Atharvaveda Saṃhitā (Śaunaka) 8.8

इन्द्रो मन्थतु मन्थिता शक्रः शूरः पुरंदरः । यथा हनाम सेना अमित्राणां सहस्रशः ॥१॥

indro manthatu manthitā śakraḥ śūraḥ puraṃdaraḥ | yathā hanāma senā amitrāṇāṃ sahasraśaḥ ||1||

Sanskrit only: no published translation is held for this verse.

पूतिरज्जुर् उपध्मानी पूतिं सेनां कृणोत्व् अमूम् । धूमम् अग्निम् परादृश्या ऽमित्रा हृत्स्व् आ दधतां भयम् ॥२॥

pūtirajjur upadhmānī pūtiṃ senāṃ kṛṇotv amūm | dhūmam agnim parādṛśyā 'mitrā hṛtsv ā dadhatāṃ bhayam ||2||

Sanskrit only: no published translation is held for this verse.

अमून् अश्वत्थ निः शृणीहि खादामून् खदिराजिरम् । ताजद्भङ्ग इव भजन्तां हन्त्व् एनान् वधको वधैः ॥३॥

amūn aśvattha niḥ śṛṇīhi khādāmūn khadirājiram | tājadbhaṅga iva bhajantāṃ hantv enān vadhako vadhaiḥ ||3||

Sanskrit only: no published translation is held for this verse.

परुषान् अमून् परुषाह्वः कृणोतु हन्त्व् एनान् वधको वधैः । क्षिप्रं शर इव भजन्तां बृहज्जालेन संदिताः ॥४॥

paruṣān amūn paruṣāhvaḥ kṛṇotu hantv enān vadhako vadhaiḥ | kṣipraṃ śara iva bhajantāṃ bṛhajjālena saṃditāḥ ||4||

Sanskrit only: no published translation is held for this verse.

अन्तरिक्षं जालम् आसीज् जालदण्डा दिशो महीः । तेनाभिधाय दस्यूनां शक्रः सेनाम् अपावपत् ॥५॥

antarikṣaṃ jālam āsīj jāladaṇḍā diśo mahīḥ | tenābhidhāya dasyūnāṃ śakraḥ senām apāvapat ||5||

Sanskrit only: no published translation is held for this verse.

बृहद् धि जालं बृहतः शक्रस्य वाजिनीवतः । तेन शत्रून् अभि सर्वान् न्य् उब्ज यथा न मुच्यातै कतमश् चनैषाम् ॥६॥

bṛhad dhi jālaṃ bṛhataḥ śakrasya vājinīvataḥ | tena śatrūn abhi sarvān ny ubja yathā na mucyātai katamaś canaiṣām ||6||

Sanskrit only: no published translation is held for this verse.

बृहत् ते जालं बृहत इन्द्र शूर सहस्रार्घस्य शतवीर्यस्य । तेन शतं सहस्रम् अयुतं न्यर्बुदं जघान शक्रो दस्यूनाम् अभिधाय सेनया ॥७॥

bṛhat te jālaṃ bṛhata indra śūra sahasrārghasya śatavīryasya | tena śataṃ sahasram ayutaṃ nyarbudaṃ jaghāna śakro dasyūnām abhidhāya senayā ||7||

Sanskrit only: no published translation is held for this verse.

अयं लोको जालम् आसीच् छक्रस्य महतो महान् । तेनाहम् इन्द्रजालेनामूंस् तमसाभि दधामि सर्वान् ॥८॥

ayaṃ loko jālam āsīc chakrasya mahato mahān | tenāham indrajālenāmūṃs tamasābhi dadhāmi sarvān ||8||

Sanskrit only: no published translation is held for this verse.

सेदिर् उग्रा व्यृद्धिर् आर्तिश् चानपवाचना । श्रमस् तन्द्रीश् च मोहश् च तैर् अमून् अभि दधामि सर्वान् ॥९॥

sedir ugrā vyṛddhir ārtiś cānapavācanā | śramas tandrīś ca mohaś ca tair amūn abhi dadhāmi sarvān ||9||

Sanskrit only: no published translation is held for this verse.

मृत्यवे ऽमून् प्र यछामि मृत्युपाशैर् अमी सिताः । मृत्योर् ये अघला दूतास् तेभ्य एनान् प्रति नयामि बद्ध्वा ॥१०॥ २०

mṛtyave 'mūn pra yachāmi mṛtyupāśair amī sitāḥ | mṛtyor ye aghalā dūtās tebhya enān prati nayāmi baddhvā ||10|| 20

Sanskrit only: no published translation is held for this verse.

नयतामून् मृत्युदूता यमदूता अपोम्भत । परःसहस्रा हन्यन्तां तृणेढ्व् एनान् मत्यं भवस्य ॥११॥

nayatāmūn mṛtyudūtā yamadūtā apombhata | paraḥsahasrā hanyantāṃ tṛṇeḍhv enān matyaṃ bhavasya ||11||

Sanskrit only: no published translation is held for this verse.

साध्या एकं जालदण्डम् उद्यत्य यन्त्य् ओजसा । रुद्रा एकं वसव एकम् आदित्यैर् एक उद्यतः ॥१२॥

sādhyā ekaṃ jāladaṇḍam udyatya yanty ojasā | rudrā ekaṃ vasava ekam ādityair eka udyataḥ ||12||

Sanskrit only: no published translation is held for this verse.

विश्वे देवाः उपरिष्टाद् उब्जन्तो यन्त्व् ओजसा । मध्येन घ्नन्तो यन्तु सेनाम् अङ्गिरसो महीम् ॥१३॥

viśve devāḥ upariṣṭād ubjanto yantv ojasā | madhyena ghnanto yantu senām aṅgiraso mahīm ||13||

Sanskrit only: no published translation is held for this verse.

वनस्पतीन् वानस्पत्यान् ओषधीर् उत वीरुधः । द्विपाच् चतुष्पाद् इष्णामि यथा सेनाम् अमूं हनन् ॥१४॥

vanaspatīn vānaspatyān oṣadhīr uta vīrudhaḥ | dvipāc catuṣpād iṣṇāmi yathā senām amūṃ hanan ||14||

Sanskrit only: no published translation is held for this verse.

गन्धर्वाप्सरसः सर्पान् देवान् पुण्यजनान् पितॄन् । दृष्टान् अदृष्टान् इष्णामि यथा सेनाम् अमूं हनन् ॥१५॥

gandharvāpsarasaḥ sarpān devān puṇyajanān pitṝn | dṛṣṭān adṛṣṭān iṣṇāmi yathā senām amūṃ hanan ||15||

Sanskrit only: no published translation is held for this verse.

इम उप्ता मृत्युपाशा यान् आक्रम्य न मुच्यसे । अमुष्या हन्तु सेनाया इदं कूटं सहस्रशः ॥१६॥

ima uptā mṛtyupāśā yān ākramya na mucyase | amuṣyā hantu senāyā idaṃ kūṭaṃ sahasraśaḥ ||16||

Sanskrit only: no published translation is held for this verse.

घर्मः समिद्धो अग्निनायं होमः सहस्रहः । भवश् च पृश्निबाहुश् च शर्व सेनाम् अमूं हतम् ॥१७॥

gharmaḥ samiddho agnināyaṃ homaḥ sahasrahaḥ | bhavaś ca pṛśnibāhuś ca śarva senām amūṃ hatam ||17||

Sanskrit only: no published translation is held for this verse.

मृत्योर् आषम् आ पद्यन्तां क्षुधं सेदिं वधम् भयम् । इन्द्रश् चाक्षुजालाभ्यां शर्व सेनाम् अमूं हतम् ॥१८॥

mṛtyor āṣam ā padyantāṃ kṣudhaṃ sediṃ vadham bhayam | indraś cākṣujālābhyāṃ śarva senām amūṃ hatam ||18||

Sanskrit only: no published translation is held for this verse.

पराजिताः प्र त्रसतामित्रा नुत्ता धावत ब्रह्मणा । बृहस्पतिप्रनुत्तानां मामीषां मोचि कश् चन ॥१९॥

parājitāḥ pra trasatāmitrā nuttā dhāvata brahmaṇā | bṛhaspatipranuttānāṃ māmīṣāṃ moci kaś cana ||19||

Sanskrit only: no published translation is held for this verse.

अव पद्यन्ताम् एषाम् आयुधानि मा शकन् प्रतिधाम् इषुम् । अथैषां बहु बिभ्यताम् इषवः घ्नन्तु मर्मणि ॥२०॥

ava padyantām eṣām āyudhāni mā śakan pratidhām iṣum | athaiṣāṃ bahu bibhyatām iṣavaḥ ghnantu marmaṇi ||20||

Sanskrit only: no published translation is held for this verse.

सं क्रोशताम् एनान् द्यावापृथिवी सम् अन्तरिक्षं सह देवताभिः । मा ज्ञातारं मा प्रतिष्ठां विदन्त मिथो विघ्नाना उप यन्तु मृत्युम् ॥२१॥

saṃ krośatām enān dyāvāpṛthivī sam antarikṣaṃ saha devatābhiḥ | mā jñātāraṃ mā pratiṣṭhāṃ vidanta mitho vighnānā upa yantu mṛtyum ||21||

Sanskrit only: no published translation is held for this verse.

दिशश् चतस्रो ऽश्वतर्यो देवरथस्य पुरोदाशाः शफा अन्तरिक्षम् उद्धिः । द्यावापृथिवी पक्षसी ऋतवो ऽभीशवो ऽन्तर्देशाः किम्करा वाक् परिरथ्यम् ॥२२॥

diśaś catasro 'śvataryo devarathasya purodāśāḥ śaphā antarikṣam uddhiḥ | dyāvāpṛthivī pakṣasī ṛtavo 'bhīśavo 'ntardeśāḥ kimkarā vāk parirathyam ||22||

Sanskrit only: no published translation is held for this verse.

संवत्सरो रथः परिवत्सरो रथोपस्थो विराड् ईषाग्नी रथमुखम् । इन्द्रः सव्यष्ठाश् चन्द्रमाः सारथिः ॥२३॥

saṃvatsaro rathaḥ parivatsaro rathopastho virāḍ īṣāgnī rathamukham | indraḥ savyaṣṭhāś candramāḥ sārathiḥ ||23||

Sanskrit only: no published translation is held for this verse.

इतो जयेतो वि जय सं जय जय स्वाहा । इमे जयन्तु परामी जयन्तां स्वाहैभ्यो दुराहामीभ्यः । नीललोहितेनामून् अभ्यवतनोमि ॥२४॥ २१

ito jayeto vi jaya saṃ jaya jaya svāhā | ime jayantu parāmī jayantāṃ svāhaibhyo durāhāmībhyaḥ | nīlalohitenāmūn abhyavatanomi ||24|| 21

Sanskrit only: no published translation is held for this verse.