अष्टावक्रगीता जनक उवाच कथं ज्ञानम् अवाप्तो ऽति कथं मुक्तिर् भविष्यति । वैराग्यं च कथं प्राप्तम् एतद् ब्रूहि मम प्रभो
aṣṭāvakragītā janaka uvāca kathaṃ jñānam avāpto 'ti kathaṃ muktir bhaviṣyati / vairāgyaṃ ca kathaṃ prāptam etad brūhi mama prabho
Sanskrit only: no published translation is held for this verse.
अष्टावक्र उवाच मुक्तिम् इच्छसि चेत् तात विषयान् विषवत् त्यज । क्षमार्जवदयातोष-सत्यं पीयूषवद् भज
aṣṭāvakra uvāca muktim icchasi cet tāta viṣayān viṣavat tyaja / kṣamārjavadayātoṣa-satyaṃ pīyūṣavad bhaja
Sanskrit only: no published translation is held for this verse.
न पृथ्वी न जलं नाग्निर् न वायुर् द्यौर् न वा भवान् । एषां साक्षिणम् आत्मानं चिद्-रूपं विद्धि मुक्तये
na pṛthvī na jalaṃ nāgnir na vāyur dyaur na vā bhavān / eṣāṃ sākṣiṇam ātmānaṃ cid-rūpaṃ viddhi muktaye
Sanskrit only: no published translation is held for this verse.
यदि देहं पृथक् कृत्य चिति विश्राम्य तिष्ठसि । अधुनैव सुखी शान्तो बन्ध-मुक्तो भविष्यसि
yadi dehaṃ pṛthak kṛtya citi viśrāmya tiṣṭhasi / adhunaiva sukhī śānto bandha-mukto bhaviṣyasi
Sanskrit only: no published translation is held for this verse.
न त्वं विप्रादिको वर्णो नाश्रमी नाक्ष-गोचरः । असङ्गो ऽसि निराकारो विश्व-साक्षी सुखी भव
na tvaṃ viprādiko varṇo nāśramī nākṣa-gocaraḥ / asaṅgo 'si nirākāro viśva-sākṣī sukhī bhava
Sanskrit only: no published translation is held for this verse.
धर्माधर्मौ सुखं दुःखं मानसानि न ते विभो । न कर्तासि न भोक्तासि मुक्त एवासि सर्वदा
dharmādharmau sukhaṃ duḥkhaṃ mānasāni na te vibho / na kartāsi na bhoktāsi mukta evāsi sarvadā
Sanskrit only: no published translation is held for this verse.
एको द्रष्टासि सर्वस्य मुक्त-प्रायो ऽसि सर्वदा । अयम् एव हि ते बन्धो द्रष्टारं पश्यसीतरम्
eko draṣṭāsi sarvasya mukta-prāyo 'si sarvadā / ayam eva hi te bandho draṣṭāraṃ paśyasītaram
Sanskrit only: no published translation is held for this verse.
अहं कर्तेत्य् अहं-मान-महा-कृष्णाहि-दंशितः । नाहं कर्तेति विश्वासामृतं पीत्वा सुखी भव
ahaṃ kartety ahaṃ-māna-mahā-kṛṣṇāhi-daṃśitaḥ / nāhaṃ karteti viśvāsāmṛtaṃ pītvā sukhī bhava
Sanskrit only: no published translation is held for this verse.
एको विशुद्ध-बोधो ऽहम् इति निश्चय-वह्निना । प्रज्वाल्याज्ञान-गहनं वीत-सोकः सुखी भव
eko viśuddha-bodho 'ham iti niścaya-vahninā / prajvālyājñāna-gahanaṃ vīta-sokaḥ sukhī bhava
Sanskrit only: no published translation is held for this verse.
यत्र विश्वम् इदं भाति कल्पितं रज्जु-सर्पवत् । आनन्द-परमानन्दः स बोधस् त्वं सुखं चर
yatra viśvam idaṃ bhāti kalpitaṃ rajju-sarpavat / ānanda-paramānandaḥ sa bodhas tvaṃ sukhaṃ cara
Sanskrit only: no published translation is held for this verse.
मुक्ताभिमानी मुक्तो हि बद्धो बद्धाभिमान्य् अपि । किं वदन्तीह सत्ये ऽयं या मतिः सा गतिर् भवेत्
muktābhimānī mukto hi baddho baddhābhimāny api / kiṃ vadantīha satye 'yaṃ yā matiḥ sā gatir bhavet
Sanskrit only: no published translation is held for this verse.
आत्मा साक्षी विभुः पूर्ण एको मुक्तश् चिद् अक्रियः । असङ्गो निस्पृहः शान्तो भ्रमात् संसारवान् इव
ātmā sākṣī vibhuḥ pūrṇa eko muktaś cid akriyaḥ / asaṅgo nispṛhaḥ śānto bhramāt saṃsāravān iva
Sanskrit only: no published translation is held for this verse.
कूटस्थं बोधम् अद्वैतम् आत्मानं परिभावय । आभासो ऽहं भ्रमं मुक्त्वा भावं बाह्यम् अथान्तरं
kūṭasthaṃ bodham advaitam ātmānaṃ paribhāvaya / ābhāso 'haṃ bhramaṃ muktvā bhāvaṃ bāhyam athāntaraṃ
Sanskrit only: no published translation is held for this verse.
देहाभिमान-पाशेन चिरं बद्धो ऽसि पुत्रक । बोधो ऽहं ज्ञान-खड्गेन तन् निष्कृत्य सुखी भव
dehābhimāna-pāśena ciraṃ baddho 'si putraka / bodho 'haṃ jñāna-khaḍgena tan niṣkṛtya sukhī bhava
Sanskrit only: no published translation is held for this verse.
निःसङ्गो निष्क्रियो ऽसि त्वं स्व-प्रकाशो निरञ्जनः । अयम् एव हि ते बन्धः समाधिम् अनुतिष्ठसि
niḥsaṅgo niṣkriyo 'si tvaṃ sva-prakāśo nirañjanaḥ / ayam eva hi te bandhaḥ samādhim anutiṣṭhasi
Sanskrit only: no published translation is held for this verse.
त्वया व्याप्तम् इदं विश्वं त्वयि प्रोतं यथार्थतः । शुद्द्ध-बुद्ध-स्वरूपस् त्वं, मा गमः क्षुद्र-चित्तताम्
tvayā vyāptam idaṃ viśvaṃ tvayi protaṃ yathārthataḥ / śudddha-buddha-svarūpas tvaṃ, mā gamaḥ kṣudra-cittatām
Sanskrit only: no published translation is held for this verse.
निरपेक्षो निर्विकारो निर्भरः शीतलाशयः । अगाध-बुद्धिर् अक्षुब्धो भव चिन्-मात्र-वासनः
nirapekṣo nirvikāro nirbharaḥ śītalāśayaḥ / agādha-buddhir akṣubdho bhava cin-mātra-vāsanaḥ
Sanskrit only: no published translation is held for this verse.
साकारम् अनृतं विद्धि निराकारं तु निश्चलम् । एतत्-तत्त्वोपदेशेन न पुनर्-भव-सम्भवः
sākāram anṛtaṃ viddhi nirākāraṃ tu niścalam / etat-tattvopadeśena na punar-bhava-sambhavaḥ
Sanskrit only: no published translation is held for this verse.
यथैवादर्शम् अध्यस्थे रूपे ऽन्तः परितस् तु सः । तथैवास्मिन् शरीरे ऽन्तः परितः परमेश्वरः
yathaivādarśam adhyasthe rūpe 'ntaḥ paritas tu saḥ / tathaivāsmin śarīre 'ntaḥ paritaḥ parameśvaraḥ
Sanskrit only: no published translation is held for this verse.
एकं सर्व-गतं व्योम बहिर् अन्तर् यथा घटे । नित्यं निरन्तरं ब्रह्म सर्व-भूत-गणे तथा
ekaṃ sarva-gataṃ vyoma bahir antar yathā ghaṭe / nityaṃ nirantaraṃ brahma sarva-bhūta-gaṇe tathā
Sanskrit only: no published translation is held for this verse.