Atharvaveda Saṃhitā (Śaunaka) 2.1

वेनस् तत् पश्यत् परमं गुहा यद् यत्र विश्वं भवत्य् एकरूपम् । इदं पृश्निर् अदुहज् जायमानाः स्वर्विदो अभ्य् अनूषत व्राः ॥१॥

venas tat paśyat paramaṃ guhā yad yatra viśvaṃ bhavaty ekarūpam | idaṃ pṛśnir aduhaj jāyamānāḥ svarvido abhy anūṣata vrāḥ ||1||

Sanskrit only: no published translation is held for this verse.

प्र तद् वोचेद् अमृतस्य विद्वान् गन्धर्वो धाम परमं गुहा यत् । त्रीणि पदानि निहिता गुहास्य यस् तानि वेद स पितुष् पितासत् ॥२॥

pra tad voced amṛtasya vidvān gandharvo dhāma paramaṃ guhā yat | trīṇi padāni nihitā guhāsya yas tāni veda sa pituṣ pitāsat ||2||

Sanskrit only: no published translation is held for this verse.

स नः पिता जनिता स उत बन्धुर् धामानि वेद भुवनानि विश्वा । यो देवानां नामध एक एव तं संप्रश्नं भुवना यन्ति सर्वा ॥३॥

sa naḥ pitā janitā sa uta bandhur dhāmāni veda bhuvanāni viśvā | yo devānāṃ nāmadha eka eva taṃ saṃpraśnaṃ bhuvanā yanti sarvā ||3||

Sanskrit only: no published translation is held for this verse.

परि द्यावापृथिवी सद्य आयम् उपातिष्ठे प्रथमजाम् ऋतस्य । वाचम् इव वक्तरि भुवनेष्ठा धास्युर् एष नन्व् एषो अग्निः ॥४॥

pari dyāvāpṛthivī sadya āyam upātiṣṭhe prathamajām ṛtasya | vācam iva vaktari bhuvaneṣṭhā dhāsyur eṣa nanv eṣo agniḥ ||4||

Sanskrit only: no published translation is held for this verse.

परि विश्वा भुवनान्य् आयम् ऋतस्य तन्तुं विततं दृशे कम् । यत्र देवा अमृतम् आनशानाः समाने योनाव् अध्य् ऐरयन्त ॥५॥

pari viśvā bhuvanāny āyam ṛtasya tantuṃ vitataṃ dṛśe kam | yatra devā amṛtam ānaśānāḥ samāne yonāv adhy airayanta ||5||

Sanskrit only: no published translation is held for this verse.