Atharvaveda Saṃhitā (Śaunaka) 7.82

अभ्य् अर्चत सुष्टुतिं गव्यम् आजिम् अस्मासु भद्रा द्रविणानि धत्त । इमं यज्ञं नयत देवता नो घृतस्य धारा मधुमत् पवन्ताम् ॥१॥

abhy arcata suṣṭutiṃ gavyam ājim asmāsu bhadrā draviṇāni dhatta | imaṃ yajñaṃ nayata devatā no ghṛtasya dhārā madhumat pavantām ||1||

मय्य् अग्रे अग्निं गृह्णामि सह क्षत्रेण वर्चसा बलेन । मयि प्रजां मय्य् आयुर् दधामि स्वाहा मय्य् अग्निम् ॥२॥

mayy agre agniṃ gṛhṇāmi saha kṣatreṇa varcasā balena | mayi prajāṃ mayy āyur dadhāmi svāhā mayy agnim ||2||

Sanskrit only: no published translation is held for this verse.

इहैवाग्ने अध्य् धारया रयिम् मा त्वा नि क्रन् पूर्वचित्ता निकारिणः । क्षत्रेणाग्ने सुयमम् अस्तु तुभ्यम् उपसत्ता वर्धतां ते अनिष्टृतः ॥३॥

ihaivāgne adhy dhārayā rayim mā tvā ni kran pūrvacittā nikāriṇaḥ | kṣatreṇāgne suyamam astu tubhyam upasattā vardhatāṃ te aniṣṭṛtaḥ ||3||

Sanskrit only: no published translation is held for this verse.

अन्व् अग्निर् उषसाम् अग्रम् अख्यद् अन्व् अहानि प्रथमो जातवेदाः । अनु सूर्य उषसो अनु रश्मीन् अनु द्यावापृथिवी आ विवेश ॥४॥

anv agnir uṣasām agram akhyad anv ahāni prathamo jātavedāḥ | anu sūrya uṣaso anu raśmīn anu dyāvāpṛthivī ā viveśa ||4||

Sanskrit only: no published translation is held for this verse.

प्रत्य् अग्निर् उषसाम् अग्रम् अख्यत् प्रति अहानि प्रथमो जातवेदाः । प्रति सूर्यस्य पुरुधा च रश्मीन् प्रति द्यावापृथिवी आ ततान ॥५॥

praty agnir uṣasām agram akhyat prati ahāni prathamo jātavedāḥ | prati sūryasya purudhā ca raśmīn prati dyāvāpṛthivī ā tatāna ||5||

Sanskrit only: no published translation is held for this verse.

घृतं ते अग्ने दिव्ये सधस्थे घृतेन त्वां मनुर् अद्या सम् इन्धे । घृतं ते देवीर् नप्त्य आ वहन्तु घृतं तुभ्यं दुह्रतां गावो अग्ने ॥६॥

ghṛtaṃ te agne divye sadhasthe ghṛtena tvāṃ manur adyā sam indhe | ghṛtaṃ te devīr naptya ā vahantu ghṛtaṃ tubhyaṃ duhratāṃ gāvo agne ||6||

Sanskrit only: no published translation is held for this verse.