Atharvaveda Saṃhitā (Śaunaka) 20.105

त्वम् इन्द्र प्रतूर्तिष्व् अभि विश्वा असि स्पृधः । अशस्तिहा जनिता विश्वतूर् असि त्वं तूर्य तरुष्यतः ॥१॥

tvam indra pratūrtiṣv abhi viśvā asi spṛdhaḥ | aśastihā janitā viśvatūr asi tvaṃ tūrya taruṣyataḥ ||1||

Sanskrit only: no published translation is held for this verse.

अनु ते शुष्मं तुरयन्तम् ईयतुः क्षोणी शिशुं न मातरा । विश्वास् ते स्पृधः श्नथयन्त मन्यवे वृत्रं यद् इन्द्र तूर्वसि ॥२॥

anu te śuṣmaṃ turayantam īyatuḥ kṣoṇī śiśuṃ na mātarā | viśvās te spṛdhaḥ śnathayanta manyave vṛtraṃ yad indra tūrvasi ||2||

Sanskrit only: no published translation is held for this verse.

इत ऊती वो अजरं प्रहेतारम् अप्रहितम् । आशुं जेतारं हेतारं रथीतमम् अतूर्तं तुग्र्यावृधम् ॥३॥

ita ūtī vo ajaraṃ prahetāram aprahitam | āśuṃ jetāraṃ hetāraṃ rathītamam atūrtaṃ tugryāvṛdham ||3||

Sanskrit only: no published translation is held for this verse.

यो राजा चर्षणीनां याता रथेभिर् अध्रिगुः । विश्वासां तरुता पृतनानां ज्येष्ठो यो वृत्रहा गृणे ॥४॥

yo rājā carṣaṇīnāṃ yātā rathebhir adhriguḥ | viśvāsāṃ tarutā pṛtanānāṃ jyeṣṭho yo vṛtrahā gṛṇe ||4||

Sanskrit only: no published translation is held for this verse.

इन्द्रं तं शुम्भ पुरुहन्मन्न् अवसे यस्य द्विता विधर्तरि । हस्ताय वज्रः प्रति धायि दर्शतो महो दिवे न सूर्यः ॥५॥

indraṃ taṃ śumbha puruhanmann avase yasya dvitā vidhartari | hastāya vajraḥ prati dhāyi darśato maho dive na sūryaḥ ||5||

Sanskrit only: no published translation is held for this verse.