Atharvaveda Saṃhitā (Śaunaka) 4.26

मन्वे वां द्यावापृथिवी सुभोजसौ सचेतसौ ये अप्रथेथाम् अमिता योजनानि । प्रतिष्ठे ह्य् अभवतं वसूनां ते नो मुञ्चतम् अंहसः ॥१॥

manve vāṃ dyāvāpṛthivī subhojasau sacetasau ye aprathethām amitā yojanāni | pratiṣṭhe hy abhavataṃ vasūnāṃ te no muñcatam aṃhasaḥ ||1||

Sanskrit only: no published translation is held for this verse.

प्रतिष्ठे ह्य् अभवतं वसूनां प्रवृद्धे देवी सुभगे उरूची । द्यावापृथिवी भवतं मे स्योने ते नो मुञ्चतम् अंहसः ॥२॥

pratiṣṭhe hy abhavataṃ vasūnāṃ pravṛddhe devī subhage urūcī | dyāvāpṛthivī bhavataṃ me syone te no muñcatam aṃhasaḥ ||2||

Sanskrit only: no published translation is held for this verse.

असन्तापे सुतपसौ हुवे ऽहम् उर्वी गम्भीरे कविभिर् नमस्ये । द्यावापृथिवी भवतं मे स्योने ते नो मुञ्चतम् अंहसः ॥३॥

asantāpe sutapasau huve 'ham urvī gambhīre kavibhir namasye | dyāvāpṛthivī bhavataṃ me syone te no muñcatam aṃhasaḥ ||3||

Sanskrit only: no published translation is held for this verse.

ये अमृतं बिभृथो ये हवींषि ये स्रोत्या बिभृथो ये मनुष्यान् । द्यावापृथिवी भवतं मे स्योने ते नो मुञ्चतम् अंहसः ॥४॥

ye amṛtaṃ bibhṛtho ye havīṃṣi ye srotyā bibhṛtho ye manuṣyān | dyāvāpṛthivī bhavataṃ me syone te no muñcatam aṃhasaḥ ||4||

Sanskrit only: no published translation is held for this verse.

ये उस्रिया बिभृथो ये वनस्पतीन् ययोर् वां विश्वा भुवनान्य् अन्तः । द्यावापृथिवी भवतं मे स्योने ते नो मुञ्चतम् अंहसः ॥५॥

ye usriyā bibhṛtho ye vanaspatīn yayor vāṃ viśvā bhuvanāny antaḥ | dyāvāpṛthivī bhavataṃ me syone te no muñcatam aṃhasaḥ ||5||

Sanskrit only: no published translation is held for this verse.

ये कीलालेन तर्पयथो ये घृतेन याभ्याम् ऋते न किं चन शक्नुवन्ति । द्यावापृथिवी भवतं मे स्योने ते नो मुञ्चतम् अंहसः ॥६॥

ye kīlālena tarpayatho ye ghṛtena yābhyām ṛte na kiṃ cana śaknuvanti | dyāvāpṛthivī bhavataṃ me syone te no muñcatam aṃhasaḥ ||6||

Sanskrit only: no published translation is held for this verse.

यन् मेदम् अभिशोचति येनयेन वा कृतं पौरुषेयान् न दैवात् । स्तौमि द्यावापृथिवी नाथितो जोहवीमि ते नो मुञ्चतम् अंहसः ॥७॥

yan medam abhiśocati yenayena vā kṛtaṃ pauruṣeyān na daivāt | staumi dyāvāpṛthivī nāthito johavīmi te no muñcatam aṃhasaḥ ||7||

Sanskrit only: no published translation is held for this verse.