Bharavi: Kiratarjuniya 15

अथ भूतानि वार्त्रघ्न- शरेभ्यस् तत्र तत्रसुः । भेजे दिशः परित्यक्त- महेष्वासा च सा चमूः

atha bhūtāni vārtraghna- śarebhyas tatra tatrasuḥ / bheje diśaḥ parityakta- maheṣvāsā ca sā camūḥ

Sanskrit only: no published translation is held for this verse.

अपश्यद्भिर् इवेशानं रणान् निववृते गणैः । मुह्यतीव हि कृच्छ्रेषु सम्भ्रमज्वलितं मनः

apaśyadbhir iveśānaṃ raṇān nivavṛte gaṇaiḥ / muhyatīva hi kṛcchreṣu sambhramajvalitaṃ manaḥ

Sanskrit only: no published translation is held for this verse.

खण्डिताशंसया तेषां पराङ्मुखतया तया । आविवेश कृपा केतौ कृतोच्चैर्वानरं नरम्

khaṇḍitāśaṃsayā teṣāṃ parāṅmukhatayā tayā / āviveśa kṛpā ketau kṛtoccairvānaraṃ naram

Sanskrit only: no published translation is held for this verse.

आस्थाम् आलम्ब्य नीतेषु वशं क्षुद्रेष्व् अरातिषु । व्यक्तिम् आयाति महतां माहात्म्यम् अनुकम्पया

āsthām ālambya nīteṣu vaśaṃ kṣudreṣv arātiṣu / vyaktim āyāti mahatāṃ māhātmyam anukampayā

Sanskrit only: no published translation is held for this verse.

स सासिः सासुसूः सासो येयायेयाययाययः । ललौ लीलां ललो ऽलोलः शशीशशिशुशीः शशन्

sa sāsiḥ sāsusūḥ sāso yeyāyeyāyayāyayaḥ / lalau līlāṃ lalo 'lolaḥ śaśīśaśiśuśīḥ śaśan

Sanskrit only: no published translation is held for this verse.

त्रासजिह्मं यतश् चैतान् मन्दम् एवान्वियाय सः । नातिपीडयितुं भग्नान् इच्छन्ति हि महौजसः

trāsajihmaṃ yataś caitān mandam evānviyāya saḥ / nātipīḍayituṃ bhagnān icchanti hi mahaujasaḥ

Sanskrit only: no published translation is held for this verse.

अथाग्रे हसता साचि- स्थितेन स्थिरकीर्तिना । सेनान्या ते जगदिरे किंचिदायस्तचेतसा

athāgre hasatā sāci- sthitena sthirakīrtinā / senānyā te jagadire kiṃcidāyastacetasā

Sanskrit only: no published translation is held for this verse.

मा विहासिष्ट समरं समरन्तव्यसंयतः । क्षतं क्षुण्णासुरगणैर् अगणैर् इव किं यशः

mā vihāsiṣṭa samaraṃ samarantavyasaṃyataḥ / kṣataṃ kṣuṇṇāsuragaṇair agaṇair iva kiṃ yaśaḥ

Sanskrit only: no published translation is held for this verse.

विवस्वदंशुसंश्लेष- द्विगुणीकृततेजसः । अमी वो मोघम् उद्गूर्णा हसन्तीव महासयः

vivasvadaṃśusaṃśleṣa- dviguṇīkṛtatejasaḥ / amī vo mogham udgūrṇā hasantīva mahāsayaḥ

Sanskrit only: no published translation is held for this verse.

वने ऽवने वनसदां मार्गं मार्गम् उपेयुषाम् । वाणैर् बाणैः समासक्तं शङ्के ऽशं केन शाम्यति

vane 'vane vanasadāṃ mārgaṃ mārgam upeyuṣām / vāṇair bāṇaiḥ samāsaktaṃ śaṅke 'śaṃ kena śāmyati

Sanskrit only: no published translation is held for this verse.

पातितोत्तुङ्गमाहात्म्यैः संहृतायतकीर्तिभिः । गुर्वीं काम् आपदं हन्तुं कृतम् आवृत्तिसाहसम्

pātitottuṅgamāhātmyaiḥ saṃhṛtāyatakīrtibhiḥ / gurvīṃ kām āpadaṃ hantuṃ kṛtam āvṛttisāhasam

Sanskrit only: no published translation is held for this verse.

नासुरो ऽयं न वा नागो धरसंस्थो न राक्षसः । ना सुखो ऽयं नवाभोगो धरणिस्थो हि राजसः

nāsuro 'yaṃ na vā nāgo dharasaṃstho na rākṣasaḥ / nā sukho 'yaṃ navābhogo dharaṇistho hi rājasaḥ

Sanskrit only: no published translation is held for this verse.

मन्दम् अस्यन्न् इषुलतां घृणया मुनिर् एष वः । प्रणुदत्य् आगतावज्ञं जघनेषु पशून् इव

mandam asyann iṣulatāṃ ghṛṇayā munir eṣa vaḥ / praṇudaty āgatāvajñaṃ jaghaneṣu paśūn iva

Sanskrit only: no published translation is held for this verse.

न नोननुन्नो ऽनुन्नेनो न ना नानानना ननु । नुन्नो ऽनुन्नो न नुन्नेनो नानेनानुन्ननुन् न नुत्

na nonanunno 'nunneno na nā nānānanā nanu / nunno 'nunno na nunneno nānenānunnanun na nut

Sanskrit only: no published translation is held for this verse.

वरं कृतध्वस्तगुणाद् अत्यन्तम् अगुणः पुमान् । प्रकृत्या ह्य् अमणिः श्रेयान् नालंकारश् च्युतोपलः

varaṃ kṛtadhvastaguṇād atyantam aguṇaḥ pumān / prakṛtyā hy amaṇiḥ śreyān nālaṃkāraś cyutopalaḥ

Sanskrit only: no published translation is held for this verse.

स्यन्दना नो चतुरगाः सुरेभा वाविपत्तयः । स्यन्दना नो च तुरगाः सुरेभावा विपत्तयः

syandanā no caturagāḥ surebhā vāvipattayaḥ / syandanā no ca turagāḥ surebhāvā vipattayaḥ

Sanskrit only: no published translation is held for this verse.

भवद्भिर् अधुनाराति- परिहापितपौरुषैः । ह्रदैर् इवार्कनिष्पीतैः प्राप्तः पङ्को दुरुत्सहः

bhavadbhir adhunārāti- parihāpitapauruṣaiḥ / hradair ivārkaniṣpītaiḥ prāptaḥ paṅko durutsahaḥ

Sanskrit only: no published translation is held for this verse.

वेत्रशाककुजे शैले ऽलेशैजे ऽकुकशात्रवे । यात किं विदिशो जेतुं तुञ्जेशो दिवि किंतया

vetraśākakuje śaile 'leśaije 'kukaśātrave / yāta kiṃ vidiśo jetuṃ tuñjeśo divi kiṃtayā

Sanskrit only: no published translation is held for this verse.

अयं वः क्लैब्यम् आपन्नान् दृष्टपृष्ठान् अरातिना । इच्छतीशश् च्युताचारान् दारान् इव निगोपितुम्

ayaṃ vaḥ klaibyam āpannān dṛṣṭapṛṣṭhān arātinā / icchatīśaś cyutācārān dārān iva nigopitum

Sanskrit only: no published translation is held for this verse.

ननु हो मथना राघो घोरा नाथमहो नु न । तयदातवदा भीमा माभीदा बत दायत

nanu ho mathanā rāgho ghorā nāthamaho nu na / tayadātavadā bhīmā mābhīdā bata dāyata

Sanskrit only: no published translation is held for this verse.

किं त्यक्तापास्तदेवत्व- मानुष्यकपरिग्रहैः । ज्वलितान्यगुणैर् गुर्वी स्थिता तेजसि मान्यता

kiṃ tyaktāpāstadevatva- mānuṣyakaparigrahaiḥ / jvalitānyaguṇair gurvī sthitā tejasi mānyatā

Sanskrit only: no published translation is held for this verse.

निशितासिरतो ऽभीको न्येजते ऽमरणा रुचा । सारतो न विरोधी नः स्वाभासो भरवान् उत

niśitāsirato 'bhīko nyejate 'maraṇā rucā / sārato na virodhī naḥ svābhāso bharavān uta

Sanskrit only: no published translation is held for this verse.

तनुवारभसो भास्वान् अधीरो ऽविनतोरसा । चारुणा रमते जन्ये को ऽभीतो रसिताशिनि

tanuvārabhaso bhāsvān adhīro 'vinatorasā / cāruṇā ramate janye ko 'bhīto rasitāśini

Sanskrit only: no published translation is held for this verse.

निर्भिन्नपातिताश्वीय- निरुद्धरथवर्त्मनि । हतद्विपनगष्ठ्यूत- रुधिराम्बुनदाकुले

nirbhinnapātitāśvīya- niruddharathavartmani / hatadvipanagaṣṭhyūta- rudhirāmbunadākule

Sanskrit only: no published translation is held for this verse.

देवाकानिनि कावादे वाहिकास्वस्वकाहि वा । काकारेभभरे काका निस्वभव्यव्यभस्वनि

devākānini kāvāde vāhikāsvasvakāhi vā / kākārebhabhare kākā nisvabhavyavyabhasvani

Sanskrit only: no published translation is held for this verse.

प्रनृत्तशववित्रस्त- तुरगाक्षिप्तसारथौ । मारुतापूर्णतूणीर- विक्रुष्टहतसादिनि

pranṛttaśavavitrasta- turagākṣiptasārathau / mārutāpūrṇatūṇīra- vikruṣṭahatasādini

Sanskrit only: no published translation is held for this verse.

ससत्त्वरतिदे नित्यं सदरामर्षनाशिनि । त्वराधिककसन्नादे रमकत्वम् अकर्षति

sasattvaratide nityaṃ sadarāmarṣanāśini / tvarādhikakasannāde ramakatvam akarṣati

Sanskrit only: no published translation is held for this verse.

आसुरे लोकवित्रास- विधायिनि महाहवे । युष्माभिर् उन्नतिं नीतं निरस्तम् इह पौरुषम्

āsure lokavitrāsa- vidhāyini mahāhave / yuṣmābhir unnatiṃ nītaṃ nirastam iha pauruṣam

Sanskrit only: no published translation is held for this verse.

इति शासति सेनान्यां गच्छतस् तान् अनेकधा । निषिध्य हसता किंचित् तत्र तस्थे ऽन्धकारिणा

iti śāsati senānyāṃ gacchatas tān anekadhā / niṣidhya hasatā kiṃcit tatra tasthe 'ndhakāriṇā

Sanskrit only: no published translation is held for this verse.

मुनीषुदहनातप्तांल् लज्जया निविवृत्सतः । शिवः प्रह्लादयामास तान् निषेधहिमाम्बुना

munīṣudahanātaptāṃl lajjayā nivivṛtsataḥ / śivaḥ prahlādayāmāsa tān niṣedhahimāmbunā

Sanskrit only: no published translation is held for this verse.

दूनास् ते ऽरिबलाद् ऊना निरेभा बहु मेनिरे । भीताः शितशराभीताः शंकरं तत्र शंकरम्

dūnās te 'ribalād ūnā nirebhā bahu menire / bhītāḥ śitaśarābhītāḥ śaṃkaraṃ tatra śaṃkaram

Sanskrit only: no published translation is held for this verse.

महेषुजलधौ शत्रोर् वर्तमाना दुरुत्तरे । प्राप्य पारम् इवेशानम् आशश्वास पताकिनी

maheṣujaladhau śatror vartamānā duruttare / prāpya pāram iveśānam āśaśvāsa patākinī

Sanskrit only: no published translation is held for this verse.

स बभार रणापेतां चमूं पश्चाद् अवस्थिताम् । पुरः सूर्याद् उपावृत्तां छायाम् इव महातरुः

sa babhāra raṇāpetāṃ camūṃ paścād avasthitām / puraḥ sūryād upāvṛttāṃ chāyām iva mahātaruḥ

Sanskrit only: no published translation is held for this verse.

मुञ्चतीशे शराञ् जिष्णौ पिनाकस्वनपूरितः । दध्वान ध्वनयन्न् आशाः स्फुटन्न् इव धराधरः

muñcatīśe śarāñ jiṣṇau pinākasvanapūritaḥ / dadhvāna dhvanayann āśāḥ sphuṭann iva dharādharaḥ

Sanskrit only: no published translation is held for this verse.

तद्गणा ददृशुर् भीमं चित्रसंस्था इवाचलाः । विस्मयेन तयोर् युद्धं चित्रसंस्था इवाचलाः

tadgaṇā dadṛśur bhīmaṃ citrasaṃsthā ivācalāḥ / vismayena tayor yuddhaṃ citrasaṃsthā ivācalāḥ

Sanskrit only: no published translation is held for this verse.

परिमोहयमाणेन शिक्षालाघवलीलया । जैष्णवी विशिखश्रेणी परिजह्रे पिनाकिना

parimohayamāṇena śikṣālāghavalīlayā / jaiṣṇavī viśikhaśreṇī parijahre pinākinā

Sanskrit only: no published translation is held for this verse.

अवद्यन् पत्रिणः शम्भोः सायकैर् अवसायकैः । पाण्डवः परिचक्राम शिक्षया रणशिक्षया

avadyan patriṇaḥ śambhoḥ sāyakair avasāyakaiḥ / pāṇḍavaḥ paricakrāma śikṣayā raṇaśikṣayā

Sanskrit only: no published translation is held for this verse.

चारचुञ्चुश् चिरारेची चञ्चच्चीररुचा रुचः । चचार रुचिरश् चारु चारैर् आचारचञ्चुरः

cāracuñcuś cirārecī cañcaccīrarucā rucaḥ / cacāra ruciraś cāru cārair ācāracañcuraḥ

Sanskrit only: no published translation is held for this verse.

स्फुरत्पिशङ्गमौर्वीकं धुनानः स बृहद्धनुः । धृतोल्कानलयोगेन तुल्यम् अंशुमता बभौ

sphuratpiśaṅgamaurvīkaṃ dhunānaḥ sa bṛhaddhanuḥ / dhṛtolkānalayogena tulyam aṃśumatā babhau

Sanskrit only: no published translation is held for this verse.

पार्थबाणाः पशुपतेर् आवव्रुर् विशिखावलिम् । पयोमुच इवारन्ध्राः सावित्रीम् अंशुसंहतिम्

pārthabāṇāḥ paśupater āvavrur viśikhāvalim / payomuca ivārandhrāḥ sāvitrīm aṃśusaṃhatim

Sanskrit only: no published translation is held for this verse.

शरवृष्टिं विधूयोर्वीम् उदस्तां सव्यसाचिना । रुरोध मार्गणैर् मार्गं तपनस्य त्रिलोचनः

śaravṛṣṭiṃ vidhūyorvīm udastāṃ savyasācinā / rurodha mārgaṇair mārgaṃ tapanasya trilocanaḥ

Sanskrit only: no published translation is held for this verse.

तेन व्यातेनिरे भीमा भीमार्जनफलाननाः । न नानुकम्प्य विशिखाः शिखाधरजवाससः

tena vyātenire bhīmā bhīmārjanaphalānanāḥ / na nānukampya viśikhāḥ śikhādharajavāsasaḥ

Sanskrit only: no published translation is held for this verse.

द्युवियद्गामिनी तार- संरावविहतश्रुतिः । हैमीषुमाला शुशुभे विद्युताम् इव संहतिः

dyuviyadgāminī tāra- saṃrāvavihataśrutiḥ / haimīṣumālā śuśubhe vidyutām iva saṃhatiḥ

Sanskrit only: no published translation is held for this verse.

विलङ्घ्य पत्रिणां पङ्क्तिं भिन्नः शिवशिलीमुखैः । ज्यायो वीर्यं समाश्रित्य न चकम्पे कपिध्वजः

vilaṅghya patriṇāṃ paṅktiṃ bhinnaḥ śivaśilīmukhaiḥ / jyāyo vīryaṃ samāśritya na cakampe kapidhvajaḥ

Sanskrit only: no published translation is held for this verse.

जगतीशरणे युक्तो हरिकान्तः सुधासितः । दानवर्षीकृताशंसो नागराज इवाबभौ

jagatīśaraṇe yukto harikāntaḥ sudhāsitaḥ / dānavarṣīkṛtāśaṃso nāgarāja ivābabhau

Sanskrit only: no published translation is held for this verse.

विफलीकृतयत्नस्य क्षतबाणस्य शम्भुना । गाण्डीवधन्वनः खेभ्यो निश्चचार हुताशनः

viphalīkṛtayatnasya kṣatabāṇasya śambhunā / gāṇḍīvadhanvanaḥ khebhyo niścacāra hutāśanaḥ

Sanskrit only: no published translation is held for this verse.

स पिशङ्गजटावलिः किरन्न् उरुतेजः परमेण मन्युना । ज्वलितौषधिजातवेदसा हिमशैलेन समं विदिद्युते

sa piśaṅgajaṭāvaliḥ kirann urutejaḥ parameṇa manyunā / jvalitauṣadhijātavedasā himaśailena samaṃ vididyute

Sanskrit only: no published translation is held for this verse.

शतशो विशिखान् अवद्यते भृशम् अस्मै रणवेगशालिने । प्रथयन्न् अनिवार्यवीर्यतां प्रजिगायेषुम् अघातुकं शिवः

śataśo viśikhān avadyate bhṛśam asmai raṇavegaśāline / prathayann anivāryavīryatāṃ prajigāyeṣum aghātukaṃ śivaḥ

Sanskrit only: no published translation is held for this verse.

शम्भो धनुर्मण्डलतः प्रवृत्तं तं मण्डलाद् अंशुम् इवांशुभर्तुः । निवारयिष्यन् विदधे सिताश्वः शिलीमुखच्छायवृतां धरित्रीम्

śambho dhanurmaṇḍalataḥ pravṛttaṃ taṃ maṇḍalād aṃśum ivāṃśubhartuḥ / nivārayiṣyan vidadhe sitāśvaḥ śilīmukhacchāyavṛtāṃ dharitrīm

Sanskrit only: no published translation is held for this verse.

घनं विदार्यार्जुनबाणपूगं ससारबाणो ऽयुग् अलोचनस्य । घनं विदार्यार्जुनबाणपूगं ससार बाणो ऽयुगलोचनस्य

ghanaṃ vidāryārjunabāṇapūgaṃ sasārabāṇo 'yug alocanasya / ghanaṃ vidāryārjunabāṇapūgaṃ sasāra bāṇo 'yugalocanasya

Sanskrit only: no published translation is held for this verse.

रुजन् परेषून् बहुधाशुपातिनो मुहुः शरौघैर् अपवारयन् दिशः । चलाचलो ऽनेक इव क्रियावशान् महर्षिसंघैर् बुबुधे धनंजयः

rujan pareṣūn bahudhāśupātino muhuḥ śaraughair apavārayan diśaḥ / calācalo 'neka iva kriyāvaśān maharṣisaṃghair bubudhe dhanaṃjayaḥ

Sanskrit only: no published translation is held for this verse.

विकाशम् ईयुर् जगतीशमार्गणा विकाशम् ईयुर् जगतीशमार्गणाः । विकाशम् ईयुर् जगतीशमार्गणा विकाशम् ईयुर् जगतीशमार्गणाः

vikāśam īyur jagatīśamārgaṇā vikāśam īyur jagatīśamārgaṇāḥ / vikāśam īyur jagatīśamārgaṇā vikāśam īyur jagatīśamārgaṇāḥ

Sanskrit only: no published translation is held for this verse.

सम्पश्यताम् इति शिवेन वितायमानं लक्ष्मीवतः क्षितिपतेस् तनयस्य वीर्यम् । अङ्गान्य् अभिन्नम् अपि तत्त्वविदां मुनीनां रोमाञ्चम् अञ्चिततरं बिभराम्बभूवुः

sampaśyatām iti śivena vitāyamānaṃ lakṣmīvataḥ kṣitipates tanayasya vīryam / aṅgāny abhinnam api tattvavidāṃ munīnāṃ romāñcam añcitataraṃ bibharāmbabhūvuḥ

Sanskrit only: no published translation is held for this verse.