Atharvaveda Saṃhitā (Śaunaka) 20.21

न्य् ऊ षु वाचं प्र महे भरामहे गिर इन्द्राय सदने विवस्वतः । नू चिद् धि रत्नं ससताम् इवाविदन् न दुष्टुतिर् द्रविणोदेषु शस्यते ॥१॥

ny ū ṣu vācaṃ pra mahe bharāmahe gira indrāya sadane vivasvataḥ | nū cid dhi ratnaṃ sasatām ivāvidan na duṣṭutir draviṇodeṣu śasyate ||1||

Sanskrit only: no published translation is held for this verse.

दुरो अश्वस्य दुर इन्द्र गोर् असि दुरो यवस्य वसुन इनस् पतिः । शिक्षानरः प्रदिवो अकामकर्शनः सखा सखिभ्यस् तम् इदं गृणीमसि ॥२॥

duro aśvasya dura indra gor asi duro yavasya vasuna inas patiḥ | śikṣānaraḥ pradivo akāmakarśanaḥ sakhā sakhibhyas tam idaṃ gṛṇīmasi ||2||

Sanskrit only: no published translation is held for this verse.

शचीव इन्द्र पुरुकृद् द्युमत्तम तवेद् इदम् अभितश् चेकिते वसु । अतः संगृभ्याभिभूत आ भर मा त्वायतो जरितुः कामम् ऊनयीः ॥३॥

śacīva indra purukṛd dyumattama taved idam abhitaś cekite vasu | ataḥ saṃgṛbhyābhibhūta ā bhara mā tvāyato jarituḥ kāmam ūnayīḥ ||3||

Sanskrit only: no published translation is held for this verse.

एभिर् द्युभिर् सुमना एभिर् इन्दुभिर् निरुन्धानो अमतिं गोभिर् अश्विना । इन्द्रेण दस्युं दरयन्त इन्दुभिर् युतद्वेषसः सम् इषा रभेमहि ॥४॥

ebhir dyubhir sumanā ebhir indubhir nirundhāno amatiṃ gobhir aśvinā | indreṇa dasyuṃ darayanta indubhir yutadveṣasaḥ sam iṣā rabhemahi ||4||

Sanskrit only: no published translation is held for this verse.

सम् इन्द्र राया सम् इषा रभेमहि सं वाजेभिः पुरुश्चन्द्रैर् अभिद्युभिः । सं देव्या प्रमत्या वीरशुष्मया गोअग्रयाश्वावत्या रभेमहि ॥५॥

sam indra rāyā sam iṣā rabhemahi saṃ vājebhiḥ puruścandrair abhidyubhiḥ | saṃ devyā pramatyā vīraśuṣmayā goagrayāśvāvatyā rabhemahi ||5||

Sanskrit only: no published translation is held for this verse.

ते त्वा मदा अमदन् तानि वृष्ण्या ते सोमासो वृत्रहत्येषु सत्पते । यत् कारवे दश वृत्राण्य् अप्रति बर्हिष्मते नि सहस्राणि बर्हयः ॥६॥

te tvā madā amadan tāni vṛṣṇyā te somāso vṛtrahatyeṣu satpate | yat kārave daśa vṛtrāṇy aprati barhiṣmate ni sahasrāṇi barhayaḥ ||6||

Sanskrit only: no published translation is held for this verse.

युधा युधम् उप घेद् एषि धृष्णुया पुरा पुरं सम् इदं हंस्य् ओजसा । नम्या यद् इन्द्र सख्या परावति निबर्हयो नमुचिं नाम मायिनम् ॥७॥

yudhā yudham upa ghed eṣi dhṛṣṇuyā purā puraṃ sam idaṃ haṃsy ojasā | namyā yad indra sakhyā parāvati nibarhayo namuciṃ nāma māyinam ||7||

Sanskrit only: no published translation is held for this verse.

त्वं करञ्जम् उत पर्णयं वधीस् तेजिष्ठयातिथिग्वस्य वर्तनी । त्वं शता वङ्गृदस्याभिनत् पुरो ऽनानुदः परिषूता ऋजिश्वना ॥८॥

tvaṃ karañjam uta parṇayaṃ vadhīs tejiṣṭhayātithigvasya vartanī | tvaṃ śatā vaṅgṛdasyābhinat puro 'nānudaḥ pariṣūtā ṛjiśvanā ||8||

Sanskrit only: no published translation is held for this verse.

त्वम् एतां जनराज्ञो द्विर् दशाबन्धुना सुश्रवसोपजग्मुषः । षष्टिं सहस्रा नवतिं नव श्रुतो नि चक्रेण रथ्या दुष्पदावृणक् ॥९॥

tvam etāṃ janarājño dvir daśābandhunā suśravasopajagmuṣaḥ | ṣaṣṭiṃ sahasrā navatiṃ nava śruto ni cakreṇa rathyā duṣpadāvṛṇak ||9||

Sanskrit only: no published translation is held for this verse.

त्वम् आविथ सुश्रवसं तवोतिभिस् तव त्रामभिर् इन्द्र तूर्वयाणम् । त्व अस्मै कुत्सम् अतिथिग्वम् आयुं महे राज्ञे यूने अरन्धनायः ॥१०॥

tvam āvitha suśravasaṃ tavotibhis tava trāmabhir indra tūrvayāṇam | tva asmai kutsam atithigvam āyuṃ mahe rājñe yūne arandhanāyaḥ ||10||

Sanskrit only: no published translation is held for this verse.

य उदृचीन्द्र देवगोपाः सखायस् ते शिवतमा असाम । त्वां स्तोषाम त्वया सुवीरा द्राघीय आयुः प्रतरं दधानाः ॥११॥

ya udṛcīndra devagopāḥ sakhāyas te śivatamā asāma | tvāṃ stoṣāma tvayā suvīrā drāghīya āyuḥ prataraṃ dadhānāḥ ||11||

Sanskrit only: no published translation is held for this verse.