Atharvaveda Saṃhitā (Śaunaka) 20.127

इदं जना उप श्रुत नराशंस स्तविष्यते । षष्टिं सहस्रा नवतिं च कौरम आ रुशमेषु दद्महे ॥१॥

idaṃ janā upa śruta narāśaṃsa staviṣyate | ṣaṣṭiṃ sahasrā navatiṃ ca kaurama ā ruśameṣu dadmahe ||1||

Sanskrit only: no published translation is held for this verse.

उष्ट्रा यस्य प्रवाहणो वधूमन्तो द्विर्दश । वर्ष्मा रथस्य नि जिहीडते दिव ईषमाणा उपस्पृशः ॥२॥

uṣṭrā yasya pravāhaṇo vadhūmanto dvirdaśa | varṣmā rathasya ni jihīḍate diva īṣamāṇā upaspṛśaḥ ||2||

Sanskrit only: no published translation is held for this verse.

एष इषाय मामहे शतं निष्कान् दश स्रजः । त्रीणि शतान्यर्वतां सहस्रा दश गोनाम् ॥३॥

eṣa iṣāya māmahe śataṃ niṣkān daśa srajaḥ | trīṇi śatānyarvatāṃ sahasrā daśa gonām ||3||

Sanskrit only: no published translation is held for this verse.

वच्यस्व रेभ वच्यस्व वृक्षे न पक्वे शकुनः । नष्टे जिह्वा चर्चरीति क्षुरो न भुरिजोरिव ॥४॥

vacyasva rebha vacyasva vṛkṣe na pakve śakunaḥ | naṣṭe jihvā carcarīti kṣuro na bhurijoriva ||4||

Sanskrit only: no published translation is held for this verse.

प्र रेभासो मनीषा वृषा गाव इवेरते । अमोतपुत्रका एषाममोत गा इवासते ॥५॥

pra rebhāso manīṣā vṛṣā gāva iverate | amotaputrakā eṣāmamota gā ivāsate ||5||

Sanskrit only: no published translation is held for this verse.

प्र रेभ धीम् भरस्व गोविदं वसुविदम् । देवत्रेमां वाचं स्रीणीहीषुर्नावीरस्तारम् ॥६॥

pra rebha dhīm bharasva govidaṃ vasuvidam | devatremāṃ vācaṃ srīṇīhīṣurnāvīrastāram ||6||

Sanskrit only: no published translation is held for this verse.

राज्ञो विश्वजनीनस्य यो देवोमर्त्यां अति । वैश्वानरस्य सुष्टुतिमा सुनोता परिक्षितः ॥७॥

rājño viśvajanīnasya yo devomartyāṃ ati | vaiśvānarasya suṣṭutimā sunotā parikṣitaḥ ||7||

Sanskrit only: no published translation is held for this verse.

परिछिन्नः क्षेमम् अकरोत् तम आसनमाचरन् । कुलायन् कृण्वन् कौरव्यः पतिर् वदति जायया ॥८॥

parichinnaḥ kṣemam akarot tama āsanamācaran | kulāyan kṛṇvan kauravyaḥ patir vadati jāyayā ||8||

Sanskrit only: no published translation is held for this verse.

कतरत् त आ हराणि दधि मन्थां परि श्रुतम् । जायाः पतिं वि पृछति राष्ट्रे राज्ञः परिक्षितः ॥९॥

katarat ta ā harāṇi dadhi manthāṃ pari śrutam | jāyāḥ patiṃ vi pṛchati rāṣṭre rājñaḥ parikṣitaḥ ||9||

Sanskrit only: no published translation is held for this verse.

अभीवस्वः प्र जिहीते यवः पक्वः पथो बिलम् । जनः स भद्रम् एधति राष्ट्रे राज्ञः परिक्षितः ॥१०॥

abhīvasvaḥ pra jihīte yavaḥ pakvaḥ patho bilam | janaḥ sa bhadram edhati rāṣṭre rājñaḥ parikṣitaḥ ||10||

Sanskrit only: no published translation is held for this verse.

इन्द्रः कारुम् अबूबुधद् उत्तिष्ठ वि चरा जनम् । ममेदुग्रस्य चर्कृधि सर्व इत् ते पृणादरिः ॥११॥

indraḥ kārum abūbudhad uttiṣṭha vi carā janam | mamedugrasya carkṛdhi sarva it te pṛṇādariḥ ||11||

Sanskrit only: no published translation is held for this verse.

इह गावः प्र जायध्वम् इहाश्वा इह पूरुषाः । इहो सहस्रदक्षिणोपि पूषा नि षीदति ॥१२॥

iha gāvaḥ pra jāyadhvam ihāśvā iha pūruṣāḥ | iho sahasradakṣiṇopi pūṣā ni ṣīdati ||12||

Sanskrit only: no published translation is held for this verse.

नेमा इन्द्र गावो रिषन् मो आसां गोप रीरिषत् । मासाम् अमित्रयुर्जन इन्द्र मा स्तेन ईशत ॥१३॥

nemā indra gāvo riṣan mo āsāṃ gopa rīriṣat | māsām amitrayurjana indra mā stena īśata ||13||

Sanskrit only: no published translation is held for this verse.

उप नो न रमसि सूक्तेन वचसा वयं भद्रेण वचसा वयम् । वनाद् अधिध्वनो गिरो न रिष्येम कदा चन ॥१४॥

upa no na ramasi sūktena vacasā vayaṃ bhadreṇa vacasā vayam | vanād adhidhvano giro na riṣyema kadā cana ||14||

Sanskrit only: no published translation is held for this verse.