गवामयनेन यन्ति गावो वा आदित्या आदित्यानामेव तदयनेन यन्ति गावो वै सत्रमासत शफाञ्छृङ्गाणि सिषासन्त्यस्तासां दशमे मासि शफाः शृङ्गाण्यजायन्त ता अब्रुवन्यस्मै कामायादीक्षामह्यापाम तमुत्तिष्ठामेति ता या उदतिष्ठंस्ता एताः शृङ्गिण्योऽथ याः समापयिष्यामः संवत्सरमित्यासत तासा-मश्रद्धया शृङ्गाणि प्रावर्तन्त ता एतास्तूपरा ऊर्जं त्वसुन्वंस्तस्मादु ताः सर्वा-नृतून्प्राप्त्वोत्तरमुत्तिष्ठन्त्यूर्जं ह्यसुन्वन्सर्वस्य वै गावः प्रेमाणं सर्वस्य चारुतां गताः सर्वस्य प्रेमाणं सर्वस्य चारुतां गच्छति य एवं वेदादित्याश्च ह वा अङ्गिरसश्च स्वर्गे लोकेऽस्पर्धन्त वयम्पूर्व एष्यामो वयमिति ते हादित्याः पूर्वे स्वर्गं लोकं जग्मुः पश्चेवाङ्गिरसः षष्ट्यां वा वर्षेषु यथा वा प्रायणीयोऽतिरात्रश्चतुर्विंश उक्थ्यः सर्वेऽभिप्लवाः षळहा आक्ष्यन्त्यन्यान्यहानि तदादित्यानामयनम्प्रायणीयोऽतिरात्रश्चतुर्विंश उक्थ्यः सर्वे पृष्ठ्याः षळहा आक्ष्यन्त्यन्यान्यहानि तदङ्गिरसामयनं सा यथा स्रुतिरञ्जसाय-न्येवमभिप्लवः षळहः स्वर्गस्य लोकस्याथ यथा महापथः पर्याण एवम्पृष्ठ्यः षळहः स्वर्गस्य लोकस्य तद्यदुभाभ्यां यन्त्युभाभ्यां वै यन्न रिष्यत्युभयोः कामयोरुपाप्त्यै यश्चाभिप्लवे षळहे यश्च पृष्ठ्ये
gavāmayanena yanti gāvo vā ādityā ādityānāmeva tadayanena yanti gāvo vai satramāsata śaphāñchṛṅgāṇi siṣāsantyastāsāṃ daśame māsi śaphāḥ śṛṅgāṇyajāyanta tā abruvanyasmai kāmāyādīkṣāmahyāpāma tamuttiṣṭhāmeti tā yā udatiṣṭhaṃstā etāḥ śṛṅgiṇyo'tha yāḥ samāpayiṣyāmaḥ saṃvatsaramityāsata tāsā-maśraddhayā śṛṅgāṇi prāvartanta tā etāstūparā ūrjaṃ tvasunvaṃstasmādu tāḥ sarvā-nṛtūnprāptvottaramuttiṣṭhantyūrjaṃ hyasunvansarvasya vai gāvaḥ premāṇaṃ sarvasya cārutāṃ gatāḥ sarvasya premāṇaṃ sarvasya cārutāṃ gacchati ya evaṃ vedādityāśca ha vā aṅgirasaśca svarge loke'spardhanta vayampūrva eṣyāmo vayamiti te hādityāḥ pūrve svargaṃ lokaṃ jagmuḥ paścevāṅgirasaḥ ṣaṣṭyāṃ vā varṣeṣu yathā vā prāyaṇīyo'tirātraścaturviṃśa ukthyaḥ sarve'bhiplavāḥ ṣal̤ahā ākṣyantyanyānyahāni tadādityānāmayanamprāyaṇīyo'tirātraścaturviṃśa ukthyaḥ sarve pṛṣṭhyāḥ ṣal̤ahā ākṣyantyanyānyahāni tadaṅgirasāmayanaṃ sā yathā srutirañjasāya-nyevamabhiplavaḥ ṣal̤ahaḥ svargasya lokasyātha yathā mahāpathaḥ paryāṇa evampṛṣṭhyaḥ ṣal̤ahaḥ svargasya lokasya tadyadubhābhyāṃ yantyubhābhyāṃ vai yanna riṣyatyubhayoḥ kāmayorupāptyai yaścābhiplave ṣal̤ahe yaśca pṛṣṭhye
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.