Bharavi: Kiratarjuniya 8

अथ स्वमायाकृतमन्दिरोज्ज्वलं ज्वलन्मणि व्योमसदां सनातनम् । सुराङ्गना गोपतिचापगोपुरं पुरं वनानां विजिहीर्षया जहुः

atha svamāyākṛtamandirojjvalaṃ jvalanmaṇi vyomasadāṃ sanātanam / surāṅganā gopaticāpagopuraṃ puraṃ vanānāṃ vijihīrṣayā jahuḥ

Sanskrit only: no published translation is held for this verse.

यथायथं ताः सहिता नभश्चरैः प्रभाभिर् उद्भासितशैलवीरुधः । वनं विशन्त्यो वनजायतेक्षणाः क्षणद्युतीनां दधुर् एकरूपताम्

yathāyathaṃ tāḥ sahitā nabhaścaraiḥ prabhābhir udbhāsitaśailavīrudhaḥ / vanaṃ viśantyo vanajāyatekṣaṇāḥ kṣaṇadyutīnāṃ dadhur ekarūpatām

Sanskrit only: no published translation is held for this verse.

निवृत्तवृत्तोरुपयोधरक्लमः प्रवृत्तैनिर्ह्रादिविभूषणारवः । नितम्बिनीनां भृशम् आदधे धृतिं नभःप्रयाणाद् अवनौ परिक्रमः

nivṛttavṛttorupayodharaklamaḥ pravṛttainirhrādivibhūṣaṇāravaḥ / nitambinīnāṃ bhṛśam ādadhe dhṛtiṃ nabhaḥprayāṇād avanau parikramaḥ

Sanskrit only: no published translation is held for this verse.

घनानि कामं कुसुमानि बिभ्रतः करप्रचेयान्य् अपहाय शाखिनः । पुरो ऽभिसस्रे सुरसुन्दरीजनैर् यथोत्तरेच्छा हि गुणेषु कामिनः

ghanāni kāmaṃ kusumāni bibhrataḥ karapraceyāny apahāya śākhinaḥ / puro 'bhisasre surasundarījanair yathottarecchā hi guṇeṣu kāminaḥ

Sanskrit only: no published translation is held for this verse.

तनूर् अलक्तारुणपाणिपल्लवाः स्फुरन्नखांशूत्करमञ्जरीभृतः । विलासिनीबाहुलता वनालयो विलेपनामोदहृताः सिषेविरे

tanūr alaktāruṇapāṇipallavāḥ sphurannakhāṃśūtkaramañjarībhṛtaḥ / vilāsinībāhulatā vanālayo vilepanāmodahṛtāḥ siṣevire

Sanskrit only: no published translation is held for this verse.

निपीयमानस्तबका शिलीमुखैर् अशोकयष्टिश् चलबालपल्लवा । विडम्बयन्ती ददृशे वधूजनैर् अमन्ददष्टौष्ठकरावधूननम्

nipīyamānastabakā śilīmukhair aśokayaṣṭiś calabālapallavā / viḍambayantī dadṛśe vadhūjanair amandadaṣṭauṣṭhakarāvadhūnanam

Sanskrit only: no published translation is held for this verse.

करौ धुनाना नवपल्लवाकृती वृथा कृथा मानिनि मा परिश्रमम् । उपेयुषी कल्पलताभिशङ्कया कथं न्व् इतस् त्रस्यति षट्पदावलिः

karau dhunānā navapallavākṛtī vṛthā kṛthā mānini mā pariśramam / upeyuṣī kalpalatābhiśaṅkayā kathaṃ nv itas trasyati ṣaṭpadāvaliḥ

Sanskrit only: no published translation is held for this verse.

जहीहि कोपं दयितो ऽनुगम्यतां पुरानुशेते तव चञ्चलं मनः । इति प्रियं कांचिद् उपैतुम् इच्छतीं पुरो ऽनुनिन्ये निपुणः सखीजनः

jahīhi kopaṃ dayito 'nugamyatāṃ purānuśete tava cañcalaṃ manaḥ / iti priyaṃ kāṃcid upaitum icchatīṃ puro 'nuninye nipuṇaḥ sakhījanaḥ

Sanskrit only: no published translation is held for this verse.

समुन्नतैः काशदुकूलशालिभिः परिक्वणत्सारसपङ्क्तिमेखलैः । प्रतीरदेशैः स्वकलत्रचारुभिर् विभूषिताः कुञ्जसमुद्रयोषितः

samunnataiḥ kāśadukūlaśālibhiḥ parikvaṇatsārasapaṅktimekhalaiḥ / pratīradeśaiḥ svakalatracārubhir vibhūṣitāḥ kuñjasamudrayoṣitaḥ

Sanskrit only: no published translation is held for this verse.

विदूरपातेन भिदाम् उपेयुषश् च्युताः प्रवाहाद् अभितः प्रसारिणः । प्रियाङ्कशीताः शुचिमौक्तिकत्विषो वनप्रहासा इव वारिबिन्दवः

vidūrapātena bhidām upeyuṣaś cyutāḥ pravāhād abhitaḥ prasāriṇaḥ / priyāṅkaśītāḥ śucimauktikatviṣo vanaprahāsā iva vāribindavaḥ

Sanskrit only: no published translation is held for this verse.

सखीजनं प्रेम गुरूकृतादरं निरीक्षमाणा इव नम्रमूर्तयः । स्थिरद्विरेफाञ्जनशरितोदरैर् विसारिभिः पुष्पविलोचनैर् लताः

sakhījanaṃ prema gurūkṛtādaraṃ nirīkṣamāṇā iva namramūrtayaḥ / sthiradvirephāñjanaśaritodarair visāribhiḥ puṣpavilocanair latāḥ

Sanskrit only: no published translation is held for this verse.

उपेयुषीणां बृहतीर् अधित्यका मनांसि जह्रुः सुरराजयोषिताम् । कपोलकाषैः करिणां मदारुणैर् उपाहितश्यामरुचश् च चन्दनाः

upeyuṣīṇāṃ bṛhatīr adhityakā manāṃsi jahruḥ surarājayoṣitām / kapolakāṣaiḥ kariṇāṃ madāruṇair upāhitaśyāmarucaś ca candanāḥ

Sanskrit only: no published translation is held for this verse.

स्वगोचरे सत्य् अपि वित्तहारिणा विलोभ्यमानाः प्रसवेन शाखिनाम् । नभश्चराणाम् उपकर्तुम् इच्छतां प्रियाणि चक्रुः प्रणयेन योषितः

svagocare saty api vittahāriṇā vilobhyamānāḥ prasavena śākhinām / nabhaścarāṇām upakartum icchatāṃ priyāṇi cakruḥ praṇayena yoṣitaḥ

Sanskrit only: no published translation is held for this verse.

प्रयच्छतोच्चैः कुसुमानि मानिनी विपक्षगोत्रं दयितेन लम्भिता । न किंचिद् ऊचे चरणेन केवलं लिलेख बाष्पाकुललोचना भुवम्

prayacchatoccaiḥ kusumāni māninī vipakṣagotraṃ dayitena lambhitā / na kiṃcid ūce caraṇena kevalaṃ lilekha bāṣpākulalocanā bhuvam

Sanskrit only: no published translation is held for this verse.

प्रिये ऽपरा यच्छति वाचम् उन्मुखी निबद्धदृष्टिः शिथिलाकुलोच्चया । समादधे नांशुकम् आहितं वृथा विवेद पुष्पेषु न पाणिपल्लवम्

priye 'parā yacchati vācam unmukhī nibaddhadṛṣṭiḥ śithilākuloccayā / samādadhe nāṃśukam āhitaṃ vṛthā viveda puṣpeṣu na pāṇipallavam

Sanskrit only: no published translation is held for this verse.

सलीलम् आसक्तलतान्तभूषणं समासजन्त्या कुसुमावतंसकम् । स्तनोपपीडं नुनुदे नितम्बिना घनेन कश्चिज् जघनेन कान्तया

salīlam āsaktalatāntabhūṣaṇaṃ samāsajantyā kusumāvataṃsakam / stanopapīḍaṃ nunude nitambinā ghanena kaścij jaghanena kāntayā

Sanskrit only: no published translation is held for this verse.

कलत्रभारेण विलोलनीविना गलद्दुकूलस्तनशालिनोरसा । बलिव्यपायस्फुटरोमराजिना निरायतत्वाद् उदरेण ताम्यता

kalatrabhāreṇa vilolanīvinā galaddukūlastanaśālinorasā / balivyapāyasphuṭaromarājinā nirāyatatvād udareṇa tāmyatā

Sanskrit only: no published translation is held for this verse.

विलम्बमानाकुलकेशपाशया कयाचिद् आविष्कृतबाहुमूलया । तरुप्रसूनान्य् अपदिश्य सादरं मनोधिनाथस्य मनः समाददे

vilambamānākulakeśapāśayā kayācid āviṣkṛtabāhumūlayā / taruprasūnāny apadiśya sādaraṃ manodhināthasya manaḥ samādade

Sanskrit only: no published translation is held for this verse.

व्यपोहितुं लोचनतो मुखानिलैर् अपारयन्तं किल पुष्पजं रजः । पयोधरेणोरसि काचिद् उन्मनाः प्रियं जघानोन्नतपीवरस्तनी

vyapohituṃ locanato mukhānilair apārayantaṃ kila puṣpajaṃ rajaḥ / payodhareṇorasi kācid unmanāḥ priyaṃ jaghānonnatapīvarastanī

Sanskrit only: no published translation is held for this verse.

इमान्य् अमूनीत्य् अपवर्जिते शनैर् यथाभिरामं कुसुमाग्रपल्लवे । विहाय निःसारतयेव भूरुहान् पदं वनश्रीर् वनितासु संदधे

imāny amūnīty apavarjite śanair yathābhirāmaṃ kusumāgrapallave / vihāya niḥsāratayeva bhūruhān padaṃ vanaśrīr vanitāsu saṃdadhe

Sanskrit only: no published translation is held for this verse.

प्रवालभङ्गारुणपाणिपल्लवः परागपाण्डूकृतपीवरस्तनः । महीरुहः पुष्पसुगन्धिर् आददे वपुर्गुणोच्छ्रायम् इवाङ्गनाजनः

pravālabhaṅgāruṇapāṇipallavaḥ parāgapāṇḍūkṛtapīvarastanaḥ / mahīruhaḥ puṣpasugandhir ādade vapurguṇocchrāyam ivāṅganājanaḥ

Sanskrit only: no published translation is held for this verse.

वरोरुभिर् वारणहस्तपीवरैश् चिराय खिन्नान् नवपल्लवश्रियः । समे ऽपि यातुं चरणान् अनीश्वरान् मदाद् इव प्रस्खलतः पदे पदे

varorubhir vāraṇahastapīvaraiś cirāya khinnān navapallavaśriyaḥ / same 'pi yātuṃ caraṇān anīśvarān madād iva praskhalataḥ pade pade

Sanskrit only: no published translation is held for this verse.

विसारिकाञ्चीमणिरश्मिलब्धया मनोहरोच्छायनितम्बशोभया । स्थितानि जित्वा नवसैकतद्युतिं श्रमातिरिक्तैर् जघनानि गौरवैः

visārikāñcīmaṇiraśmilabdhayā manoharocchāyanitambaśobhayā / sthitāni jitvā navasaikatadyutiṃ śramātiriktair jaghanāni gauravaiḥ

Sanskrit only: no published translation is held for this verse.

समुच्छ्वसत्पङ्कजकोशकोमलैर् उपाहितश्रीण्य् उपनीवि नाभिभिः । दधन्ति मध्येषु वलीविभङ्गिषु स्तनातिभाराद् उदराणि नम्रताम्

samucchvasatpaṅkajakośakomalair upāhitaśrīṇy upanīvi nābhibhiḥ / dadhanti madhyeṣu valīvibhaṅgiṣu stanātibhārād udarāṇi namratām

Sanskrit only: no published translation is held for this verse.

समानकान्तीनि तुषारभूषणैः सरोरुहैर् अस्फुटपत्त्रपङ्क्तिभिः । चितानि घर्माम्बुकणैः समन्ततो मुखान्य् अनुत्फुल्लविलोचनानि च

samānakāntīni tuṣārabhūṣaṇaiḥ saroruhair asphuṭapattrapaṅktibhiḥ / citāni gharmāmbukaṇaiḥ samantato mukhāny anutphullavilocanāni ca

Sanskrit only: no published translation is held for this verse.

विनिर्यतीनां गुरुस्वेदमन्थरं सुराङ्गनानाम् अनुसानुवर्त्मनः । सविस्मयं रूपयतो नभश्चरान् विवेश तत्पूर्वम् इवेक्षणादरः

viniryatīnāṃ gurusvedamantharaṃ surāṅganānām anusānuvartmanaḥ / savismayaṃ rūpayato nabhaścarān viveśa tatpūrvam ivekṣaṇādaraḥ

Sanskrit only: no published translation is held for this verse.

अथ स्फुरन्मीनविधूतपङ्कजा विपङ्कतीरस्खलितोर्मिसंहतिः । पयो ऽवगाढुं कलहंसनादिनी समाजुहावेव वधूः सुरापगा

atha sphuranmīnavidhūtapaṅkajā vipaṅkatīraskhalitormisaṃhatiḥ / payo 'vagāḍhuṃ kalahaṃsanādinī samājuhāveva vadhūḥ surāpagā

Sanskrit only: no published translation is held for this verse.

प्रशान्तघर्माभिभवः शनैर् विवान् विलासिनीभ्यः परिमृष्टपङ्कजः । ददौ भुजालम्बम् इवात्तशीकरस् तरङ्गमालान्तरगोचरो ऽनिलः

praśāntagharmābhibhavaḥ śanair vivān vilāsinībhyaḥ parimṛṣṭapaṅkajaḥ / dadau bhujālambam ivāttaśīkaras taraṅgamālāntaragocaro 'nilaḥ

Sanskrit only: no published translation is held for this verse.

गतैः सहावैः कलहंसविक्रमं कलत्रभारैः पुलिनं नितम्बिभिः । मुखैः सरोजानि च दीर्घलोचनैः सुरस्त्रियः साम्यगुणान् निरासिरे

gataiḥ sahāvaiḥ kalahaṃsavikramaṃ kalatrabhāraiḥ pulinaṃ nitambibhiḥ / mukhaiḥ sarojāni ca dīrghalocanaiḥ surastriyaḥ sāmyaguṇān nirāsire

Sanskrit only: no published translation is held for this verse.

विभिन्नपर्यन्तगमीनपङ्क्तयः पुरो विगाढाः सखिभिर् मरुत्वतः । कथंचिद् आपः सुरसुन्दरीजनैः सभीतिभिस् तत्प्रथमं प्रपेदिरे

vibhinnaparyantagamīnapaṅktayaḥ puro vigāḍhāḥ sakhibhir marutvataḥ / kathaṃcid āpaḥ surasundarījanaiḥ sabhītibhis tatprathamaṃ prapedire

Sanskrit only: no published translation is held for this verse.

विगाढमात्रे रमणीभिर् अम्भसि प्रयत्नसंवाहितपीवरोरुभिः । विभिद्यमाना विससार सारसान् उदस्य तीरेषु तरङ्गसंहतिः

vigāḍhamātre ramaṇībhir ambhasi prayatnasaṃvāhitapīvarorubhiḥ / vibhidyamānā visasāra sārasān udasya tīreṣu taraṅgasaṃhatiḥ

Sanskrit only: no published translation is held for this verse.

शिलाघनैर् नाकसदाम् उरःस्थलैर् बृहन्निवेशैश् च वधूपयोधरैः । तटाभिनीतेन विभिन्नवीचिना रुषेव भेजे कलुषत्वम् अम्भसा

śilāghanair nākasadām uraḥsthalair bṛhanniveśaiś ca vadhūpayodharaiḥ / taṭābhinītena vibhinnavīcinā ruṣeva bheje kaluṣatvam ambhasā

Sanskrit only: no published translation is held for this verse.

विधूतकेशाः परिलोलितस्रजः सुराङ्गनानां प्रविलुप्तचन्दनाः । अतिप्रसङ्गाद् विहितागसो मुहुः प्रकम्पम् ईयुः सभया इवोर्मयः

vidhūtakeśāḥ parilolitasrajaḥ surāṅganānāṃ praviluptacandanāḥ / atiprasaṅgād vihitāgaso muhuḥ prakampam īyuḥ sabhayā ivormayaḥ

Sanskrit only: no published translation is held for this verse.

विपक्षचित्तोन्मथना नखव्रणास् तिरोहिता विभ्रममण्डनेन ये । हृतस्य शेषान् इव कुङ्कुमस्य तान् विकत्थनीयान् दधुर् अन्यथा स्त्रियः

vipakṣacittonmathanā nakhavraṇās tirohitā vibhramamaṇḍanena ye / hṛtasya śeṣān iva kuṅkumasya tān vikatthanīyān dadhur anyathā striyaḥ

Sanskrit only: no published translation is held for this verse.

सरोजपत्त्रे नु विलीनषट्पदे विलोलदृष्टेः स्विद् अमू विलोचने । शिरोरुहाः स्विन् नतपक्ष्मसन्ततेर् द्विरेफवृन्दं नु निशब्दनिश्चलम्

sarojapattre nu vilīnaṣaṭpade viloladṛṣṭeḥ svid amū vilocane / śiroruhāḥ svin natapakṣmasantater dvirephavṛndaṃ nu niśabdaniścalam

Sanskrit only: no published translation is held for this verse.

अगूढहासस्फुटदन्तकेसरं मुखं स्विद् एतद् विकसन् नु पङ्कजम् । इति प्रलीनां नलिनीवने सखीं विदांबभूवुः सुचिरेण योषितः

agūḍhahāsasphuṭadantakesaraṃ mukhaṃ svid etad vikasan nu paṅkajam / iti pralīnāṃ nalinīvane sakhīṃ vidāṃbabhūvuḥ sucireṇa yoṣitaḥ

Sanskrit only: no published translation is held for this verse.

प्रियेण संग्रथ्य विपक्षसंनिधाव् उपाहितां वक्षसि पीवरस्तने । स्रजं न काचिद् विजहौ जलाविलां वसन्ति हि प्रेम्णि गुणा न वस्तुनि

priyeṇa saṃgrathya vipakṣasaṃnidhāv upāhitāṃ vakṣasi pīvarastane / srajaṃ na kācid vijahau jalāvilāṃ vasanti hi premṇi guṇā na vastuni

Sanskrit only: no published translation is held for this verse.

असंशयं न्यस्तम् उपान्तरक्ततां यद् एव रोद्धुं रमणीभिर् अञ्जनम् । हृते ऽपि तस्मिन् सलिलेन शुक्लतां निरास रागो नयनेषु न श्रियम्

asaṃśayaṃ nyastam upāntaraktatāṃ yad eva roddhuṃ ramaṇībhir añjanam / hṛte 'pi tasmin salilena śuklatāṃ nirāsa rāgo nayaneṣu na śriyam

Sanskrit only: no published translation is held for this verse.

द्युतिं वहन्तो वनितावतंसका हृताः प्रलोभाद् इव वेगिभिर् जलैः । उपप्लुतास् तत्क्षणशोचनीयतां च्युताधिकाराः सचिवा इवाययुः

dyutiṃ vahanto vanitāvataṃsakā hṛtāḥ pralobhād iva vegibhir jalaiḥ / upaplutās tatkṣaṇaśocanīyatāṃ cyutādhikārāḥ sacivā ivāyayuḥ

Sanskrit only: no published translation is held for this verse.

विपत्त्रलेखा निरलक्तकाधरा निरञ्जनाक्षीर् अपि बिभ्रतीः श्रियम् । निरीक्ष्य रामा बुबुधे नभश्चरैर् अलंकृतं तद्वपुषैव मण्डनम्

vipattralekhā niralaktakādharā nirañjanākṣīr api bibhratīḥ śriyam / nirīkṣya rāmā bubudhe nabhaścarair alaṃkṛtaṃ tadvapuṣaiva maṇḍanam

Sanskrit only: no published translation is held for this verse.

तथा न पूर्वं कृतभूषणादरः प्रियानुरागेण विलासिनीजनः । यथा जलार्द्रो नखमण्डनश्रिया ददाह दृष्टीश् च विपक्षयोषिताम्

tathā na pūrvaṃ kṛtabhūṣaṇādaraḥ priyānurāgeṇa vilāsinījanaḥ / yathā jalārdro nakhamaṇḍanaśriyā dadāha dṛṣṭīś ca vipakṣayoṣitām

Sanskrit only: no published translation is held for this verse.

शुभाननाः साम्बुरुहेषु भीरवो विलोलहाराश् चलफेनपङ्क्तिषु । नितान्तगौर्यो हृतकुङ्कुमेष्व् अलं न लेभिरे ताः परभागम् ऊर्मिषु

śubhānanāḥ sāmburuheṣu bhīravo vilolahārāś calaphenapaṅktiṣu / nitāntagauryo hṛtakuṅkumeṣv alaṃ na lebhire tāḥ parabhāgam ūrmiṣu

Sanskrit only: no published translation is held for this verse.

ह्रदाम्भसि व्यस्तवधूकराहते रवं मृदङ्गध्वनिधीरम् उज्झति । मुहुस्तनैस् तालस्समं समाददे मनोरमं नृत्यम् इव प्रवेपितम्

hradāmbhasi vyastavadhūkarāhate ravaṃ mṛdaṅgadhvanidhīram ujjhati / muhustanais tālassamaṃ samādade manoramaṃ nṛtyam iva pravepitam

Sanskrit only: no published translation is held for this verse.

श्रिया हसद्भिः कलमानि सस्मितैर् अलंकृताम्बुः प्रतिमागतैर् मुखैः । कृतानुकूल्या सुरराजयोषितां प्रसादसाफल्यम् अवाप जाह्वनी

śriyā hasadbhiḥ kalamāni sasmitair alaṃkṛtāmbuḥ pratimāgatair mukhaiḥ / kṛtānukūlyā surarājayoṣitāṃ prasādasāphalyam avāpa jāhvanī

Sanskrit only: no published translation is held for this verse.

परिस्फुरन्मीनविघट्टितोरवः सुराङ्गनास् त्रासविलोलदृष्टयः । उपाययुः कम्पितपाणिपल्लवाः सखीजनस्यापि विलोकनीयताम्

parisphuranmīnavighaṭṭitoravaḥ surāṅganās trāsaviloladṛṣṭayaḥ / upāyayuḥ kampitapāṇipallavāḥ sakhījanasyāpi vilokanīyatām

Sanskrit only: no published translation is held for this verse.

भयाद् इवाश्लिष्य झषाहते ऽम्भसि प्रियं मुदानन्दयति स्म मानिनी । अकृत्रिमप्रेमरसाहितैर् मनो हरन्ति रामाः कृतकैर् अपीहितैः

bhayād ivāśliṣya jhaṣāhate 'mbhasi priyaṃ mudānandayati sma māninī / akṛtrimapremarasāhitair mano haranti rāmāḥ kṛtakair apīhitaiḥ

Sanskrit only: no published translation is held for this verse.

तिरोहितान्तानि नितान्तम् आकुलैर् अपां विगाहाद् अलकैः प्रसारिभिः । ययुर् वधूनां वदनानि तुल्यतां द्विरेफवृन्दान्तरितैः सरोरुहैः

tirohitāntāni nitāntam ākulair apāṃ vigāhād alakaiḥ prasāribhiḥ / yayur vadhūnāṃ vadanāni tulyatāṃ dvirephavṛndāntaritaiḥ saroruhaiḥ

Sanskrit only: no published translation is held for this verse.

करौ धुनाना नवपल्लवाकृती पयस्य् अगाधे किल जातसम्भ्रमा । सखीषु निर्वाच्यम् अधार्ष्ठ्यदूषितं प्रियाङ्गसंश्लेषम् अवाप मानिनी

karau dhunānā navapallavākṛtī payasy agādhe kila jātasambhramā / sakhīṣu nirvācyam adhārṣṭhyadūṣitaṃ priyāṅgasaṃśleṣam avāpa māninī

Sanskrit only: no published translation is held for this verse.

प्रियैः सलीलं करवारिवारितः प्रवृद्धनिःश्वासविकम्पितस्तनः । सविभ्रमाधूतकराग्रपल्लवो यथार्थताम् आप विलासिनीजनः

priyaiḥ salīlaṃ karavārivāritaḥ pravṛddhaniḥśvāsavikampitastanaḥ / savibhramādhūtakarāgrapallavo yathārthatām āpa vilāsinījanaḥ

Sanskrit only: no published translation is held for this verse.

उदस्य धैर्यं दयितेन सादरं प्रसादितायाः करवारिवारितम् । मुखं निमीलन्नयनं नतभ्रुवः श्रियं सपत्नीवदनाद् इवाददे

udasya dhairyaṃ dayitena sādaraṃ prasāditāyāḥ karavārivāritam / mukhaṃ nimīlannayanaṃ natabhruvaḥ śriyaṃ sapatnīvadanād ivādade

Sanskrit only: no published translation is held for this verse.

विहस्य पाणौ विधृते धृताम्भसि प्रियेण वध्वा मदनार्द्रचेतसः । सखीव काञ्ची पयसा घनीकृता बभार वीतोच्चयबन्धम् अंशुकम्

vihasya pāṇau vidhṛte dhṛtāmbhasi priyeṇa vadhvā madanārdracetasaḥ / sakhīva kāñcī payasā ghanīkṛtā babhāra vītoccayabandham aṃśukam

Sanskrit only: no published translation is held for this verse.

निरञ्जने साचिविलोकितं दृशाव् अयावकं वेपथुर् ओष्ठपल्लवम् । नतभ्रुवो मण्डयदि स्म विग्रहे बलिक्रिया चातिलकं तदास्पदम्

nirañjane sācivilokitaṃ dṛśāv ayāvakaṃ vepathur oṣṭhapallavam / natabhruvo maṇḍayadi sma vigrahe balikriyā cātilakaṃ tadāspadam

Sanskrit only: no published translation is held for this verse.

निमीलदाकेकरलोचचक्षुषां प्रियोपकण्ठं कृतगात्रवेपथुः । निमज्जतीनां श्वसितोद्धतस्तनः श्रमो नु तासां मदनो नु पप्रथे

nimīladākekaralocacakṣuṣāṃ priyopakaṇṭhaṃ kṛtagātravepathuḥ / nimajjatīnāṃ śvasitoddhatastanaḥ śramo nu tāsāṃ madano nu paprathe

Sanskrit only: no published translation is held for this verse.

प्रियेण सिक्ता चरमं विपक्षतश् चुकोप काचिन् न तुतोष सान्त्वनैः । जनस्य रूढप्रणयस्य चेतसः किम् अप्य् अमर्षो ऽनुनये भृशायते

priyeṇa siktā caramaṃ vipakṣataś cukopa kācin na tutoṣa sāntvanaiḥ / janasya rūḍhapraṇayasya cetasaḥ kim apy amarṣo 'nunaye bhṛśāyate

Sanskrit only: no published translation is held for this verse.

इत्थं विहृत्य वनिताभिर् उदस्यमानं पीनस्तनोरुजघनस्थलशालिनीभिः । उत्सर्पितोर्मिचयलङ्घिततीरदेशम् औत्सुक्य् अनुन्नम् इव वारि पुरः प्रतस्थे

itthaṃ vihṛtya vanitābhir udasyamānaṃ pīnastanorujaghanasthalaśālinībhiḥ / utsarpitormicayalaṅghitatīradeśam autsuky anunnam iva vāri puraḥ pratasthe

Sanskrit only: no published translation is held for this verse.

तीरान्तराणि मिथुनानि रथाङ्गनाम्नां नीत्वा विलोलितसरोजवनश्रियस् ताः । संरेजिरे सुरसरिज्जलधौतहारास् तारावितानतरला इव यामवत्यः

tīrāntarāṇi mithunāni rathāṅganāmnāṃ nītvā vilolitasarojavanaśriyas tāḥ / saṃrejire surasarijjaladhautahārās tārāvitānataralā iva yāmavatyaḥ

Sanskrit only: no published translation is held for this verse.

संक्रान्तचन्दनरसाहितवर्णभेदं विच्छिन्नभूषणमणिप्रकरांशुचित्रम् । बद्धोर्मि नाकवनितापरिभुक्तमुक्तं सिन्धोर् बभार सलिलं शयनीयलक्ष्मीम्

saṃkrāntacandanarasāhitavarṇabhedaṃ vicchinnabhūṣaṇamaṇiprakarāṃśucitram / baddhormi nākavanitāparibhuktamuktaṃ sindhor babhāra salilaṃ śayanīyalakṣmīm

Sanskrit only: no published translation is held for this verse.