Atharvaveda Saṃhitā (Śaunaka) 7.70

यत् किं चासौ मनसा यच् च वाचा यज्ञैर् जुहोति हविषा यजुषा । तन् मृत्युना निरृतिः संविदाना पुरा सत्याद् आहुतिं हन्त्व् अस्य ॥१॥

yat kiṃ cāsau manasā yac ca vācā yajñair juhoti haviṣā yajuṣā | tan mṛtyunā nirṛtiḥ saṃvidānā purā satyād āhutiṃ hantv asya ||1||

Sanskrit only: no published translation is held for this verse.

यातुधाना निरृतिर् आद् उ रक्षस् ते अस्य घ्नन्त्व् अनृतेन सत्यम् । इन्द्रेषिता देवा आजम् अस्य मथ्नन्तु मा तत् सं पादि यद् असौ जुहोति ॥२॥

yātudhānā nirṛtir ād u rakṣas te asya ghnantv anṛtena satyam | indreṣitā devā ājam asya mathnantu mā tat saṃ pādi yad asau juhoti ||2||

Sanskrit only: no published translation is held for this verse.

अजिराधिराजौ श्येनौ संपातिनाव् इव । आज्यं पृतन्यतो हतां यो नः कश्चाभ्यघायति ॥३॥

ajirādhirājau śyenau saṃpātināv iva | ājyaṃ pṛtanyato hatāṃ yo naḥ kaścābhyaghāyati ||3||

Sanskrit only: no published translation is held for this verse.

अपाञ्चौ त उभौ बाहू अपि नह्याम्य् आस्यम् । अग्नेर् देवस्य मन्युना तेन ते ऽवधिषं हविः ॥४॥

apāñcau ta ubhau bāhū api nahyāmy āsyam | agner devasya manyunā tena te 'vadhiṣaṃ haviḥ ||4||

Sanskrit only: no published translation is held for this verse.

अपि नह्यामि ते बाहू अपि नह्याम्य् आस्यम् । अग्नेर् घोरस्य मन्युना तेन ऽवधिषं हविः ॥५॥

api nahyāmi te bāhū api nahyāmy āsyam | agner ghorasya manyunā tena 'vadhiṣaṃ haviḥ ||5||

Sanskrit only: no published translation is held for this verse.