Atharvaveda Saṃhitā (Śaunaka) 2.6

समास् त्वाग्न ऋतवो वर्धयन्तु संवत्सरा ऋषयो यानि सत्या । सं दिव्येन दीदिहि रोचनेन विश्वा आ माहि प्रदिशश् चतस्रः ॥१॥

samās tvāgna ṛtavo vardhayantu saṃvatsarā ṛṣayo yāni satyā | saṃ divyena dīdihi rocanena viśvā ā māhi pradiśaś catasraḥ ||1||

Sanskrit only: no published translation is held for this verse.

सं चेध्यस्वाग्ने प्र च वर्धयेमम् उच् च तिष्ठ महते सौभगाय । मा ते रिषन्न् उपसत्तारो अग्ने ब्रह्माणस् ते यशसः सन्तु मान्ये ॥२॥

saṃ cedhyasvāgne pra ca vardhayemam uc ca tiṣṭha mahate saubhagāya | mā te riṣann upasattāro agne brahmāṇas te yaśasaḥ santu mānye ||2||

Sanskrit only: no published translation is held for this verse.

त्वाम् अग्ने वृणते ब्राह्मणा इमे शिवो अग्ने संवरणे भवा नः । सपत्नहाग्ने अभिमातिजिद् भव स्वे गये जागृह्य् अप्रयुछन् ॥३॥

tvām agne vṛṇate brāhmaṇā ime śivo agne saṃvaraṇe bhavā naḥ | sapatnahāgne abhimātijid bhava sve gaye jāgṛhy aprayuchan ||3||

Sanskrit only: no published translation is held for this verse.

क्षत्रेणाग्ने स्वेन सं रभस्व मित्रेणाग्ने मित्रधा यतस्व । सजातानां मध्यमेष्ठा राज्ञाम् अग्ने विहव्यो दीदिहीह ॥४॥

kṣatreṇāgne svena saṃ rabhasva mitreṇāgne mitradhā yatasva | sajātānāṃ madhyameṣṭhā rājñām agne vihavyo dīdihīha ||4||

Sanskrit only: no published translation is held for this verse.

अति निहो अति सृधो ऽत्य् अचित्तीर् अति द्विषः । विश्वा ह्य् अग्ने दुरिता तर त्वम् अथास्मभ्यं सहवीरं रयिं दाः ॥५॥

ati niho ati sṛdho 'ty acittīr ati dviṣaḥ | viśvā hy agne duritā tara tvam athāsmabhyaṃ sahavīraṃ rayiṃ dāḥ ||5||

Sanskrit only: no published translation is held for this verse.