Library·Atharvaveda Saṃhitā (Śaunaka)·4·4.14
अजो ह्य् अग्नेर् अजनिष्ट शोकात् सो अपश्यज् जनितारम् अग्रे । तेन देवा देवताम् अग्रा आयन् तेन रोहान् रुरुहुर् मेध्यासः ॥१॥
ajo hy agner ajaniṣṭa śokāt so apaśyaj janitāram agre | tena devā devatām agrā āyan tena rohān ruruhur medhyāsaḥ ||1||
Sanskrit only: no published translation is held for this verse.
क्रमध्वम् अग्निना नाकम् उख्यान् हस्तेषु बिभ्रतः । दिवस् पृष्ठं स्वर् गत्वा मिश्रा देवेभिर् आध्वम् ॥२॥
kramadhvam agninā nākam ukhyān hasteṣu bibhrataḥ | divas pṛṣṭhaṃ svar gatvā miśrā devebhir ādhvam ||2||
Sanskrit only: no published translation is held for this verse.
पृष्ठात् पृथिव्या अहम् अन्तरिक्षम् आरुहम् अन्तरिक्षाद् दिवम् आरुहम् । दिवो नाकस्य पृष्ठात् स्वर् ज्योतिर् अगाम् अहम् ॥३॥
pṛṣṭhāt pṛthivyā aham antarikṣam āruham antarikṣād divam āruham | divo nākasya pṛṣṭhāt svar jyotir agām aham ||3||
Sanskrit only: no published translation is held for this verse.
स्वर् यन्तो नापेक्षन्त आ द्यां रोहन्ति रोदसी । यज्ञं ये विश्वतोधारं सुविद्वांसो वितेनिरे ॥४॥
svar yanto nāpekṣanta ā dyāṃ rohanti rodasī | yajñaṃ ye viśvatodhāraṃ suvidvāṃso vitenire ||4||
Sanskrit only: no published translation is held for this verse.
अग्ने प्रेहि प्रथमो देवतानां चक्षुर् देवानाम् उत मानुषानाम् । इयक्षमाणा भृगुभिः सजोषाः स्वर् यन्तु यजमानाः स्वस्ति ॥५॥
agne prehi prathamo devatānāṃ cakṣur devānām uta mānuṣānām | iyakṣamāṇā bhṛgubhiḥ sajoṣāḥ svar yantu yajamānāḥ svasti ||5||
Sanskrit only: no published translation is held for this verse.
अजम् अनज्मि पयसा घृतेन दिव्यं सुपर्नं पयसं बृहन्तम् । तेन गेष्म सुकृतस्य लोकं स्वर् आरोहन्तो अभि नाकम् उत्तमम् ॥६॥
ajam anajmi payasā ghṛtena divyaṃ suparnaṃ payasaṃ bṛhantam | tena geṣma sukṛtasya lokaṃ svar ārohanto abhi nākam uttamam ||6||
Sanskrit only: no published translation is held for this verse.
पञ्चौदनं पञ्चभिर् अङ्गुलिभिर् दर्व्योद्धर पञ्चधैतम् ओदनम् । प्राच्यां दिशि शिरो अजस्य धेहि दक्षिणायां दिशि दक्षिणं धेहि पार्श्वम् ॥७॥
pañcaudanaṃ pañcabhir aṅgulibhir darvyoddhara pañcadhaitam odanam | prācyāṃ diśi śiro ajasya dhehi dakṣiṇāyāṃ diśi dakṣiṇaṃ dhehi pārśvam ||7||
Sanskrit only: no published translation is held for this verse.
प्रतीच्यां दिशि भसदम् अस्य धेह्य् उत्तरस्यां दिश्य् उत्तरं धेहि पार्श्वम् । ऊर्ध्वायां दिश्य् अजस्यानूकं धेहि दिशि ध्रुवायां धेहि पाजस्यम् अन्तरिक्षे मध्यतो मध्यम् अस्य ॥८॥
pratīcyāṃ diśi bhasadam asya dhehy uttarasyāṃ diśy uttaraṃ dhehi pārśvam | ūrdhvāyāṃ diśy ajasyānūkaṃ dhehi diśi dhruvāyāṃ dhehi pājasyam antarikṣe madhyato madhyam asya ||8||
Sanskrit only: no published translation is held for this verse.
शृतम् अजं शृतया प्रोर्णुहि त्वचा सर्वैर् अङ्गैः संभृतं विश्वरूपम् । स उत् तिस्ठेतो अभि नाकम् उत्तमं पद्भिश् चतुर्भिः प्रति तिष्ठ दिक्षु ॥९॥
śṛtam ajaṃ śṛtayā prorṇuhi tvacā sarvair aṅgaiḥ saṃbhṛtaṃ viśvarūpam | sa ut tisṭheto abhi nākam uttamaṃ padbhiś caturbhiḥ prati tiṣṭha dikṣu ||9||
Sanskrit only: no published translation is held for this verse.