आहूय तूष्णींशंसं शंसति रेतस्तत्सिक्तं विकरोति सिक्तिर्वा अग्रेऽथ विकृतिरुपांशु तूष्णींशंसं शंसत्युपांश्विव वै रेतसः सिक्तिस्तिर इव तूष्णींशंसं शंसति तिर इव वै रेतांसि विक्रियन्ते षट्पदं तूष्णींशंसं शंसति षड्विधो वै पुरुषः षळङ्ग आत्मानमेव तत्षड्विधं षळङ्गं विकरोति तूष्णींशंसं शस्त्वा पुरोरुचं शंसति रेतस्तद्विकृतं प्रजनयति विकृतिर्वा अग्रेऽथ जातिरुच्चैः पुरोरुचं शंसत्युच्चैरेवैनं तत्प्रजनयति द्वादशपदां पुरोरुचां शंसति द्वादश वै मासाः संवत्सरः संवत्सरः प्रजापतिः सोऽस्य सर्वस्य प्रजनयिता स योऽस्य सर्वस्य प्रजनयिता स एवैनं तत्प्रजया पशुभिः प्रजनयति प्रजात्यै प्रजायते प्रजया पशुभिर्य एवं वेद जातवेदस्यां पुरोरुचं शंसति जातवेदोन्यङ्गां तदाहुर्यत्तृतीयसवनमेव जातवेदस आयतनमथ कस्मात्प्रातःसवने जातवेदस्यां पुरोरुचं शंसतीति प्राणो वै जातवेदाः स हि जातानां वेद यावतां वै स जातानां वेद ते भवन्ति येषामु न वेद किमु ते स्युर्यो वा आज्यं आत्मसंस्कृतिं वेद तत्सुविदितम्
āhūya tūṣṇīṃśaṃsaṃ śaṃsati retastatsiktaṃ vikaroti siktirvā agre'tha vikṛtirupāṃśu tūṣṇīṃśaṃsaṃ śaṃsatyupāṃśviva vai retasaḥ siktistira iva tūṣṇīṃśaṃsaṃ śaṃsati tira iva vai retāṃsi vikriyante ṣaṭpadaṃ tūṣṇīṃśaṃsaṃ śaṃsati ṣaḍvidho vai puruṣaḥ ṣal̤aṅga ātmānameva tatṣaḍvidhaṃ ṣal̤aṅgaṃ vikaroti tūṣṇīṃśaṃsaṃ śastvā purorucaṃ śaṃsati retastadvikṛtaṃ prajanayati vikṛtirvā agre'tha jātiruccaiḥ purorucaṃ śaṃsatyuccairevainaṃ tatprajanayati dvādaśapadāṃ purorucāṃ śaṃsati dvādaśa vai māsāḥ saṃvatsaraḥ saṃvatsaraḥ prajāpatiḥ so'sya sarvasya prajanayitā sa yo'sya sarvasya prajanayitā sa evainaṃ tatprajayā paśubhiḥ prajanayati prajātyai prajāyate prajayā paśubhirya evaṃ veda jātavedasyāṃ purorucaṃ śaṃsati jātavedonyaṅgāṃ tadāhuryattṛtīyasavanameva jātavedasa āyatanamatha kasmātprātaḥsavane jātavedasyāṃ purorucaṃ śaṃsatīti prāṇo vai jātavedāḥ sa hi jātānāṃ veda yāvatāṃ vai sa jātānāṃ veda te bhavanti yeṣāmu na veda kimu te syuryo vā ājyaṃ ātmasaṃskṛtiṃ veda tatsuviditam
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.