद् अस्मासु दुष्वप्न्यं यद् गोषु यच् च नो गृहे ॥४॥

taṃ tvā svapna tathā saṃ vidma sa tvaṃ svapnāśva iva kāyam aśva iva nīnāham | anāsmākaṃ devapīyuṃ piyāruṃ vapa yad asmāsu duṣvapnyaṃ yad goṣu yac ca no gṛhe ||4||

Sanskrit only: no published translation is held for this verse.

अनास्माकस् तद् देवपीयुः पियारुर् निष्कम् इव प्रति मुञ्चताम् । नवारत्नीन् अपमया अस्माकं ततः परि । दुष्वप्न्यं सर्वं द्विषते निर् दयामसि ॥५॥

anāsmākas tad devapīyuḥ piyārur niṣkam iva prati muñcatām | navāratnīn apamayā asmākaṃ tataḥ pari | duṣvapnyaṃ sarvaṃ dviṣate nir dayāmasi ||5||

Sanskrit only: no published translation is held for this verse.