Library·Atharvaveda Saṃhitā (Śaunaka)·2·2.30
यथेदं भूम्या अधि तृणं वातो मथायति । एवा मथ्नामि ते मनो यथा मां कामिन्य् असो यथा मन् नापगा असः ॥१॥
yathedaṃ bhūmyā adhi tṛṇaṃ vāto mathāyati | evā mathnāmi te mano yathā māṃ kāminy aso yathā man nāpagā asaḥ ||1||
Sanskrit only: no published translation is held for this verse.
सं चेन् नयाथो अश्विना कामिना सं च वक्षथः । सं वां भगासो अग्मत सं चित्तानि सम् उ व्रता ॥२॥
saṃ cen nayātho aśvinā kāminā saṃ ca vakṣathaḥ | saṃ vāṃ bhagāso agmata saṃ cittāni sam u vratā ||2||
Sanskrit only: no published translation is held for this verse.
यत् सुपर्णा विवक्षवो अनमीवा विवक्षवः । तत्र मे गछताद् धवं शल्य इव कुल्मलं यथा ॥३॥
yat suparṇā vivakṣavo anamīvā vivakṣavaḥ | tatra me gachatād dhavaṃ śalya iva kulmalaṃ yathā ||3||
Sanskrit only: no published translation is held for this verse.
यद् अन्तरं तद् बाह्यं यद् बाह्यं तद् अन्तरम् । कन्यानां विश्वरूपाणां मनो गृभायौषधे ॥४॥
yad antaraṃ tad bāhyaṃ yad bāhyaṃ tad antaram | kanyānāṃ viśvarūpāṇāṃ mano gṛbhāyauṣadhe ||4||
Sanskrit only: no published translation is held for this verse.
एयम् अगन् पतिकामा जनिकामो ऽहम् आगमम् । अश्वः कनिक्रदद् यथा भगेनाहं सहागमम् ॥५॥
eyam agan patikāmā janikāmo 'ham āgamam | aśvaḥ kanikradad yathā bhagenāhaṃ sahāgamam ||5||
Sanskrit only: no published translation is held for this verse.