Atharvaveda Saṃhitā (Śaunaka) 20.16

उदप्रुतो न वयो रक्षमाणा वावदतो अभ्रियस्येव घोषाः । गिरिभ्रजो नोर्मयो मदन्तो बृहस्पतिम् अभ्य् अर्का अनावन् ॥१॥

udapruto na vayo rakṣamāṇā vāvadato abhriyasyeva ghoṣāḥ | giribhrajo normayo madanto bṛhaspatim abhy arkā anāvan ||1||

Sanskrit only: no published translation is held for this verse.

सं गोभिर् अङ्गिरसो नक्षमाणो भग इवेद् अर्यमणं निनाय । जने मित्रो न दम्पती अनक्ति बृहस्पते वाजयाशूंर् इवाजौ ॥२॥

saṃ gobhir aṅgiraso nakṣamāṇo bhaga ived aryamaṇaṃ nināya | jane mitro na dampatī anakti bṛhaspate vājayāśūṃr ivājau ||2||

Sanskrit only: no published translation is held for this verse.

साध्वर्या अतिथिनीर् इषिरा स्पार्हाः सुवर्णा अनवद्यरूपाः । बृहस्पतिः पर्वतेभ्यो वितूर्या निर् गा ऊपे यवम् इव स्थिविभ्यः ॥३॥

sādhvaryā atithinīr iṣirā spārhāḥ suvarṇā anavadyarūpāḥ | bṛhaspatiḥ parvatebhyo vitūryā nir gā ūpe yavam iva sthivibhyaḥ ||3||

Sanskrit only: no published translation is held for this verse.

आप्रुषायन् मधुना ऋतस्य योनिम् अवक्षिपन्न् अर्क उल्काम् इव द्योः । बृहस्पतिर् उद्धरन्न् अश्मनो गा भूम्या उद्नेव वि त्वचं बिभेद ॥४॥

āpruṣāyan madhunā ṛtasya yonim avakṣipann arka ulkām iva dyoḥ | bṛhaspatir uddharann aśmano gā bhūmyā udneva vi tvacaṃ bibheda ||4||

Sanskrit only: no published translation is held for this verse.

अप ज्योतिषा तमो अन्तरिक्षद् उद्नः शीपालम् इव वात आजत् । बृहस्पतिर् अनुमृश्या वलस्याभ्रम् इव वात आ चक्र आ गाः ॥५॥

apa jyotiṣā tamo antarikṣad udnaḥ śīpālam iva vāta ājat | bṛhaspatir anumṛśyā valasyābhram iva vāta ā cakra ā gāḥ ||5||

Sanskrit only: no published translation is held for this verse.

यदा वलस्य पीयतो जसुं भेद् बृहस्पतिर् अग्नितपोभिर् अर्कैः । दद्भिर् न जिह्वा परिविष्टम् आदद् आविर् निधींर् अकृणोद् उस्रियाणाम् ॥६॥

yadā valasya pīyato jasuṃ bhed bṛhaspatir agnitapobhir arkaiḥ | dadbhir na jihvā pariviṣṭam ādad āvir nidhīṃr akṛṇod usriyāṇām ||6||

Sanskrit only: no published translation is held for this verse.

बृहस्पतिर् अमत हि त्यद् आसां नाम स्वरीणां सदने गुहा यत् । आण्डेव भित्वा शकुनस्य गर्भम् उद् उस्रियाः पर्वतस्य त्मनाजत् ॥७॥

bṛhaspatir amata hi tyad āsāṃ nāma svarīṇāṃ sadane guhā yat | āṇḍeva bhitvā śakunasya garbham ud usriyāḥ parvatasya tmanājat ||7||

Sanskrit only: no published translation is held for this verse.

अश्नापिनद्धं मधु पर्य् अपश्यन् मत्स्यं न दीन उदनि क्षियन्तम् । निष् टज् जभार चमसं न वृक्षाद् बृहस्पतिर् विरवेणा विकृत्य ॥८॥

aśnāpinaddhaṃ madhu pary apaśyan matsyaṃ na dīna udani kṣiyantam | niṣ ṭaj jabhāra camasaṃ na vṛkṣād bṛhaspatir viraveṇā vikṛtya ||8||

Sanskrit only: no published translation is held for this verse.

सोषाम् अविन्दत् स स्वः सो अग्निं सो अर्केण वि बबाधे तमांसि । बृहस्पतिर् गोवपुषो वलस्य निर् मज्जानं न पर्वणो जभार ॥९॥

soṣām avindat sa svaḥ so agniṃ so arkeṇa vi babādhe tamāṃsi | bṛhaspatir govapuṣo valasya nir majjānaṃ na parvaṇo jabhāra ||9||

Sanskrit only: no published translation is held for this verse.

हिमेव पर्णा मुषिता वनानि बृहस्पतिनाकृपयद् वलो गाः । अनानुकृत्यम् अपुनश् चकार यात् सूर्यामासा मिथ उच्चरातः ॥१०॥

himeva parṇā muṣitā vanāni bṛhaspatinākṛpayad valo gāḥ | anānukṛtyam apunaś cakāra yāt sūryāmāsā mitha uccarātaḥ ||10||

Sanskrit only: no published translation is held for this verse.

अभि श्यावं न कृशनेभिर् अश्वं नक्षत्रेभिः पितरो द्याम् अपिंशन् । रात्र्यां तमो अदधुर् ज्योतिर् अहन् बृहस्पतिर् भिनद् अद्रिं विदद् गाः ॥११॥

abhi śyāvaṃ na kṛśanebhir aśvaṃ nakṣatrebhiḥ pitaro dyām apiṃśan | rātryāṃ tamo adadhur jyotir ahan bṛhaspatir bhinad adriṃ vidad gāḥ ||11||

Sanskrit only: no published translation is held for this verse.

इदम् अकर्म नमो अभ्रियाय यः पूर्वीर् अन्व् आनोनवीति । बृहस्पतिः स हि गोभिः सो अश्वैः स वीरेभिः स नृभिर् नो वयो धात् ॥१२॥

idam akarma namo abhriyāya yaḥ pūrvīr anv ānonavīti | bṛhaspatiḥ sa hi gobhiḥ so aśvaiḥ sa vīrebhiḥ sa nṛbhir no vayo dhāt ||12||

Sanskrit only: no published translation is held for this verse.