Bharavi: Kiratarjuniya 16

ततः किराताधिपतेर् अलघ्वीम् आजिक्रियां वीक्ष्य विवृद्धमन्युः । स तर्कयामास विविक्ततर्कश् चिरं विचिन्वन्न् इति कारणानि

tataḥ kirātādhipater alaghvīm ājikriyāṃ vīkṣya vivṛddhamanyuḥ / sa tarkayāmāsa viviktatarkaś ciraṃ vicinvann iti kāraṇāni

Sanskrit only: no published translation is held for this verse.

मदस्रुतिश्यामितगण्डलेखाः क्रामन्ति विक्रान्तनराधिरूढाः । सहिष्णवो नेह युधाम् अभिज्ञा नागा नगोच्छ्रायम् इवाक्षिपन्तः

madasrutiśyāmitagaṇḍalekhāḥ krāmanti vikrāntanarādhirūḍhāḥ / sahiṣṇavo neha yudhām abhijñā nāgā nagocchrāyam ivākṣipantaḥ

Sanskrit only: no published translation is held for this verse.

विचित्रया चित्रयतेव भिन्नां रुचं रवेः केतनरत्नभासा । महारथौघेन न संनिरुद्धाः पयोदमन्द्रध्वनिना धरित्री

vicitrayā citrayateva bhinnāṃ rucaṃ raveḥ ketanaratnabhāsā / mahārathaughena na saṃniruddhāḥ payodamandradhvaninā dharitrī

Sanskrit only: no published translation is held for this verse.

समुल्लसत्प्रासमहोर्मिमालं परिस्फुरच्चामरफेनपङ्क्ति । विभिन्नमर्यादम् इहातनोति नाश्वीयम् आशा जलधेर् इवाम्भः

samullasatprāsamahormimālaṃ parisphuraccāmaraphenapaṅkti / vibhinnamaryādam ihātanoti nāśvīyam āśā jaladher ivāmbhaḥ

Sanskrit only: no published translation is held for this verse.

हताहतेत्य् उद्धतभीष्मघोषैः समुज्झिता योद्धृभिर् अभ्यमित्रम् । न हेतयः प्राप्ततडित्त्विषः खे विवस्वदंशुज्वलिताः पतन्ति

hatāhatety uddhatabhīṣmaghoṣaiḥ samujjhitā yoddhṛbhir abhyamitram / na hetayaḥ prāptataḍittviṣaḥ khe vivasvadaṃśujvalitāḥ patanti

Sanskrit only: no published translation is held for this verse.

अभ्यायतः संततधूमधूम्रं व्यापि प्रभाजालम् इवान्तकस्य । रजः प्रतूर्णाश्वरथाङ्गनुन्नं तनोति न व्योमनि मातरिश्वा

abhyāyataḥ saṃtatadhūmadhūmraṃ vyāpi prabhājālam ivāntakasya / rajaḥ pratūrṇāśvarathāṅganunnaṃ tanoti na vyomani mātariśvā

Sanskrit only: no published translation is held for this verse.

भूरेणुना रासभधूसरेण तिरोहिते वर्त्मनि लोचनानाम् । नास्त्य् अत्र तेजस्विभिर् उत्सुकानाम् अह्नि प्रदोषः सुरसुन्दरीणाम्

bhūreṇunā rāsabhadhūsareṇa tirohite vartmani locanānām / nāsty atra tejasvibhir utsukānām ahni pradoṣaḥ surasundarīṇām

Sanskrit only: no published translation is held for this verse.

रथाङ्गसंक्रीडितम् अश्वहेषा बृहन्ति मत्तद्विपबृंहितानि । संघर्षयोगाद् इव मूर्छितानि ह्रादं निगृह्णन्ति न दुन्दुभीनाम्

rathāṅgasaṃkrīḍitam aśvaheṣā bṛhanti mattadvipabṛṃhitāni / saṃgharṣayogād iva mūrchitāni hrādaṃ nigṛhṇanti na dundubhīnām

Sanskrit only: no published translation is held for this verse.

अस्मिन् यशःपौरुषलोलुपानाम् अरातिभिः प्रत्युरसं क्षतानाम् । मूर्छान्तरायं मुहुर् उच्छिनत्ति नासारशीतं करिशीकराम्भः

asmin yaśaḥpauruṣalolupānām arātibhiḥ pratyurasaṃ kṣatānām / mūrchāntarāyaṃ muhur ucchinatti nāsāraśītaṃ kariśīkarāmbhaḥ

Sanskrit only: no published translation is held for this verse.

असृङ्नदीनाम् उपचीयमानैर् विदारयद्भिः पदवीं ध्वजिन्याः । उच्छ्रायम् आयान्ति न शोणितौघैः पङ्कैर् इवाश्यानघनैस् तटानि

asṛṅnadīnām upacīyamānair vidārayadbhiḥ padavīṃ dhvajinyāḥ / ucchrāyam āyānti na śoṇitaughaiḥ paṅkair ivāśyānaghanais taṭāni

Sanskrit only: no published translation is held for this verse.

परिक्षते वक्षसि दन्तिदन्तैः प्रियाङ्कशीता नभसः पतन्ती । नेह प्रमोहं प्रियसाहसानां मन्दारमाला विरलीकरोति

parikṣate vakṣasi dantidantaiḥ priyāṅkaśītā nabhasaḥ patantī / neha pramohaṃ priyasāhasānāṃ mandāramālā viralīkaroti

Sanskrit only: no published translation is held for this verse.

निषादिसंनाहमणिप्रभौघे परीयमाणे करिशीकरेण । अर्कत्विषोन्मीलितम् अभ्युदेति न खण्डम् आखण्डलकार्मुकस्य

niṣādisaṃnāhamaṇiprabhaughe parīyamāṇe kariśīkareṇa / arkatviṣonmīlitam abhyudeti na khaṇḍam ākhaṇḍalakārmukasya

Sanskrit only: no published translation is held for this verse.

महीभृता पक्षवतेव भिन्ना विगाह्य मध्यं परवारणेन । नावर्तमाना निनदन्ति भीमम् अपां निधेर् आप इव ध्वजिन्यः

mahībhṛtā pakṣavateva bhinnā vigāhya madhyaṃ paravāraṇena / nāvartamānā ninadanti bhīmam apāṃ nidher āpa iva dhvajinyaḥ

Sanskrit only: no published translation is held for this verse.

महारथानां प्रतिदन्त्यनीकम् अधिस्यदस्यन्दनम् उत्थितानाम् । आमूललूनैर् अतिमन्युनेव मातङ्गहस्तैर् व्रियते न पन्थाः

mahārathānāṃ pratidantyanīkam adhisyadasyandanam utthitānām / āmūlalūnair atimanyuneva mātaṅgahastair vriyate na panthāḥ

Sanskrit only: no published translation is held for this verse.

धृतोत्पलापीड इव प्रियायाः शिरोरुहाणां शिथिलः कलापः । न बर्हभारः पतितस्य शङ्कोर् निषादिवक्षःस्थलम् आतनोति

dhṛtotpalāpīḍa iva priyāyāḥ śiroruhāṇāṃ śithilaḥ kalāpaḥ / na barhabhāraḥ patitasya śaṅkor niṣādivakṣaḥsthalam ātanoti

Sanskrit only: no published translation is held for this verse.

उज्झत्सु संहार इवास्तसंख्यम् अह्नाय तेजस्विषु जीवितानि । लोकत्रयास्वादनलोलजिह्वं न व्याददात्य् आननम् अत्र मृत्युः

ujjhatsu saṃhāra ivāstasaṃkhyam ahnāya tejasviṣu jīvitāni / lokatrayāsvādanalolajihvaṃ na vyādadāty ānanam atra mṛtyuḥ

Sanskrit only: no published translation is held for this verse.

इयं च दुर्वारमहारथानाम् आक्षिप्य वीर्यं महतां बलानाम् । शक्तिर् ममावस्यति हीनयुद्धे सौरीव ताराधिपधाम्नि दीप्तिः

iyaṃ ca durvāramahārathānām ākṣipya vīryaṃ mahatāṃ balānām / śaktir mamāvasyati hīnayuddhe saurīva tārādhipadhāmni dīptiḥ

Sanskrit only: no published translation is held for this verse.

माया स्विद् एषा मतिविभ्रमो वा ध्वस्तं नु मे वीर्यम् उताहम् अन्यः । गाण्डीवमुक्ता हि यथा पुरा मे पराक्रमन्ते न शराः किराते

māyā svid eṣā mativibhramo vā dhvastaṃ nu me vīryam utāham anyaḥ / gāṇḍīvamuktā hi yathā purā me parākramante na śarāḥ kirāte

Sanskrit only: no published translation is held for this verse.

पुंसः पदं मध्यमम् उत्तमस्य द्विधेव कुर्वन् धनुषः प्रणादैः । नूनं तथा नैषा यथास्य वेषः प्रच्छन्नम् अप्य् ऊहयते हि चेष्टा

puṃsaḥ padaṃ madhyamam uttamasya dvidheva kurvan dhanuṣaḥ praṇādaiḥ / nūnaṃ tathā naiṣā yathāsya veṣaḥ pracchannam apy ūhayate hi ceṣṭā

Sanskrit only: no published translation is held for this verse.

धनुः प्रबन्धध्वनितं रुषेव सकृद् विकृष्टा विततेव मौर्वी । संधानम् उत्कर्षम् इव व्युदस्य मुष्टेर् असम्भेद इवापवर्गे

dhanuḥ prabandhadhvanitaṃ ruṣeva sakṛd vikṛṣṭā vitateva maurvī / saṃdhānam utkarṣam iva vyudasya muṣṭer asambheda ivāpavarge

Sanskrit only: no published translation is held for this verse.

अंसाव् अवष्टब्धनतौ समाधिः शिरोधराया रहितप्रयासः । धृता विकारांस् त्यजता मुखेन प्रसादलक्ष्मीः शशलाञ्छनस्य

aṃsāv avaṣṭabdhanatau samādhiḥ śirodharāyā rahitaprayāsaḥ / dhṛtā vikārāṃs tyajatā mukhena prasādalakṣmīḥ śaśalāñchanasya

Sanskrit only: no published translation is held for this verse.

प्रहीयते कार्यवशागतेषु स्थानेषु विष्टब्धतया न देहः । स्थितप्रयातेषु ससौष्ठवश् च लक्ष्येषु पातः सदृशः शराणाम्

prahīyate kāryavaśāgateṣu sthāneṣu viṣṭabdhatayā na dehaḥ / sthitaprayāteṣu sasauṣṭhavaś ca lakṣyeṣu pātaḥ sadṛśaḥ śarāṇām

Sanskrit only: no published translation is held for this verse.

परस्य भूयान् विवरे ऽभियोगः प्रसह्य संरक्षणम् आत्मरन्ध्रे । भीष्मे ऽप्य् असम्भाव्यम् इदं गुरौ वा न सम्भवत्य् एव वनेचरेषु

parasya bhūyān vivare 'bhiyogaḥ prasahya saṃrakṣaṇam ātmarandhre / bhīṣme 'py asambhāvyam idaṃ gurau vā na sambhavaty eva vanecareṣu

Sanskrit only: no published translation is held for this verse.

अप्राकृतस्याहवदुर्मदस्य निवार्यम् अस्यास्त्रबलेन वीर्यम् । अल्पीयसो ऽप्य् आमयतुल्यवृत्तेर् महापकाराय रिपोर् विवृद्धिः

aprākṛtasyāhavadurmadasya nivāryam asyāstrabalena vīryam / alpīyaso 'py āmayatulyavṛtter mahāpakārāya ripor vivṛddhiḥ

Sanskrit only: no published translation is held for this verse.

स सम्प्रधार्यैवम् अहार्यसारः सारं विनेष्यन् सगणस्य शत्रोः । प्रस्वापनास्त्रं द्रुतम् आजहार ध्वान्तं घनानद्ध इवार्धरात्रः

sa sampradhāryaivam ahāryasāraḥ sāraṃ vineṣyan sagaṇasya śatroḥ / prasvāpanāstraṃ drutam ājahāra dhvāntaṃ ghanānaddha ivārdharātraḥ

Sanskrit only: no published translation is held for this verse.

प्रसक्तदावानलधूमधूम्रा निरुन्धती धाम सहस्ररश्मेः । महावनानीव महातमिस्रा छाया ततानेशबलानि काली

prasaktadāvānaladhūmadhūmrā nirundhatī dhāma sahasraraśmeḥ / mahāvanānīva mahātamisrā chāyā tatāneśabalāni kālī

Sanskrit only: no published translation is held for this verse.

आसादिता तत्प्रथमं प्रसह्य प्रगल्भतायाः पदवीं हरन्ती । सभेव भीमा विदधे गणानां निद्रा निरासं प्रतिभागुणस्य

āsāditā tatprathamaṃ prasahya pragalbhatāyāḥ padavīṃ harantī / sabheva bhīmā vidadhe gaṇānāṃ nidrā nirāsaṃ pratibhāguṇasya

Sanskrit only: no published translation is held for this verse.

गुरुस्थिराण्य् उत्तमवंशजत्वाद् विज्ञातसाराण्य् अनुशीलनेन । केचित् समाश्रित्य गुणान् वितानि सुहृत्कुलानीव धनूंषि तस्थुः

gurusthirāṇy uttamavaṃśajatvād vijñātasārāṇy anuśīlanena / kecit samāśritya guṇān vitāni suhṛtkulānīva dhanūṃṣi tasthuḥ

Sanskrit only: no published translation is held for this verse.

कृतान्तदुर्वृत्त इवापरेषां पुरः प्रतिद्वन्द्विनि पाण्डवास्त्रे । अतर्कितं पाणितलान् निपेतुः क्रियाफलानीव तदायुधानि

kṛtāntadurvṛtta ivāpareṣāṃ puraḥ pratidvandvini pāṇḍavāstre / atarkitaṃ pāṇitalān nipetuḥ kriyāphalānīva tadāyudhāni

Sanskrit only: no published translation is held for this verse.

अंसस्थलैः केचिद् अभिन्नधैर्याः स्कन्धेषु संश्लेषवतां तरूणाम् । मदेन मीलन्नयनाः सलीलं नागा इव स्रस्तकरा निषेदुः

aṃsasthalaiḥ kecid abhinnadhairyāḥ skandheṣu saṃśleṣavatāṃ tarūṇām / madena mīlannayanāḥ salīlaṃ nāgā iva srastakarā niṣeduḥ

Sanskrit only: no published translation is held for this verse.

तिरोहितेन्दोर् अथ शम्भुमूर्ध्नः प्रणम्यमानं तपसां निवासैः । सुमेरुशृङ्गाद् इव बिम्बम् आर्कं पिशङ्गम् उच्चैर् उदियाय तेजः

tirohitendor atha śambhumūrdhnaḥ praṇamyamānaṃ tapasāṃ nivāsaiḥ / sumeruśṛṅgād iva bimbam ārkaṃ piśaṅgam uccair udiyāya tejaḥ

Sanskrit only: no published translation is held for this verse.

छायां विनिर्धूय तमोमयीं तां तत्त्वस्य संवित्तिर् इवापविद्याम् । ययौ विकासं द्युतिर् इन्दुमौलेर् आलोकम् अभ्यादिशती गणेभ्यः

chāyāṃ vinirdhūya tamomayīṃ tāṃ tattvasya saṃvittir ivāpavidyām / yayau vikāsaṃ dyutir indumauler ālokam abhyādiśatī gaṇebhyaḥ

Sanskrit only: no published translation is held for this verse.

त्विषां ततिः पाटलिताम्बुवाहा सा सर्वतः पूर्वसरीव संध्या । निनाय तेषां द्रुतम् उल्लसन्ती विनिद्रतां लोचनपङ्कजानि

tviṣāṃ tatiḥ pāṭalitāmbuvāhā sā sarvataḥ pūrvasarīva saṃdhyā / nināya teṣāṃ drutam ullasantī vinidratāṃ locanapaṅkajāni

Sanskrit only: no published translation is held for this verse.

पृथग्विधान्य् अस्त्रविरामबुद्धाः शस्त्राणि भूयः प्रतिपेदिरे ते । मुक्ता वितानेन बलाहकानां ज्योतींषि रम्या इव दिग्विभागाः

pṛthagvidhāny astravirāmabuddhāḥ śastrāṇi bhūyaḥ pratipedire te / muktā vitānena balāhakānāṃ jyotīṃṣi ramyā iva digvibhāgāḥ

Sanskrit only: no published translation is held for this verse.

द्यौर् उन्ननामेव दिशः प्रसेदुः स्फुटं विसस्रे सवितुर् मयूखैः । क्षयं गतायाम् इव यामवत्यां पुनः समीयाय दिनं दिनश्रीः

dyaur unnanāmeva diśaḥ praseduḥ sphuṭaṃ visasre savitur mayūkhaiḥ / kṣayaṃ gatāyām iva yāmavatyāṃ punaḥ samīyāya dinaṃ dinaśrīḥ

Sanskrit only: no published translation is held for this verse.

महास्त्रदुर्गे शिथिलप्रयत्नं दिग्वारणेनेव परेण रुग्णे । भुजङ्गपाशान् भुजवीर्यशाली प्रबन्धनाय प्रजिघाय जिष्णुः

mahāstradurge śithilaprayatnaṃ digvāraṇeneva pareṇa rugṇe / bhujaṅgapāśān bhujavīryaśālī prabandhanāya prajighāya jiṣṇuḥ

Sanskrit only: no published translation is held for this verse.

जिह्वाशतान्य् उल्लसयन्त्य् अजस्रं लसत्तडिल्लोलविषानलानि । त्रासान् निरस्तां भुजगेन्द्रसेना नभश्चरैस् तत्पदवीं विवव्रे

jihvāśatāny ullasayanty ajasraṃ lasattaḍillolaviṣānalāni / trāsān nirastāṃ bhujagendrasenā nabhaścarais tatpadavīṃ vivavre

Sanskrit only: no published translation is held for this verse.

दिङ्नागहस्ताकृतिम् उद्वहद्भिर् भोगैः प्रशस्तासितरत्ननीलैः । रराज सर्पावलिर् उल्लसन्ती तरङ्गमालेव नभोर्णवस्य

diṅnāgahastākṛtim udvahadbhir bhogaiḥ praśastāsitaratnanīlaiḥ / rarāja sarpāvalir ullasantī taraṅgamāleva nabhorṇavasya

Sanskrit only: no published translation is held for this verse.

निःश्वासधूमैः स्थगितांशुजालं फणावताम् उत्फणमण्डलानाम् । गच्छन्न् इवास्तं वपुर् अभ्युवाह विलोचनानां सुखम् उष्णरश्मिः

niḥśvāsadhūmaiḥ sthagitāṃśujālaṃ phaṇāvatām utphaṇamaṇḍalānām / gacchann ivāstaṃ vapur abhyuvāha vilocanānāṃ sukham uṣṇaraśmiḥ

Sanskrit only: no published translation is held for this verse.

प्रतप्तचामीकरभासुरेण दिशः प्रकाशेन पिशङ्गयन्त्यः । निश्चक्रमुः प्राणहरेक्षणानां ज्वाला महोल्का इव लोचनेभ्यः

prataptacāmīkarabhāsureṇa diśaḥ prakāśena piśaṅgayantyaḥ / niścakramuḥ prāṇaharekṣaṇānāṃ jvālā maholkā iva locanebhyaḥ

Sanskrit only: no published translation is held for this verse.

आक्षिप्तसम्पातम् अपेतशोभम् उद्वह्नि धूमाक्कुलदिग्विभागम् । वृतं नभो भोगिकुलैर् अवस्थां परोपरुद्धस्य पुरस्य भेजे

ākṣiptasampātam apetaśobham udvahni dhūmākkuladigvibhāgam / vṛtaṃ nabho bhogikulair avasthāṃ paroparuddhasya purasya bheje

Sanskrit only: no published translation is held for this verse.

तम् आशु चक्षुःश्रवसां समूहं मन्त्रेण तार्क्ष्योदयकारणेन । नेता नयेनेव परोपजापं निवारयामास पतिः पशूनाम्

tam āśu cakṣuḥśravasāṃ samūhaṃ mantreṇa tārkṣyodayakāraṇena / netā nayeneva paropajāpaṃ nivārayāmāsa patiḥ paśūnām

Sanskrit only: no published translation is held for this verse.

प्रतिघ्नतीभिः कृतमीलितानि द्युलोकभाजाम् अपि लोचनानि । गरुत्मता संहतिभिर् विहायः क्षणप्रकाशाभिर् इवावतेने

pratighnatībhiḥ kṛtamīlitāni dyulokabhājām api locanāni / garutmatā saṃhatibhir vihāyaḥ kṣaṇaprakāśābhir ivāvatene

Sanskrit only: no published translation is held for this verse.

ततः सुपर्णव्रजपक्षजन्मा नानागतिर् मण्डलयञ् जवेन । जरत्तृणानीव वियन् निनाय वनस्पतीनां गहनानि वायुः

tataḥ suparṇavrajapakṣajanmā nānāgatir maṇḍalayañ javena / jarattṛṇānīva viyan nināya vanaspatīnāṃ gahanāni vāyuḥ

Sanskrit only: no published translation is held for this verse.

मनःशिलाभङ्गनिभेन पश्चान् निरुध्यमानं निकरेण भासाम् । व्यूढैर् उरोभिश् च विनुद्यमानं नभः ससर्पेव पुरः खगानाम्

manaḥśilābhaṅganibhena paścān nirudhyamānaṃ nikareṇa bhāsām / vyūḍhair urobhiś ca vinudyamānaṃ nabhaḥ sasarpeva puraḥ khagānām

Sanskrit only: no published translation is held for this verse.

दरीमुखैर् आसवरागताम्रं विकासि रुक्मच्छदधाम पीत्वा । जवानिलाघूर्णितसानुजालो हिमाचलः क्षीब इवाचकम्पे

darīmukhair āsavarāgatāmraṃ vikāsi rukmacchadadhāma pītvā / javānilāghūrṇitasānujālo himācalaḥ kṣība ivācakampe

Sanskrit only: no published translation is held for this verse.

प्रवृत्तनक्तंदिवसंधिदीप्तैर् नभस्तलं गां च पिशङ्गयष्टिः । अन्तर्हितार्कैः परितः पतद्भिश् छायाः समाचिक्षिपिरे वनानाम्

pravṛttanaktaṃdivasaṃdhidīptair nabhastalaṃ gāṃ ca piśaṅgayaṣṭiḥ / antarhitārkaiḥ paritaḥ patadbhiś chāyāḥ samācikṣipire vanānām

Sanskrit only: no published translation is held for this verse.

स भोगसंघः शमम् उग्रधाम्नां सैन्येन निन्ये विनतासुतानाम् । महाध्वरे विध्यपचारदोषः कर्मान्तरेणेव महोदयेन

sa bhogasaṃghaḥ śamam ugradhāmnāṃ sainyena ninye vinatāsutānām / mahādhvare vidhyapacāradoṣaḥ karmāntareṇeva mahodayena

Sanskrit only: no published translation is held for this verse.

साफल्यम् अस्त्रे रिपुपौरुषस्य कृत्वा गते भाग्य इअवापवर्गम् । अनिन्धनस्य प्रसभं समन्युः समाददे ऽस्त्रं ज्वलनस्य जिष्णुः

sāphalyam astre ripupauruṣasya kṛtvā gate bhāgya iavāpavargam / anindhanasya prasabhaṃ samanyuḥ samādade 'straṃ jvalanasya jiṣṇuḥ

Sanskrit only: no published translation is held for this verse.

ऊर्ध्वं तिरश्चीनम् अधश् च कीर्णैर् ज्वालासटैर् लङ्घितमेघपङ्क्तिः । आयस्तसिंहाकृतिर् उत्पपात प्राण्यन्तम् इच्छन्न् इव जातवेदाः

ūrdhvaṃ tiraścīnam adhaś ca kīrṇair jvālāsaṭair laṅghitameghapaṅktiḥ / āyastasiṃhākṛtir utpapāta prāṇyantam icchann iva jātavedāḥ

Sanskrit only: no published translation is held for this verse.

भित्त्वेव भाभिः सवितुर् मयूखाञ् जज्वाल विष्वग् विसृतस्फुलिङ्गः । विदीर्यमाणाश्मनिनादधीरं ध्वनिं वितन्वन्न् अकृशः कृशानुः

bhittveva bhābhiḥ savitur mayūkhāñ jajvāla viṣvag visṛtasphuliṅgaḥ / vidīryamāṇāśmaninādadhīraṃ dhvaniṃ vitanvann akṛśaḥ kṛśānuḥ

Sanskrit only: no published translation is held for this verse.

चयान् इवाद्रीन् इव तुङ्गशृङ्गान् क्वचित् पुराणीव हिरण्मयानि । महावनानीव च किंशुकानाम् अत्तान वह्निः पवनानुवृत्त्या

cayān ivādrīn iva tuṅgaśṛṅgān kvacit purāṇīva hiraṇmayāni / mahāvanānīva ca kiṃśukānām attāna vahniḥ pavanānuvṛttyā

Sanskrit only: no published translation is held for this verse.

मुहुश् चलत्पल्लवलोहिनीभिर् उच्चैः शिखाभिः शिखिनो ऽवलीढाः । तलेषु मुक्ताविशदा बभूवुः सान्द्राञ्ज्जनश्यामरुचः पयोदाः

muhuś calatpallavalohinībhir uccaiḥ śikhābhiḥ śikhino 'valīḍhāḥ / taleṣu muktāviśadā babhūvuḥ sāndrāñjjanaśyāmarucaḥ payodāḥ

Sanskrit only: no published translation is held for this verse.

लिलिक्षतीव क्षयकालरौद्रे लोकं विलोलार्चिषि रोहिताश्वे । पिनाकिना हूतमहाम्बुवाहम् अस्त्रं पुनः पाशभृतः प्रणिन्ये

lilikṣatīva kṣayakālaraudre lokaṃ vilolārciṣi rohitāśve / pinākinā hūtamahāmbuvāham astraṃ punaḥ pāśabhṛtaḥ praṇinye

Sanskrit only: no published translation is held for this verse.

ततो धरित्रीधरतुल्यरोधसस् तडिल्लतालिङ्गितनीलमूर्तयः । अधोमुखाकाशसरिन्निपातिनीर् अपः प्रसक्तं मुमुचुः पयोमुचः

tato dharitrīdharatulyarodhasas taḍillatāliṅgitanīlamūrtayaḥ / adhomukhākāśasarinnipātinīr apaḥ prasaktaṃ mumucuḥ payomucaḥ

Sanskrit only: no published translation is held for this verse.

पराहतध्वस्तशिखे शिखावतो वपुष्य् अधिक्षिप्तसमिद्धतेजसि । कृतास्पदास् तप्त इवायसि ध्वनिं पयोनिपाताः प्रथमे वितेनिरे

parāhatadhvastaśikhe śikhāvato vapuṣy adhikṣiptasamiddhatejasi / kṛtāspadās tapta ivāyasi dhvaniṃ payonipātāḥ prathame vitenire

Sanskrit only: no published translation is held for this verse.

महानले भिन्नसिताभ्रपातिभिः समेत्य सद्यः कथनेन फेनताम् । व्रजद्भिर् आर्द्रेन्धनवत् परिक्षयं जलैर् वितेने दिवि धूमसंततिः

mahānale bhinnasitābhrapātibhiḥ sametya sadyaḥ kathanena phenatām / vrajadbhir ārdrendhanavat parikṣayaṃ jalair vitene divi dhūmasaṃtatiḥ

Sanskrit only: no published translation is held for this verse.

स्वकेतुभिः पाण्डुरनीलपाटलैः समागताः शक्रधनुःप्रभाभिदः । असंस्थिताम् आदधिरे विभावसोर् विचित्रचीनांशुकचारुतां त्विषः

svaketubhiḥ pāṇḍuranīlapāṭalaiḥ samāgatāḥ śakradhanuḥprabhābhidaḥ / asaṃsthitām ādadhire vibhāvasor vicitracīnāṃśukacārutāṃ tviṣaḥ

Sanskrit only: no published translation is held for this verse.

जलौघसंमूर्छनमूर्छितस्वनः प्रसक्तविद्युल्लसितैधितद्युतिः । प्रशान्तिम् एष्यन् धृतधूममण्डलो बभूव भूयान् इव तत्र पावकः

jalaughasaṃmūrchanamūrchitasvanaḥ prasaktavidyullasitaidhitadyutiḥ / praśāntim eṣyan dhṛtadhūmamaṇḍalo babhūva bhūyān iva tatra pāvakaḥ

Sanskrit only: no published translation is held for this verse.

प्रवृद्धसिन्धूर्मिचयस्थवीयसां चयैर् विभिन्नाः पयसां प्रपेदिरे । उपात्तसंध्यारुचिभिः सरूपतां पयोदविच्छेदलवैः कृशानवः

pravṛddhasindhūrmicayasthavīyasāṃ cayair vibhinnāḥ payasāṃ prapedire / upāttasaṃdhyārucibhiḥ sarūpatāṃ payodavicchedalavaiḥ kṛśānavaḥ

Sanskrit only: no published translation is held for this verse.

उपैत्य् अनन्तद्युतिर् अप्य् असंशयं विभिन्नमूलो ऽनुदयाय संक्षयम् । तथा हि तोयौघविभिन्नसंहतिः स हव्यवाहः प्रययौ पराभवम्

upaity anantadyutir apy asaṃśayaṃ vibhinnamūlo 'nudayāya saṃkṣayam / tathā hi toyaughavibhinnasaṃhatiḥ sa havyavāhaḥ prayayau parābhavam

Sanskrit only: no published translation is held for this verse.

अथ विहितविधेयैर् आशु मुक्ता वितानैर् असितनगनितम्बश्यामभासां घनानाम् । विकसदमलधाम्नां प्राप नीलोत्पलानां श्रियम् अधिकविशुद्धां वह्निदाहाद् इव द्यौः

atha vihitavidheyair āśu muktā vitānair asitanaganitambaśyāmabhāsāṃ ghanānām / vikasadamaladhāmnāṃ prāpa nīlotpalānāṃ śriyam adhikaviśuddhāṃ vahnidāhād iva dyauḥ

Sanskrit only: no published translation is held for this verse.

इति विविधम् उदासे सव्यसाची यद् अस्त्रं बहुसमरनयज्ञः सादयिष्यन्न् अरातिम् । विधिर् इव विपरीतः पौरुषं न्यायवृत्तेः सपदि तद् उपनिन्ये रिक्ततां नीलकण्ठः

iti vividham udāse savyasācī yad astraṃ bahusamaranayajñaḥ sādayiṣyann arātim / vidhir iva viparītaḥ pauruṣaṃ nyāyavṛtteḥ sapadi tad upaninye riktatāṃ nīlakaṇṭhaḥ

Sanskrit only: no published translation is held for this verse.

वीतप्रभावतनुर् अप्य् अतनुप्रभावः प्रत्याचकाङ्क्ष जयिनीं भुजवीर्यलक्ष्मीम् । अस्त्रेषु भूतपतिनापहृतेषु जिष्णुर् वर्षिष्यता दिनकृतेव जलेषु लोकः

vītaprabhāvatanur apy atanuprabhāvaḥ pratyācakāṅkṣa jayinīṃ bhujavīryalakṣmīm / astreṣu bhūtapatināpahṛteṣu jiṣṇur varṣiṣyatā dinakṛteva jaleṣu lokaḥ

Sanskrit only: no published translation is held for this verse.