Atharvaveda Saṃhitā (Śaunaka) 7.12

सभा च मा समितिश् चावतां प्रजापतेर् दुहितरौ संविदाने । येना संगछा उप मा स शिक्षाच् चारु वदानि पितरः संगतेषु ॥१॥

sabhā ca mā samitiś cāvatāṃ prajāpater duhitarau saṃvidāne | yenā saṃgachā upa mā sa śikṣāc cāru vadāni pitaraḥ saṃgateṣu ||1||

Sanskrit only: no published translation is held for this verse.

विद्म ते सभे नाम नरिष्टा नाम वा असि । ये ते के च सभासदस् ते मे सन्तु सवाचसः ॥२॥

vidma te sabhe nāma nariṣṭā nāma vā asi | ye te ke ca sabhāsadas te me santu savācasaḥ ||2||

Sanskrit only: no published translation is held for this verse.

एषाम् अहं समासीनानां वर्चो विज्ञानम् आ ददे । अस्याः सर्वस्याः संसदो माम् इन्द्र भगिनं कृणु ॥३॥

eṣām ahaṃ samāsīnānāṃ varco vijñānam ā dade | asyāḥ sarvasyāḥ saṃsado mām indra bhaginaṃ kṛṇu ||3||

Sanskrit only: no published translation is held for this verse.

यद् वो मनः परागतं यद् बद्धम् इह वेह वा । तद् व आ वर्तयामसि मयि वो रमतां मनः ॥४॥

yad vo manaḥ parāgataṃ yad baddham iha veha vā | tad va ā vartayāmasi mayi vo ramatāṃ manaḥ ||4||

Sanskrit only: no published translation is held for this verse.