Atharvaveda Saṃhitā (Śaunaka) 20.92

अभि प्र गोपतिं गिरेन्द्रम् अर्च यथा विदे । सूतुं सत्यस्य सत्पतिम् ॥१॥

abhi pra gopatiṃ girendram arca yathā vide | sūtuṃ satyasya satpatim ||1||

Sanskrit only: no published translation is held for this verse.

आ हरयः ससृज्रिरे ऽरुषीर् अधि बर्हिषि । यत्राभि संनवामहे ॥२॥

ā harayaḥ sasṛjrire 'ruṣīr adhi barhiṣi | yatrābhi saṃnavāmahe ||2||

Sanskrit only: no published translation is held for this verse.

इन्द्राय गाव आशिरं दुदुह्रे वज्रिणे मधु । यत् सीम् उपह्वरे विदत् ॥३॥

indrāya gāva āśiraṃ duduhre vajriṇe madhu | yat sīm upahvare vidat ||3||

Sanskrit only: no published translation is held for this verse.

उद् यद् ब्रध्नस्य विष्टपं गृहम् इन्द्रश् च गन्वहि । मध्वः पीत्वा सचेवहि त्रिः सप्त सख्युः पदे ॥४॥

ud yad bradhnasya viṣṭapaṃ gṛham indraś ca ganvahi | madhvaḥ pītvā sacevahi triḥ sapta sakhyuḥ pade ||4||

Sanskrit only: no published translation is held for this verse.

अर्चत प्रार्चत प्रियमेधासो अर्चत । अर्चन्तु पुत्रका उत पुरं न धृष्ण्व् अर्चत ॥५॥

arcata prārcata priyamedhāso arcata | arcantu putrakā uta puraṃ na dhṛṣṇv arcata ||5||

Sanskrit only: no published translation is held for this verse.

अव स्वराति गर्गरो गोधा परि सनिष्वणत् । पिङ्गा परि चनिष्कदद् इन्द्राय ब्रह्मोद्यतम् ॥६॥

ava svarāti gargaro godhā pari saniṣvaṇat | piṅgā pari caniṣkadad indrāya brahmodyatam ||6||

Sanskrit only: no published translation is held for this verse.

आ यत् पतन्त्य् एन्यः सुदुघा अनपस्फुरः । अपस्फुरं गृभायत सोमम् इन्द्राय पातवे ॥७॥

ā yat patanty enyaḥ sudughā anapasphuraḥ | apasphuraṃ gṛbhāyata somam indrāya pātave ||7||

Sanskrit only: no published translation is held for this verse.

अपाद् इन्द्रो अपाद् अग्निर् विश्वे देवा अमत्सत । वरुण इद् इह क्षयत् तम् आपो अभ्य् अनूषत वत्सं संशिश्वरीर् इव ॥८॥

apād indro apād agnir viśve devā amatsata | varuṇa id iha kṣayat tam āpo abhy anūṣata vatsaṃ saṃśiśvarīr iva ||8||

Sanskrit only: no published translation is held for this verse.

सुदेवो असि वरुण यस्य ते सप्त सिन्धवः । अनुक्षरन्ति काकुदं सूर्यं सुषिराम् इव ॥९॥

sudevo asi varuṇa yasya te sapta sindhavaḥ | anukṣaranti kākudaṃ sūryaṃ suṣirām iva ||9||

Sanskrit only: no published translation is held for this verse.

यो व्यतींर् अफाणयत् सुयुक्तां उप दाशुषे । तक्वो नेता तद् इद् वपुर् उपमा यो अमुच्यत ॥१०॥

yo vyatīṃr aphāṇayat suyuktāṃ upa dāśuṣe | takvo netā tad id vapur upamā yo amucyata ||10||

Sanskrit only: no published translation is held for this verse.

अतीद् उ शक्र ओहत इन्द्रो विश्वा अति द्विषः । भिनत् कनीन ओदनं पच्यमानं परो गिरा ॥११॥

atīd u śakra ohata indro viśvā ati dviṣaḥ | bhinat kanīna odanaṃ pacyamānaṃ paro girā ||11||

Sanskrit only: no published translation is held for this verse.

अर्भको न कुमारको ऽधि तिष्ठन्न् अवं रथम् । स पक्षन् महिषं मृगं पित्रे मात्रे विभुक्रतुम् ॥१२॥

arbhako na kumārako 'dhi tiṣṭhann avaṃ ratham | sa pakṣan mahiṣaṃ mṛgaṃ pitre mātre vibhukratum ||12||

Sanskrit only: no published translation is held for this verse.

आ तू सुशिप्र दंपते रथं तिष्ठा हिरण्ययम् । अध द्युक्षं सचेवहि सहस्रपादम् अरुषं स्वस्तिगाम् अनेहसम् ॥१३॥

ā tū suśipra daṃpate rathaṃ tiṣṭhā hiraṇyayam | adha dyukṣaṃ sacevahi sahasrapādam aruṣaṃ svastigām anehasam ||13||

Sanskrit only: no published translation is held for this verse.

तम् घेम् इत्था नमस्विन उप स्वराजम् आसते । अर्थं चिद् अस्य सुधितं यद् एतवे आवर्तयन्ति दावने ॥१४॥

tam ghem itthā namasvina upa svarājam āsate | arthaṃ cid asya sudhitaṃ yad etave āvartayanti dāvane ||14||

Sanskrit only: no published translation is held for this verse.

अनु प्रत्नस्यौकसः प्रियमेधास एषाम् । पूर्वाम् अनु प्रयतिं वृक्तबर्हिषो हितप्रयस आशत ॥१५॥

anu pratnasyaukasaḥ priyamedhāsa eṣām | pūrvām anu prayatiṃ vṛktabarhiṣo hitaprayasa āśata ||15||

Sanskrit only: no published translation is held for this verse.

यो राजा चर्षणीनां याता रथेभिर् अध्रिगुः । विश्वासां तरुता पृतनानां ज्येष्ठो यो वृत्रहा गृणे ॥१६॥

yo rājā carṣaṇīnāṃ yātā rathebhir adhriguḥ | viśvāsāṃ tarutā pṛtanānāṃ jyeṣṭho yo vṛtrahā gṛṇe ||16||

Sanskrit only: no published translation is held for this verse.

इन्द्रं तं शुम्भ पुरुहन्मन्न् अवसे यस्य द्विता विधर्तरि । हस्ताय वज्रः प्रति धायि दर्शतो महो दिवे न सूर्यः ॥१७॥

indraṃ taṃ śumbha puruhanmann avase yasya dvitā vidhartari | hastāya vajraḥ prati dhāyi darśato maho dive na sūryaḥ ||17||

Sanskrit only: no published translation is held for this verse.

नकिष् टं कर्मणा नशद् यश् चकार सदावृधम् । इन्द्रं न यज्ञैर् विश्वगूर्तम् ऋभ्वसम् अधृष्टं धृष्ण्वोजसम् ॥१८॥

nakiṣ ṭaṃ karmaṇā naśad yaś cakāra sadāvṛdham | indraṃ na yajñair viśvagūrtam ṛbhvasam adhṛṣṭaṃ dhṛṣṇvojasam ||18||

Sanskrit only: no published translation is held for this verse.

अषाल्हम् उग्रं पृतनासु सासहिं यस्मिन् महीर् उरुज्रयः । सं धेनवो जायमाने अनोनवुर् द्यावः क्षामो अनोनवुः ॥१९॥

aṣālham ugraṃ pṛtanāsu sāsahiṃ yasmin mahīr urujrayaḥ | saṃ dhenavo jāyamāne anonavur dyāvaḥ kṣāmo anonavuḥ ||19||

Sanskrit only: no published translation is held for this verse.

यद् द्याव इन्द्र ते शतं शतं भूमीर् उत स्युः । न त्वा वज्रिन्त् सहस्रं सूर्या अनु न जातम् अष्ट रोदसी ॥२०॥

yad dyāva indra te śataṃ śataṃ bhūmīr uta syuḥ | na tvā vajrint sahasraṃ sūryā anu na jātam aṣṭa rodasī ||20||

Sanskrit only: no published translation is held for this verse.

आ पप्राथ महिना वृष्ण्या वृषन् विश्वा शविष्ठ शवसा । अस्मां अव मघवन् गोमति व्रजे वज्रिं चित्राभिर् ऊतिभिः ॥२१॥

ā paprātha mahinā vṛṣṇyā vṛṣan viśvā śaviṣṭha śavasā | asmāṃ ava maghavan gomati vraje vajriṃ citrābhir ūtibhiḥ ||21||

Sanskrit only: no published translation is held for this verse.