Atharvaveda Saṃhitā (Śaunaka) 2.12

द्यावापृथिवी उर्व् अन्तरिक्षं क्षेत्रस्य पत्न्य् उरुगायो ऽद्भुतः । उतान्तरिक्षम् उरु वातगोपं त इह तप्यन्तां मयि तप्यमाने ॥१॥

dyāvāpṛthivī urv antarikṣaṃ kṣetrasya patny urugāyo 'dbhutaḥ | utāntarikṣam uru vātagopaṃ ta iha tapyantāṃ mayi tapyamāne ||1||

Sanskrit only: no published translation is held for this verse.

इदं देवाः शृणुत ये यज्ञिया स्थ भरद्वाजो मह्यम् उक्थानि शंसति । पाशे स बद्धो दुरिते नि युज्यतां यो अस्माकं मन इदं हिनस्ति ॥२॥

idaṃ devāḥ śṛṇuta ye yajñiyā stha bharadvājo mahyam ukthāni śaṃsati | pāśe sa baddho durite ni yujyatāṃ yo asmākaṃ mana idaṃ hinasti ||2||

Sanskrit only: no published translation is held for this verse.

इदम् इन्द्र शृणुहि सोमप यत् त्वा हृदा शोचता जोहवीमि । वृश्चामि तं कुलिशेनेव वृक्षं यो अस्माकं मन इदं हिनस्ति ॥३॥

idam indra śṛṇuhi somapa yat tvā hṛdā śocatā johavīmi | vṛścāmi taṃ kuliśeneva vṛkṣaṃ yo asmākaṃ mana idaṃ hinasti ||3||

Sanskrit only: no published translation is held for this verse.

अशीतिभिस् तिसृभिः सामगेभिर् आदित्येभिर् वसुभिर् अङ्गिरोभिः । इष्टापूर्तम् अवतु नः पितॄणाम् आमुं ददे हरसा दैव्येन ॥४॥

aśītibhis tisṛbhiḥ sāmagebhir ādityebhir vasubhir aṅgirobhiḥ | iṣṭāpūrtam avatu naḥ pitṝṇām āmuṃ dade harasā daivyena ||4||

Sanskrit only: no published translation is held for this verse.

द्यावापृथिवी अनु मा दीधीथां विश्वे देवासो अनु मा रभध्वम् । अङ्गिरसः पितरः सोम्यासः पापम् आ ऋछत्व् अपकामस्य कर्ता ॥५॥

dyāvāpṛthivī anu mā dīdhīthāṃ viśve devāso anu mā rabhadhvam | aṅgirasaḥ pitaraḥ somyāsaḥ pāpam ā ṛchatv apakāmasya kartā ||5||

Sanskrit only: no published translation is held for this verse.

अतीव यो मरुतो मन्यते नो ब्रह्म वा यो निन्दिषत् क्रियमाणम् । तपूंषि तस्मै वृजिनानि सन्तु ब्रह्मद्विषं द्यौर् अभिसंतपाति ॥६॥

atīva yo maruto manyate no brahma vā yo nindiṣat kriyamāṇam | tapūṃṣi tasmai vṛjināni santu brahmadviṣaṃ dyaur abhisaṃtapāti ||6||

Sanskrit only: no published translation is held for this verse.

सप्त प्राणान् अष्टौ मन्यस् तांस् ते वृश्चामि ब्रह्मणा । अया यमस्य सादनम् अग्निदूतो अरंकृतः ॥७॥

sapta prāṇān aṣṭau manyas tāṃs te vṛścāmi brahmaṇā | ayā yamasya sādanam agnidūto araṃkṛtaḥ ||7||

Sanskrit only: no published translation is held for this verse.

आ दधामि ते पदं समिद्धे जातवेदसि । अग्निः शरीरं वेवेष्ट्व् असुं वाग् अपि गछतु ॥८॥

ā dadhāmi te padaṃ samiddhe jātavedasi | agniḥ śarīraṃ veveṣṭv asuṃ vāg api gachatu ||8||

Sanskrit only: no published translation is held for this verse.