Atharvaveda Saṃhitā (Śaunaka) 7.56

तिरश्चिराजेर् असितात् पृदाकोः परि संभृतम् । तत् कङ्कपर्वणो विषम् इयं वीरुद् अनीनशत् ॥१॥

tiraścirājer asitāt pṛdākoḥ pari saṃbhṛtam | tat kaṅkaparvaṇo viṣam iyaṃ vīrud anīnaśat ||1||

Sanskrit only: no published translation is held for this verse.

इयं वीरुन् मधुजाता मधुश्चुन् मधुला मधूः । सा विह्रुतस्य भेषज्य् अथो मशकजम्भनी ॥२॥

iyaṃ vīrun madhujātā madhuścun madhulā madhūḥ | sā vihrutasya bheṣajy atho maśakajambhanī ||2||

Sanskrit only: no published translation is held for this verse.

यतो दष्टं यतो धीतं ततस् ते निर् ह्वयामसि । अर्भस्य तृप्रदंशिनो मशकस्यारसं विषम् ॥३॥

yato daṣṭaṃ yato dhītaṃ tatas te nir hvayāmasi | arbhasya tṛpradaṃśino maśakasyārasaṃ viṣam ||3||

Sanskrit only: no published translation is held for this verse.

अयं यो वक्रो विपरुर् व्यङ्गो मुखानि वक्रा वृजिना कृणोषि । तानि त्वं ब्रह्मणस् पते इषीकाम् इव सं नमः ॥४॥

ayaṃ yo vakro viparur vyaṅgo mukhāni vakrā vṛjinā kṛṇoṣi | tāni tvaṃ brahmaṇas pate iṣīkām iva saṃ namaḥ ||4||

Sanskrit only: no published translation is held for this verse.

अरसस्य शर्कोटस्य नीचीनस्योपसर्पतः । विषं ह्य् अस्यादिष्य् अथो एनम् अजीजभम् ॥५॥

arasasya śarkoṭasya nīcīnasyopasarpataḥ | viṣaṃ hy asyādiṣy atho enam ajījabham ||5||

Sanskrit only: no published translation is held for this verse.

न ते बाह्वोर् बलम् अस्ति न शीर्षे नोत मध्यतः । अथ किं पापया ऽमुया पुछे बिभर्ष्य् अर्भकम् ॥६॥

na te bāhvor balam asti na śīrṣe nota madhyataḥ | atha kiṃ pāpayā 'muyā puche bibharṣy arbhakam ||6||

Sanskrit only: no published translation is held for this verse.

अदन्ति त्वा पिपीलिका वि वृश्चन्ति मयूर्यः । सर्वे भल ब्रवाथ शार्कोटम् अरसं विषम् ॥७॥

adanti tvā pipīlikā vi vṛścanti mayūryaḥ | sarve bhala bravātha śārkoṭam arasaṃ viṣam ||7||

Sanskrit only: no published translation is held for this verse.

य उभाभ्यां प्रहरसि पुछेन चास्येन च । आस्ये न ते विषं किम् उ ते पुछधाव् असत् ॥८॥

ya ubhābhyāṃ praharasi puchena cāsyena ca | āsye na te viṣaṃ kim u te puchadhāv asat ||8||

Sanskrit only: no published translation is held for this verse.