Bharavi: Kiratarjuniya 2

विहितां प्रियया मनःप्रियाम् अथ निश्चित्य गिरं गरीयसीम् । उपपत्तिमद् ऊर्जिताश्रयं नृपम् ऊचे वचनं वृकोदरः

vihitāṃ priyayā manaḥpriyām atha niścitya giraṃ garīyasīm / upapattimad ūrjitāśrayaṃ nṛpam ūce vacanaṃ vṛkodaraḥ

Sanskrit only: no published translation is held for this verse.

यद् अवोचत वीक्ष्य मानिनी परितः स्नेहमयेन चक्षुषा । अपि वागधिपस्य दुर्वचं वचनं तद् विदधीत विस्मयम्

yad avocata vīkṣya māninī paritaḥ snehamayena cakṣuṣā / api vāgadhipasya durvacaṃ vacanaṃ tad vidadhīta vismayam

Sanskrit only: no published translation is held for this verse.

विषमो ऽपि विगाह्यते नयः कृततीर्थः पयसाम् इवाशयः । स तु तत्र विशेषदुर्लभः सद् उपन्यस्यति कृत्यवर्त्म यः

viṣamo 'pi vigāhyate nayaḥ kṛtatīrthaḥ payasām ivāśayaḥ / sa tu tatra viśeṣadurlabhaḥ sad upanyasyati kṛtyavartma yaḥ

Sanskrit only: no published translation is held for this verse.

परिणामसुखे गरीयसि व्यथके ऽस्मिन् वचसि क्षतौजसाम् । अतिवीर्यवतीव भेषजे बहुर् अल्पीयसि दृश्यते गुणः

pariṇāmasukhe garīyasi vyathake 'smin vacasi kṣataujasām / ativīryavatīva bheṣaje bahur alpīyasi dṛśyate guṇaḥ

Sanskrit only: no published translation is held for this verse.

इयम् इष्टगुणाय रोचतां रुचिरार्था भवते ऽपि भारती । ननु वक्तृविशेषनिःस्पृहा गुणगृह्या वचने विपश्चितः

iyam iṣṭaguṇāya rocatāṃ rucirārthā bhavate 'pi bhāratī / nanu vaktṛviśeṣaniḥspṛhā guṇagṛhyā vacane vipaścitaḥ

Sanskrit only: no published translation is held for this verse.

चतसृष्व् अपि ते विवेकिनी नृप विद्यासु निरूढिम् आगता । कथम् एत्य मतिर् विपर्ययं करिणी पङ्कम् इवावसीदति

catasṛṣv api te vivekinī nṛpa vidyāsu nirūḍhim āgatā / katham etya matir viparyayaṃ kariṇī paṅkam ivāvasīdati

Sanskrit only: no published translation is held for this verse.

विधुरं किम् अतः परं परैर् अवगीतां गमिते दशाम् इमाम् । अवसीदति यत् सुरैर् अपि त्वयि सम्भावितवृत्ति पौरुषम्

vidhuraṃ kim ataḥ paraṃ parair avagītāṃ gamite daśām imām / avasīdati yat surair api tvayi sambhāvitavṛtti pauruṣam

Sanskrit only: no published translation is held for this verse.

द्विषताम् उदयः सुमेधसा गुरुर् अस्वन्ततरः सुमर्षणः । न महान् अपि भूतिम् इच्छता फलसम्पत्प्रवणः परिक्षयः

dviṣatām udayaḥ sumedhasā gurur asvantataraḥ sumarṣaṇaḥ / na mahān api bhūtim icchatā phalasampatpravaṇaḥ parikṣayaḥ

Sanskrit only: no published translation is held for this verse.

अचिरेण परस्य भूयसीं विपरीतां विगणय्य चात्मनः । क्षययुक्तिम् उपेक्षते कृती कुरुते तत्प्रतिकारम् अन्यथा

acireṇa parasya bhūyasīṃ viparītāṃ vigaṇayya cātmanaḥ / kṣayayuktim upekṣate kṛtī kurute tatpratikāram anyathā

Sanskrit only: no published translation is held for this verse.

अनुपालयताम् उदेष्यतीं प्रभुशक्तिं द्विषताम् अनीहया । अपयान्त्य् अचिरान् महीभुजां जननिर्वादभयाद् इव श्रियः

anupālayatām udeṣyatīṃ prabhuśaktiṃ dviṣatām anīhayā / apayānty acirān mahībhujāṃ jananirvādabhayād iva śriyaḥ

Sanskrit only: no published translation is held for this verse.

क्षययुक्तम् अपि स्वभावजं दधतं धाम शिवं समृद्धये । प्रणमन्त्य् अनपायम् उत्थितं प्रतिपच्चन्द्रम् इव प्रजा नृपम्

kṣayayuktam api svabhāvajaṃ dadhataṃ dhāma śivaṃ samṛddhaye / praṇamanty anapāyam utthitaṃ pratipaccandram iva prajā nṛpam

Sanskrit only: no published translation is held for this verse.

प्रभवः खलु कोशदण्डयोः कृतपञ्चाङ्गविनिर्णयो नयः । स विधेयपदेषु दक्षतां नियतिं लोक इवानुरुध्यते

prabhavaḥ khalu kośadaṇḍayoḥ kṛtapañcāṅgavinirṇayo nayaḥ / sa vidheyapadeṣu dakṣatāṃ niyatiṃ loka ivānurudhyate

Sanskrit only: no published translation is held for this verse.

अभिमानवतो मनस्विनः प्रियम् उच्चैः पदम् आरुरुक्षतः । विनिपातनिवर्तनक्षमं मतम् आलम्बनम् आत्मपौरुषम्

abhimānavato manasvinaḥ priyam uccaiḥ padam ārurukṣataḥ / vinipātanivartanakṣamaṃ matam ālambanam ātmapauruṣam

Sanskrit only: no published translation is held for this verse.

विपदो ऽभिभवन्त्य् अविक्रमं रहयत्य् आपदुपेतम् आयतिः । नियता लघुता निरायतेर् अगरीयान् न पदं नृपश्रियः

vipado 'bhibhavanty avikramaṃ rahayaty āpadupetam āyatiḥ / niyatā laghutā nirāyater agarīyān na padaṃ nṛpaśriyaḥ

Sanskrit only: no published translation is held for this verse.

तद् अलं प्रतिपक्षम् उन्नतेर् अवलम्ब्य व्यवसायवन्ध्यताम् । निवसन्ति पराक्रमाश्रया न विषादेन समं समृद्धयः

tad alaṃ pratipakṣam unnater avalambya vyavasāyavandhyatām / nivasanti parākramāśrayā na viṣādena samaṃ samṛddhayaḥ

Sanskrit only: no published translation is held for this verse.

अथ चेद् अवधिः प्रतीक्ष्यते कथम् आविष्कृतजिह्मवृत्तिना । धृतराष्ट्रसुतेन सुत्यज्याश् चिरम् आस्वाद्य नरेन्द्रसम्पदः

atha ced avadhiḥ pratīkṣyate katham āviṣkṛtajihmavṛttinā / dhṛtarāṣṭrasutena sutyajyāś ciram āsvādya narendrasampadaḥ

Sanskrit only: no published translation is held for this verse.

द्विषता विहितं त्वयाथवा यदि लब्धा पुनर् आत्मनः पदम् । जननाथ तवानुजन्मनां कृतम् आविष्कृतपौरुषैर् भुजैः

dviṣatā vihitaṃ tvayāthavā yadi labdhā punar ātmanaḥ padam / jananātha tavānujanmanāṃ kṛtam āviṣkṛtapauruṣair bhujaiḥ

Sanskrit only: no published translation is held for this verse.

मदसिक्तमुखैर् मृगाधिपः करिभिर् वर्तयति स्वयं हतैः । लघयन् खलु तेजसा जगन् न महान् इच्छति भूतिम् अन्यतः

madasiktamukhair mṛgādhipaḥ karibhir vartayati svayaṃ hataiḥ / laghayan khalu tejasā jagan na mahān icchati bhūtim anyataḥ

Sanskrit only: no published translation is held for this verse.

अभिमानधनस्य गत्वरैर् असुभिः स्थास्नु यशश् चिचीषतः । अचिरांशुविलासचञ्चला ननु लक्ष्मीः फलम् आनुषङ्गिकम्

abhimānadhanasya gatvarair asubhiḥ sthāsnu yaśaś cicīṣataḥ / acirāṃśuvilāsacañcalā nanu lakṣmīḥ phalam ānuṣaṅgikam

Sanskrit only: no published translation is held for this verse.

ज्वलितं न हिरण्यरेतसं चयम् आस्कन्दति भस्मनां जनः । अभिभूतिभयाद् असून् अतः सुखम् उज्झन्ति न धाम मानिनः

jvalitaṃ na hiraṇyaretasaṃ cayam āskandati bhasmanāṃ janaḥ / abhibhūtibhayād asūn ataḥ sukham ujjhanti na dhāma māninaḥ

Sanskrit only: no published translation is held for this verse.

किम् अवेक्ष्य फलं पयोधरान् ध्वनतः प्रार्थयते मृगाधिपः । प्रकृतिः खलु सा महीयसः सहते नान्यसमुन्नतिं यया

kim avekṣya phalaṃ payodharān dhvanataḥ prārthayate mṛgādhipaḥ / prakṛtiḥ khalu sā mahīyasaḥ sahate nānyasamunnatiṃ yayā

Sanskrit only: no published translation is held for this verse.

कुरु तन् मतिम् एव विक्रमे नृप निर्धूय तमः प्रमादजम् । ध्रुवम् एतद् अवेहि विद्विषां त्वदनुत्साहहता विपत्तयः

kuru tan matim eva vikrame nṛpa nirdhūya tamaḥ pramādajam / dhruvam etad avehi vidviṣāṃ tvadanutsāhahatā vipattayaḥ

Sanskrit only: no published translation is held for this verse.

द्विरदान् इव दिग्विभावितांश् चतुरस् तोयनिधीन् इवायतः । प्रसहेत रणे तवानुजान् द्विषतां कः शतमन्युतेजसः

dviradān iva digvibhāvitāṃś caturas toyanidhīn ivāyataḥ / prasaheta raṇe tavānujān dviṣatāṃ kaḥ śatamanyutejasaḥ

Sanskrit only: no published translation is held for this verse.

ज्वलतस् तव जातवेदसः सततं वैरिकृतस्य चेतसि । विदधातु शमं शिवेतरा रिपुनारीनयनाम्बुसन्ततिः

jvalatas tava jātavedasaḥ satataṃ vairikṛtasya cetasi / vidadhātu śamaṃ śivetarā ripunārīnayanāmbusantatiḥ

Sanskrit only: no published translation is held for this verse.

इति दर्शितविक्रियं सुतं मरुतः कोपपरीतमानसम् । उपसान्त्वयितुं महीपतिर् द्विरदं दुष्टम् इवोपचक्रमे

iti darśitavikriyaṃ sutaṃ marutaḥ kopaparītamānasam / upasāntvayituṃ mahīpatir dviradaṃ duṣṭam ivopacakrame

Sanskrit only: no published translation is held for this verse.

अपवर्जितविप्लवे शुचय् हृदयग्राहिणि मङ्गलास्पदे । विमला तव विस्तरे गिरां मतिर् आदर्श इवाभिदृश्यते

apavarjitaviplave śucay hṛdayagrāhiṇi maṅgalāspade / vimalā tava vistare girāṃ matir ādarśa ivābhidṛśyate

Sanskrit only: no published translation is held for this verse.

स्फुटता न पदैर् अपाकृता न च न स्वीकृतम् अर्थगौरवम् । रचिता पृथगर्थता गिरां न च सामर्थ्यम् अपोहितं क्वचित्

sphuṭatā na padair apākṛtā na ca na svīkṛtam arthagauravam / racitā pṛthagarthatā girāṃ na ca sāmarthyam apohitaṃ kvacit

Sanskrit only: no published translation is held for this verse.

उपपत्तिर् उदाहृता बलाद् अनुमानेन न चागमः क्षतः । इदम् ईदृग् अनीदृगाशयः प्रसभं वक्तुम् उपक्रमेत कः

upapattir udāhṛtā balād anumānena na cāgamaḥ kṣataḥ / idam īdṛg anīdṛgāśayaḥ prasabhaṃ vaktum upakrameta kaḥ

Sanskrit only: no published translation is held for this verse.

अवितृप्ततया तथापि मे हृदयं निर्णयम् एव धावति । अवसाययितुं क्षमाः सुखं न विधेयेषु विशेषसम्पदः

avitṛptatayā tathāpi me hṛdayaṃ nirṇayam eva dhāvati / avasāyayituṃ kṣamāḥ sukhaṃ na vidheyeṣu viśeṣasampadaḥ

Sanskrit only: no published translation is held for this verse.

सहसा विदधीत न क्रियाम् अविवेकः परम् आपदां पदम् । वृणते हि विमृश्यकारिणं गुणलुब्धाः स्वयम् एव सम्पदः

sahasā vidadhīta na kriyām avivekaḥ param āpadāṃ padam / vṛṇate hi vimṛśyakāriṇaṃ guṇalubdhāḥ svayam eva sampadaḥ

Sanskrit only: no published translation is held for this verse.

अभिवर्षति यो ऽनुपालयन् विधिबीजानि विवेकवारिणा । स सदा फलशालिनीं क्रियां शरदं लोक इवाधितिष्ठति

abhivarṣati yo 'nupālayan vidhibījāni vivekavāriṇā / sa sadā phalaśālinīṃ kriyāṃ śaradaṃ loka ivādhitiṣṭhati

Sanskrit only: no published translation is held for this verse.

शुचि भूषयति श्रुतं वपुः प्रशमस् तस्य भवत्य् अलंक्रिया । प्रशमाभरणं पराक्रमः स नयापादितसिद्धिभूषणः

śuci bhūṣayati śrutaṃ vapuḥ praśamas tasya bhavaty alaṃkriyā / praśamābharaṇaṃ parākramaḥ sa nayāpāditasiddhibhūṣaṇaḥ

Sanskrit only: no published translation is held for this verse.

मतिभेदतमस्तिरोहिते गहने कृत्यविधौ विवेकिनाम् । सुकृतः परिशुद्ध आगमः कुरुते दीप इवार्थदर्शनम्

matibhedatamastirohite gahane kṛtyavidhau vivekinām / sukṛtaḥ pariśuddha āgamaḥ kurute dīpa ivārthadarśanam

Sanskrit only: no published translation is held for this verse.

स्पृहणीयगुणैर् महात्मभिश् चरिते वर्त्मनि यच्छतां मनः । विधिहेतुर् अहेतुर् आगसां विनिपातो ऽपि समः समुन्नतेः

spṛhaṇīyaguṇair mahātmabhiś carite vartmani yacchatāṃ manaḥ / vidhihetur ahetur āgasāṃ vinipāto 'pi samaḥ samunnateḥ

Sanskrit only: no published translation is held for this verse.

शिवम् औपयिकं गरीयसीं फलनिष्पत्तिम् अदूषितायतिम् । विगणय्य नयन्ति पौरुषं विजितक्रोधरया जिगीषवः

śivam aupayikaṃ garīyasīṃ phalaniṣpattim adūṣitāyatim / vigaṇayya nayanti pauruṣaṃ vijitakrodharayā jigīṣavaḥ

Sanskrit only: no published translation is held for this verse.

अपनेयम् उदेतुम् इच्छता तिमिरं रोषमयं धिया पुरः । अविभिद्य निशाकृतं तमः प्रभया नांशुमताप्य् उदीयते

apaneyam udetum icchatā timiraṃ roṣamayaṃ dhiyā puraḥ / avibhidya niśākṛtaṃ tamaḥ prabhayā nāṃśumatāpy udīyate

Sanskrit only: no published translation is held for this verse.

बलवान् अपि कोपजन्मनस् तमसो नाभिभवं रुणद्धि यः । क्षयपक्ष इवैन्दवीः कलाः सकला हन्ति स शक्तिसम्पदः

balavān api kopajanmanas tamaso nābhibhavaṃ ruṇaddhi yaḥ / kṣayapakṣa ivaindavīḥ kalāḥ sakalā hanti sa śaktisampadaḥ

Sanskrit only: no published translation is held for this verse.

समवृत्तिर् उपैति मार्दवं समये यश् च तनोति तिग्मताम् । अधितिष्ठति लोकम् ओजसा स विवस्वान् इव मेदिनीपतिः

samavṛttir upaiti mārdavaṃ samaye yaś ca tanoti tigmatām / adhitiṣṭhati lokam ojasā sa vivasvān iva medinīpatiḥ

Sanskrit only: no published translation is held for this verse.

क्व चिराय परिग्रहः श्रियां क्व च दुष्टेन्द्रियवाजिवश्यता । शरदभ्रचलाश् चलेन्द्रियैर् असुरक्षा हि बहुच्छलाः श्रियः

kva cirāya parigrahaḥ śriyāṃ kva ca duṣṭendriyavājivaśyatā / śaradabhracalāś calendriyair asurakṣā hi bahucchalāḥ śriyaḥ

Sanskrit only: no published translation is held for this verse.

किम् असामयिकं वितन्वता मनसः क्षोभम् उपात्तरंहसः । क्रियते पतिर् उच्चकैर् अपां भवता धीरतयाधरीकृतः

kim asāmayikaṃ vitanvatā manasaḥ kṣobham upāttaraṃhasaḥ / kriyate patir uccakair apāṃ bhavatā dhīratayādharīkṛtaḥ

Sanskrit only: no published translation is held for this verse.

श्रुतम् अप्य् अधिगम्य ये रिपून् विनयन्ते स्म न शरीरजन्मनः । जनयन्त्य् अचिराय सम्पदाम् अयशस् ते खलु चापलाश्रयम्

śrutam apy adhigamya ye ripūn vinayante sma na śarīrajanmanaḥ / janayanty acirāya sampadām ayaśas te khalu cāpalāśrayam

Sanskrit only: no published translation is held for this verse.

अतिपातितकालसाधना स्वशरीरेन्द्रियवर्गतापनी । जनवन् न भवन्तम् अक्षमा नयसिद्धेर् अपनेतुम् अर्हति

atipātitakālasādhanā svaśarīrendriyavargatāpanī / janavan na bhavantam akṣamā nayasiddher apanetum arhati

Sanskrit only: no published translation is held for this verse.

उपकारकम् आयतेर् भृशं प्रसवः कर्मफलस्य भूरिणः । अनपायि निबर्हणं द्विषां न तितिक्षासमम् अस्ति साधनम्

upakārakam āyater bhṛśaṃ prasavaḥ karmaphalasya bhūriṇaḥ / anapāyi nibarhaṇaṃ dviṣāṃ na titikṣāsamam asti sādhanam

Sanskrit only: no published translation is held for this verse.

प्रणतिप्रवणान् विहाय नः सहजस्नेहनिबद्धचेतसः । प्रणमन्ति सदा सुयोधनं प्रथमे मानभृतां न वृष्णयः

praṇatipravaṇān vihāya naḥ sahajasnehanibaddhacetasaḥ / praṇamanti sadā suyodhanaṃ prathame mānabhṛtāṃ na vṛṣṇayaḥ

Sanskrit only: no published translation is held for this verse.

सुहृदः सहजास् तथेतरे मतम् एषां न विलङ्घयन्ति ये । विनयाद् इव यापयन्ति ते धृतराष्ट्रात्मजम् आत्मसिद्धये

suhṛdaḥ sahajās tathetare matam eṣāṃ na vilaṅghayanti ye / vinayād iva yāpayanti te dhṛtarāṣṭrātmajam ātmasiddhaye

Sanskrit only: no published translation is held for this verse.

अभियोग इमान् महीभुजो भवता तस्य ततः कृतावधेः । प्रविघाटयिता समुत्पतन् हरिदश्वः कमलाकरान् इव

abhiyoga imān mahībhujo bhavatā tasya tataḥ kṛtāvadheḥ / pravighāṭayitā samutpatan haridaśvaḥ kamalākarān iva

Sanskrit only: no published translation is held for this verse.

उपजापसहान् विलङ्घयन् स विधाता नृपतीन् मदोद्धतः । सहते न जनो ऽप्य् अधःक्रियां किम् उ लोकाधिकधाम राजकम्

upajāpasahān vilaṅghayan sa vidhātā nṛpatīn madoddhataḥ / sahate na jano 'py adhaḥkriyāṃ kim u lokādhikadhāma rājakam

Sanskrit only: no published translation is held for this verse.

असमापितकृत्यसम्पदां हतवेगं विनयेन तावता । प्रभवन्त्य् अभिमानशालिनां मदम् उत्तम्भयितुं विभूतयः

asamāpitakṛtyasampadāṃ hatavegaṃ vinayena tāvatā / prabhavanty abhimānaśālināṃ madam uttambhayituṃ vibhūtayaḥ

Sanskrit only: no published translation is held for this verse.

मदमानसमुद्धतं नृपं न वियुङ्क्ते नियमेन मूढता । अतिमूढ उदस्यते नयान् नयहीनाद् अपरज्यते जनः

madamānasamuddhataṃ nṛpaṃ na viyuṅkte niyamena mūḍhatā / atimūḍha udasyate nayān nayahīnād aparajyate janaḥ

Sanskrit only: no published translation is held for this verse.

अपरागसमीरणेरितः क्रमशीर्णाकुलमूलसन्ततिः । सुकरस् तरुवत् सहिष्णुना रिपुर् उन्मूलयितुं महान् अपि

aparāgasamīraṇeritaḥ kramaśīrṇākulamūlasantatiḥ / sukaras taruvat sahiṣṇunā ripur unmūlayituṃ mahān api

Sanskrit only: no published translation is held for this verse.

अणुर् अप्य् उपहन्ति विग्रहः प्रभुम् अन्तःप्रकृतिप्रकोपजः । अखिलं हि हिनस्ति भूधरं तरुशाखान्तनिघर्षजो ऽनलः

aṇur apy upahanti vigrahaḥ prabhum antaḥprakṛtiprakopajaḥ / akhilaṃ hi hinasti bhūdharaṃ taruśākhāntanigharṣajo 'nalaḥ

Sanskrit only: no published translation is held for this verse.

मतिमान् विनयप्रमाथिनः समुपेक्षेत समुन्नतिं द्विषः । सुजयः खलु तादृग् अन्तरे विपदन्ता ह्य् अविनीतसम्पदः

matimān vinayapramāthinaḥ samupekṣeta samunnatiṃ dviṣaḥ / sujayaḥ khalu tādṛg antare vipadantā hy avinītasampadaḥ

Sanskrit only: no published translation is held for this verse.

लघुवृत्तितया भिदां गतं बहिर् अन्तश् च नृपस्य मण्डलम् । अभिभूय हरत्य् अनन्तरः शिथिलं कूलम् इवापगारयः

laghuvṛttitayā bhidāṃ gataṃ bahir antaś ca nṛpasya maṇḍalam / abhibhūya haraty anantaraḥ śithilaṃ kūlam ivāpagārayaḥ

Sanskrit only: no published translation is held for this verse.

अनुशासतम् इत्य् अनाकुलं नयवर्त्माकुलम् अर्जुनाग्रजम् । स्वयम् अर्थ इवाभिवाञ्छितस् तम् अभीयाय पराशरात्मजः

anuśāsatam ity anākulaṃ nayavartmākulam arjunāgrajam / svayam artha ivābhivāñchitas tam abhīyāya parāśarātmajaḥ

Sanskrit only: no published translation is held for this verse.

मधुरैर् अवशानि लम्भयन्न् अपि तिर्यञ्चि शमं निरीक्षितैः । परितः पटु बिभ्रद् एनसां दहनं धाम विलोकनक्षमम्

madhurair avaśāni lambhayann api tiryañci śamaṃ nirīkṣitaiḥ / paritaḥ paṭu bibhrad enasāṃ dahanaṃ dhāma vilokanakṣamam

Sanskrit only: no published translation is held for this verse.

सहसोपगतः सविस्मयं तपसां सूतिर् असूतिर् एनसाम् । ददृशे जगतीभुजा मुनिः स वपुष्मान् इव पुण्यसंचयः

sahasopagataḥ savismayaṃ tapasāṃ sūtir asūtir enasām / dadṛśe jagatībhujā muniḥ sa vapuṣmān iva puṇyasaṃcayaḥ

Sanskrit only: no published translation is held for this verse.

अथोच्चकैर् आसनतः परार्ध्याद् उद्यन् स धूतारुणवल्कलाग्रः । रराज कीर्णाकपिशांशुजालः शृङ्गात् सुमेरोर् इव तिग्मरश्मिः

athoccakair āsanataḥ parārdhyād udyan sa dhūtāruṇavalkalāgraḥ / rarāja kīrṇākapiśāṃśujālaḥ śṛṅgāt sumeror iva tigmaraśmiḥ

Sanskrit only: no published translation is held for this verse.

अवहितहृदयो विधाय स अर्हाम् ऋषिवद् ऋषिप्रवरे गुरूपदिष्टाम् । तदनुमतम् अलंचकार पश्चात् प्रशम इव श्रुतम् आसनं नरेन्द्रः

avahitahṛdayo vidhāya sa arhām ṛṣivad ṛṣipravare gurūpadiṣṭām / tadanumatam alaṃcakāra paścāt praśama iva śrutam āsanaṃ narendraḥ

Sanskrit only: no published translation is held for this verse.

व्यक्तोदितस्मितमयूखविभासितोष्ठस् तिष्ठन् मुनेर् अभिमुखं स विकीर्णधाम्नः । तन्वन्तम् इद्धम् अभितो गुरुम् अंशुजालं लक्ष्मीम् उवाह सकलस्य शशाङ्कमूर्तेः

vyaktoditasmitamayūkhavibhāsitoṣṭhas tiṣṭhan muner abhimukhaṃ sa vikīrṇadhāmnaḥ / tanvantam iddham abhito gurum aṃśujālaṃ lakṣmīm uvāha sakalasya śaśāṅkamūrteḥ

Sanskrit only: no published translation is held for this verse.