Library·Atharvaveda Saṃhitā (Śaunaka)·7·7.60
ऊर्जं बिभ्रद् वसुवनिः सुमेधा अघोरेण चक्षुषा मित्रियेण । गृहान् ऐमि सुमना वन्दमानो रमध्वम् मा बिभीत मत् ॥१॥
ūrjaṃ bibhrad vasuvaniḥ sumedhā aghoreṇa cakṣuṣā mitriyeṇa | gṛhān aimi sumanā vandamāno ramadhvam mā bibhīta mat ||1||
Sanskrit only: no published translation is held for this verse.
इमे गृहा मयोभुव ऊर्जस्वन्तः पयस्वन्तः । पूर्णा वामेन तिष्ठन्तस् ते नो जानन्त्व् आयतः ॥२॥
ime gṛhā mayobhuva ūrjasvantaḥ payasvantaḥ | pūrṇā vāmena tiṣṭhantas te no jānantv āyataḥ ||2||
Sanskrit only: no published translation is held for this verse.
येषाम् अध्येति प्रवसन् येषु सौमनसो बहुः । गृहान् उप ह्वयामहे ते नो जानन्त्व् आयतः ॥३॥
yeṣām adhyeti pravasan yeṣu saumanaso bahuḥ | gṛhān upa hvayāmahe te no jānantv āyataḥ ||3||
Sanskrit only: no published translation is held for this verse.
उपहूता भूरिधनाः सखायः स्वादुसंमुदः । अक्षुध्या अतृष्या स्त गृहा मास्मद् बिभीतन ॥४॥
upahūtā bhūridhanāḥ sakhāyaḥ svādusaṃmudaḥ | akṣudhyā atṛṣyā sta gṛhā māsmad bibhītana ||4||
Sanskrit only: no published translation is held for this verse.
उपहूता इह गाव उपहूता अजावयः । अथो अन्नस्य कीलाल उपहूतो गृहेषु ॥५॥
upahūtā iha gāva upahūtā ajāvayaḥ | atho annasya kīlāla upahūto gṛheṣu ||5||
Sanskrit only: no published translation is held for this verse.
सूनृतावन्तः सुभगा इरावन्तो हसामुदाः । अतृष्या अक्षुध्या स्त गृहा मास्मद् बिभीतन ॥६॥
sūnṛtāvantaḥ subhagā irāvanto hasāmudāḥ | atṛṣyā akṣudhyā sta gṛhā māsmad bibhītana ||6||
Sanskrit only: no published translation is held for this verse.
इहैव स्त मानु गात विश्वा रूपाणि पुष्यत । ऐष्यामि भद्रेणा सह भूयांसो भवता मया ॥७॥
ihaiva sta mānu gāta viśvā rūpāṇi puṣyata | aiṣyāmi bhadreṇā saha bhūyāṃso bhavatā mayā ||7||
Sanskrit only: no published translation is held for this verse.