Library·Atharvaveda Saṃhitā (Śaunaka)·7·7.53
अमुत्रभूयाद् अधि यद् यमस्य बृहस्पते अभिशस्तेर् अमुञ्चः । प्रत्य् औहताम् अश्विना मृत्युम् अस्मद् देवानाम् अग्ने भिषजा शचीभिः ॥१॥
amutrabhūyād adhi yad yamasya bṛhaspate abhiśaster amuñcaḥ | praty auhatām aśvinā mṛtyum asmad devānām agne bhiṣajā śacībhiḥ ||1||
Sanskrit only: no published translation is held for this verse.
सं क्रामतं मा जहीतं शरीरं प्राणापानौ ते सयुजाव् इह स्ताम् । शतं जीव शरदो वर्धमानो ऽग्निष् टे गोपा अधिपा वसिष्ठः ॥२॥
saṃ krāmataṃ mā jahītaṃ śarīraṃ prāṇāpānau te sayujāv iha stām | śataṃ jīva śarado vardhamāno 'gniṣ ṭe gopā adhipā vasiṣṭhaḥ ||2||
Sanskrit only: no published translation is held for this verse.
आयुर् यत् ते अतिहितं पराचैर् अपानः प्राणः पुनर् आ ताव् इताम् । अग्निष् टद् आहार् निरृतेर् उपस्थात् तद् आत्मनि पुनर् आ वेशयामि ते ॥३॥
āyur yat te atihitaṃ parācair apānaḥ prāṇaḥ punar ā tāv itām | agniṣ ṭad āhār nirṛter upasthāt tad ātmani punar ā veśayāmi te ||3||
Sanskrit only: no published translation is held for this verse.
मेमं प्राणो हासीन् मो अपानो ऽवहाय परा गात् । सप्तर्षिभ्य एनं परि ददामि ते एनं स्वस्ति जरसे वहन्तु ॥४॥
memaṃ prāṇo hāsīn mo apāno 'vahāya parā gāt | saptarṣibhya enaṃ pari dadāmi te enaṃ svasti jarase vahantu ||4||
Sanskrit only: no published translation is held for this verse.
प्र विषतं प्राणापानाव् अनड्वाहाव् इव व्रजम् । अयं जरिम्नः शेवधिर् अरिष्ट इह वर्धताम् ॥५॥
pra viṣataṃ prāṇāpānāv anaḍvāhāv iva vrajam | ayaṃ jarimnaḥ śevadhir ariṣṭa iha vardhatām ||5||
Sanskrit only: no published translation is held for this verse.
आ ते प्राणं सुवामसि परा यक्ष्मं सुवामि ते । आयुर् नो विश्वतो दधद् अयम् अग्निर् वरेण्यः ॥६॥
ā te prāṇaṃ suvāmasi parā yakṣmaṃ suvāmi te | āyur no viśvato dadhad ayam agnir vareṇyaḥ ||6||
Sanskrit only: no published translation is held for this verse.
उद् वयं तमसस् परि रोहन्तो नाकम् उत्तमम् । देवं देवत्रा सूर्यम् अगन्म ज्योतिर् उत्तमम् ॥७॥
ud vayaṃ tamasas pari rohanto nākam uttamam | devaṃ devatrā sūryam aganma jyotir uttamam ||7||
Sanskrit only: no published translation is held for this verse.