Atharvaveda Saṃhitā (Śaunaka) 2.14

निःसालां धृष्णुं धिषणम् एकवाद्याम् जिघत्स्वम् । सर्वाश् चण्डस्य नप्त्यो नाशयामः सदान्वाः ॥१॥

niḥsālāṃ dhṛṣṇuṃ dhiṣaṇam ekavādyām jighatsvam | sarvāś caṇḍasya naptyo nāśayāmaḥ sadānvāḥ ||1||

Sanskrit only: no published translation is held for this verse.

निर् वो गोष्ठाद् अजामसि निर् अक्षान् निर् उपानशात् । निर् वो मगुन्द्या दुहितरो गृहेभ्यश् चातयामहे ॥२॥

nir vo goṣṭhād ajāmasi nir akṣān nir upānaśāt | nir vo magundyā duhitaro gṛhebhyaś cātayāmahe ||2||

Sanskrit only: no published translation is held for this verse.

असौ यो अधराद् गृहस् तत्र सन्त्व् अराय्यः । तत्र सेदिर् न्य् उच्यतु सर्वाश् च यातुधान्यः ॥३॥

asau yo adharād gṛhas tatra santv arāyyaḥ | tatra sedir ny ucyatu sarvāś ca yātudhānyaḥ ||3||

Sanskrit only: no published translation is held for this verse.

भूतपतिर् निर् अजत्व् इन्द्रश् चेतः सदान्वाः । गृहस्य बुध्न आसीनास् ता इन्द्रो वज्रेणाधि तिष्ठतु ॥४॥

bhūtapatir nir ajatv indraś cetaḥ sadānvāḥ | gṛhasya budhna āsīnās tā indro vajreṇādhi tiṣṭhatu ||4||

Sanskrit only: no published translation is held for this verse.

यदि स्थ क्षेत्रियाणां यदि वा पुरुषेषिताः । यदि स्थ दस्युभ्यो जाता नश्यतेतः सदान्वाः ॥५॥

yadi stha kṣetriyāṇāṃ yadi vā puruṣeṣitāḥ | yadi stha dasyubhyo jātā naśyatetaḥ sadānvāḥ ||5||

Sanskrit only: no published translation is held for this verse.

परि धामान्य् आसाम् आशुर् गाष्ठाम् इवासरम् । अजैषं सर्वान् आजीन् वो नश्यतेतः सदान्वाः ॥६॥

pari dhāmāny āsām āśur gāṣṭhām ivāsaram | ajaiṣaṃ sarvān ājīn vo naśyatetaḥ sadānvāḥ ||6||

Sanskrit only: no published translation is held for this verse.