Bhāgavata Purāṇa 1.12

शौनक उवाच अश्वत्थाम्नोपसृष्टेन ब्रह्मशीर्ष्णोरुतेजसा उत्तराया हतो गर्भ ईशेनाजीवितः पुनः

śaunaka uvāca aśvatthāmnopasṛṣṭena brahmaśīrṣṇorutejasā uttarāyā hato garbha īśenājīvitaḥ punaḥ

Sanskrit only: no published translation is held for this verse.

तस्य जन्म महाबुद्धेः कर्माणि च महात्मनः निधनं च यथैवासीत् स प्रेत्य गतवान् यथा

tasya janma mahābuddheḥ karmāṇi ca mahātmanaḥ nidhanaṃ ca yathaivāsīt sa pretya gatavān yathā

Sanskrit only: no published translation is held for this verse.

तदिदं श्रोतुम् इच्छामो गदितुं यदि मन्यसे ब्रूहि नः श्रद्दधानानां यस्य ज्ञानम् अदाच् छुकः

tadidaṃ śrotum icchāmo gadituṃ yadi manyase brūhi naḥ śraddadhānānāṃ yasya jñānam adāc chukaḥ

Sanskrit only: no published translation is held for this verse.

सूत उवाच अपीपलद्धर्मराजः पितृवद्रञ्जयन् प्रजाः निःस्पृहः सर्वकामेभ्यः कृष्णपादानुसेवया

sūta uvāca apīpaladdharmarājaḥ pitṛvadrañjayan prajāḥ niḥspṛhaḥ sarvakāmebhyaḥ kṛṣṇapādānusevayā

Sanskrit only: no published translation is held for this verse.

सम्पदः क्रतवो लोका महिषी भ्रातरो मही जम्बूद्वीपाधिपत्यं च यशश्च त्रिदिवं गतम्

sampadaḥ kratavo lokā mahiṣī bhrātaro mahī jambūdvīpādhipatyaṃ ca yaśaśca tridivaṃ gatam

Sanskrit only: no published translation is held for this verse.

किं ते कामाः सुरस्पार्हा मुकुन्दमनसो द्विजाः अधिजह्रुर्मुदं राज्ञः क्षुधितस्य यथेतरे

kiṃ te kāmāḥ suraspārhā mukundamanaso dvijāḥ adhijahrurmudaṃ rājñaḥ kṣudhitasya yathetare

Sanskrit only: no published translation is held for this verse.

मातुर्गर्भगतो वीरः स तदा भृगुनन्दन ददर्श पुरुषं कञ्चिद्दह्यमानो ऽस्त्रतेजसा

māturgarbhagato vīraḥ sa tadā bhṛgunandana dadarśa puruṣaṃ kañciddahyamāno 'stratejasā

Sanskrit only: no published translation is held for this verse.

अङ्गुष्ठमात्रम् अमलं स्फुरत्पुरटमौलिनम् अपीव्यदर्शनं श्यामं तडिद्वाससम् अच्युतम्

aṅguṣṭhamātram amalaṃ sphuratpuraṭamaulinam apīvyadarśanaṃ śyāmaṃ taḍidvāsasam acyutam

Sanskrit only: no published translation is held for this verse.

श्रीमद्दीर्घचतुर्बाहुं तप्तकाञ्चनकुण्डलम् क्षतजाक्षं गदापाणिम् आत्मनः सर्वतो दिशम् परिभ्रमन्तम् उल्काभां भ्रामयन्तं गदां मुहुः

śrīmaddīrghacaturbāhuṃ taptakāñcanakuṇḍalam kṣatajākṣaṃ gadāpāṇim ātmanaḥ sarvato diśam paribhramantam ulkābhāṃ bhrāmayantaṃ gadāṃ muhuḥ

Sanskrit only: no published translation is held for this verse.

अस्त्रतेजः स्वगदया नीहारम् इव गोपतिः विधमन्तं सन्निकर्षे पर्यैक्षत क इत्यसौ

astratejaḥ svagadayā nīhāram iva gopatiḥ vidhamantaṃ sannikarṣe paryaikṣata ka ityasau

Sanskrit only: no published translation is held for this verse.

विधूय तदमेयात्मा भगवान् धर्मगुब् विभुः मिषतो दशमासस्य तत्रैवान्तर्दधे हरिः

vidhūya tadameyātmā bhagavān dharmagub vibhuḥ miṣato daśamāsasya tatraivāntardadhe hariḥ

Sanskrit only: no published translation is held for this verse.

ततः सर्वगुणोदर्के सानुकूलग्रहोदये जज्ञे वंशधरः पाण्डोर्भूयः पाण्डुरिवौजसा

tataḥ sarvaguṇodarke sānukūlagrahodaye jajñe vaṃśadharaḥ pāṇḍorbhūyaḥ pāṇḍurivaujasā

Sanskrit only: no published translation is held for this verse.

तस्य प्रीतमना राजा विप्रैर्धौम्यकृपादिभिः जातकं कारयाम् आस वाचयित्वा च मङ्गलम्

tasya prītamanā rājā viprairdhaumyakṛpādibhiḥ jātakaṃ kārayām āsa vācayitvā ca maṅgalam

Sanskrit only: no published translation is held for this verse.

हिरण्यं गां महीं ग्रामान् हस्त्यश्वान् नृपतिर्वरान् प्रादात् स्वन्नं च विप्रेभ्यः प्रजातीर्थे स तीर्थवित्

hiraṇyaṃ gāṃ mahīṃ grāmān hastyaśvān nṛpatirvarān prādāt svannaṃ ca viprebhyaḥ prajātīrthe sa tīrthavit

Sanskrit only: no published translation is held for this verse.

तम् ऊचुर्ब्राह्मणास्तुष्टा राजानं प्रश्रयान्वितम् एष ह्यस्मिन् प्रजातन्तौ पुरूणां पौरवर्षभ

tam ūcurbrāhmaṇāstuṣṭā rājānaṃ praśrayānvitam eṣa hyasmin prajātantau purūṇāṃ pauravarṣabha

Sanskrit only: no published translation is held for this verse.

दैवेनाप्रतिघातेन शुक्ले संस्थाम् उपेयुषि रातो वो ऽनुग्रहार्थाय विष्णुना प्रभविष्णुना

daivenāpratighātena śukle saṃsthām upeyuṣi rāto vo 'nugrahārthāya viṣṇunā prabhaviṣṇunā

Sanskrit only: no published translation is held for this verse.

तस्मान् नाम्ना विष्णुरात इति लोके भविष्यति न सन्देहो महाभाग महाभागवतो महान्

tasmān nāmnā viṣṇurāta iti loke bhaviṣyati na sandeho mahābhāga mahābhāgavato mahān

Sanskrit only: no published translation is held for this verse.

श्रीराजोवाच अप्येष वंश्यान् राजर्षीन् पुण्यश्लोकान् महात्मनः अनुवर्तिता स्विद्यशसा साधुवादेन सत्तमाः

śrīrājovāca apyeṣa vaṃśyān rājarṣīn puṇyaślokān mahātmanaḥ anuvartitā svidyaśasā sādhuvādena sattamāḥ

Sanskrit only: no published translation is held for this verse.

ब्राह्मणा ऊचुः पार्थ प्रजाविता साक्षादिक्ष्वाकुरिव मानवः ब्रह्मण्यः सत्यसन्धश्च रामो दाशरथिर्यथा

brāhmaṇā ūcuḥ pārtha prajāvitā sākṣādikṣvākuriva mānavaḥ brahmaṇyaḥ satyasandhaśca rāmo dāśarathiryathā

Sanskrit only: no published translation is held for this verse.

एष दाता शरण्यश्च यथा ह्यौशीनरः शिबिः यशो वितनिता स्वानां दौष्यन्तिरिव यज्वनाम्

eṣa dātā śaraṇyaśca yathā hyauśīnaraḥ śibiḥ yaśo vitanitā svānāṃ dauṣyantiriva yajvanām

Sanskrit only: no published translation is held for this verse.

धन्विनाम् अग्रणीरेष तुल्यश्चार्जुनयोर्द्वयोः हुताश इव दुर्धर्षः समुद्र इव दुस्तरः

dhanvinām agraṇīreṣa tulyaścārjunayordvayoḥ hutāśa iva durdharṣaḥ samudra iva dustaraḥ

Sanskrit only: no published translation is held for this verse.

मृगेन्द्र इव विक्रान्तो निषेव्यो हिमवान् इव तितिक्षुर्वसुधेवासौ सहिष्णुः पितराविव

mṛgendra iva vikrānto niṣevyo himavān iva titikṣurvasudhevāsau sahiṣṇuḥ pitarāviva

Sanskrit only: no published translation is held for this verse.

पितामहसमः साम्ये प्रसादे गिरिशोपमः आश्रयः सर्वभूतानां यथा देवो रमाश्रयः

pitāmahasamaḥ sāmye prasāde giriśopamaḥ āśrayaḥ sarvabhūtānāṃ yathā devo ramāśrayaḥ

Sanskrit only: no published translation is held for this verse.

सर्वसद्गुणमाहात्म्ये एष कृष्णम् अनुव्रतः रन्तिदेव इवोदारो ययातिरिव धार्मिकः

sarvasadguṇamāhātmye eṣa kṛṣṇam anuvrataḥ rantideva ivodāro yayātiriva dhārmikaḥ

Sanskrit only: no published translation is held for this verse.

हृत्या बलिसमः कृष्णे प्रह्राद इव सद्ग्रहः आहर्तैषो ऽश्वमेधानां वृद्धानां पर्युपासकः

hṛtyā balisamaḥ kṛṣṇe prahrāda iva sadgrahaḥ āhartaiṣo 'śvamedhānāṃ vṛddhānāṃ paryupāsakaḥ

Sanskrit only: no published translation is held for this verse.

राजर्षीणां जनयिता शास्ता चोत्पथगामिनाम् निग्रहीता कलेरेष भुवो धर्मस्य कारणात्

rājarṣīṇāṃ janayitā śāstā cotpathagāminām nigrahītā kalereṣa bhuvo dharmasya kāraṇāt

Sanskrit only: no published translation is held for this verse.

तक्षकादात्मनो मृत्युं द्विजपुत्रोपसर्जितात् प्रपत्स्यत उपश्रुत्य मुक्तसङ्गः पदं हरेः

takṣakādātmano mṛtyuṃ dvijaputropasarjitāt prapatsyata upaśrutya muktasaṅgaḥ padaṃ hareḥ

Sanskrit only: no published translation is held for this verse.

जिज्ञासितात्मयाथार्थ्यो मुनेर्व्याससुतादसौ हित्वेदं नृप गङ्गायां यास्यत्यद्धाकुतोभयम्

jijñāsitātmayāthārthyo munervyāsasutādasau hitvedaṃ nṛpa gaṅgāyāṃ yāsyatyaddhākutobhayam

Sanskrit only: no published translation is held for this verse.

इति राज्ञ उपादिश्य विप्रा जातककोविदाः लब्धापचितयः सर्वे प्रतिजग्मुः स्वकान् गृहान्

iti rājña upādiśya viprā jātakakovidāḥ labdhāpacitayaḥ sarve pratijagmuḥ svakān gṛhān

Sanskrit only: no published translation is held for this verse.

स एष लोके विख्यातः परीक्षिदिति यत् प्रभुः पूर्वं दृष्टम् अनुध्यायन् परीक्षेत नरेष्विह

sa eṣa loke vikhyātaḥ parīkṣiditi yat prabhuḥ pūrvaṃ dṛṣṭam anudhyāyan parīkṣeta nareṣviha

Sanskrit only: no published translation is held for this verse.

स राजपुत्रो ववृधे आशु शुक्ल इवोडुपः आपूर्यमाणः पितृभिः काष्ठाभिरिव सो ऽन्वहम्

sa rājaputro vavṛdhe āśu śukla ivoḍupaḥ āpūryamāṇaḥ pitṛbhiḥ kāṣṭhābhiriva so 'nvaham

Sanskrit only: no published translation is held for this verse.

यक्ष्यमाणो ऽश्वमेधेन ज्ञातिद्रोहजिहासया राजा लब्धधनो दध्यौ नान्यत्र करदण्डयोः

yakṣyamāṇo 'śvamedhena jñātidrohajihāsayā rājā labdhadhano dadhyau nānyatra karadaṇḍayoḥ

Sanskrit only: no published translation is held for this verse.

तदभिप्रेतम् आलक्ष्य भ्रातरो ञ्च्युतचोदिताः धनं प्रहीणम् आजह्रुरुदीच्यां दिशि भूरिशः

tadabhipretam ālakṣya bhrātaro ñcyutacoditāḥ dhanaṃ prahīṇam ājahrurudīcyāṃ diśi bhūriśaḥ

Sanskrit only: no published translation is held for this verse.

तेन सम्भृतसम्भारो धर्मपुत्रो युधिष्ठिरः वाजिमेधैस्त्रिभिर्भीतो यज्ञैः समयजद्धरिम्

tena sambhṛtasambhāro dharmaputro yudhiṣṭhiraḥ vājimedhaistribhirbhīto yajñaiḥ samayajaddharim

Sanskrit only: no published translation is held for this verse.

आहूतो भगवान् राज्ञा याजयित्वा द्विजैर्नृपम् उवास कतिचिन् मासान् सुहृदां प्रियकाम्यया

āhūto bhagavān rājñā yājayitvā dvijairnṛpam uvāsa katicin māsān suhṛdāṃ priyakāmyayā

Sanskrit only: no published translation is held for this verse.

ततो राज्ञाभ्यनुज्ञातः कृष्णया सहबन्धुभिः ययौ द्वारवतीं ब्रह्मन् सार्जुनो यदुभिर्वृतः

tato rājñābhyanujñātaḥ kṛṣṇayā sahabandhubhiḥ yayau dvāravatīṃ brahman sārjuno yadubhirvṛtaḥ

Sanskrit only: no published translation is held for this verse.