Asvaghosa: Buddhacarita 6

ततो मुहूर्ताभ्युदिते जगच्चक्षुषि भास्करे । भार्गवस्याश्रमपदं स ददर्श नृणां वरः

tato muhūrtābhyudite jagaccakṣuṣi bhāskare / bhārgavasyāśramapadaṃ sa dadarśa nṛṇāṃ varaḥ

Sanskrit only: no published translation is held for this verse.

सुप्तविश्वस्तहरिणं स्वस्थस्थितविहङ्गमम् । विश्रान्त इव यद्दृष्ट्वा कृतार्थ इव चाभवत्

suptaviśvastahariṇaṃ svasthasthitavihaṅgamam / viśrānta iva yaddṛṣṭvā kṛtārtha iva cābhavat

Sanskrit only: no published translation is held for this verse.

स विस्मयनिवृत्त्यर्थ तपःपूजार्थमेव च । स्वां चानुवर्तिता रक्षन्नश्वपृष्ठादवतारत्

sa vismayanivṛttyartha tapaḥpūjārthameva ca / svāṃ cānuvartitā rakṣannaśvapṛṣṭhādavatārat

Sanskrit only: no published translation is held for this verse.

अवतीर्य च पस्पर्श निस्तीर्णमिति वाजिनम् । छन्दकं चाव्रवीत्प्रीतः स्नापयन्निव चक्षुषा

avatīrya ca pasparśa nistīrṇamiti vājinam / chandakaṃ cāvravītprītaḥ snāpayanniva cakṣuṣā

Sanskrit only: no published translation is held for this verse.

इमं तार्क्ष्योपमजवं तुरङ्गमनुगच्छता । दर्शिता सौम्य मद्भक्तिर्विक्रमश्चायमात्मनः

imaṃ tārkṣyopamajavaṃ turaṅgamanugacchatā / darśitā saumya madbhaktirvikramaścāyamātmanaḥ

Sanskrit only: no published translation is held for this verse.

सर्वथास्म्यन्यकार्यो ऽपि गृहीतो भवता हृदि । भर्तुस्नेहश्च यस्यायमीदृशः शक्तिरेव च

sarvathāsmyanyakāryo 'pi gṛhīto bhavatā hṛdi / bhartusnehaśca yasyāyamīdṛśaḥ śaktireva ca

Sanskrit only: no published translation is held for this verse.

अस्निग्धो ऽपि समर्थो ऽस्ति निःसामर्थ्यो ऽपि भक्तिमान् । भक्तिमांश्चैव शक्तश्च दुर्लभस्त्वद्विधो भुवि

asnigdho 'pi samartho 'sti niḥsāmarthyo 'pi bhaktimān / bhaktimāṃścaiva śaktaśca durlabhastvadvidho bhuvi

Sanskrit only: no published translation is held for this verse.

तत्प्रीतो ऽस्मि तवानेन महाभागेन कर्मणा । यस्य ते मयि भावो ऽयं फलेभ्यो ऽपि पराङ्मुखः

tatprīto 'smi tavānena mahābhāgena karmaṇā / yasya te mayi bhāvo 'yaṃ phalebhyo 'pi parāṅmukhaḥ

Sanskrit only: no published translation is held for this verse.

को जनस्य फलस्थस्य न स्यादभिमुखो जनः । जनीभवति भूयिष्ठं स्वजनो ऽपि विपर्यये

ko janasya phalasthasya na syādabhimukho janaḥ / janībhavati bhūyiṣṭhaṃ svajano 'pi viparyaye

Sanskrit only: no published translation is held for this verse.

कुलार्थ धार्यते पुत्रः पोषार्थ सेव्यते पिता । आशयाच्छिलष्यति जगन्नास्ति निष्कारणा स्वता

kulārtha dhāryate putraḥ poṣārtha sevyate pitā / āśayācchilaṣyati jagannāsti niṣkāraṇā svatā

Sanskrit only: no published translation is held for this verse.

किमुक्त्वा बहु संक्षेपात्कृतं मे सुमहत्प्रियम् । निवर्तस्वाश्वमादाय संप्राप्तो ऽस्मीप्सितं पदम्

kimuktvā bahu saṃkṣepātkṛtaṃ me sumahatpriyam / nivartasvāśvamādāya saṃprāpto 'smīpsitaṃ padam

Sanskrit only: no published translation is held for this verse.

इत्युक्त्वा स महाबाहुरनुशंसचिकीर्षया । भूषणान्यवमुच्यास्मै संतप्तमनसे ददौ

ityuktvā sa mahābāhuranuśaṃsacikīrṣayā / bhūṣaṇānyavamucyāsmai saṃtaptamanase dadau

Sanskrit only: no published translation is held for this verse.

मुकुटाद्दीपकर्माणं मणीमादाय भास्वरम् । ब्रुवन्वाक्यमिदं तस्थौ सांदित्य इव मन्दरः

mukuṭāddīpakarmāṇaṃ maṇīmādāya bhāsvaram / bruvanvākyamidaṃ tasthau sāṃditya iva mandaraḥ

Sanskrit only: no published translation is held for this verse.

अनेन मणिना छन्द प्रणम्य बहुशो नृपः । विज्ञाप्यो ऽमुक्तविश्रम्भं संतापविनिवृत्तये

anena maṇinā chanda praṇamya bahuśo nṛpaḥ / vijñāpyo 'muktaviśrambhaṃ saṃtāpavinivṛttaye

Sanskrit only: no published translation is held for this verse.

जन्ममरणनाशार्थ प्रविष्टो ऽस्मि तपोवनम् । न खलु स्वर्गतर्षेण नास्नेहेन न मन्युना

janmamaraṇanāśārtha praviṣṭo 'smi tapovanam / na khalu svargatarṣeṇa nāsnehena na manyunā

Sanskrit only: no published translation is held for this verse.

तदेवमभिनिष्क्रान्तं न मां शोचितुमर्हसि । भूत्वापि हि चिरं श्लेषः कालेन न भविष्यति

tadevamabhiniṣkrāntaṃ na māṃ śocitumarhasi / bhūtvāpi hi ciraṃ śleṣaḥ kālena na bhaviṣyati

Sanskrit only: no published translation is held for this verse.

ध्रुवो यस्माच्च विश्लेषस्तस्मान्मोक्षाय मे मतिः । विप्रयोगः कथं न स्याद् भूयो ऽपि स्वजनादिति

dhruvo yasmācca viśleṣastasmānmokṣāya me matiḥ / viprayogaḥ kathaṃ na syād bhūyo 'pi svajanāditi

Sanskrit only: no published translation is held for this verse.

शोकत्यागाय निष्क्रान्तं न मां शोचितुमर्हसि । शोकहेतुषु कामेषु सक्ताः शोच्यास्तु रागिणः

śokatyāgāya niṣkrāntaṃ na māṃ śocitumarhasi / śokahetuṣu kāmeṣu saktāḥ śocyāstu rāgiṇaḥ

Sanskrit only: no published translation is held for this verse.

अयं च किल पूर्वेषामस्माकं निश्चयः स्थिरः । इति दायाद्यभूतेन न शोच्यो ऽस्मि पथा व्रजन्

ayaṃ ca kila pūrveṣāmasmākaṃ niścayaḥ sthiraḥ / iti dāyādyabhūtena na śocyo 'smi pathā vrajan

Sanskrit only: no published translation is held for this verse.

भवन्ति ह्यर्थदायादाः पुरुषस्य विपर्यये । पृथिव्यां धर्मदायादाः दुर्लभास्तु न सन्ति वा

bhavanti hyarthadāyādāḥ puruṣasya viparyaye / pṛthivyāṃ dharmadāyādāḥ durlabhāstu na santi vā

Sanskrit only: no published translation is held for this verse.

यदपि स्यादसमये यातो वनमसाविति । अकालो नास्ति धर्मस्य जीविते चञ्चले सति

yadapi syādasamaye yāto vanamasāviti / akālo nāsti dharmasya jīvite cañcale sati

Sanskrit only: no published translation is held for this verse.

तस्मादद्यैव मे श्रेयश्चेतव्यमिति निश्चयः । जीविते को हि विश्रम्भो मृत्यौ प्रत्यर्थिनि स्थिते

tasmādadyaiva me śreyaścetavyamiti niścayaḥ / jīvite ko hi viśrambho mṛtyau pratyarthini sthite

Sanskrit only: no published translation is held for this verse.

एवमादि त्वया सौम्य विज्ञाप्यो वसुधाधिपः । प्रयतेथास्तथा चैव यथा मां न स्मरेदापि

evamādi tvayā saumya vijñāpyo vasudhādhipaḥ / prayatethāstathā caiva yathā māṃ na smaredāpi

Sanskrit only: no published translation is held for this verse.

अपि नैर्गुण्यमस्माकं वाच्यं नरपतौ त्वया । नैर्गुण्यात्त्यज्यते स्नेहः स्नेहत्यागान्न शोच्यते

api nairguṇyamasmākaṃ vācyaṃ narapatau tvayā / nairguṇyāttyajyate snehaḥ snehatyāgānna śocyate

Sanskrit only: no published translation is held for this verse.

इति वाक्यमिदं श्रुत्वा छन्दः संतापविक्लवः । बाष्पग्रथितया वाचा प्रत्युवाच कृताञ्जलिः

iti vākyamidaṃ śrutvā chandaḥ saṃtāpaviklavaḥ / bāṣpagrathitayā vācā pratyuvāca kṛtāñjaliḥ

Sanskrit only: no published translation is held for this verse.

अनेन त व भावेन बान्धवायासदायिना । भर्तः सीदति मे चेतो नदीपङ्क इव द्विपः

anena ta va bhāvena bāndhavāyāsadāyinā / bhartaḥ sīdati me ceto nadīpaṅka iva dvipaḥ

Sanskrit only: no published translation is held for this verse.

कस्य नोत्पादयेद्बाष्पं निश्चयस्ते ऽयमीदृशः । अयोमये ऽपि हृदये किं पुनः स्नेहविक्लवे

kasya notpādayedbāṣpaṃ niścayaste 'yamīdṛśaḥ / ayomaye 'pi hṛdaye kiṃ punaḥ snehaviklave

Sanskrit only: no published translation is held for this verse.

विमानशयनार्हं हि सौकुमार्यमिदं क्व च । खरदर्भाङ्कुरवती तपोवनमही क्व च

vimānaśayanārhaṃ hi saukumāryamidaṃ kva ca / kharadarbhāṅkuravatī tapovanamahī kva ca

Sanskrit only: no published translation is held for this verse.

श्रुत्वा तु व्यवसायं ते यदश्वो ऽयं मयाहृतः । बलात्कारेण तन्नाथ दैवेनैवास्मि कारितः

śrutvā tu vyavasāyaṃ te yadaśvo 'yaṃ mayāhṛtaḥ / balātkāreṇa tannātha daivenaivāsmi kāritaḥ

Sanskrit only: no published translation is held for this verse.

कथं ह्यात्मवशो जानन् व्यवसायमिमं तव । उपानयेयं तुरगं शोकं कपिलवास्तुनः

kathaṃ hyātmavaśo jānan vyavasāyamimaṃ tava / upānayeyaṃ turagaṃ śokaṃ kapilavāstunaḥ

Sanskrit only: no published translation is held for this verse.

तन्नार्हसि महाबाहो विहातुं पुत्रलालसम् । स्निग्धं वृद्धं च राजानं सद्धर्ममिव नास्तिकः

tannārhasi mahābāho vihātuṃ putralālasam / snigdhaṃ vṛddhaṃ ca rājānaṃ saddharmamiva nāstikaḥ

Sanskrit only: no published translation is held for this verse.

संवर्धनपरिश्रान्तां द्वितीयां तां च मातरम् । देवीं नार्हसि विस्मर्तु कृतघ्न इव सत्क्रियाम्

saṃvardhanapariśrāntāṃ dvitīyāṃ tāṃ ca mātaram / devīṃ nārhasi vismartu kṛtaghna iva satkriyām

Sanskrit only: no published translation is held for this verse.

बालपुत्रां गुणवर्ती कुलश्लाध्यां पतिव्रताम् । देवीमर्हसि न त्यक्तुं क्लीबः प्राप्तामिव श्रियम्

bālaputrāṃ guṇavartī kulaślādhyāṃ pativratām / devīmarhasi na tyaktuṃ klībaḥ prāptāmiva śriyam

Sanskrit only: no published translation is held for this verse.

पुत्रं याशोधरं श्लाध्यं यशोधर्मभृतां वरम् । बालमर्हसि न त्यक्तुं व्यसनीवोत्तमं यशः

putraṃ yāśodharaṃ ślādhyaṃ yaśodharmabhṛtāṃ varam / bālamarhasi na tyaktuṃ vyasanīvottamaṃ yaśaḥ

Sanskrit only: no published translation is held for this verse.

अथ बन्धुं च राज्यं च त्यक्तुमेव कृता मतिः । मां नार्हसि विभो त्यक्तुं त्वत्पादौ हि गतिर्मम

atha bandhuṃ ca rājyaṃ ca tyaktumeva kṛtā matiḥ / māṃ nārhasi vibho tyaktuṃ tvatpādau hi gatirmama

Sanskrit only: no published translation is held for this verse.

नास्मि यातुं पुरं शक्तो दह्यमानेन चेतसा । त्वामरण्ये परित्यज्य सुमन्त्र इव राघवम्

nāsmi yātuṃ puraṃ śakto dahyamānena cetasā / tvāmaraṇye parityajya sumantra iva rāghavam

Sanskrit only: no published translation is held for this verse.

किं हि वक्ष्यति मां राजा त्वदृते नगरं गतम् । वक्ष्याम्युचितदर्शित्वात्किं तवान्तःपुराणि वा

kiṃ hi vakṣyati māṃ rājā tvadṛte nagaraṃ gatam / vakṣyāmyucitadarśitvātkiṃ tavāntaḥpurāṇi vā

Sanskrit only: no published translation is held for this verse.

यदप्यात्थापि नैर्गुण्यं वाच्यं नरपताविति । किं तद्वक्ष्याम्यभूतं ते निर्दोषस्य मुनेरिव

yadapyātthāpi nairguṇyaṃ vācyaṃ narapatāviti / kiṃ tadvakṣyāmyabhūtaṃ te nirdoṣasya muneriva

Sanskrit only: no published translation is held for this verse.

हृदयेन सलज्जेन जिव्हया सज्जमानया । अहं यदपि वा ब्रूयां कस्तच्छ्रद्धातुमर्हति

hṛdayena salajjena jivhayā sajjamānayā / ahaṃ yadapi vā brūyāṃ kastacchraddhātumarhati

Sanskrit only: no published translation is held for this verse.

यो हि चन्द्रमसस्तैक्ष्ण्यं कथयेच्छ्रद्दधीत वा । स दोषांस्तव दोषज्ञ कथयेच्छ्रद्दधीत वा

yo hi candramasastaikṣṇyaṃ kathayecchraddadhīta vā / sa doṣāṃstava doṣajña kathayecchraddadhīta vā

Sanskrit only: no published translation is held for this verse.

सानुक्रोशस्य सततं नित्यं करुणवेदिनः । स्निग्धत्यागो न सदृशो निवर्तस्व प्रसीद मे

sānukrośasya satataṃ nityaṃ karuṇavedinaḥ / snigdhatyāgo na sadṛśo nivartasva prasīda me

Sanskrit only: no published translation is held for this verse.

इति शोकाभिभूतस्य श्रुत्वा छन्दस्य भाषितम् । स्वस्थः परमया धृत्या जगाद वदतां वरः

iti śokābhibhūtasya śrutvā chandasya bhāṣitam / svasthaḥ paramayā dhṛtyā jagāda vadatāṃ varaḥ

Sanskrit only: no published translation is held for this verse.

मद्वियोगं प्रति च्छन्द संतापस्त्यज्यतामयम् । नानाभावो हि नियतं पृथग्जातिषु देहिषु

madviyogaṃ prati cchanda saṃtāpastyajyatāmayam / nānābhāvo hi niyataṃ pṛthagjātiṣu dehiṣu

Sanskrit only: no published translation is held for this verse.

स्वजनं यद्यपि स्नेहान्न त्यजेयमहं स्वयम् । मृत्युरन्योन्यमवशानस्मान् संत्याजयिष्यति

svajanaṃ yadyapi snehānna tyajeyamahaṃ svayam / mṛtyuranyonyamavaśānasmān saṃtyājayiṣyati

Sanskrit only: no published translation is held for this verse.

महत्या तृष्णया दुःखैर्गर्भेणास्मि यया धृतः । तस्या निष्फलयत्नायाः क्वाहं मातुः क्व सा मम

mahatyā tṛṣṇayā duḥkhairgarbheṇāsmi yayā dhṛtaḥ / tasyā niṣphalayatnāyāḥ kvāhaṃ mātuḥ kva sā mama

Sanskrit only: no published translation is held for this verse.

वासवृक्षे समागम्य विगच्छन्ति यथाण्डजाः । नियतं विप्रयोगान्तस्तथा भूतसमागमः

vāsavṛkṣe samāgamya vigacchanti yathāṇḍajāḥ / niyataṃ viprayogāntastathā bhūtasamāgamaḥ

Sanskrit only: no published translation is held for this verse.

समेत्य च यथा भूयो व्यपयान्ति बलाहकाः । संयोगो विप्रयोगश्च तथा मे प्राणिनां मतः

sametya ca yathā bhūyo vyapayānti balāhakāḥ / saṃyogo viprayogaśca tathā me prāṇināṃ mataḥ

Sanskrit only: no published translation is held for this verse.

यस्माद्याति च लोको ऽयं विप्रलभ्य परंपरम् । ममत्त्वं न क्षमं तस्मात्स्वप्नभूते समागमे

yasmādyāti ca loko 'yaṃ vipralabhya paraṃparam / mamattvaṃ na kṣamaṃ tasmātsvapnabhūte samāgame

Sanskrit only: no published translation is held for this verse.

सहजेन वियुज्यन्ते पर्णरागेण पादपाः । अन्येनान्यस्य विश्लेषः किं पुनर्न भविष्यति

sahajena viyujyante parṇarāgeṇa pādapāḥ / anyenānyasya viśleṣaḥ kiṃ punarna bhaviṣyati

Sanskrit only: no published translation is held for this verse.

तदेवं सति संतापं मा कार्षी सौम्य गम्यताम् । लम्बते यदि तु स्नेहो गत्वापि पुनराव्रज

tadevaṃ sati saṃtāpaṃ mā kārṣī saumya gamyatām / lambate yadi tu sneho gatvāpi punarāvraja

Sanskrit only: no published translation is held for this verse.

ब्रूयाश्चास्मत्कृतापेक्षं जनं कपिलवास्तुनि । त्यज्यतां तग्दतः स्नेहः श्रूयतां चास्य निश्चयः

brūyāścāsmatkṛtāpekṣaṃ janaṃ kapilavāstuni / tyajyatāṃ tagdataḥ snehaḥ śrūyatāṃ cāsya niścayaḥ

Sanskrit only: no published translation is held for this verse.

क्षिप्रमेष्यति वा कृत्वा जन्ममृत्युक्षयं किल । अकृतार्थो निरारम्भो निधनं यास्यतीति वा

kṣiprameṣyati vā kṛtvā janmamṛtyukṣayaṃ kila / akṛtārtho nirārambho nidhanaṃ yāsyatīti vā

Sanskrit only: no published translation is held for this verse.

इति तस्य वचः श्रुत्वा कन्थकस्तुरगोत्तमः । जिव्हया लिलिहे पादौ बाष्पमुष्णं मुमोच च

iti tasya vacaḥ śrutvā kanthakasturagottamaḥ / jivhayā lilihe pādau bāṣpamuṣṇaṃ mumoca ca

Sanskrit only: no published translation is held for this verse.

जालिना स्वस्तिकाङ्केन चक्रमध्येन पाणिना । आममर्श कुमारस्तं बभाषे च वयस्यवत्

jālinā svastikāṅkena cakramadhyena pāṇinā / āmamarśa kumārastaṃ babhāṣe ca vayasyavat

Sanskrit only: no published translation is held for this verse.

मुञ्च कन्थक मा बाष्पं दर्शितेयं सदश्वता । मृष्यतां सफलः शीघ्रं श्रमस्ते ऽयं भविष्यति

muñca kanthaka mā bāṣpaṃ darśiteyaṃ sadaśvatā / mṛṣyatāṃ saphalaḥ śīghraṃ śramaste 'yaṃ bhaviṣyati

Sanskrit only: no published translation is held for this verse.

मणित्सरुं छन्दकहस्तसंस्थं ततः स धीरो निशितं गृहीत्वा कोशादसिं कञ्चनभक्तिचित्रं बिलादिवशीविषमुद्बबर्ह

maṇitsaruṃ chandakahastasaṃsthaṃ tataḥ sa dhīro niśitaṃ gṛhītvā kośādasiṃ kañcanabhakticitraṃ bilādivaśīviṣamudbabarha

Sanskrit only: no published translation is held for this verse.

निष्कास्य तं चोत्पलपत्त्रनीलं चिच्छेद चित्रं मुकुटं सकेशम् । विकीर्यमाणांशुकमन्तरीक्षे चिक्षेप चैनं सरसीव हंसम्

niṣkāsya taṃ cotpalapattranīlaṃ ciccheda citraṃ mukuṭaṃ sakeśam / vikīryamāṇāṃśukamantarīkṣe cikṣepa cainaṃ sarasīva haṃsam

Sanskrit only: no published translation is held for this verse.

पूजाभिलाषेण च बाहुमान्याद्दिवौकसस्तं जगृहुः प्रविद्धम् । यथावदेनं दिवि देवसङ्घा दिव्यैर्विशेषैर्महयां च चक्रुः

pūjābhilāṣeṇa ca bāhumānyāddivaukasastaṃ jagṛhuḥ praviddham / yathāvadenaṃ divi devasaṅghā divyairviśeṣairmahayāṃ ca cakruḥ

Sanskrit only: no published translation is held for this verse.

मुक्त्वा त्वलंकारकलत्रवत्तां श्रीविप्रवासं शिरसश्च कृत्वा । दृष्ट्वांशुकं काञ्चनहंसचिन्हं वन्यं स धीरो ऽभिचकाङ्क्ष वासः

muktvā tvalaṃkārakalatravattāṃ śrīvipravāsaṃ śirasaśca kṛtvā / dṛṣṭvāṃśukaṃ kāñcanahaṃsacinhaṃ vanyaṃ sa dhīro 'bhicakāṅkṣa vāsaḥ

Sanskrit only: no published translation is held for this verse.

ततो मृगव्याधनपुर्दिवौका भावं विदित्वास्य विशुद्धभावः । काषायवस्त्रो ऽभिययौ समीपं तं शाक्यराजप्रभवो ऽभ्युवाच

tato mṛgavyādhanapurdivaukā bhāvaṃ viditvāsya viśuddhabhāvaḥ / kāṣāyavastro 'bhiyayau samīpaṃ taṃ śākyarājaprabhavo 'bhyuvāca

Sanskrit only: no published translation is held for this verse.

शिवं च काषायमृषिध्वजस्ते न युज्यते हिंस्रमिदं धनुश्च । तत्सौम्य यद्यस्ति न सक्तिरत्र मह्यं प्रयच्छेदमिदं गृहाण

śivaṃ ca kāṣāyamṛṣidhvajaste na yujyate hiṃsramidaṃ dhanuśca / tatsaumya yadyasti na saktiratra mahyaṃ prayacchedamidaṃ gṛhāṇa

Sanskrit only: no published translation is held for this verse.

व्याधो ऽब्रवीत्कामद काममारादनेन विश्वास्य मृगाग्निहन्मि । अर्थस्तु शक्रोपम यद्यनेन हन्त प्रतीच्छानय शुक्लमेतत्

vyādho 'bravītkāmada kāmamārādanena viśvāsya mṛgāgnihanmi / arthastu śakropama yadyanena hanta pratīcchānaya śuklametat

Sanskrit only: no published translation is held for this verse.

परेण हर्षेण ततः स वन्यं जग्राह वासो ऽशुकमुत्ससर्ज । व्याधस्तु दिव्यं वपुरेव बिभ्रत्तच्छुक्लमादाय दिवं जगाम

pareṇa harṣeṇa tataḥ sa vanyaṃ jagrāha vāso 'śukamutsasarja / vyādhastu divyaṃ vapureva bibhrattacchuklamādāya divaṃ jagāma

Sanskrit only: no published translation is held for this verse.

ततः कुमारश्च स चाश्वगोपस्तस्मिंस्तथा याति विसिस्मियाते । आरण्यके वाससि चैव भूयस्तस्मिन्नकार्ष्टा बहुमानमाशु

tataḥ kumāraśca sa cāśvagopastasmiṃstathā yāti visismiyāte / āraṇyake vāsasi caiva bhūyastasminnakārṣṭā bahumānamāśu

Sanskrit only: no published translation is held for this verse.

छन्दं ततः साश्रुमुखं विसृज्य काषायसंभृद्धृतिकीर्तिभृत्सः । येनाश्रमस्तेन ययौ महात्मा संध्याभ्रसंवीत इवोडुराजः

chandaṃ tataḥ sāśrumukhaṃ visṛjya kāṣāyasaṃbhṛddhṛtikīrtibhṛtsaḥ / yenāśramastena yayau mahātmā saṃdhyābhrasaṃvīta ivoḍurājaḥ

Sanskrit only: no published translation is held for this verse.

ततस्तथा भर्तरि राज्यनिःस्पृहे तपोवनं याति विवर्णवाससि । भुजौ समुत्क्षिप्य ततः स वाजिभृद् भृशं विचुक्रोश पपात च क्षितौ

tatastathā bhartari rājyaniḥspṛhe tapovanaṃ yāti vivarṇavāsasi / bhujau samutkṣipya tataḥ sa vājibhṛd bhṛśaṃ vicukrośa papāta ca kṣitau

Sanskrit only: no published translation is held for this verse.

विलोक्य भूयश्च रुरोद सस्वरं हयं भुजाभ्यामुपगुह्य कन्थकम् । ततो निराशो विलपनन्मुहुर्मुहुर्ययौ शरीरेण पुरं न चेतसा

vilokya bhūyaśca ruroda sasvaraṃ hayaṃ bhujābhyāmupaguhya kanthakam / tato nirāśo vilapananmuhurmuhuryayau śarīreṇa puraṃ na cetasā

Sanskrit only: no published translation is held for this verse.

क्वचित्प्रदध्यौ विललाप च क्वचित् क्वचित्प्रचस्खाल पपात च क्वचित् । अतो व्रजन् भक्तिवशेन दुःखितश्चचार बव्हीरवशः पथि क्रियाः

kvacitpradadhyau vilalāpa ca kvacit kvacitpracaskhāla papāta ca kvacit / ato vrajan bhaktivaśena duḥkhitaścacāra bavhīravaśaḥ pathi kriyāḥ

Sanskrit only: no published translation is held for this verse.