Atharvaveda Saṃhitā (Śaunaka) 9.1

दिवस् पृथिव्या अन्तरिक्षात् समुद्राद् अग्नेर् वातान् मधुकशा हि जज्ञे । तां चायित्वामृतं वसानां हृद्भिः प्रजाः प्रति नन्दन्ति सर्वाः ॥१॥

divas pṛthivyā antarikṣāt samudrād agner vātān madhukaśā hi jajñe | tāṃ cāyitvāmṛtaṃ vasānāṃ hṛdbhiḥ prajāḥ prati nandanti sarvāḥ ||1||

Sanskrit only: no published translation is held for this verse.

महत् पयो विश्वरूपम् अस्याः समुद्रस्य त्वोत रेत आहुः । यत ऐति मधुकशा रराणा तत् प्राणस् तद् अमृतं निविष्टम् ॥२॥

mahat payo viśvarūpam asyāḥ samudrasya tvota reta āhuḥ | yata aiti madhukaśā rarāṇā tat prāṇas tad amṛtaṃ niviṣṭam ||2||

Sanskrit only: no published translation is held for this verse.

पश्यन्त्य् अस्याश् चरितं पृथिव्यां पृथङ् नरो बहुधा मीमांसमानाः । अग्नेर् वातान् मधुकशा हि जज्ञे मरुताम् उग्रा नप्तिः ॥३॥

paśyanty asyāś caritaṃ pṛthivyāṃ pṛthaṅ naro bahudhā mīmāṃsamānāḥ | agner vātān madhukaśā hi jajñe marutām ugrā naptiḥ ||3||

Sanskrit only: no published translation is held for this verse.

मातादित्यानां दुहिता वसूनां प्राणः प्रजानाम् अमृतस्य नाभिः । हिरण्यवर्णा मधुकशा घृताची महान् भर्गश् चरति मर्त्येषु ॥४॥

mātādityānāṃ duhitā vasūnāṃ prāṇaḥ prajānām amṛtasya nābhiḥ | hiraṇyavarṇā madhukaśā ghṛtācī mahān bhargaś carati martyeṣu ||4||

Sanskrit only: no published translation is held for this verse.

मधोः कशाम् अजनयन्त देवास् तस्या गर्भो अभवद् विश्वरूपः । तं जातं तरुणं पिपर्ति माता स जातो विश्वा भुवना वि चष्टे ॥५॥

madhoḥ kaśām ajanayanta devās tasyā garbho abhavad viśvarūpaḥ | taṃ jātaṃ taruṇaṃ piparti mātā sa jāto viśvā bhuvanā vi caṣṭe ||5||

Sanskrit only: no published translation is held for this verse.

कस् तं प्र वेद क उ तं चिकेत यो अस्या हृदः कलशः सोमधानो अक्षितः । ब्रह्मा सुमेधाः सो अस्मिन् मदेत ॥६॥

kas taṃ pra veda ka u taṃ ciketa yo asyā hṛdaḥ kalaśaḥ somadhāno akṣitaḥ | brahmā sumedhāḥ so asmin madeta ||6||

Sanskrit only: no published translation is held for this verse.

स तौ प्र वेद स उ तौ चिकेत याव् अस्याः स्तनौ सहस्रधाराव् अक्षितौ । ऊर्जं दुहाते अनपस्फुरन्तौ ॥७॥

sa tau pra veda sa u tau ciketa yāv asyāḥ stanau sahasradhārāv akṣitau | ūrjaṃ duhāte anapasphurantau ||7||

Sanskrit only: no published translation is held for this verse.

हिङ्करिक्रती बृहती वयोधा उच्चैर्घोषाभ्येति या व्रतम् । त्रीन् घर्मान् अभि वावशाना मिमाति मायुं पयते पयोभिः ॥८॥

hiṅkarikratī bṛhatī vayodhā uccairghoṣābhyeti yā vratam | trīn gharmān abhi vāvaśānā mimāti māyuṃ payate payobhiḥ ||8||

Sanskrit only: no published translation is held for this verse.

याम् आपीनाम् उपसीदन्त्य् आपः शाक्वरा वृषभा ये स्वराजः । ते वर्षन्ति ते वर्षयन्ति तद्विदे कामम् ऊर्जम् आपः ॥९॥

yām āpīnām upasīdanty āpaḥ śākvarā vṛṣabhā ye svarājaḥ | te varṣanti te varṣayanti tadvide kāmam ūrjam āpaḥ ||9||

Sanskrit only: no published translation is held for this verse.

स्तनयित्नुस् ते वाक् प्रजापते वृषा शुष्मं क्षिपसि भूम्याम् अधि । अग्नेर् वातान् मधुकशा हि जज्ञे मरुताम् उग्रा नप्तिः ॥१०॥ १

stanayitnus te vāk prajāpate vṛṣā śuṣmaṃ kṣipasi bhūmyām adhi | agner vātān madhukaśā hi jajñe marutām ugrā naptiḥ ||10|| 1

Sanskrit only: no published translation is held for this verse.

यथा सोमः प्रातःसवने अश्विनोर् भवति प्रियः । एवा मे अश्विना वर्च आत्मनि ध्रियताम् ॥११॥

yathā somaḥ prātaḥsavane aśvinor bhavati priyaḥ | evā me aśvinā varca ātmani dhriyatām ||11||

Sanskrit only: no published translation is held for this verse.

यथा सोमो द्वितीये सवन इन्द्राग्न्योर् भवति प्रियः । एवा म इन्द्राग्नी वर्च आत्मनि ध्रियताम् ॥१२॥

yathā somo dvitīye savana indrāgnyor bhavati priyaḥ | evā ma indrāgnī varca ātmani dhriyatām ||12||

Sanskrit only: no published translation is held for this verse.

यथा सोमस् तृतीये सवन ऋभूणां भवति प्रियः । एवा म ऋभवो वर्च आत्मनि ध्रियताम् ॥१३॥

yathā somas tṛtīye savana ṛbhūṇāṃ bhavati priyaḥ | evā ma ṛbhavo varca ātmani dhriyatām ||13||

Sanskrit only: no published translation is held for this verse.

मधु जनिषीय मधु वंसिषीय । पयस्वान् अग्न आगमं तं मा सं सृज वर्चसा ॥१४॥

madhu janiṣīya madhu vaṃsiṣīya | payasvān agna āgamaṃ taṃ mā saṃ sṛja varcasā ||14||

Sanskrit only: no published translation is held for this verse.

सं माग्ने वर्चसा सृज सं प्रजया सम् आयुषा । विद्युर् मे अस्य देवा इन्द्रो विद्यात् सह ऋषिभिः ॥१५॥

saṃ māgne varcasā sṛja saṃ prajayā sam āyuṣā | vidyur me asya devā indro vidyāt saha ṛṣibhiḥ ||15||

यथा मधु मधुकृतः संभरन्ति मधाव् अधि । एवा मे अश्विना वर्च आत्मनि ध्रियताम् ॥१६॥

yathā madhu madhukṛtaḥ saṃbharanti madhāv adhi | evā me aśvinā varca ātmani dhriyatām ||16||

Sanskrit only: no published translation is held for this verse.

यथा मक्षाः इदं मधु न्यञ्जन्ति मधाव् अधि । एवा मे अश्विना वर्चस् तेजो बलम् ओजश् च ध्रियताम् ॥१७॥

yathā makṣāḥ idaṃ madhu nyañjanti madhāv adhi | evā me aśvinā varcas tejo balam ojaś ca dhriyatām ||17||

Sanskrit only: no published translation is held for this verse.

यद् गिरिषु पर्वतेषु गोष्व् अश्वेषु यन् मधु । सुरायां सिच्यमानायां यत् तत्र मधु तन् मयि ॥१८॥

yad giriṣu parvateṣu goṣv aśveṣu yan madhu | surāyāṃ sicyamānāyāṃ yat tatra madhu tan mayi ||18||

Sanskrit only: no published translation is held for this verse.

अश्विना सारघेण मा मधुनाङ्क्तं शुभस् पती । यथा वर्चस्वतीं वाचम् आवदानि जनां अनु ॥१९॥

aśvinā sāragheṇa mā madhunāṅktaṃ śubhas patī | yathā varcasvatīṃ vācam āvadāni janāṃ anu ||19||

Sanskrit only: no published translation is held for this verse.

स्तनयित्नुस् ते वाक् प्रजापते वृषा शुष्मं क्षिपसि भूम्यां दिवि । तां पशव उप जीवन्ति सर्वे तेनो सेषम् ऊर्जं पिपर्ति ॥२०॥

stanayitnus te vāk prajāpate vṛṣā śuṣmaṃ kṣipasi bhūmyāṃ divi | tāṃ paśava upa jīvanti sarve teno seṣam ūrjaṃ piparti ||20||

Sanskrit only: no published translation is held for this verse.

पृथिवी दण्डो ऽन्तरिक्षं गर्भो द्यौः कशा विद्युत् प्रकशो हिरण्ययो बिन्दुः ॥२१॥

pṛthivī daṇḍo 'ntarikṣaṃ garbho dyauḥ kaśā vidyut prakaśo hiraṇyayo binduḥ ||21||

Sanskrit only: no published translation is held for this verse.

यो वै कशायाः सप्त मधूनि वेद मधुमान् भवति । ब्राह्मणश् च राजा च धेनुश् चानड्वांश् च व्रीहिश् च यवश् च मधु सप्तमम् ॥२२॥

yo vai kaśāyāḥ sapta madhūni veda madhumān bhavati | brāhmaṇaś ca rājā ca dhenuś cānaḍvāṃś ca vrīhiś ca yavaś ca madhu saptamam ||22||

Sanskrit only: no published translation is held for this verse.

मधुमान् भवति मधुमद् अस्याहार्यं भवति । मधुमतो लोकान् जयति य एवं वेद ॥२३॥

madhumān bhavati madhumad asyāhāryaṃ bhavati | madhumato lokān jayati ya evaṃ veda ||23||

Sanskrit only: no published translation is held for this verse.

यद् वीध्रे स्तनयति प्रजापतिर् एव तत् प्रजाभ्यः प्रादुर् भवति । तस्मात् प्राचीनोपवीतस् तिष्ठे प्रजापते ऽनु मा बुध्यस्वेति । अन्व् एनं प्रजा अनु प्रजापतिर् बुध्यते य एवं वेद ॥२४॥ २

yad vīdhre stanayati prajāpatir eva tat prajābhyaḥ prādur bhavati | tasmāt prācīnopavītas tiṣṭhe prajāpate 'nu mā budhyasveti | anv enaṃ prajā anu prajāpatir budhyate ya evaṃ veda ||24|| 2

Sanskrit only: no published translation is held for this verse.