Vagbhata: Astangahrdayasutra 66

विद्रधिं सर्वम् एवामं शोफ-वत् समुपाचरेत् । प्रततं च हरेद् रक्तं पक्वे तु व्रण-वत् क्रिया

vidradhiṃ sarvam evāmaṃ śopha-vat samupācaret | pratataṃ ca hared raktaṃ pakve tu vraṇa-vat kriyā

Sanskrit only: no published translation is held for this verse.

पञ्च-मूल-जलैर् धौतं वातिकं लवणोत्तरैः । भद्रादि-वर्ग-यष्ट्य्-आह्व-तिलैर् आलेपयेद् व्रणम्

pañca-mūla-jalair dhautaṃ vātikaṃ lavaṇottaraiḥ | bhadrādi-varga-yaṣṭy-āhva-tilair ālepayed vraṇam

Sanskrit only: no published translation is held for this verse.

वैरेचनिक-युक्तेन त्रैवृतेन विशोध्य च । विदारी-वर्ग-सिद्धेन त्रैवृतेनैव रोपयेत्

vairecanika-yuktena traivṛtena viśodhya ca | vidārī-varga-siddhena traivṛtenaiva ropayet

Sanskrit only: no published translation is held for this verse.

क्षालितं क्षीरि-तोयेन लिम्पेद् यष्ट्य्-अमृता-तिलैः । पैत्तं घृतेन सिद्धेन मञ्जिष्ठोशीर-पद्मकैः

kṣālitaṃ kṣīri-toyena limped yaṣṭy-amṛtā-tilaiḥ | paittaṃ ghṛtena siddhena mañjiṣṭhośīra-padmakaiḥ

Sanskrit only: no published translation is held for this verse.

पयस्या-द्वि-निशा-श्रेष्ठा-यष्टी-दुग्धैश् च रोपयेत् । न्यग्रोधादि-प्रवाल-त्वक्-फलैर् वा कफ-जं पुनः

payasyā-dvi-niśā-śreṣṭhā-yaṣṭī-dugdhaiś ca ropayet | nyagrodhādi-pravāla-tvak-phalair vā kapha-jaṃ punaḥ

Sanskrit only: no published translation is held for this verse.

आरग्वधादिना धौतं सक्तु-कुम्भ-निशा-तिलैः । लिम्पेत् कुलत्थिका-दन्ती -त्रिवृच्-छ्यामाग्नि-तिल्वकैः

āragvadhādinā dhautaṃ saktu-kumbha-niśā-tilaiḥ | limpet kulatthikā-dantī -trivṛc-chyāmāgni-tilvakaiḥ

Sanskrit only: no published translation is held for this verse.

स-सैन्धवैः स-गो-मूत्रैस् तैलं कुर्वीत रोपणम् । रक्तागन्तूद्भवे कार्या पित्त-विद्रधि-वत् क्रिया

sa-saindhavaiḥ sa-go-mūtrais tailaṃ kurvīta ropaṇam | raktāgantūdbhave kāryā pitta-vidradhi-vat kriyā

Sanskrit only: no published translation is held for this verse.

वरुणादि-गण-क्वाथम् अ-पक्वे ऽभ्यन्तरोत्थिते । ऊषकादि-प्रतीवापं पूर्वाह्णे विद्रधौ पिबेत्

varuṇādi-gaṇa-kvātham a-pakve 'bhyantarotthite | ūṣakādi-pratīvāpaṃ pūrvāhṇe vidradhau pibet

Sanskrit only: no published translation is held for this verse.

घृतं विरेचन-द्रव्यैः सिद्धं ताभ्यां च पाययेत् । निरूहं स्नेह-वस्तिं च ताभ्याम् एव प्रकल्पयेत्

ghṛtaṃ virecana-dravyaiḥ siddhaṃ tābhyāṃ ca pāyayet | nirūhaṃ sneha-vastiṃ ca tābhyām eva prakalpayet

Sanskrit only: no published translation is held for this verse.

पान-भोजन-लेपेषु मधु-शिग्रुः प्रयोजितः । दत्तावापो यथा-दोषम् अ-पक्वं हन्ति विद्रधिम्

pāna-bhojana-lepeṣu madhu-śigruḥ prayojitaḥ | dattāvāpo yathā-doṣam a-pakvaṃ hanti vidradhim

Sanskrit only: no published translation is held for this verse.

त्रायन्ती-त्रि-फला-निम्ब-कटुका-मधुकं समम् । त्रिवृत्-पटोल-मूलाभ्यां चत्वारो ऽंशाः पृथक् पृथक्

trāyantī-tri-phalā-nimba-kaṭukā-madhukaṃ samam | trivṛt-paṭola-mūlābhyāṃ catvāro 'ṃśāḥ pṛthak pṛthak

Sanskrit only: no published translation is held for this verse.

मसूरान् निस्-तुषाद् अष्टौ तत्-क्वाथः स-घृतो जयेत् । विद्रधि-गुल्म-वीसर्प-दाह-मोह-मद-ज्वरान्

masūrān nis-tuṣād aṣṭau tat-kvāthaḥ sa-ghṛto jayet | vidradhi-gulma-vīsarpa-dāha-moha-mada-jvarān

Sanskrit only: no published translation is held for this verse.

तृण्-मूर्छा-छर्दि-हृद्-रोग-पित्तासृक्-कुष्ठ-कामलाः । कुडवं त्रायमाणायाः साध्यम् अष्ट-गुणे ऽम्भसि

tṛṇ-mūrchā-chardi-hṛd-roga-pittāsṛk-kuṣṭha-kāmalāḥ | kuḍavaṃ trāyamāṇāyāḥ sādhyam aṣṭa-guṇe 'mbhasi

Sanskrit only: no published translation is held for this verse.

कुडवं तद्-रसाद् धात्री-स्व-रसात् क्षीरतो घृतात् । कर्षांशं कल्कितं तिक्ता-त्रायन्ती-धन्वयासकम्

kuḍavaṃ tad-rasād dhātrī-sva-rasāt kṣīrato ghṛtāt | karṣāṃśaṃ kalkitaṃ tiktā-trāyantī-dhanvayāsakam

Sanskrit only: no published translation is held for this verse.

मुस्ता-तामलकी-वीरा-जीवन्ती-चन्दनोत्पलम् । पचेद् एक-त्र संयोज्य तद् घृतं पूर्व-वद् गुणैः

mustā-tāmalakī-vīrā-jīvantī-candanotpalam | paced eka-tra saṃyojya tad ghṛtaṃ pūrva-vad guṇaiḥ

Sanskrit only: no published translation is held for this verse.

द्राक्षा मधूकं खर्जूरं विदारी स-शतावरी । परूषकाणि त्रि-फला तत्-क्वाथे पाचयेद् घृतम्

drākṣā madhūkaṃ kharjūraṃ vidārī sa-śatāvarī | parūṣakāṇi tri-phalā tat-kvāthe pācayed ghṛtam

Sanskrit only: no published translation is held for this verse.

क्षीरेक्षु-धात्री-निर्यास-प्राणदा-कल्क-संयुतम् । तच् छीतं शर्करा-क्षौद्र-पादिकं पूर्व-वद् गुणैः

kṣīrekṣu-dhātrī-niryāsa-prāṇadā-kalka-saṃyutam | tac chītaṃ śarkarā-kṣaudra-pādikaṃ pūrva-vad guṇaiḥ

Sanskrit only: no published translation is held for this verse.

हरेच् छृङ्गादिभिर् असृक् सिरया वा यथान्तिकम् । विद्रधिं पच्यमानं च कोष्ठ-स्थं बहिर्-उन्नतम्

harec chṛṅgādibhir asṛk sirayā vā yathāntikam | vidradhiṃ pacyamānaṃ ca koṣṭha-sthaṃ bahir-unnatam

Sanskrit only: no published translation is held for this verse.

ज्ञात्वोपनाहयेत् शूले स्थिते तत्रैव पिण्डिते । तत्-पार्श्व-पीडनात् सुप्तौ दाहादिष्व् अल्पकेषु च

jñātvopanāhayet śūle sthite tatraiva piṇḍite | tat-pārśva-pīḍanāt suptau dāhādiṣv alpakeṣu ca

Sanskrit only: no published translation is held for this verse.

पक्वः स्याद् विद्रधिं भित्त्वा व्रण-वत् तम् उपाचरेत् । अन्तर्-भागस्य चाप्य् एतच् चिह्नं पक्वस्य विद्रदेः

pakvaḥ syād vidradhiṃ bhittvā vraṇa-vat tam upācaret | antar-bhāgasya cāpy etac cihnaṃ pakvasya vidradeḥ

Sanskrit only: no published translation is held for this verse.

पक्वः स्रोतांसि संपूर्य स यात्य् ऊर्ध्वम् अधो ऽथ-वा । स्वयम्-प्रवृत्तं तं दोषम् उपेक्षेत हिताशिनः

pakvaḥ srotāṃsi saṃpūrya sa yāty ūrdhvam adho 'tha-vā | svayam-pravṛttaṃ taṃ doṣam upekṣeta hitāśinaḥ

Sanskrit only: no published translation is held for this verse.

दशाहं द्वा-दशाहं वा रक्षन् भिषग् उपद्रवात् । अ-सम्यग् वहति क्लेदे वरुणादिं सुखाम्भसा

daśāhaṃ dvā-daśāhaṃ vā rakṣan bhiṣag upadravāt | a-samyag vahati klede varuṇādiṃ sukhāmbhasā

Sanskrit only: no published translation is held for this verse.

पाययेन् मधु-शिग्रुं वा यवागूं तेन वा कृताम् । यव-कोल-कुलत्थोत्थ-यूषैर् अन्नं च शस्यते

pāyayen madhu-śigruṃ vā yavāgūṃ tena vā kṛtām | yava-kola-kulatthottha-yūṣair annaṃ ca śasyate

Sanskrit only: no published translation is held for this verse.

ऊर्ध्वं दशाहात् त्रायन्ती-सर्पिषा तैल्वकेन वा । शोधयेद् बलतः शुद्धः स-क्षौद्रं तिक्तकं पिबेत्

ūrdhvaṃ daśāhāt trāyantī-sarpiṣā tailvakena vā | śodhayed balataḥ śuddhaḥ sa-kṣaudraṃ tiktakaṃ pibet

Sanskrit only: no published translation is held for this verse.

सर्व-शो गुल्म-वच् चैनं यथा-दोषम् उपाचरेत् । सर्वावस्थासु सर्वासु गुग्गुलुं विद्रधीषु च

sarva-śo gulma-vac cainaṃ yathā-doṣam upācaret | sarvāvasthāsu sarvāsu gugguluṃ vidradhīṣu ca

Sanskrit only: no published translation is held for this verse.

कषायैर् यौगिकैर् युञ्ज्यात् स्वैः स्वैस् तद्-वच् छिला-जतु । पाकं च वारयेद् यत्नात् सिद्धिः पक्वे हि दैविकी

kaṣāyair yaugikair yuñjyāt svaiḥ svais tad-vac chilā-jatu | pākaṃ ca vārayed yatnāt siddhiḥ pakve hi daivikī

Sanskrit only: no published translation is held for this verse.

अपि चाशु विदाहि-त्वाद् विद्रधिः सो ऽभिधीयते । सति चालोचयेन् मेहे प्रमेहाणां चिकित्सितम्

api cāśu vidāhi-tvād vidradhiḥ so 'bhidhīyate | sati cālocayen mehe pramehāṇāṃ cikitsitam

Sanskrit only: no published translation is held for this verse.

शौभाञ्जनक-निर्यूहो हिङ्गु-सैन्धव-संयुतः । अ-चिराद् विद्रधिं हन्ति प्रातः प्रातर् निषेवितः ॥ २७+१ ॥ कटु-त्रिकं तिक्तक-रोहिणी घनं किराततिक्तो ऽथ शतक्रतोर् यवाः । स-सप्तपर्णातिविषा दुरालभा पटोल-मूलं सह त्रायमाणया ॥ २७+२ ॥ गुडूची-चव्यं स-विडङ्ग-निम्बं प्रियङ्गु-नीलोत्पल-लोध्रम् अञ्जनम् । स-धातकी-मोच-रसं फल-त्रिकं स-नागरं बिल्व-कपित्थ-शारिवाः ॥ २७+३ ॥ समाः स्युर् एते द्वि-गुणं तु चित्रकं द्विर् अष्ट-भागं कुटज-त्वचं स्यात् । सु-सूक्ष्म-पिष्टं शिशिराम्बु-योजितं पिबेन् मनुष्यो ऽर्ध-पलं गुडान्वितम् ॥ २७+४ ॥ बुभुक्षिते स्यान् मृदु भोजनं हितं शशैः स-लावैर् अथ-वा ऽपि तित्तिरैः । निहन्ति गुल्मान् कफ-पित्त-संभवान् विराजते शारद-पूर्ण-चन्द्र-वत् ॥ २७+५ ॥ अ-जीर्ण-कासं क्षय-पाण्डु-ते तथा ज्वरातिसार-ग्रहणी-गदापचीः । प्रमेह-मूत्र-क्षय-वर्ध्म-विद्रधीञ् जयेत् प्रयुक्तः स-गुडः कटु-त्रिकः ॥ २७+६ ॥ भूनिम्बार्ध-पलं निशा-पल-युक्तं दार्वी-पले द्वे तथा ॥ २७+७अ ॥ दार्व्य्-अर्धेन पुनर्नवां कुरु तथा दार्व्या समः प्रग्रहः ॥ २७+७ब् ॥ सार्धं दुःस्पर्शतः पलं तु कटुका योज्या तद्-अर्धेन वा ॥ २७+७च् ॥ अश्वाह्वं निशया समानम् अमृता-पादाधिकं स्यात् पलम् ॥ २७+७द् ॥ एतद् वत्सक-सप्त-कर्ष-सहितं सु-श्लक्ष्ण-चूर्णी-कृतं ॥ २७+८अ ॥ वासायाः स्व-रसेन पञ्च चतुरस् त्रीन् वा पिबेद् वासरान् ॥ २७+८ब् ॥ भूयस् तद् गुड-वारिणा प्रति-दिनं पेयं पुरः-स्थे रवौ ॥ २७+८च् ॥ एतद् विद्रधि-रोगिणां नि-रुज-कृच् चूर्णं तु गुह्योत्तमम् ॥ २७+८द् ॥ ना-पुत्राय न चा-भ्रात्रे ना-शिष्याया-हितैषिणे । आरोग्य-शास्त्र-सर्व-स्वं देयम् एतत् कथञ्-च-न ॥ २७+९ ॥ स्तन-जे व्रण-वत् सर्वं न त्व् एनम् उपनाहयेत् । पाटयेत् पालयन् स्तन्य-वाहिनीः कृष्ण-चूचुकौ

śaubhāñjanaka-niryūho hiṅgu-saindhava-saṃyutaḥ | a-cirād vidradhiṃ hanti prātaḥ prātar niṣevitaḥ || 27+1 || kaṭu-trikaṃ tiktaka-rohiṇī ghanaṃ kirātatikto 'tha śatakrator yavāḥ | sa-saptaparṇātiviṣā durālabhā paṭola-mūlaṃ saha trāyamāṇayā || 27+2 || guḍūcī-cavyaṃ sa-viḍaṅga-nimbaṃ priyaṅgu-nīlotpala-lodhram añjanam | sa-dhātakī-moca-rasaṃ phala-trikaṃ sa-nāgaraṃ bilva-kapittha-śārivāḥ || 27+3 || samāḥ syur ete dvi-guṇaṃ tu citrakaṃ dvir aṣṭa-bhāgaṃ kuṭaja-tvacaṃ syāt | su-sūkṣma-piṣṭaṃ śiśirāmbu-yojitaṃ piben manuṣyo 'rdha-palaṃ guḍānvitam || 27+4 || bubhukṣite syān mṛdu bhojanaṃ hitaṃ śaśaiḥ sa-lāvair atha-vā 'pi tittiraiḥ | nihanti gulmān kapha-pitta-saṃbhavān virājate śārada-pūrṇa-candra-vat || 27+5 || a-jīrṇa-kāsaṃ kṣaya-pāṇḍu-te tathā jvarātisāra-grahaṇī-gadāpacīḥ | prameha-mūtra-kṣaya-vardhma-vidradhīñ jayet prayuktaḥ sa-guḍaḥ kaṭu-trikaḥ || 27+6 || bhūnimbārdha-palaṃ niśā-pala-yuktaṃ dārvī-pale dve tathā || 27+7a || dārvy-ardhena punarnavāṃ kuru tathā dārvyā samaḥ pragrahaḥ || 27+7b || sārdhaṃ duḥsparśataḥ palaṃ tu kaṭukā yojyā tad-ardhena vā || 27+7c || aśvāhvaṃ niśayā samānam amṛtā-pādādhikaṃ syāt palam || 27+7d || etad vatsaka-sapta-karṣa-sahitaṃ su-ślakṣṇa-cūrṇī-kṛtaṃ || 27+8a || vāsāyāḥ sva-rasena pañca caturas trīn vā pibed vāsarān || 27+8b || bhūyas tad guḍa-vāriṇā prati-dinaṃ peyaṃ puraḥ-sthe ravau || 27+8c || etad vidradhi-rogiṇāṃ ni-ruja-kṛc cūrṇaṃ tu guhyottamam || 27+8d || nā-putrāya na cā-bhrātre nā-śiṣyāyā-hitaiṣiṇe | ārogya-śāstra-sarva-svaṃ deyam etat kathañ-ca-na || 27+9 || stana-je vraṇa-vat sarvaṃ na tv enam upanāhayet | pāṭayet pālayan stanya-vāhinīḥ kṛṣṇa-cūcukau

Sanskrit only: no published translation is held for this verse.

सर्वास्व् आमाद्य्-अवस्थासु निर्दुहीत च तत् स्तनम् । शोधयेत् त्रि-वृता स्निग्धं वृद्धौ स्नेहैश् चलात्मके

sarvāsv āmādy-avasthāsu nirduhīta ca tat stanam | śodhayet tri-vṛtā snigdhaṃ vṛddhau snehaiś calātmake

Sanskrit only: no published translation is held for this verse.

कौशाम्र-तिल्वकैरण्ड-सु-कुमारक-मिश्रकैः । ततो ऽनिल-घ्न-निर्यूह-कल्क-स्नेहैर् निरूहयेत्

kauśāmra-tilvakairaṇḍa-su-kumāraka-miśrakaiḥ | tato 'nila-ghna-niryūha-kalka-snehair nirūhayet

Sanskrit only: no published translation is held for this verse.

रसेन भोजितं यष्टी-तैलेनान्वासयेद् अनु । स्वेद-प्रलेपा वात-घ्नाः पक्वे भित्त्वा व्रण-क्रियाम्

rasena bhojitaṃ yaṣṭī-tailenānvāsayed anu | sveda-pralepā vāta-ghnāḥ pakve bhittvā vraṇa-kriyām

Sanskrit only: no published translation is held for this verse.

पित्त-रक्तोद्भवे वृद्धाव् आम-पक्वे यथा-यथम् । शोफ-व्रण-क्रियां कुर्यात् प्रततं च हरेद् असृक्

pitta-raktodbhave vṛddhāv āma-pakve yathā-yatham | śopha-vraṇa-kriyāṃ kuryāt pratataṃ ca hared asṛk

Sanskrit only: no published translation is held for this verse.

गो-मूत्रेण पिबेत् कल्कं श्लैष्मिके पीतदारु-जम् । विम्लापनाद् ऋते चास्य श्लेष्म-ग्रन्थि-क्रमो हितः

go-mūtreṇa pibet kalkaṃ ślaiṣmike pītadāru-jam | vimlāpanād ṛte cāsya śleṣma-granthi-kramo hitaḥ

Sanskrit only: no published translation is held for this verse.

पक्वे च पाटिते तैलम् इष्यते व्रण-शोधनम् । सुमनो-ऽरुष्कराङ्कोल्ल-सप्तपर्णेषु साधितम्

pakve ca pāṭite tailam iṣyate vraṇa-śodhanam | sumano-'ruṣkarāṅkolla-saptaparṇeṣu sādhitam

Sanskrit only: no published translation is held for this verse.

पटोल-निम्ब-रजनी-विडङ्ग-कुटजेषु च । मेदो-जं मूत्र-पिष्टेन सु-स्विन्नं सुरसादिना

paṭola-nimba-rajanī-viḍaṅga-kuṭajeṣu ca | medo-jaṃ mūtra-piṣṭena su-svinnaṃ surasādinā

Sanskrit only: no published translation is held for this verse.

शिरो-विरेक-द्रव्यैर् वा वर्जयन् फल-सेवनीम् । दारयेद् वृद्धि-पत्त्रेण सम्यङ् मेदसि सूद्धृते

śiro-vireka-dravyair vā varjayan phala-sevanīm | dārayed vṛddhi-pattreṇa samyaṅ medasi sūddhṛte

Sanskrit only: no published translation is held for this verse.

व्रणं माक्षिक-कासीस-सैन्धव-प्रतिसारितम् । सीव्येद् अभ्यञ्जनं चास्य योज्यं मेदो-विशुद्धये

vraṇaṃ mākṣika-kāsīsa-saindhava-pratisāritam | sīvyed abhyañjanaṃ cāsya yojyaṃ medo-viśuddhaye

Sanskrit only: no published translation is held for this verse.

मनःशिलैला-सुमनो-ग्रन्थि-भल्लातकैः कृतम् । तैलम् आ-व्रण-संधानात् स्नेह-स्वेदौ च शीलयेत्

manaḥśilailā-sumano-granthi-bhallātakaiḥ kṛtam | tailam ā-vraṇa-saṃdhānāt sneha-svedau ca śīlayet

Sanskrit only: no published translation is held for this verse.

मूत्र-जं स्वेदितं स्निग्धैर् वस्त्र-पट्टेन वेष्टितम् । विध्येद् अधस्-तात् सेवन्याः स्रावयेच् च यथोदरम्

mūtra-jaṃ sveditaṃ snigdhair vastra-paṭṭena veṣṭitam | vidhyed adhas-tāt sevanyāḥ srāvayec ca yathodaram

Sanskrit only: no published translation is held for this verse.

व्रणं च स्थगिका-बद्धं रोपयेद् अन्त्र-हेतुके । फल-कोशम् अ-संप्राप्ते चिकित्सा वात-वृद्धि-वत्

vraṇaṃ ca sthagikā-baddhaṃ ropayed antra-hetuke | phala-kośam a-saṃprāpte cikitsā vāta-vṛddhi-vat

Sanskrit only: no published translation is held for this verse.

पचेत् पुनर्नव-तुलां तथा दश-पलाः पृथक् । दश-मूल-पयस्याश्वगन्धैरण्ड-शतावरीः

pacet punarnava-tulāṃ tathā daśa-palāḥ pṛthak | daśa-mūla-payasyāśvagandhairaṇḍa-śatāvarīḥ

Sanskrit only: no published translation is held for this verse.

द्वि-दर्भ-शर-काशेक्षु-मूल-पोटगलान्विताः । वहे ऽपाम् अष्ट-भाग-स्थे तत्र त्रिंशत्-पलं गुडात्

dvi-darbha-śara-kāśekṣu-mūla-poṭagalānvitāḥ | vahe 'pām aṣṭa-bhāga-sthe tatra triṃśat-palaṃ guḍāt

Sanskrit only: no published translation is held for this verse.

प्रस्थम् एरण्ड-तैलस्य द्वौ घृतात् पयसस् तथा । आवपेद् द्वि-पलांशं च कृष्णा-तन्-मूल-सैन्धवम्

prastham eraṇḍa-tailasya dvau ghṛtāt payasas tathā | āvaped dvi-palāṃśaṃ ca kṛṣṇā-tan-mūla-saindhavam

Sanskrit only: no published translation is held for this verse.

यष्टीमधुक-मृद्वीका-यवानी-नागराणि च । तत्-सिद्धं सु-कुमाराख्यं सु-कुमारं रसायनम्

yaṣṭīmadhuka-mṛdvīkā-yavānī-nāgarāṇi ca | tat-siddhaṃ su-kumārākhyaṃ su-kumāraṃ rasāyanam

Sanskrit only: no published translation is held for this verse.

वातातपाध्व-यानादि-परिहार्येष्व् अ-यन्त्रणम् । प्रयोज्यं सु-कुमाराणाम् ईश्वराणाम् सुखात्मनाम्

vātātapādhva-yānādi-parihāryeṣv a-yantraṇam | prayojyaṃ su-kumārāṇām īśvarāṇām sukhātmanām

Sanskrit only: no published translation is held for this verse.

नृणां स्त्री-वृन्द-भर्तॄणाम् अ-लक्ष्मी-कलि-नाशनम् । सर्व-कालोपयोगेन कान्ति-लावण्य-पुष्टि-दम्

nṛṇāṃ strī-vṛnda-bhartṝṇām a-lakṣmī-kali-nāśanam | sarva-kālopayogena kānti-lāvaṇya-puṣṭi-dam

Sanskrit only: no published translation is held for this verse.

वर्ध्म-विद्रधि-गुल्मार्शो-योनि-मेढ्रानिलार्तिषु । शोफोदर-खुड-प्लीह-विड्-विबन्धेषु चोत्तमम्

vardhma-vidradhi-gulmārśo-yoni-meḍhrānilārtiṣu | śophodara-khuḍa-plīha-viḍ-vibandheṣu cottamam

Sanskrit only: no published translation is held for this verse.

रास्ना-यष्ट्य्-अमृतैरण्ड-बला-गोक्षुर-साधितः । क्वाथो ऽन्त्र-वृद्धिं हन्त्य् आशु रुबु-तैलेन मिश्रितः ॥ ४७+१ ॥ यायाद् वर्ध्म न चेच् छान्तिं स्नेह-रेकानुवासनैः । वस्ति-कर्म पुरः कृत्वा वङ्क्षण-स्थं ततो दहेत्

rāsnā-yaṣṭy-amṛtairaṇḍa-balā-gokṣura-sādhitaḥ | kvātho 'ntra-vṛddhiṃ hanty āśu rubu-tailena miśritaḥ || 47+1 || yāyād vardhma na cec chāntiṃ sneha-rekānuvāsanaiḥ | vasti-karma puraḥ kṛtvā vaṅkṣaṇa-sthaṃ tato dahet

Sanskrit only: no published translation is held for this verse.

अग्निना मार्ग-रोधार्थं मरुतो ऽर्धेन्दु-वक्रया । अङ्गुष्ठस्योपरि स्नाव पीतं तन्तु-समं च यत्

agninā mārga-rodhārthaṃ maruto 'rdhendu-vakrayā | aṅguṣṭhasyopari snāva pītaṃ tantu-samaṃ ca yat

Sanskrit only: no published translation is held for this verse.

उत्क्षिप्य सूच्या तत् तिर्यग् दहेच् छित्त्वा यतो गदः । ततो ऽन्य-पार्श्वे ऽन्ये त्व् आहुर् दहेद् वानामिकाङ्गुलेः

utkṣipya sūcyā tat tiryag dahec chittvā yato gadaḥ | tato 'nya-pārśve 'nye tv āhur dahed vānāmikāṅguleḥ

Sanskrit only: no published translation is held for this verse.

गुल्मे ऽन्यैर् वात-कफ-जे प्लीह्नि चायं विधिः स्मृतः । कनिष्ठिकानामिकयोर् विश्वाच्यां च यतो गदः

gulme 'nyair vāta-kapha-je plīhni cāyaṃ vidhiḥ smṛtaḥ | kaniṣṭhikānāmikayor viśvācyāṃ ca yato gadaḥ

Sanskrit only: no published translation is held for this verse.