Bharavi: Kiratarjuniya 9

वीक्ष्य रन्तुमनसः सुरनारीर् आत्तचित्रपरिधानविभूषाः । तत्प्रियार्थम् इव यातुम् अथास्तं भानुमान् उपपयोधि ललम्बे

vīkṣya rantumanasaḥ suranārīr āttacitraparidhānavibhūṣāḥ / tatpriyārtham iva yātum athāstaṃ bhānumān upapayodhi lalambe

Sanskrit only: no published translation is held for this verse.

मध्यमोपलनिभे लसदंशाव् एकतश् च्युतिम् उपेयुषि भानौ । द्यौर् उवाह परिवृत्तिविलोलां हारयष्टिम् इव वासरलक्ष्मीम्

madhyamopalanibhe lasadaṃśāv ekataś cyutim upeyuṣi bhānau / dyaur uvāha parivṛttivilolāṃ hārayaṣṭim iva vāsaralakṣmīm

Sanskrit only: no published translation is held for this verse.

अंशुपाणिभिर् अतीव पिपासुः पद्मजं मधु भृशं रसयित्वा । क्षीबताम् इव गतः क्षितिम् एष्यंल् लोहितं वपुर् उवाह पतङ्गः

aṃśupāṇibhir atīva pipāsuḥ padmajaṃ madhu bhṛśaṃ rasayitvā / kṣībatām iva gataḥ kṣitim eṣyaṃl lohitaṃ vapur uvāha pataṅgaḥ

Sanskrit only: no published translation is held for this verse.

गम्यताम् उपगते नयनानां लोहितायाति सहस्रमरीचौ । आससाद विरहय्य धरित्रीं चक्रवाकहृदयान्य् अभितापः

gamyatām upagate nayanānāṃ lohitāyāti sahasramarīcau / āsasāda virahayya dharitrīṃ cakravākahṛdayāny abhitāpaḥ

Sanskrit only: no published translation is held for this verse.

मुक्तमूललघुर् उज्झितपूर्वः पश्चिमे नभसि सम्भृतसान्द्रः । सामि मज्जति रवौ न विरेजे खिन्नजिह्म इव रश्मिसमूहः

muktamūlalaghur ujjhitapūrvaḥ paścime nabhasi sambhṛtasāndraḥ / sāmi majjati ravau na vireje khinnajihma iva raśmisamūhaḥ

Sanskrit only: no published translation is held for this verse.

कान्तदूत्य इव कुङ्कुमताम्राः सायमण्डलम् अभि त्वरयन्त्यः । सादरं ददृशिरे वनिताभिः सौधजालपतिता रविभासः

kāntadūtya iva kuṅkumatāmrāḥ sāyamaṇḍalam abhi tvarayantyaḥ / sādaraṃ dadṛśire vanitābhiḥ saudhajālapatitā ravibhāsaḥ

Sanskrit only: no published translation is held for this verse.

अग्रसानुषु नितान्तपिशङ्गैर् भूरुहान् मृदुकरैर् अवलम्ब्य । अस्तशैलगहनं नु विवस्वान् आविवेश जलधिं नु महीं नु

agrasānuṣu nitāntapiśaṅgair bhūruhān mṛdukarair avalambya / astaśailagahanaṃ nu vivasvān āviveśa jaladhiṃ nu mahīṃ nu

Sanskrit only: no published translation is held for this verse.

आकुलश् चलपतत्रिकुलानाम् आरवैर् अनुदितौषसरागः । आययाव् अहरिदश्वविपाण्डुस् तुल्यतां दिनमुखेन दिनान्तः

ākulaś calapatatrikulānām āravair anuditauṣasarāgaḥ / āyayāv aharidaśvavipāṇḍus tulyatāṃ dinamukhena dināntaḥ

Sanskrit only: no published translation is held for this verse.

आस्थितः स्थगितवारिदपङ्क्त्या संध्यया गगनपश्चिमभागः । सोर्मिविद्रुमविन्तानविभासा रञ्जितस्य जलधेः श्रियम् ऊहे

āsthitaḥ sthagitavāridapaṅktyā saṃdhyayā gaganapaścimabhāgaḥ / sormividrumavintānavibhāsā rañjitasya jaladheḥ śriyam ūhe

Sanskrit only: no published translation is held for this verse.

प्राञ्जलाव् अपि जने नतमूर्ध्नि प्रेम तत्प्रवणचेतसि हित्वा । संध्ययानुविदधे विरमन्त्या चापलेन सुजनेतरमैत्री

prāñjalāv api jane natamūrdhni prema tatpravaṇacetasi hitvā / saṃdhyayānuvidadhe viramantyā cāpalena sujanetaramaitrī

Sanskrit only: no published translation is held for this verse.

औषसातपभयाद् अपलीनं वासरच्छविविरामपटीयः । संनिपत्य शनकैर् इव निम्नाद् अन्धकारम् उदवाप समानि

auṣasātapabhayād apalīnaṃ vāsaracchavivirāmapaṭīyaḥ / saṃnipatya śanakair iva nimnād andhakāram udavāpa samāni

Sanskrit only: no published translation is held for this verse.

एकताम् इव गतस्य विवेकः कस्यचिन् न महतो ऽप्य् उपलेभे । भास्वता निदधिरे भुवनानाम् आत्मनीव पतितेन विशेषाः

ekatām iva gatasya vivekaḥ kasyacin na mahato 'py upalebhe / bhāsvatā nidadhire bhuvanānām ātmanīva patitena viśeṣāḥ

Sanskrit only: no published translation is held for this verse.

इच्छतां सह वधूभिर् अभेदं यामिनीविरहिणां विहगानाम् । आपुर् एव मिथुनानि वियोगं लङ्घ्यते न खलु कालनियोगः

icchatāṃ saha vadhūbhir abhedaṃ yāminīvirahiṇāṃ vihagānām / āpur eva mithunāni viyogaṃ laṅghyate na khalu kālaniyogaḥ

Sanskrit only: no published translation is held for this verse.

यच्छति प्रतिमुखं दयितायै वाचम् अन्तिकगते ऽपि शकुन्तौ । नीयते स्म नतिम् उज्झितहर्षं पङ्कजं मुखम् इवाम्बुरुहिण्या

yacchati pratimukhaṃ dayitāyai vācam antikagate 'pi śakuntau / nīyate sma natim ujjhitaharṣaṃ paṅkajaṃ mukham ivāmburuhiṇyā

Sanskrit only: no published translation is held for this verse.

रञ्जिता नु विविधास् तरुशैला नामितं नु गगनं स्थगितं नु । पूरिता नु विषमेषु धरित्री संहृता नु ककुभस् तिमिरेण

rañjitā nu vividhās taruśailā nāmitaṃ nu gaganaṃ sthagitaṃ nu / pūritā nu viṣameṣu dharitrī saṃhṛtā nu kakubhas timireṇa

Sanskrit only: no published translation is held for this verse.

रात्रिरागमलिनानि विकासं पङ्कजानि रहयन्ति विहाय । स्पष्टतारकम् इयाय नभः श्रीर् वस्तुम् इच्छति निरापदि सर्वः

rātrirāgamalināni vikāsaṃ paṅkajāni rahayanti vihāya / spaṣṭatārakam iyāya nabhaḥ śrīr vastum icchati nirāpadi sarvaḥ

Sanskrit only: no published translation is held for this verse.

व्यानशे शशधरेण विमुक्तः केतकीकुसुमकेसरपाण्डुः । चूर्णमुष्टिर् इव लम्भितकान्तिर् वासवस्य दिशम् अंशुसमूहः

vyānaśe śaśadhareṇa vimuktaḥ ketakīkusumakesarapāṇḍuḥ / cūrṇamuṣṭir iva lambhitakāntir vāsavasya diśam aṃśusamūhaḥ

Sanskrit only: no published translation is held for this verse.

उज्झती शुचम् इवाशु तमिस्राम् अन्तिकं व्रजति तारकराजे । दिक्प्रसादगुणमण्डनम् ऊहे रश्मिहासविशदं मुखम् ऐन्द्री

ujjhatī śucam ivāśu tamisrām antikaṃ vrajati tārakarāje / dikprasādaguṇamaṇḍanam ūhe raśmihāsaviśadaṃ mukham aindrī

Sanskrit only: no published translation is held for this verse.

नीलनीरजनिभे हिमगौरं शैलरुद्धवपुषः सितरश्मेः । खे रराज निपतत्करजालं वारिधेः पयसि गाङ्गम् इवाम्भः

nīlanīrajanibhe himagauraṃ śailaruddhavapuṣaḥ sitaraśmeḥ / khe rarāja nipatatkarajālaṃ vāridheḥ payasi gāṅgam ivāmbhaḥ

Sanskrit only: no published translation is held for this verse.

द्यां निरुन्धद् अतिनीलघनाभं ध्वान्तम् उद्यतकरेण पुरस्तात् । क्षिप्यमाणम् असितेतरभासा शम्भुनेव करिचर्म चकासे

dyāṃ nirundhad atinīlaghanābhaṃ dhvāntam udyatakareṇa purastāt / kṣipyamāṇam asitetarabhāsā śambhuneva karicarma cakāse

Sanskrit only: no published translation is held for this verse.

अन्तिकान्तिकगतेन्दुविसृष्टे जिह्मतां जहति दीधितिजाले । निःसृतस् तिमिरभारनिरोधाद् उच्छ्वसन्न् इव रराज दिगन्तः

antikāntikagatenduvisṛṣṭe jihmatāṃ jahati dīdhitijāle / niḥsṛtas timirabhāranirodhād ucchvasann iva rarāja digantaḥ

Sanskrit only: no published translation is held for this verse.

लेखया विमलविद्रुमभासा संततं तिमिरम् इन्दुर् उदासे । दंष्ट्रया कनकटङ्कपिशङ्ग्या मण्डलं भुव इवादिवराहः

lekhayā vimalavidrumabhāsā saṃtataṃ timiram indur udāse / daṃṣṭrayā kanakaṭaṅkapiśaṅgyā maṇḍalaṃ bhuva ivādivarāhaḥ

Sanskrit only: no published translation is held for this verse.

दीपयन्न् अथ नभः किरणौघैः कुङ्कुमारुणपयोधरगौरः । हेमकुम्भ इव पूर्वपयोधेर् उन्ममज्ज शनकैस् तुहिनांशुः

dīpayann atha nabhaḥ kiraṇaughaiḥ kuṅkumāruṇapayodharagauraḥ / hemakumbha iva pūrvapayodher unmamajja śanakais tuhināṃśuḥ

Sanskrit only: no published translation is held for this verse.

उद्गतेन्दुम् अविभिन्नतमिस्रां पश्यति स्म रजनीम् अवितृप्तः । व्यंशुकस्फुटमुखीम् अतिजिह्मां व्रीडया नववधूम् इव लोकः

udgatendum avibhinnatamisrāṃ paśyati sma rajanīm avitṛptaḥ / vyaṃśukasphuṭamukhīm atijihmāṃ vrīḍayā navavadhūm iva lokaḥ

Sanskrit only: no published translation is held for this verse.

न प्रसादम् उचितं गमिता द्यैर् नोद्धृतं तिमिरम् अद्रिवनेभ्यः । दिङ्मुखेषु न च धाम विकीर्णं भूषितैव रजनी हिमभासा

na prasādam ucitaṃ gamitā dyair noddhṛtaṃ timiram adrivanebhyaḥ / diṅmukheṣu na ca dhāma vikīrṇaṃ bhūṣitaiva rajanī himabhāsā

Sanskrit only: no published translation is held for this verse.

मानिनीजनविलोचनपातान् उष्णबाष्पकलुषान् प्रतिगृह्णन् । मन्दमन्दम् उदितः प्रययौ खं भीतभीत इव शीतमयूखः

māninījanavilocanapātān uṣṇabāṣpakaluṣān pratigṛhṇan / mandamandam uditaḥ prayayau khaṃ bhītabhīta iva śītamayūkhaḥ

Sanskrit only: no published translation is held for this verse.

श्लिष्यतः प्रियवधूर् उपकण्ठं तारकास् ततकरस्य हिमांशोः । उद्वमन्न् अभिरराज समन्ताद् अङ्गराग इव लोहितरागः

śliṣyataḥ priyavadhūr upakaṇṭhaṃ tārakās tatakarasya himāṃśoḥ / udvamann abhirarāja samantād aṅgarāga iva lohitarāgaḥ

Sanskrit only: no published translation is held for this verse.

प्रेरितः शशधरेण करौघः संहतान्य् अपि नुनोद तमांसि । क्षीरसिन्धुर् इव मन्दरभिन्नः काननान्य् अविरलोच्चतरूणि

preritaḥ śaśadhareṇa karaughaḥ saṃhatāny api nunoda tamāṃsi / kṣīrasindhur iva mandarabhinnaḥ kānanāny aviraloccatarūṇi

Sanskrit only: no published translation is held for this verse.

शारतां गमितया शशिपादैश् छायया विटपिनां प्रतिपेदे । न्यस्तशुक्लबलिचित्रतलाभिस् तुल्यता वसतिवेश्ममहीभिः

śāratāṃ gamitayā śaśipādaiś chāyayā viṭapināṃ pratipede / nyastaśuklabalicitratalābhis tulyatā vasativeśmamahībhiḥ

Sanskrit only: no published translation is held for this verse.

आतपे धृतिमता सह वध्वा यामिनीविरहिणा विहगेन । सेहिरे न किरणा हिमरश्मेर् दुःखिते मनसि सर्वम् असह्यम्

ātape dhṛtimatā saha vadhvā yāminīvirahiṇā vihagena / sehire na kiraṇā himaraśmer duḥkhite manasi sarvam asahyam

Sanskrit only: no published translation is held for this verse.

गन्धम् उद्धतरजःकणवाही विक्षिपन् विकसतां कुमुदानाम् । आदुधाव परिलीनविहङ्गा यामिनीमरुद् अपां वनराजीः

gandham uddhatarajaḥkaṇavāhī vikṣipan vikasatāṃ kumudānām / ādudhāva parilīnavihaṅgā yāminīmarud apāṃ vanarājīḥ

Sanskrit only: no published translation is held for this verse.

संविधातुम् अभिषेकम् उदासे मन्मथस्य लसदंशुजलौघः । यामिनीवनितया ततचिह्नः सोत्पलो रजतकुम्भ इवेन्दुः

saṃvidhātum abhiṣekam udāse manmathasya lasadaṃśujalaughaḥ / yāminīvanitayā tatacihnaḥ sotpalo rajatakumbha ivenduḥ

Sanskrit only: no published translation is held for this verse.

ओजसापि खलु नूनम् अनूनं नासहायम् उपयाति जयश्रीः । यद् विभुः शशिमयूखसखः सन्न् आददे विजयि चापम् अनङ्गः

ojasāpi khalu nūnam anūnaṃ nāsahāyam upayāti jayaśrīḥ / yad vibhuḥ śaśimayūkhasakhaḥ sann ādade vijayi cāpam anaṅgaḥ

Sanskrit only: no published translation is held for this verse.

सद्मनां विरचनाहितशोभैर् आगतप्रियकथैर् अपि दूत्यम् । संनिकृष्टरतिभिः सुरदारैर् भूषितैर् अपि विभूषणम् ईषे

sadmanāṃ viracanāhitaśobhair āgatapriyakathair api dūtyam / saṃnikṛṣṭaratibhiḥ suradārair bhūṣitair api vibhūṣaṇam īṣe

Sanskrit only: no published translation is held for this verse.

न स्रजो रुरुचिरे रमणीभ्यश् चन्दनानि विरहे मदिरा वा । साधनेषु हि रतेर् उपधत्ते रम्यतां प्रियसमागम एव

na srajo rurucire ramaṇībhyaś candanāni virahe madirā vā / sādhaneṣu hi rater upadhatte ramyatāṃ priyasamāgama eva

Sanskrit only: no published translation is held for this verse.

प्रस्थिताभिर् अधिनाथनिवासं ध्वंसितप्रियसखीवचनाभिः । मानिनीभिर् अपहस्तितधैर्यः सादयन्न् इव मदो ऽवललम्बे

prasthitābhir adhināthanivāsaṃ dhvaṃsitapriyasakhīvacanābhiḥ / māninībhir apahastitadhairyaḥ sādayann iva mado 'valalambe

Sanskrit only: no published translation is held for this verse.

कान्तवेश्म बहु संदिशतीभिर् यातम् एव रतये रमणीभिः । मन्मथेन परिलुप्तमतीनां प्रायशः स्खलितम् अप्य् उपकारि

kāntaveśma bahu saṃdiśatībhir yātam eva rataye ramaṇībhiḥ / manmathena pariluptamatīnāṃ prāyaśaḥ skhalitam apy upakāri

Sanskrit only: no published translation is held for this verse.

आशु कान्तम् अभिसारितवत्या योषितः पुलकरुद्धकपोलम् । निर्जिगाय मुखम् इन्दुम् अखण्डं खण्डपत्रतिलकाकृति कान्त्या

āśu kāntam abhisāritavatyā yoṣitaḥ pulakaruddhakapolam / nirjigāya mukham indum akhaṇḍaṃ khaṇḍapatratilakākṛti kāntyā

Sanskrit only: no published translation is held for this verse.

उच्यतां स वचनीयम् अशेषं नेश्वरे परुषता सखि साध्वी । आनयैनम् अनुनीय कथं वा विप्रियाणि जनयन्न् अनुनेयः

ucyatāṃ sa vacanīyam aśeṣaṃ neśvare paruṣatā sakhi sādhvī / ānayainam anunīya kathaṃ vā vipriyāṇi janayann anuneyaḥ

Sanskrit only: no published translation is held for this verse.

किं गतेन न हि युक्तम् उपैतुं कः प्रिये सुभगमानिनि मानः । योषिताम् इति कथासु समेतैः कामिभिर् बहुरसा धृतिर् ऊहे

kiṃ gatena na hi yuktam upaituṃ kaḥ priye subhagamānini mānaḥ / yoṣitām iti kathāsu sametaiḥ kāmibhir bahurasā dhṛtir ūhe

Sanskrit only: no published translation is held for this verse.

योषितः पुलकरोधि दधत्या घर्मवारि नवसंगमजन्म । कान्तवक्षसि बभूव पतन्त्या मण्डनं लुलितमण्डनतैव

yoṣitaḥ pulakarodhi dadhatyā gharmavāri navasaṃgamajanma / kāntavakṣasi babhūva patantyā maṇḍanaṃ lulitamaṇḍanataiva

Sanskrit only: no published translation is held for this verse.

शीधुपानविधुरासु निगृह्णन् मानम् आशु शिथिलीकृतलज्जः । संगतासु दयितैर् उपलेभे कामिनीषु मदनो नु मदो नु

śīdhupānavidhurāsu nigṛhṇan mānam āśu śithilīkṛtalajjaḥ / saṃgatāsu dayitair upalebhe kāminīṣu madano nu mado nu

Sanskrit only: no published translation is held for this verse.

द्वारि चक्षुर् अधिपाणि कपोलौ कीवितं त्वयि कुतः कलहो ऽस्याः । कामिनाम् इति वचः पुनरुक्तं प्रीतये नवनवत्वम् इयाय

dvāri cakṣur adhipāṇi kapolau kīvitaṃ tvayi kutaḥ kalaho 'syāḥ / kāminām iti vacaḥ punaruktaṃ prītaye navanavatvam iyāya

Sanskrit only: no published translation is held for this verse.

साचि लोचनयुगं नमयन्ती रुन्धती दयितवक्षसि पातम् । सुभ्रुवो जनयति स्म विभूषां संगताव् उपरराम च लज्जा

sāci locanayugaṃ namayantī rundhatī dayitavakṣasi pātam / subhruvo janayati sma vibhūṣāṃ saṃgatāv upararāma ca lajjā

Sanskrit only: no published translation is held for this verse.

सव्यलीकम् अवधीरितखिन्नं प्रस्थितं सपदि कोपपदेन । योषितः सुहृद् इव स्म रुणद्धि प्राणनाथम् अभिबाष्पनिपातः

savyalīkam avadhīritakhinnaṃ prasthitaṃ sapadi kopapadena / yoṣitaḥ suhṛd iva sma ruṇaddhi prāṇanātham abhibāṣpanipātaḥ

Sanskrit only: no published translation is held for this verse.

शङ्किताय कृतबाष्पनिपाताम् ईर्ष्यया विमुखितां दयिताय । मानिनिम् अभिमुखाहितचित्तां शंसति स्म घनरोमविभेदः

śaṅkitāya kṛtabāṣpanipātām īrṣyayā vimukhitāṃ dayitāya / māninim abhimukhāhitacittāṃ śaṃsati sma ghanaromavibhedaḥ

Sanskrit only: no published translation is held for this verse.

लोलदृष्टि वदनं दयितायाश् चुम्बति प्रियतमे रभसेन । व्रीडया सह विनीवि नितम्बाद् अंशुकं शिथिलताम् उपपदे

loladṛṣṭi vadanaṃ dayitāyāś cumbati priyatame rabhasena / vrīḍayā saha vinīvi nitambād aṃśukaṃ śithilatām upapade

Sanskrit only: no published translation is held for this verse.

ह्रीतय अगलितनीवि निरस्यन्न् अन्तरीयम् अवलम्बितकाञ्चि । मण्डलीकृतपृथुस्तनभारं सस्वजे दयितया हृदयेशः

hrītaya agalitanīvi nirasyann antarīyam avalambitakāñci / maṇḍalīkṛtapṛthustanabhāraṃ sasvaje dayitayā hṛdayeśaḥ

Sanskrit only: no published translation is held for this verse.

आदृता नखपदैः परिरम्भाश् चुम्बितानि घनदन्तनिपातैः । सौकुमार्यगुणसम्भृतकीर्तिर् वाम एव सुरतेष्व् अपि कामः

ādṛtā nakhapadaiḥ parirambhāś cumbitāni ghanadantanipātaiḥ / saukumāryaguṇasambhṛtakīrtir vāma eva surateṣv api kāmaḥ

Sanskrit only: no published translation is held for this verse.

पाणिपल्लवविधूननम् अन्तः सीत्कृतानि नयनार्धनिमेषाः । योषितां रहसि गद्गदवाचाम् अस्त्रताम् उपययुर् मदनस्य

pāṇipallavavidhūnanam antaḥ sītkṛtāni nayanārdhanimeṣāḥ / yoṣitāṃ rahasi gadgadavācām astratām upayayur madanasya

Sanskrit only: no published translation is held for this verse.

पातुम् आहितरतीन्य् अभिलेषुस् तर्षयन्त्य् अपुनरुक्तरसानि । सस्मितानि वदनानि वधूनां सोत्पलानि च मधूनि युवानः

pātum āhitaratīny abhileṣus tarṣayanty apunaruktarasāni / sasmitāni vadanāni vadhūnāṃ sotpalāni ca madhūni yuvānaḥ

Sanskrit only: no published translation is held for this verse.

कान्तसंगमपराजितमन्यौ वारुणीरसनशान्तविवादे । मानिनीजन उपाहितसंधौ संदधे धनुषि नेषुम् अनङ्गः

kāntasaṃgamaparājitamanyau vāruṇīrasanaśāntavivāde / māninījana upāhitasaṃdhau saṃdadhe dhanuṣi neṣum anaṅgaḥ

Sanskrit only: no published translation is held for this verse.

कुप्यताशु भवतानतचित्ताः कोपितांश् च वरिवस्यत यूनः । इत्य् अनेक उपदेश इव स्म स्वाद्यते युवतिभिर् मधुवारः

kupyatāśu bhavatānatacittāḥ kopitāṃś ca varivasyata yūnaḥ / ity aneka upadeśa iva sma svādyate yuvatibhir madhuvāraḥ

Sanskrit only: no published translation is held for this verse.

भर्तृभिः प्रणयसम्भ्रमदत्तां वारुणीम् अतिरसां रसयित्वा । ह्रीविमोहविरहाद् उपलेभे पाटवं नु हृदयं नु वधूभिः

bhartṛbhiḥ praṇayasambhramadattāṃ vāruṇīm atirasāṃ rasayitvā / hrīvimohavirahād upalebhe pāṭavaṃ nu hṛdayaṃ nu vadhūbhiḥ

Sanskrit only: no published translation is held for this verse.

स्वादितः स्वयम् अथैधितमानं लम्भितः प्रियतमैः सह पीतः । आसवः प्रतिपदं प्रमदानां नैकरूपरसताम् इव भेजे

svāditaḥ svayam athaidhitamānaṃ lambhitaḥ priyatamaiḥ saha pītaḥ / āsavaḥ pratipadaṃ pramadānāṃ naikarūparasatām iva bheje

Sanskrit only: no published translation is held for this verse.

भ्रूविलाससुभगान् अनुकर्तुं विभ्रमान् इव वधूनयनानाम् । आददे मृदुविलोकपलाशैर् उत्पलैश् चषकवीचिषु कम्पः

bhrūvilāsasubhagān anukartuṃ vibhramān iva vadhūnayanānām / ādade mṛduvilokapalāśair utpalaiś caṣakavīciṣu kampaḥ

Sanskrit only: no published translation is held for this verse.

ओष्ठपल्लवविदंशरुचीनां हृद्यताम् उपययौ रमणानाम् । फुल्ललोचनविनीलसरोजैर् अङ्गनास्यचषकैर् मधुवारः

oṣṭhapallavavidaṃśarucīnāṃ hṛdyatām upayayau ramaṇānām / phullalocanavinīlasarojair aṅganāsyacaṣakair madhuvāraḥ

Sanskrit only: no published translation is held for this verse.

प्राप्यते गुणवतापि गुणानां व्यक्तम् आश्रयवशेन विशेषः । तत् तथा हि दयिताननदत्तं व्यानशे मधु रसातिशयेन

prāpyate guṇavatāpi guṇānāṃ vyaktam āśrayavaśena viśeṣaḥ / tat tathā hi dayitānanadattaṃ vyānaśe madhu rasātiśayena

Sanskrit only: no published translation is held for this verse.

वीक्ष्य रत्नचषकेष्व् अतिरिक्तां कान्तदन्तपदमण्डनलक्ष्मीम् । जज्ञिरे बहुमताः प्रमदानाम् ओष्ठयावकनुदो मधुवाराः

vīkṣya ratnacaṣakeṣv atiriktāṃ kāntadantapadamaṇḍanalakṣmīm / jajñire bahumatāḥ pramadānām oṣṭhayāvakanudo madhuvārāḥ

Sanskrit only: no published translation is held for this verse.

लोचनाधरकृताहृतरागा वासिताननविशेषितगन्धा । वारुणी परगुणात्मगुणानां व्यत्ययं विनिमयं नु वितेने

locanādharakṛtāhṛtarāgā vāsitānanaviśeṣitagandhā / vāruṇī paraguṇātmaguṇānāṃ vyatyayaṃ vinimayaṃ nu vitene

Sanskrit only: no published translation is held for this verse.

तुल्यरूपम् असितोत्पलम् अक्ष्णोः कर्णगं निरुपकारि विदित्वा । योषितः सुहृद् इव प्रविभेजे लम्भितेक्षणरुचिर् मदरागः

tulyarūpam asitotpalam akṣṇoḥ karṇagaṃ nirupakāri viditvā / yoṣitaḥ suhṛd iva pravibheje lambhitekṣaṇarucir madarāgaḥ

Sanskrit only: no published translation is held for this verse.

क्षीणयावकरसो ऽप्य् अतिपानैः कान्तदन्तपदसम्भृतशोभः । आययाव् अतितराम् इव वध्वाः सान्द्रताम् अधरपल्लवरागः

kṣīṇayāvakaraso 'py atipānaiḥ kāntadantapadasambhṛtaśobhaḥ / āyayāv atitarām iva vadhvāḥ sāndratām adharapallavarāgaḥ

Sanskrit only: no published translation is held for this verse.

रागजान्तनयनेषु नितान्तं विद्रुमारुणकपोलतलेषु । सर्वगापि ददृशे वनितानां दर्पणेष्व् इव मुखेषु मदश्रीः

rāgajāntanayaneṣu nitāntaṃ vidrumāruṇakapolataleṣu / sarvagāpi dadṛśe vanitānāṃ darpaṇeṣv iva mukheṣu madaśrīḥ

Sanskrit only: no published translation is held for this verse.

बद्धकोपविकृतीर् अपि रामाश् चारुताभिमतताम् उपनिन्ये । वश्यतां मधुमदो दयितानाम् आत्मवर्गहितम् इच्छति सर्वः

baddhakopavikṛtīr api rāmāś cārutābhimatatām upaninye / vaśyatāṃ madhumado dayitānām ātmavargahitam icchati sarvaḥ

Sanskrit only: no published translation is held for this verse.

वाससां शिथिलताम् उपनाभि ह्रीनिरासम् अपदे कुपितानि । योषितां विदधती गुणपक्षे निर्ममार्ज मदिरा वचनीयम्

vāsasāṃ śithilatām upanābhi hrīnirāsam apade kupitāni / yoṣitāṃ vidadhatī guṇapakṣe nirmamārja madirā vacanīyam

Sanskrit only: no published translation is held for this verse.

भर्तृषूपसखि निक्षिपतीनाम् आत्मनो मधुमदोद्यमितानाम् । व्रीडया विफलया वनितानां न स्थितं न विगतं हृदयेषु

bhartṛṣūpasakhi nikṣipatīnām ātmano madhumadodyamitānām / vrīḍayā viphalayā vanitānāṃ na sthitaṃ na vigataṃ hṛdayeṣu

Sanskrit only: no published translation is held for this verse.

रुन्धती नयनवाक्यविकासं सादितो भयकरा परिरम्भे । व्रीडितस्य ललितं युवतीनां क्षीबता बहुगुणैर् अनुजह्रे

rundhatī nayanavākyavikāsaṃ sādito bhayakarā parirambhe / vrīḍitasya lalitaṃ yuvatīnāṃ kṣībatā bahuguṇair anujahre

Sanskrit only: no published translation is held for this verse.

योषिद् उद्धतमनोभवरागा मानवत्य् अपि ययौ दयिताङ्कम् । कारयत्य् अनिभृता गुणदोषे वारुणी खलु रहस्यविभेदम्

yoṣid uddhatamanobhavarāgā mānavaty api yayau dayitāṅkam / kārayaty anibhṛtā guṇadoṣe vāruṇī khalu rahasyavibhedam

Sanskrit only: no published translation is held for this verse.

आहिते नु मधुना मधुरत्वे चेष्टितस्य गमिते नु विकासम् । आबभौ नव इवोद्धतरागः कामिनीष्व् अवसरः कुसुमेषोः

āhite nu madhunā madhuratve ceṣṭitasya gamite nu vikāsam / ābabhau nava ivoddhatarāgaḥ kāminīṣv avasaraḥ kusumeṣoḥ

Sanskrit only: no published translation is held for this verse.

मा गमन् मदविमूढधियो नः प्रोज्झ्य रन्तुम् इति शङ्कितनाथाः । योषितो न मदिरां भृशम् ईषुः प्रेम पश्यति भयान्य् अपदे ऽपि

mā gaman madavimūḍhadhiyo naḥ projjhya rantum iti śaṅkitanāthāḥ / yoṣito na madirāṃ bhṛśam īṣuḥ prema paśyati bhayāny apade 'pi

Sanskrit only: no published translation is held for this verse.

चित्तनिर्वृतिविधायि विविक्तं मन्मथो मधुमदः शशिभासः । संगमश् च दयितैः स्म नयन्ति प्रेम काम् अपि भुवं प्रमदानाम्

cittanirvṛtividhāyi viviktaṃ manmatho madhumadaḥ śaśibhāsaḥ / saṃgamaś ca dayitaiḥ sma nayanti prema kām api bhuvaṃ pramadānām

Sanskrit only: no published translation is held for this verse.

धार्ष्ट्यलङ्घितयथोचितभूमौ निर्दयं विलुलितालकमाल्ये । मानिनीरतिविधौ कुसुमेषुर् मत्तमत्त इव विभ्रमम् आप

dhārṣṭyalaṅghitayathocitabhūmau nirdayaṃ vilulitālakamālye / māninīratividhau kusumeṣur mattamatta iva vibhramam āpa

Sanskrit only: no published translation is held for this verse.

शीधुपानविधुरेषु वधूनां विघ्नताम् उपगतेषु वपुःषु । ईहितं रतिरसाहितभावं वीतलक्ष्यम् अपि कामिषु रेजे

śīdhupānavidhureṣu vadhūnāṃ vighnatām upagateṣu vapuḥṣu / īhitaṃ ratirasāhitabhāvaṃ vītalakṣyam api kāmiṣu reje

Sanskrit only: no published translation is held for this verse.

अन्योन्यरक्तमनसाम् अथ बिभ्रतीनां चेतोभुवो हरिसखाप्सरसां निदेशम् । वैबोधिकध्वनिविभावितपश्चिमार्धा सा संहृतेव परिवृत्तिम् इयाय रात्रिः

anyonyaraktamanasām atha bibhratīnāṃ cetobhuvo harisakhāpsarasāṃ nideśam / vaibodhikadhvanivibhāvitapaścimārdhā sā saṃhṛteva parivṛttim iyāya rātriḥ

Sanskrit only: no published translation is held for this verse.

निद्राविनोदितनितान्तरतिक्लमानाम् आयामिमङ्गलनिनादविबोधितानाम् । रामासु भाविविरहाकुलितासु यूनां तत्पूर्वताम् इव समादधिरे रतानि

nidrāvinoditanitāntaratiklamānām āyāmimaṅgalaninādavibodhitānām / rāmāsu bhāvivirahākulitāsu yūnāṃ tatpūrvatām iva samādadhire ratāni

Sanskrit only: no published translation is held for this verse.

कान्ताजनं सुरतखेदनिमीलिताक्षं संवाहितुं समुपयान् इव मन्दमन्दम् । हर्म्येषु माल्यमदिरापरिभोगगन्धान् आविश्चकार रजनीपरिवृत्तिवायुः

kāntājanaṃ suratakhedanimīlitākṣaṃ saṃvāhituṃ samupayān iva mandamandam / harmyeṣu mālyamadirāparibhogagandhān āviścakāra rajanīparivṛttivāyuḥ

Sanskrit only: no published translation is held for this verse.

आमोदवासितचलाधरपल्लवेषु निद्राकषायितविपाटललोचनेषु । व्यामृष्टपत्त्रतिलकेषु विलासिनीनां शोभां बबन्ध वदनेषु मदावशेषः

āmodavāsitacalādharapallaveṣu nidrākaṣāyitavipāṭalalocaneṣu / vyāmṛṣṭapattratilakeṣu vilāsinīnāṃ śobhāṃ babandha vadaneṣu madāvaśeṣaḥ

Sanskrit only: no published translation is held for this verse.

गतवति नखलेखालक्ष्यताम् अङ्गरागे समददयितपीताताम्रबिम्बाधराणाम् । विरहविधुरम् इष्टा सत्सखीवङ्गनानां हृदयम् अवललम्बे रात्रिसम्भोगलक्ष्मीः

gatavati nakhalekhālakṣyatām aṅgarāge samadadayitapītātāmrabimbādharāṇām / virahavidhuram iṣṭā satsakhīvaṅganānāṃ hṛdayam avalalambe rātrisambhogalakṣmīḥ

Sanskrit only: no published translation is held for this verse.