Library·Atharvaveda Saṃhitā (Śaunaka)·6·6.8
यथा वृक्षं लिबुजा समन्तं परिषस्वजे । एवा परि ष्वजस्व मां यथा मां कामिन्य् असो यथा मन् नापगा असः ॥१॥
yathā vṛkṣaṃ libujā samantaṃ pariṣasvaje | evā pari ṣvajasva māṃ yathā māṃ kāminy aso yathā man nāpagā asaḥ ||1||
As the creeper (líbujā) has completely embraced the tree, so do thou embrace me—that thou mayest be one loving me, that thou mayest be one not going away from me.
Translated by William Dwight Whitney (1905)
यथा सुपर्णः प्रपतन् पक्षौ निहन्ति भूम्याम् । एवा नि हन्मि ते मनो यथा मां कामिन्य् असो यथा मन् नापगा असः ॥२॥
yathā suparṇaḥ prapatan pakṣau nihanti bhūmyām | evā ni hanmi te mano yathā māṃ kāminy aso yathā man nāpagā asaḥ ||2||
As the eagle, flying forth, beats down his wings upon the earth, so do I beat down thy mind—that thou etc. etc.
Translated by William Dwight Whitney (1905)
यथेमे द्यावापृथिवी सद्यः पर्येति सूर्यः । एवा पर्य् एमि ते मनो यथा मां कामिन्य् असो यथा मन् नापगा असः ॥३॥
yatheme dyāvāpṛthivī sadyaḥ paryeti sūryaḥ | evā pary emi te mano yathā māṃ kāminy aso yathā man nāpagā asaḥ ||3||
As the sun goeth at once about heaven-and-earth here, so do I go about thy mind—that thou etc. etc.
Translated by William Dwight Whitney (1905)