Bharavi: Kiratarjuniya 10

अथ परिमलजाम् अवाप्य लक्ष्मीम् अवयवदीपितमण्डनश्रियस् ताः । वसतिम् अभिविहाय रम्यहावाः सुरपतिसूनुविलोभनाय जग्मुः

atha parimalajām avāpya lakṣmīm avayavadīpitamaṇḍanaśriyas tāḥ / vasatim abhivihāya ramyahāvāḥ surapatisūnuvilobhanāya jagmuḥ

Sanskrit only: no published translation is held for this verse.

द्रुतपदम् अभियातुम् इच्छतीनां गमनपरिक्रमलाघवेन तासाम् । अवनिषु चरणैः पृथुस्तनीनाम् अलघुनितम्बतया चिरं निषेदे

drutapadam abhiyātum icchatīnāṃ gamanaparikramalāghavena tāsām / avaniṣu caraṇaiḥ pṛthustanīnām alaghunitambatayā ciraṃ niṣede

Sanskrit only: no published translation is held for this verse.

निहितसरसयावकैर् बभासे चरणतलैः कृतपद्धतिर् वधूनाम् । अविरलविततेव शक्रगोपैर् अरुणितनीलतृणोलपा धरित्री

nihitasarasayāvakair babhāse caraṇatalaiḥ kṛtapaddhatir vadhūnām / aviralavitateva śakragopair aruṇitanīlatṛṇolapā dharitrī

Sanskrit only: no published translation is held for this verse.

ध्वनिर् अगविवरेषु नूपुराणां पृथुरशनागुणशिञ्जितानुयातः । प्रतिरवविततो वनानि चक्रे मुखरसम् उत्सुकहंससारसानि

dhvanir agavivareṣu nūpurāṇāṃ pṛthuraśanāguṇaśiñjitānuyātaḥ / pratiravavitato vanāni cakre mukharasam utsukahaṃsasārasāni

Sanskrit only: no published translation is held for this verse.

अवचयपरिभोगवन्ति हिंस्रैः सहचरितान्य् अमृगाणि काननानि । अभिदधुर् अभितो मुनिं वधूभ्यः समुदितसाध्वसविक्लवं च चेतः

avacayaparibhogavanti hiṃsraiḥ sahacaritāny amṛgāṇi kānanāni / abhidadhur abhito muniṃ vadhūbhyaḥ samuditasādhvasaviklavaṃ ca cetaḥ

Sanskrit only: no published translation is held for this verse.

नृपतिमुनिपरिग्रहेण सा भूः सुरसचिवाप्सरसां जहार चेतः । उपहितपरमप्रभावधाम्नां न हि जयिनां तपसाम् अलङ्घ्यम् अस्ति

nṛpatimuniparigraheṇa sā bhūḥ surasacivāpsarasāṃ jahāra cetaḥ / upahitaparamaprabhāvadhāmnāṃ na hi jayināṃ tapasām alaṅghyam asti

Sanskrit only: no published translation is held for this verse.

सचकितम् इव विस्मयाकुलाभिः शुचिसिकतास्व् अतिमानुषाणि ताभिः । क्षितिषु ददृशिरे पदानि जिष्णोर् उपहितकेतुर् अथाङ्गलाञ्छनानि

sacakitam iva vismayākulābhiḥ śucisikatāsv atimānuṣāṇi tābhiḥ / kṣitiṣu dadṛśire padāni jiṣṇor upahitaketur athāṅgalāñchanāni

Sanskrit only: no published translation is held for this verse.

अतिशयितवनान्तरद्युतीनां फलकुसुमावचये ऽपि तद्विधानाम् । ऋतुर् इव तरुवीरुधां समृद्ध्या युवतिजनैर् जगृहे मुनिप्रभावः

atiśayitavanāntaradyutīnāṃ phalakusumāvacaye 'pi tadvidhānām / ṛtur iva taruvīrudhāṃ samṛddhyā yuvatijanair jagṛhe muniprabhāvaḥ

Sanskrit only: no published translation is held for this verse.

मृदितकिसलयः सुराङ्गनानां ससलिलवल्कलभारभुग्नशाखः । बहुमतिम् अधिकां ययाव् अशोकः परिजनतापि गुणाय सद्गुणानाम्

mṛditakisalayaḥ surāṅganānāṃ sasalilavalkalabhārabhugnaśākhaḥ / bahumatim adhikāṃ yayāv aśokaḥ parijanatāpi guṇāya sadguṇānām

Sanskrit only: no published translation is held for this verse.

यमनियमकृशीकृतस्थिराङ्गः परिददृशे विधृतायुधः स ताभिः । अनुपमशमदीप्ततागरीयान् कृतपदपङ्क्तिर् अथर्वणेव वेदः

yamaniyamakṛśīkṛtasthirāṅgaḥ paridadṛśe vidhṛtāyudhaḥ sa tābhiḥ / anupamaśamadīptatāgarīyān kṛtapadapaṅktir atharvaṇeva vedaḥ

Sanskrit only: no published translation is held for this verse.

शशधर इव लोचनाभिरामैर् गगनविसारिभिर् अंशुभिः परीतः । शिखरनिचयम् एकसानुसद्मा सकलम् इवापि दधन् महीधरस्य

śaśadhara iva locanābhirāmair gaganavisāribhir aṃśubhiḥ parītaḥ / śikharanicayam ekasānusadmā sakalam ivāpi dadhan mahīdharasya

Sanskrit only: no published translation is held for this verse.

सुरसरिति परं तपो ऽधिगच्छन् विधृतपिशङ्गबृहज्जटाकलापः । हविर् इव विततः शिखासमूहैः समभिलषन्न् उपवेदि जातवेदाः

surasariti paraṃ tapo 'dhigacchan vidhṛtapiśaṅgabṛhajjaṭākalāpaḥ / havir iva vitataḥ śikhāsamūhaiḥ samabhilaṣann upavedi jātavedāḥ

Sanskrit only: no published translation is held for this verse.

सदृशम् अतनुम् आकृतेः प्रयत्नं तदनुगुणाम् अपरैः क्रियाम् अलङ्घ्याम् । दधद् अलघु तपः क्रियानुरूपं विजयवतीं च तपःसमां समृद्धिम्

sadṛśam atanum ākṛteḥ prayatnaṃ tadanuguṇām aparaiḥ kriyām alaṅghyām / dadhad alaghu tapaḥ kriyānurūpaṃ vijayavatīṃ ca tapaḥsamāṃ samṛddhim

Sanskrit only: no published translation is held for this verse.

चिरनियमकृशो ऽपि शैलसारः शमनिरतो ऽपि दुरासदः प्रकृत्या । ससचिव इव निर्जने ऽपि तिष्ठन् मुनिर् अपि तुल्यरुचिस् त्रिलोकभर्तुः

ciraniyamakṛśo 'pi śailasāraḥ śamanirato 'pi durāsadaḥ prakṛtyā / sasaciva iva nirjane 'pi tiṣṭhan munir api tulyarucis trilokabhartuḥ

Sanskrit only: no published translation is held for this verse.

तनुम् अवजितलोकसारधाम्नीं त्रिभुवनगुप्तिसहां विलोकयन्त्यः । अवययुर् अमरस्त्रियो ऽस्य यत्नं विजयफले विफलं तपोधिकारे

tanum avajitalokasāradhāmnīṃ tribhuvanaguptisahāṃ vilokayantyaḥ / avayayur amarastriyo 'sya yatnaṃ vijayaphale viphalaṃ tapodhikāre

Sanskrit only: no published translation is held for this verse.

मुनिदनुतनयान् विलोभ्य सद्यः प्रतनुबलान्य् अधितिष्ठतस् तपांसि । अलघुनि बहु मेनिरे च ताः स्वं कुलिशभृता विहितं पदे नियोगम्

munidanutanayān vilobhya sadyaḥ pratanubalāny adhitiṣṭhatas tapāṃsi / alaghuni bahu menire ca tāḥ svaṃ kuliśabhṛtā vihitaṃ pade niyogam

Sanskrit only: no published translation is held for this verse.

अथ कृतकविलोभनं विधित्सौ युवतिजने हरिसूनुदर्शनेन । प्रसभम् अवततार चित्तजन्मा हरति मनो मधुरा हि यौवनश्रीः

atha kṛtakavilobhanaṃ vidhitsau yuvatijane harisūnudarśanena / prasabham avatatāra cittajanmā harati mano madhurā hi yauvanaśrīḥ

Sanskrit only: no published translation is held for this verse.

सपदि हरिसखैर् वधूनिदेशाद् ध्वनितमनोरमवल्लकीमृदङ्गैः । युगपद् ऋतुगणस्य संनिधानं वियति वने च यथायथं वितेने

sapadi harisakhair vadhūnideśād dhvanitamanoramavallakīmṛdaṅgaiḥ / yugapad ṛtugaṇasya saṃnidhānaṃ viyati vane ca yathāyathaṃ vitene

Sanskrit only: no published translation is held for this verse.

सजलजलधरं नभो विरेजे विवृतिम् इयाय रुचिस् तडिल्लतानाम् । व्यवहितरतिविग्रहैर् वितेने जलगुरुभिः स्तनितैर् दिगन्तरेषु

sajalajaladharaṃ nabho vireje vivṛtim iyāya rucis taḍillatānām / vyavahitarativigrahair vitene jalagurubhiḥ stanitair digantareṣu

Sanskrit only: no published translation is held for this verse.

परिसुरपतिसूनुधाम सद्यः समुपदधन् मुकुलानि मालतीनाम् । विरलम् अपजहार बद्धबिन्दुः सरजसताम् अवनेर् अपां निपातः

parisurapatisūnudhāma sadyaḥ samupadadhan mukulāni mālatīnām / viralam apajahāra baddhabinduḥ sarajasatām avaner apāṃ nipātaḥ

Sanskrit only: no published translation is held for this verse.

प्रतिदिशम् अभिगच्छताभिमृष्टः ककुभविकाससुगन्धिनानिलेन । नव इव विबभौ सचित्तजन्मा गतधृतिर् आकुलितश् च जीवलोकः

pratidiśam abhigacchatābhimṛṣṭaḥ kakubhavikāsasugandhinānilena / nava iva vibabhau sacittajanmā gatadhṛtir ākulitaś ca jīvalokaḥ

Sanskrit only: no published translation is held for this verse.

व्यथितम् अपि भृशं मनो हरन्ती परिणतजम्बुफलोपभोगहृष्टा । परभृतयुवतिः स्वनं वितेने नवनवयोजितकण्ठरागरम्यम्

vyathitam api bhṛśaṃ mano harantī pariṇatajambuphalopabhogahṛṣṭā / parabhṛtayuvatiḥ svanaṃ vitene navanavayojitakaṇṭharāgaramyam

Sanskrit only: no published translation is held for this verse.

अभिभवति मनः कदम्बवायौ मदमधुरे च शिखण्डिनां निनादे । जन इव न धृतेश् चचाल जिष्णुर् न हि महतां सुकरः समाधिभङ्गः

abhibhavati manaḥ kadambavāyau madamadhure ca śikhaṇḍināṃ nināde / jana iva na dhṛteś cacāla jiṣṇur na hi mahatāṃ sukaraḥ samādhibhaṅgaḥ

Sanskrit only: no published translation is held for this verse.

धृतबिसवलयावलिर् वहन्ती कुमुदवनैकदुकूलम् आत्तबाणा । शरदमलतले सरोजपाणौ घनसमयेन वधूर् इवाललम्बे

dhṛtabisavalayāvalir vahantī kumudavanaikadukūlam āttabāṇā / śaradamalatale sarojapāṇau ghanasamayena vadhūr ivālalambe

Sanskrit only: no published translation is held for this verse.

समदशिखिरुतानि हंसनादैः कुमुदवनानि कदम्बपुष्पवृष्ट्या । श्रियम् अतिशयिनीं समेत्य जग्मुर् गुणमहतां महते गुणाय योगः

samadaśikhirutāni haṃsanādaiḥ kumudavanāni kadambapuṣpavṛṣṭyā / śriyam atiśayinīṃ sametya jagmur guṇamahatāṃ mahate guṇāya yogaḥ

Sanskrit only: no published translation is held for this verse.

सरजसम् अपहाय केतकीनां प्रसवम् उपान्तिकनीपरेणुकीर्णम् । प्रियमधुरसनानि षट्पदाली मलिनयति स्म विनीलबन्धनानि

sarajasam apahāya ketakīnāṃ prasavam upāntikanīpareṇukīrṇam / priyamadhurasanāni ṣaṭpadālī malinayati sma vinīlabandhanāni

Sanskrit only: no published translation is held for this verse.

मुकुलितम् अतिशय्य बन्धुजीवं धृतजलबिन्दुषु शाद्वलस्थलीषु । अविरलवपुषः सुरेन्द्रगोपा विकचपलाशचयश्रियं समीयुः

mukulitam atiśayya bandhujīvaṃ dhṛtajalabinduṣu śādvalasthalīṣu / aviralavapuṣaḥ surendragopā vikacapalāśacayaśriyaṃ samīyuḥ

Sanskrit only: no published translation is held for this verse.

अविरलफलिनीवनप्रसूनः कुसुमितकुन्दसुगन्धिगन्धवाहः । गुणम् असमयजं चिराय लेभे विरलतुषारकणस् तुषारकालः

aviralaphalinīvanaprasūnaḥ kusumitakundasugandhigandhavāhaḥ / guṇam asamayajaṃ cirāya lebhe viralatuṣārakaṇ.as tuṣārakālaḥ

Sanskrit only: no published translation is held for this verse.

निचयिनि लवलीलताविकासे जनयति लोध्रसमीरणे च हर्षम् । विकृतिम् उपययौ न पाण्डुसूनुश् चलति नयान् न जिगीषतां हि चेतः

nicayini lavalīlatāvikāse janayati lodhrasamīraṇe ca harṣam / vikṛtim upayayau na pāṇḍusūnuś calati nayān na jigīṣatāṃ hi cetaḥ

Sanskrit only: no published translation is held for this verse.

कतिपयसहकारपुष्परम्यस् तनुतुहिनो ऽल्पविनिद्रसिन्दुवारः । सुरभिमुखहिमागमान्तशंसी समुपययौ शिशिरः स्मरैकबन्धुः

katipayasahakārapuṣparamyas tanutuhino 'lpavinidrasinduvāraḥ / surabhimukhahimāgamāntaśaṃsī samupayayau śiśiraḥ smaraikabandhuḥ

Sanskrit only: no published translation is held for this verse.

कुसुमनगवनान्य् उपैतुकामा किसलयिनीम् अवलम्ब्य चूतयष्टिम् । क्वणदलिकुलनूपुरा निरासे नलिनवनेषु पदं वसन्तलक्ष्मीः

kusumanagavanāny upaitukāmā kisalayinīm avalambya cūtayaṣṭim / kvaṇadalikulanūpurā nirāse nalinavaneṣu padaṃ vasantalakṣmīḥ

Sanskrit only: no published translation is held for this verse.

विकसितकुसुमाधरं हसन्तीं कुरबकराजिवधूं विलोकयन्तम् । ददृशुर् इव सुराङ्गना निषण्णं सशरम् अनङ्गम् अशोकपल्लवेषु

vikasitakusumādharaṃ hasantīṃ kurabakarājivadhūṃ vilokayantam / dadṛśur iva surāṅganā niṣaṇṇaṃ saśaram anaṅgam aśokapallaveṣu

Sanskrit only: no published translation is held for this verse.

मुहुर् अनुपतता विधूयमानं विरचितसंहति दक्षिणानिलेन । अलिकुलम् अलकाकृतिं प्रपेदे नलिनमुखान्तविसर्पि पङ्कजिन्याः

muhur anupatatā vidhūyamānaṃ viracitasaṃhati dakṣiṇānilena / alikulam alakākṛtiṃ prapede nalinamukhāntavisarpi paṅkajinyāḥ

Sanskrit only: no published translation is held for this verse.

श्वसनचलितपल्लवाधरोष्ठे नवनिहितेर्ष्यम् इवावधूनयन्ती । मधुसुरभिणि षट्पदेन पुष्पे मुख इव शाललतावधूश् चुचुम्बे

śvasanacalitapallavādharoṣṭhe navanihiterṣyam ivāvadhūnayantī / madhusurabhiṇi ṣaṭpadena puṣpe mukha iva śālalatāvadhūś cucumbe

Sanskrit only: no published translation is held for this verse.

प्रभवति न तदा परो विजेतुं भवति जितेन्द्रियता यद् आत्मरक्षा । अवजितभुवनस् तथा हि लेभे सिततुरगे विजयं न पुष्पमासः

prabhavati na tadā paro vijetuṃ bhavati jitendriyatā yad ātmarakṣā / avajitabhuvanas tathā hi lebhe sitaturage vijayaṃ na puṣpamāsaḥ

Sanskrit only: no published translation is held for this verse.

कथम् इव तव संमतिर् भवित्री समम् ऋतुभिर् मुनिनावधीरितस्य । इति विरचितमल्लिकाविकासः स्मयत इव स्म मधुं निदाघकालः

katham iva tava saṃmatir bhavitrī samam ṛtubhir munināvadhīritasya / iti viracitamallikāvikāsaḥ smayata iva sma madhuṃ nidāghakālaḥ

Sanskrit only: no published translation is held for this verse.

बलवद् अपि बलं मिथोविरोधि प्रभवति नैव विपक्षनिर्जयाय । भुवनपरिभवी न यत् तदानीं तम् ऋतुगणः क्षणम् उन्मनीचकार

balavad api balaṃ mithovirodhi prabhavati naiva vipakṣanirjayāya / bhuvanaparibhavī na yat tadānīṃ tam ṛtugaṇaḥ kṣaṇam unmanīcakāra

Sanskrit only: no published translation is held for this verse.

श्रुतिसुखम् उपवीणितं सहायैर् अविरललाञ्छनहारिणश् च कालाः । अविहितहरिसूनुविक्रियाणि त्रिदशवधूषु मनोभवं वितेनुः

śrutisukham upavīṇitaṃ sahāyair aviralalāñchanahāriṇaś ca kālāḥ / avihitaharisūnuvikriyāṇi tridaśavadhūṣu manobhavaṃ vitenuḥ

Sanskrit only: no published translation is held for this verse.

न दलति निचये तथोत्पलानां न च विषमच्छदगुच्छयूथिकासु । अभिरतुम् उपलेभिरे यथासां हरितनयावयवेषु लोचनानि

na dalati nicaye tathotpalānāṃ na ca viṣamacchadagucchayūthikāsu / abhiratum upalebhire yathāsāṃ haritanayāvayaveṣu locanāni

Sanskrit only: no published translation is held for this verse.

मुनिम् अभिमुखतां निनीषवो याः समुपययुः कमनीयतागुणेन । मदनम् उपदधे स एव तासां दुरधिगमा हि गतिः प्रयोजनानाम्

munim abhimukhatāṃ ninīṣavo yāḥ samupayayuḥ kamanīyatāguṇena / madanam upadadhe sa eva tāsāṃ duradhigamā hi gatiḥ prayojanānām

Sanskrit only: no published translation is held for this verse.

प्रकृतम् अनुससार नाभिनेयं प्रविकसदङ्गुलि पाणिपल्लवं वा । प्रथमम् उपहितं विलासि चक्षुः सिततुरगे न चचाल नर्तकीनाम्

prakṛtam anusasāra nābhineyaṃ pravikasadaṅguli pāṇipallavaṃ vā / prathamam upahitaṃ vilāsi cakṣuḥ sitaturage na cacāla nartakīnām

Sanskrit only: no published translation is held for this verse.

अभिनयमनसः सुराङ्गनाया निहितम् अलक्तकवर्तनाभिताम्रम् । चरणम् अभिपपात षट्पदाली धुतनवलोहितपङ्कजाभिशङ्का

abhinayamanasaḥ surāṅganāyā nihitam alaktakavartanābhitāmram / caraṇam abhipapāta ṣaṭpadālī dhutanavalohitapaṅkajābhiśaṅkā

Sanskrit only: no published translation is held for this verse.

अविरलम् अलसेषु नर्तकीनां द्रुतपरिषिक्तम् अलक्तकं पदेषु । सवपुषाम् इव चित्तरागम् ऊहुर् नमितशिखानि कदम्बकेसराणि

aviralam alaseṣu nartakīnāṃ drutapariṣiktam alaktakaṃ padeṣu / savapuṣām iva cittarāgam ūhur namitaśikhāni kadambakesarāṇi

Sanskrit only: no published translation is held for this verse.

नृपसुतम् अभितः समन्मथायाः परिजनगात्रतिरोहिताङ्गयष्टेः । स्फुटम् अभिलषितं बभूव वध्वा वदति हि संवृतिर् एव कामितानि

nṛpasutam abhitaḥ samanmathāyāḥ parijanagātratirohitāṅgayaṣṭeḥ / sphuṭam abhilaṣitaṃ babhūva vadhvā vadati hi saṃvṛtir eva kāmitāni

Sanskrit only: no published translation is held for this verse.

अभिमुनि सहसा हृते परस्या घनमरुता जघनांशुकैकदेशे । चकितम् अवसनोरु सत्रपायाः प्रतियुवतीर् अपि विस्मयं निनाय

abhimuni sahasā hṛte parasyā ghanamarutā jaghanāṃśukaikadeśe / cakitam avasanoru satrapāyāḥ pratiyuvatīr api vismayaṃ nināya

Sanskrit only: no published translation is held for this verse.

धृतबिसवलये निधाय पाणौ मुखम् अधिरूषितपाण्डुगण्डलेखम् । नृपसुतम् अपरा स्मराभितापाद् अमधुमदालसलोचनं निदध्यौ

dhṛtabisavalaye nidhāya pāṇau mukham adhirūṣitapāṇḍugaṇḍalekham / nṛpasutam aparā smarābhitāpād amadhumadālasalocanaṃ nidadhyau

Sanskrit only: no published translation is held for this verse.

सखि दयितम् इहानयेति सा मां प्रहितवती कुसुमेषुणाभितप्ता । हृदयम् अहृदया न नाम पूर्वं भवदुपकण्ठम् उपागतं विवेद

sakhi dayitam ihānayeti sā māṃ prahitavatī kusumeṣuṇābhitaptā / hṛdayam ahṛdayā na nāma pūrvaṃ bhavadupakaṇṭham upāgataṃ viveda

Sanskrit only: no published translation is held for this verse.

चिरम् अपि कलितान्य् अपारयन्त्या परिगदितुं परिशुष्यता मुखेन । गतघृण गमितानि सत्सखीनां नयनयुगैः समम् आर्द्रतां मनांसि

ciram api kalitāny apārayantyā parigadituṃ pariśuṣyatā mukhena / gataghṛṇa gamitāni satsakhīnāṃ nayanayugaiḥ samam ārdratāṃ manāṃsi

Sanskrit only: no published translation is held for this verse.

अचकमत सपल्लवां धरित्रीं मृदुसुरभिं विरहय्य पुष्पशय्याम् । भृशम् अरतिम् अवाप्य तत्र चास्यास् तव सुखशीतम् उपैतुम् अङ्कम् इच्छा

acakamata sapallavāṃ dharitrīṃ mṛdusurabhiṃ virahayya puṣpaśayyām / bhṛśam aratim avāpya tatra cāsyās tava sukhaśītam upaitum aṅkam icchā

Sanskrit only: no published translation is held for this verse.

तद् अनघ तनुर् अस्तु सा सकामा व्रजति पुरा हि परासुतां त्वदर्थे । पुनर् अपि सुलभं तपो ऽनुरागी युवतिजनः खलु नाप्यते ऽनुरूपः

tad anagha tanur astu sā sakāmā vrajati purā hi parāsutāṃ tvadarthe / punar api sulabhaṃ tapo 'nurāgī yuvatijanaḥ khalu nāpyate 'nurūpaḥ

Sanskrit only: no published translation is held for this verse.

जहिहि कठिनतां प्रयच्छ वाचं ननु करुणामृदु मानसं मुनीनाम् । उपगतम् अवधीरयन्त्य् अभव्याः स निपुणम् एत्य कयाचिद् एवम् ऊचे

jahihi kaṭhinatāṃ prayaccha vācaṃ nanu karuṇāmṛdu mānasaṃ munīnām / upagatam avadhīrayanty abhavyāḥ sa nipuṇam etya kayācid evam ūce

Sanskrit only: no published translation is held for this verse.

सललितचलितत्रिकाभिरामाः शिरसिजसंयमनाकुलैकपाणिः । सुरपतितनये ऽपरा निरासे मनसिजजैत्रशरं विलोचनार्धम्

salalitacalitatrikābhirāmāḥ śirasijasaṃyamanākulaikapāṇiḥ / surapatitanaye 'parā nirāse manasijajaitraśaraṃ vilocanārdham

Sanskrit only: no published translation is held for this verse.

कुसुमितम् अवलम्ब्य चूतम् उच्चैस् तनुर् इभकुम्भपृथुस्तनानताङ्गी । तदभिमुखम् अनङ्गचापयष्टिर् विसृतगुणेव समुन्ननाम काचित्

kusumitam avalambya cūtam uccais tanur ibhakumbhapṛthustanānatāṅgī / tadabhimukham anaṅgacāpayaṣṭir visṛtaguṇeva samunnanāma kācit

Sanskrit only: no published translation is held for this verse.

सरभसम् अवलम्ब्य नीलम् अन्या विगलितनीवि विलोलम् अन्तरीयम् । अभिपतितुमनाः ससाध्वसेव च्युतरशनागुणसंदितावतस्थे

sarabhasam avalambya nīlam anyā vigalitanīvi vilolam antarīyam / abhipatitumanāḥ sasādhvaseva cyutaraśanāguṇasaṃditāvatasthe

Sanskrit only: no published translation is held for this verse.

यदि मनसि शमः किम् अङ्ग चापं शठ विषयास् तव वल्लभा न मुक्तिः । भवतु दिशति नान्यकामिनीभ्यस् तव हृदये हृदयेश्वरावकाशम्

yadi manasi śamaḥ kim aṅga cāpaṃ śaṭha viṣayās tava vallabhā na muktiḥ / bhavatu diśati nānyakāminībhyas tava hṛdaye hṛdayeśvarāvakāśam

Sanskrit only: no published translation is held for this verse.

इति विषमितचक्षुषाभिधाय स्फुरदधरोष्ठम् असूयया कयाचित् । अगणितगुरुमानलज्जयासौ स्वयम् उरसि श्रवणोत्पलेन जघ्ने

iti viṣamitacakṣuṣābhidhāya sphuradadharoṣṭham asūyayā kayācit / agaṇitagurumānalajjayāsau svayam urasi śravaṇotpalena jaghne

Sanskrit only: no published translation is held for this verse.

सविनयम् अपराभिसृत्य साचि स्मितसुभगैकलसत्कपोललक्ष्मीः । श्रवणनियमितेन तं निदध्य सकलम् इवासकलेन लोचनेन

savinayam aparābhisṛtya sāci smitasubhagaikalasatkapolalakṣmīḥ / śravaṇaniyamitena taṃ nidadhya sakalam ivāsakalena locanena

Sanskrit only: no published translation is held for this verse.

करुणम् अभिहितं त्रपा निरस्ता तदभिमुखं च विमुक्तम् अश्रु ताभिः । प्रकुपितम् अभिसारणे ऽनुनेतुं प्रियम् इयती ह्य् अबलाजनस्य भूमिः

karuṇam abhihitaṃ trapā nirastā tadabhimukhaṃ ca vimuktam aśru tābhiḥ / prakupitam abhisāraṇe 'nunetuṃ priyam iyatī hy abalājanasya bhūmiḥ

Sanskrit only: no published translation is held for this verse.

असकलनयनेक्षितानि लज्जा गतम् अलसं परिपाण्डुता विषादः । इति विविधम् इयाय तासु भूषां प्रभवति मण्डयितुं वधूर् अनङ्गः

asakalanayanekṣitāni lajjā gatam alasaṃ paripāṇḍutā viṣādaḥ / iti vividham iyāya tāsu bhūṣāṃ prabhavati maṇḍayituṃ vadhūr anaṅgaḥ

Sanskrit only: no published translation is held for this verse.

अलसपदमनोरमं प्रकृत्या जितकलहंसवधूगति प्रयातम् । स्थितम् उरुजघनस्थलातिभाराद् उदितपरिश्रमजिह्मितेक्षणं वा

alasapadamanoramaṃ prakṛtyā jitakalahaṃsavadhūgati prayātam / sthitam urujaghanasthalātibhārād uditapariśramajihmitekṣaṇaṃ vā

Sanskrit only: no published translation is held for this verse.

भृशकुसुमशरेषुपातमोहाद् अनवसितार्थपदाकुलो ऽभिलापः । अधिकविततलोचनं वधूनाम् अयुगपद् उन्नमितभ्रु वीक्षितं च

bhṛśakusumaśareṣupātamohād anavasitārthapadākulo 'bhilāpaḥ / adhikavitatalocanaṃ vadhūnām ayugapad unnamitabhru vīkṣitaṃ ca

Sanskrit only: no published translation is held for this verse.

रुचिकरम् अपि नार्थवद् बभूव स्तिमितसमाधिशुचौ पृथातनूजे । ज्वलयति महतां मनांस्य् अमर्षे न हि लभते ऽवसरं सुखाभिलाषः

rucikaram api nārthavad babhūva stimitasamādhiśucau pṛthātanūje / jvalayati mahatāṃ manāṃsy amarṣe na hi labhate 'vasaraṃ sukhābhilāṣaḥ

Sanskrit only: no published translation is held for this verse.

स्वयं संराध्यैवं शतमखम् अखण्डेन तपसा परोच्छित्त्या लभ्याम् अभिलषति लक्ष्मीं हरिसुते । मनोभिः सोद्वेगैः प्रणयविहतैध्वस्तरुचयः सगन्धर्मा धाम त्रिदशवनिताः स्वं प्रतिययुः

svayaṃ saṃrādhyaivaṃ śatamakham akhaṇḍena tapasā parocchittyā labhyām abhilaṣati lakṣmīṃ harisute / manobhiḥ sodvegaiḥ praṇayavihataidhvastarucayaḥ sagandharmā dhāma tridaśavanitāḥ svaṃ pratiyayuḥ

Sanskrit only: no published translation is held for this verse.