Atharvaveda Saṃhitā (Śaunaka) 7.109

इदम् उग्राय बभ्रवे नमो यो अक्षेषु तनूवशी । घृतेन कलिं शिक्षामि स नो मृडातीदृशे ॥१॥

idam ugrāya babhrave namo yo akṣeṣu tanūvaśī | ghṛtena kaliṃ śikṣāmi sa no mṛḍātīdṛśe ||1||

Sanskrit only: no published translation is held for this verse.

घृतम् अप्सराभ्यो वह त्वम् अग्ने पांसून् अक्षेभ्यः सिकता अपश् च । यथाभगं हव्यदातिं जुषाणा मदन्ति देवा उभयानि हव्या ॥२॥

ghṛtam apsarābhyo vaha tvam agne pāṃsūn akṣebhyaḥ sikatā apaś ca | yathābhagaṃ havyadātiṃ juṣāṇā madanti devā ubhayāni havyā ||2||

Sanskrit only: no published translation is held for this verse.

अप्सरसः सधमादं मदन्ति हविर्धानम् अन्तरा सूर्यं च । ता मे हस्तौ सं सृजन्तु घृतेन सपत्नं मे कितवम् रन्धयन्तु ॥३॥

apsarasaḥ sadhamādaṃ madanti havirdhānam antarā sūryaṃ ca | tā me hastau saṃ sṛjantu ghṛtena sapatnaṃ me kitavam randhayantu ||3||

Sanskrit only: no published translation is held for this verse.

आदिनवं प्रतिदीव्ने घृतेनास्मां अभि क्षर । वृक्षम् इवाशन्या जहि यो अस्मान् प्रतिदीव्यति ॥४॥

ādinavaṃ pratidīvne ghṛtenāsmāṃ abhi kṣara | vṛkṣam ivāśanyā jahi yo asmān pratidīvyati ||4||

Sanskrit only: no published translation is held for this verse.

यो नो द्युवे धनम् इदं चकार यो अक्षाणां ग्लहनं शेषणं च । स नो देवो हविर् इदं जुषाणो गन्धर्वेभिः सधमादं मदेम ॥५॥

yo no dyuve dhanam idaṃ cakāra yo akṣāṇāṃ glahanaṃ śeṣaṇaṃ ca | sa no devo havir idaṃ juṣāṇo gandharvebhiḥ sadhamādaṃ madema ||5||

Sanskrit only: no published translation is held for this verse.

संवसव इति वो नामधेयम् उग्रंपश्या राष्ट्रभृतो ह्य् अक्षाः । तेभ्यो व इन्दवो हविषा विधेम वयं स्याम पतयो रयीणाम् ॥६॥

saṃvasava iti vo nāmadheyam ugraṃpaśyā rāṣṭrabhṛto hy akṣāḥ | tebhyo va indavo haviṣā vidhema vayaṃ syāma patayo rayīṇām ||6||

Sanskrit only: no published translation is held for this verse.

देवान् यन् नाथितो हुवे ब्रह्मचर्यं यद् ऊषिम । अक्षान् यद् बभ्रून् आलभे ते नो मृडन्त्व् ईदृशे ॥७॥

devān yan nāthito huve brahmacaryaṃ yad ūṣima | akṣān yad babhrūn ālabhe te no mṛḍantv īdṛśe ||7||

Sanskrit only: no published translation is held for this verse.