Library·Atharvaveda Saṃhitā (Śaunaka)·7·7.35
प्रान्यान्त् सपत्नान्त् सहसा सहस्व प्रत्य् अजातान् जातवेदो नुदस्व । इदं राष्ट्रं पिपृहि सौभगाय विश्व एनम् अनु मदन्तु देवाः ॥१॥
prānyānt sapatnānt sahasā sahasva praty ajātān jātavedo nudasva | idaṃ rāṣṭraṃ pipṛhi saubhagāya viśva enam anu madantu devāḥ ||1||
Sanskrit only: no published translation is held for this verse.
इमा यास् ते शतं हिराः सहस्रं धमनीर् उत । तासां ते सर्वासाम् अहम् अश्मना बिलम् अप्य् अधाम् ॥२॥
imā yās te śataṃ hirāḥ sahasraṃ dhamanīr uta | tāsāṃ te sarvāsām aham aśmanā bilam apy adhām ||2||
Sanskrit only: no published translation is held for this verse.
परं योनेर् अवरं ते कृणोमि मा त्वा प्रजाभि भून् मोत सूतुः । अस्वं त्वाप्रजसं कृणोम्य् अश्मानं ते अपिधानम् कृणोमि ॥३॥
paraṃ yoner avaraṃ te kṛṇomi mā tvā prajābhi bhūn mota sūtuḥ | asvaṃ tvāprajasaṃ kṛṇomy aśmānaṃ te apidhānam kṛṇomi ||3||
Sanskrit only: no published translation is held for this verse.