ब्राह्मणो जज्ञे प्रथमो दशशीर्षो दशास्यः । स सोमं प्रथमः पपौ स चकारारसं विषम् ॥१॥
brāhmaṇo jajñe prathamo daśaśīrṣo daśāsyaḥ | sa somaṃ prathamaḥ papau sa cakārārasaṃ viṣam ||1||
Sanskrit only: no published translation is held for this verse.
Library·Atharvaveda Saṃhitā (Śaunaka)·4·4.6
Atharvaveda Saṃhitā (Śaunaka) 4.6
यावती द्यावापृथिवी वरिम्णा यावत् सप्त सिन्धवो वितष्ठिरे । वाचं विषस्य दूषणीं ताम् इतो निर् अवादिषम् ॥२॥
yāvatī dyāvāpṛthivī varimṇā yāvat sapta sindhavo vitaṣṭhire | vācaṃ viṣasya dūṣaṇīṃ tām ito nir avādiṣam ||2||
Sanskrit only: no published translation is held for this verse.
सुपर्णस् त्वा गरुत्मान् विष प्रथमम् आवयत् । नामीमदो नारूरुप उतास्मा अभवः पितुः ॥३॥
suparṇas tvā garutmān viṣa prathamam āvayat | nāmīmado nārūrupa utāsmā abhavaḥ pituḥ ||3||
Sanskrit only: no published translation is held for this verse.
यस् त आस्यत् पञ्चाङ्गुरिर् वक्राच् चिद् अधि धन्वनः । अपस्कम्भस्य शल्यान् निर् अवोचम् अहं विषम् ॥४॥
yas ta āsyat pañcāṅgurir vakrāc cid adhi dhanvanaḥ | apaskambhasya śalyān nir avocam ahaṃ viṣam ||4||
Sanskrit only: no published translation is held for this verse.
शल्याद् विषं निर् अवोचम् प्राञ्जनाद् उत पर्णधेः । अपाष्ठाच् छृङ्गात् कुल्मलान् निर् अवोचम् अहम् विषम् ॥५॥
śalyād viṣaṃ nir avocam prāñjanād uta parṇadheḥ | apāṣṭhāc chṛṅgāt kulmalān nir avocam aham viṣam ||5||
Sanskrit only: no published translation is held for this verse.
अरसस् त इषो शल्यो ऽथो ते अरसं विषम् । उतारसस्य वृक्षस्य धनुष् टे अरसारसम् ॥६॥
arasas ta iṣo śalyo 'tho te arasaṃ viṣam | utārasasya vṛkṣasya dhanuṣ ṭe arasārasam ||6||
Sanskrit only: no published translation is held for this verse.
ये अपीषन् ये अदिहन् य आस्यन् ये अवासृजन् । सर्वे ते वध्रयः कृता वध्रिर् विषगिरिः कृतः ॥७॥
ye apīṣan ye adihan ya āsyan ye avāsṛjan | sarve te vadhrayaḥ kṛtā vadhrir viṣagiriḥ kṛtaḥ ||7||
Sanskrit only: no published translation is held for this verse.
वध्रयस् ते खनितारो वध्रिस् त्वम् अस्य् ओषधे । वध्रिः स पर्वतो गिरिर् यतो जातम् इदं विषम् ॥८॥
vadhrayas te khanitāro vadhris tvam asy oṣadhe | vadhriḥ sa parvato girir yato jātam idaṃ viṣam ||8||
Sanskrit only: no published translation is held for this verse.