Library·Bhāgavata Purāṇa·10·10.1
श्री-राजोवाच कथितो वंश-विस्तारो भवता सोम-सूर्ययोः राज्ञां चोभय-वंश्यानां चरितं परमाद्भुतम्
śrī-rājovāca kathito vaṃśa-vistāro bhavatā soma-sūryayoḥ rājñāṃ cobhaya-vaṃśyānāṃ caritaṃ paramādbhutam
Sanskrit only: no published translation is held for this verse.
यदोश् च धर्म-शीलस्य नितरां मुनि-सत्तम तत्रांशेनावतीर्णस्य विष्णोर् वीर्याणि शंस नः
yadoś ca dharma-śīlasya nitarāṃ muni-sattama tatrāṃśenāvatīrṇasya viṣṇor vīryāṇi śaṃsa naḥ
Sanskrit only: no published translation is held for this verse.
अवतीर्य यदोर् वंशे भगवान् भूत-भावनः कृतवान् यानि विश्वात्मा तानि नो वद विस्तरात्
avatīrya yador vaṃśe bhagavān bhūta-bhāvanaḥ kṛtavān yāni viśvātmā tāni no vada vistarāt
Sanskrit only: no published translation is held for this verse.
निवृत्त-तर्षैर् उपगीयमानाद् भवौषधाच् छ्रोत्र-मनो-ऽभिरामात् क उत्तमश्लोक-गुणानुवादात् पुमान् विरज्येत विना पशुघ्नात्
nivṛtta-tarṣair upagīyamānād bhavauṣadhāc chrotra-mano-'bhirāmāt ka uttamaśloka-guṇānuvādāt pumān virajyeta vinā paśughnāt
Sanskrit only: no published translation is held for this verse.
पितामहा मे समरे ऽमरञ्जयैर् देवव्रताद्यातिरथैस् तिमिङ्गिलैः दुरत्ययं कौरव-सैन्य-सागरं कृत्वातरन् वत्स-पदं स्म यत्-प्लवाः
pitāmahā me samare 'marañjayair devavratādyātirathais timiṅgilaiḥ duratyayaṃ kaurava-sainya-sāgaraṃ kṛtvātaran vatsa-padaṃ sma yat-plavāḥ
Sanskrit only: no published translation is held for this verse.
द्रौण्य्-अस्त्र-विप्लुष्टम् इदं मद्-अङ्गं सन्तान-बीजं कुरु-पाण्डवानाम् जुगोप कुक्षिं गत आत्त-चक्रो मातुश् च मे यः शरणं गतायाः
drauṇy-astra-vipluṣṭam idaṃ mad-aṅgaṃ santāna-bījaṃ kuru-pāṇḍavānām jugopa kukṣiṃ gata ātta-cakro mātuś ca me yaḥ śaraṇaṃ gatāyāḥ
Sanskrit only: no published translation is held for this verse.
वीर्याणि तस्याखिल-देह-भाजाम् अन्तर् बहिः पूरुष-काल-रूपैः प्रयच्छतो मृत्युम् उतामृतं च माया-मनुष्यस्य वदस्व विद्वन्
vīryāṇi tasyākhila-deha-bhājām antar bahiḥ pūruṣa-kāla-rūpaiḥ prayacchato mṛtyum utāmṛtaṃ ca māyā-manuṣyasya vadasva vidvan
Sanskrit only: no published translation is held for this verse.
रोहिण्यास् तनयः प्रोक्तो रामः सङ्कर्षणस् त्वया देवक्या गर्भ-सम्बन्धः कुतो देहान्तरं विना
rohiṇyās tanayaḥ prokto rāmaḥ saṅkarṣaṇas tvayā devakyā garbha-sambandhaḥ kuto dehāntaraṃ vinā
Sanskrit only: no published translation is held for this verse.
कस्मान् मुकुन्दो भगवान् पितुर् गेहाद् व्रजं गतः क्व वासं ज्ञातिभिः सार्धं कृतवान् सात्वतां पतिः
kasmān mukundo bhagavān pitur gehād vrajaṃ gataḥ kva vāsaṃ jñātibhiḥ sārdhaṃ kṛtavān sātvatāṃ patiḥ
Sanskrit only: no published translation is held for this verse.
व्रजे वसन् किम् अकरोन् मधुपुर्यां च केशवः भ्रातरं चावधीत् कंसं मातुर् अद्धातद्-अर्हणम्
vraje vasan kim akaron madhupuryāṃ ca keśavaḥ bhrātaraṃ cāvadhīt kaṃsaṃ mātur addhātad-arhaṇam
Sanskrit only: no published translation is held for this verse.
देहं मानुषम् आश्रित्य कति वर्षाणि वृष्णिभिः यदु-पुर्यां सहावात्सीत् पत्न्यः कत्य् अभवन् प्रभोः
dehaṃ mānuṣam āśritya kati varṣāṇi vṛṣṇibhiḥ yadu-puryāṃ sahāvātsīt patnyaḥ katy abhavan prabhoḥ
Sanskrit only: no published translation is held for this verse.
एतद् अन्यच् च सर्वं मे मुने कृष्ण-विचेष्टितम् वक्तुम् अर्हसि सर्वज्ञ श्रद्दधानाय विस्तृतम्
etad anyac ca sarvaṃ me mune kṛṣṇa-viceṣṭitam vaktum arhasi sarvajña śraddadhānāya vistṛtam
Sanskrit only: no published translation is held for this verse.
नैषातिदुःसहा क्षुन् मां त्यक्तोदम् अपि बाधते पिबन्तं त्वन्-मुखाम्भोज- च्युतं हरि-कथामृतम्
naiṣātiduḥsahā kṣun māṃ tyaktodam api bādhate pibantaṃ tvan-mukhāmbhoja- cyutaṃ hari-kathāmṛtam
Sanskrit only: no published translation is held for this verse.
सूत उवाच एवं निशम्य भृगु-नन्दन साधु-वादं वैयासकिः स भगवान् अथ विष्णु-रातम् प्रत्यर्च्य कृष्ण-चरितं कलि-कल्मष-घ्नं व्याहर्तुम् आरभत भागवत-प्रधानः
sūta uvāca evaṃ niśamya bhṛgu-nandana sādhu-vādaṃ vaiyāsakiḥ sa bhagavān atha viṣṇu-rātam pratyarcya kṛṣṇa-caritaṃ kali-kalmaṣa-ghnaṃ vyāhartum ārabhata bhāgavata-pradhānaḥ
Sanskrit only: no published translation is held for this verse.
श्री-शुक उवाच सम्यग् व्यवसिता बुद्धिस् तव राजर्षि-सत्तम वासुदेव-कथायां ते यज् जाता नैष्ठिकी रतिः
śrī-śuka uvāca samyag vyavasitā buddhis tava rājarṣi-sattama vāsudeva-kathāyāṃ te yaj jātā naiṣṭhikī ratiḥ
Sanskrit only: no published translation is held for this verse.
वासुदेव-कथा-प्रश्नः पुरुषांस् त्रीन् पुनाति हि वक्तारं प्रच्छकं श्रोतॄंस् तत्-पाद-सलिलं यथा
vāsudeva-kathā-praśnaḥ puruṣāṃs trīn punāti hi vaktāraṃ pracchakaṃ śrotṝṃs tat-pāda-salilaṃ yathā
Sanskrit only: no published translation is held for this verse.
भूमिर् दृप्त-नृप-व्याज- दैत्यानीक-शतायुतैः आक्रान्ता भूरि-भारेण ब्रह्माणं शरणं ययौ
bhūmir dṛpta-nṛpa-vyāja- daityānīka-śatāyutaiḥ ākrāntā bhūri-bhāreṇa brahmāṇaṃ śaraṇaṃ yayau
Sanskrit only: no published translation is held for this verse.
गौर् भूत्वाश्रु-मुखी खिन्ना क्रन्दन्ती करुणं विभोः उपस्थितान्तिके तस्मै व्यसनं समवोचत
gaur bhūtvāśru-mukhī khinnā krandantī karuṇaṃ vibhoḥ upasthitāntike tasmai vyasanaṃ samavocata
Sanskrit only: no published translation is held for this verse.
ब्रह्मा तद्-उपधार्याथ सह देवैस् तया सह जगाम स-त्रि-नयनस् तीरं क्षीर-पयो-निधेः
brahmā tad-upadhāryātha saha devais tayā saha jagāma sa-tri-nayanas tīraṃ kṣīra-payo-nidheḥ
Sanskrit only: no published translation is held for this verse.
तत्र गत्वा जगन्नाथं देव-देवं वृषाकपिम् पुरुषं पुरुष-सूक्तेन उपतस्थे समाहितः
tatra gatvā jagannāthaṃ deva-devaṃ vṛṣākapim puruṣaṃ puruṣa-sūktena upatasthe samāhitaḥ
Sanskrit only: no published translation is held for this verse.
गिरं समाधौ गगने समीरितां निशम्य वेधास् त्रिदशान् उवाच ह गां पौरुषीं मे शृणुतामराः पुनर् विधीयताम् आशु तथैव मा चिरम्
giraṃ samādhau gagane samīritāṃ niśamya vedhās tridaśān uvāca ha gāṃ pauruṣīṃ me śṛṇutāmarāḥ punar vidhīyatām āśu tathaiva mā ciram
Sanskrit only: no published translation is held for this verse.
पुरैव पुंसावधृतो धरा-ज्वरो भवद्भिर् अंशैर् यदुषूपजन्यताम् स यावद् उर्व्या भरम् ईश्वरेश्वरः स्व-काल-शक्त्या क्षपयंश् चरेद् भुवि
puraiva puṃsāvadhṛto dharā-jvaro bhavadbhir aṃśair yaduṣūpajanyatām sa yāvad urvyā bharam īśvareśvaraḥ sva-kāla-śaktyā kṣapayaṃś cared bhuvi
Sanskrit only: no published translation is held for this verse.
वसुदेव-गृहे साक्षाद् भगवान् पुरुषः परः जनिष्यते तत्-प्रियार्थं सम्भवन्तु सुर-स्त्रियः
vasudeva-gṛhe sākṣād bhagavān puruṣaḥ paraḥ janiṣyate tat-priyārthaṃ sambhavantu sura-striyaḥ
Sanskrit only: no published translation is held for this verse.
वासुदेव-कलानन्तः सहस्र-वदनः स्वराट् अग्रतो भविता देवो हरेः प्रिय-चिकीर्षया
vāsudeva-kalānantaḥ sahasra-vadanaḥ svarāṭ agrato bhavitā devo hareḥ priya-cikīrṣayā
Sanskrit only: no published translation is held for this verse.
विष्णोर् माया भगवती यया सम्मोहितं जगत् आदिष्टा प्रभुणांशेन कार्यार्थे सम्भविष्यति
viṣṇor māyā bhagavatī yayā sammohitaṃ jagat ādiṣṭā prabhuṇāṃśena kāryārthe sambhaviṣyati
Sanskrit only: no published translation is held for this verse.
श्री-शुक उवाच इत्य् आदिश्यामर-गणान् प्रजापति-पतिर् विभुः आश्वास्य च महीं गीर्भिः स्व-धाम परमं ययौ
śrī-śuka uvāca ity ādiśyāmara-gaṇān prajāpati-patir vibhuḥ āśvāsya ca mahīṃ gīrbhiḥ sva-dhāma paramaṃ yayau
Sanskrit only: no published translation is held for this verse.
शूरसेनो यदुपतिर् मथुराम् आवसन् पुरीम् माथुराञ् छूरसेनांश् च विषयान् बुभुजे पुरा
śūraseno yadupatir mathurām āvasan purīm māthurāñ chūrasenāṃś ca viṣayān bubhuje purā
Sanskrit only: no published translation is held for this verse.
राजधानी ततः साभूत् सर्व-यादव-भूभुजाम् मथुरा भगवान् यत्र नित्यं सन्निहितो हरिः
rājadhānī tataḥ sābhūt sarva-yādava-bhūbhujām mathurā bhagavān yatra nityaṃ sannihito hariḥ
Sanskrit only: no published translation is held for this verse.
तस्यां तु कर्हिचिच् छौरिर् वसुदेवः कृतोद्वहः देवक्या सूर्यया सार्धं प्रयाणे रथम् आरुहत्
tasyāṃ tu karhicic chaurir vasudevaḥ kṛtodvahaḥ devakyā sūryayā sārdhaṃ prayāṇe ratham āruhat
Sanskrit only: no published translation is held for this verse.
उग्रसेन-सुतः कंसः स्वसुः प्रिय-चिकीर्षया रश्मीन् हयानां जग्राह रौक्मै रथ-शतैर् वृतः
ugrasena-sutaḥ kaṃsaḥ svasuḥ priya-cikīrṣayā raśmīn hayānāṃ jagrāha raukmai ratha-śatair vṛtaḥ
Sanskrit only: no published translation is held for this verse.
चतुः-शतं पारिबर्हं गजानां हेम-मालिनाम् अश्वानाम् अयुतं सार्धं रथानां च त्रि-षट्-शतम्
catuḥ-śataṃ pāribarhaṃ gajānāṃ hema-mālinām aśvānām ayutaṃ sārdhaṃ rathānāṃ ca tri-ṣaṭ-śatam
Sanskrit only: no published translation is held for this verse.
दासीनां सुकुमारीणां द्वे शते समलङ्कृते दुहित्रे देवकः प्रादाद् याने दुहितृ-वत्सलः
dāsīnāṃ sukumārīṇāṃ dve śate samalaṅkṛte duhitre devakaḥ prādād yāne duhitṛ-vatsalaḥ
Sanskrit only: no published translation is held for this verse.
शङ्ख-तूर्य-मृदङ्गाश् च नेदुर् दुन्दुभयः समम् प्रयाण-प्रक्रमे तात वर-वध्वोः सुमङ्गलम्
śaṅkha-tūrya-mṛdaṅgāś ca nedur dundubhayaḥ samam prayāṇa-prakrame tāta vara-vadhvoḥ sumaṅgalam
Sanskrit only: no published translation is held for this verse.
पथि प्रग्रहिणं कंसम् आभाष्याहाशरीर-वाक् अस्यास् त्वाम् अष्टमो गर्भो हन्ता यां वहसे ऽबुध
pathi pragrahiṇaṃ kaṃsam ābhāṣyāhāśarīra-vāk asyās tvām aṣṭamo garbho hantā yāṃ vahase 'budha
Sanskrit only: no published translation is held for this verse.
इत्य् उक्तः स खलः पापो भोजानां कुल-पांसनः भगिनीं हन्तुम् आरब्धं खड्ग-पाणिः कचे ऽग्रहीत्
ity uktaḥ sa khalaḥ pāpo bhojānāṃ kula-pāṃsanaḥ bhaginīṃ hantum ārabdhaṃ khaḍga-pāṇiḥ kace 'grahīt
Sanskrit only: no published translation is held for this verse.
तं जुगुप्सित-कर्माणं नृशंसं निरपत्रपम् वसुदेवो महा-भाग उवाच परिसान्त्वयन्
taṃ jugupsita-karmāṇaṃ nṛśaṃsaṃ nirapatrapam vasudevo mahā-bhāga uvāca parisāntvayan
Sanskrit only: no published translation is held for this verse.
श्री-वसुदेव उवाच श्लाघनीय-गुणः शूरैर् भवान् भोज-यशस्करः स कथं भगिनीं हन्यात् स्त्रियम् उद्वाह-पर्वणि
śrī-vasudeva uvāca ślāghanīya-guṇaḥ śūrair bhavān bhoja-yaśaskaraḥ sa kathaṃ bhaginīṃ hanyāt striyam udvāha-parvaṇi
Sanskrit only: no published translation is held for this verse.
मृत्युर् जन्मवतां वीर देहेन सह जायते अद्य वाब्द-शतान्ते वा मृत्युर् वै प्राणिनां ध्रुवः
mṛtyur janmavatāṃ vīra dehena saha jāyate adya vābda-śatānte vā mṛtyur vai prāṇināṃ dhruvaḥ
Sanskrit only: no published translation is held for this verse.
देहे पञ्चत्वम् आपन्ने देही कर्मानुगो ऽवशः देहान्तरम् अनुप्राप्य प्राक्तनं त्यजते वपुः
dehe pañcatvam āpanne dehī karmānugo 'vaśaḥ dehāntaram anuprāpya prāktanaṃ tyajate vapuḥ
Sanskrit only: no published translation is held for this verse.
व्रजंस् तिष्ठन् पदैकेन यथैवैकेन गच्छति यथा तृण-जलौकैवं देही कर्म-गतिं गतः
vrajaṃs tiṣṭhan padaikena yathaivaikena gacchati yathā tṛṇa-jalaukaivaṃ dehī karma-gatiṃ gataḥ
Sanskrit only: no published translation is held for this verse.
स्वप्ने यथा पश्यति देहम् ईदृशं मनोरथेनाभिनिविष्ट-चेतनः दृष्ट-श्रुताभ्यां मनसानुचिन्तयन् प्रपद्यते तत् किम् अपि ह्य् अपस्मृतिः
svapne yathā paśyati deham īdṛśaṃ manorathenābhiniviṣṭa-cetanaḥ dṛṣṭa-śrutābhyāṃ manasānucintayan prapadyate tat kim api hy apasmṛtiḥ
Sanskrit only: no published translation is held for this verse.
यतो यतो धावति दैव-चोदितं मनो विकारात्मकम् आप पञ्चसु गुणेषु माया-रोचितेषु देह्य् असौ प्रपद्यमानः सह तेन जायते
yato yato dhāvati daiva-coditaṃ mano vikārātmakam āpa pañcasu guṇeṣu māyā-rociteṣu dehy asau prapadyamānaḥ saha tena jāyate
Sanskrit only: no published translation is held for this verse.
ज्योतिर् यथैवोदक-पार्थिवेष्व् अदः समीर-वेगानुगतं विभाव्यते एवं स्व-माया-रचितेष्व् असौ पुमान् गुणेषु रागानुगतो विमुह्यति
jyotir yathaivodaka-pārthiveṣv adaḥ samīra-vegānugataṃ vibhāvyate evaṃ sva-māyā-raciteṣv asau pumān guṇeṣu rāgānugato vimuhyati
Sanskrit only: no published translation is held for this verse.
तस्मान् न कस्यचिद् द्रोहम् आचरेत् स तथा-विधः आत्मनः क्षेमम् अन्विच्छन् द्रोग्धुर् वै परतो भयम्
tasmān na kasyacid droham ācaret sa tathā-vidhaḥ ātmanaḥ kṣemam anvicchan drogdhur vai parato bhayam
Sanskrit only: no published translation is held for this verse.
एषा तवानुजा बाला कृपणा पुत्रिकोपमा हन्तुं नार्हसि कल्याणीम् इमां त्वं दीन-वत्सलः
eṣā tavānujā bālā kṛpaṇā putrikopamā hantuṃ nārhasi kalyāṇīm imāṃ tvaṃ dīna-vatsalaḥ
Sanskrit only: no published translation is held for this verse.
श्री-शुक उवाच एवं स सामभिर् भेदैर् बोध्यमानो ऽपि दारुणः न न्यवर्तत कौरव्य पुरुषादान् अनुव्रतः
śrī-śuka uvāca evaṃ sa sāmabhir bhedair bodhyamāno 'pi dāruṇaḥ na nyavartata kauravya puruṣādān anuvrataḥ
Sanskrit only: no published translation is held for this verse.
निर्बन्धं तस्य तं ज्ञात्वा विचिन्त्यानकदुन्दुभिः प्राप्तं कालं प्रतिव्योढुम् इदं तत्रान्वपद्यत
nirbandhaṃ tasya taṃ jñātvā vicintyānakadundubhiḥ prāptaṃ kālaṃ prativyoḍhum idaṃ tatrānvapadyata
Sanskrit only: no published translation is held for this verse.
मृत्युर् बुद्धिमतापोह्यो यावद् बुद्धि-बलोदयम् यद्य् असौ न निवर्तेत नापराधो ऽस्ति देहिनः
mṛtyur buddhimatāpohyo yāvad buddhi-balodayam yady asau na nivarteta nāparādho 'sti dehinaḥ
Sanskrit only: no published translation is held for this verse.
प्रदाय मृत्यवे पुत्रान् मोचये कृपणाम् इमाम् सुता मे यदि जायेरन् मृत्युर् वा न म्रियेत चेत्
pradāya mṛtyave putrān mocaye kṛpaṇām imām sutā me yadi jāyeran mṛtyur vā na mriyeta cet
Sanskrit only: no published translation is held for this verse.
विपर्ययो वा किं न स्याद् गतिर् धातुर् दुरत्यया उपस्थितो निवर्तेत निवृत्तः पुनर् आपतेत्
viparyayo vā kiṃ na syād gatir dhātur duratyayā upasthito nivarteta nivṛttaḥ punar āpatet
Sanskrit only: no published translation is held for this verse.
अग्नेर् यथा दारु-वियोग-योगयोर् अदृष्टतो ऽन्यन् न निमित्तम् अस्ति एवं हि जन्तोर् अपि दुर्विभाव्यः शरीर-संयोग-वियोग-हेतुः
agner yathā dāru-viyoga-yogayor adṛṣṭato 'nyan na nimittam asti evaṃ hi jantor api durvibhāvyaḥ śarīra-saṃyoga-viyoga-hetuḥ
Sanskrit only: no published translation is held for this verse.
एवं विमृश्य तं पापं यावद्-आत्मनि-दर्शनम् पूजयाम् आस वै शौरिर् बहु-मान-पुरःसरम्
evaṃ vimṛśya taṃ pāpaṃ yāvad-ātmani-darśanam pūjayām āsa vai śaurir bahu-māna-puraḥsaram
Sanskrit only: no published translation is held for this verse.
प्रसन्न-वदनाम्भोजो नृशंसं निरपत्रपम् मनसा दूयमानेन विहसन्न् इदम् अब्रवीत्
prasanna-vadanāmbhojo nṛśaṃsaṃ nirapatrapam manasā dūyamānena vihasann idam abravīt
Sanskrit only: no published translation is held for this verse.
श्री-वसुदेव उवाच न ह्य् अस्यास् ते भयं सौम्य यद् वै साहाशरीर-वाक् पुत्रान् समर्पयिष्ये ऽस्या यतस् ते भयम् उत्थितम्
śrī-vasudeva uvāca na hy asyās te bhayaṃ saumya yad vai sāhāśarīra-vāk putrān samarpayiṣye 'syā yatas te bhayam utthitam
Sanskrit only: no published translation is held for this verse.
श्री-शुक उवाच स्वसुर् वधान् निववृते कंसस् तद्-वाक्य-सार-वित् वसुदेवो ऽपि तं प्रीतः प्रशस्य प्राविशद् गृहम्
śrī-śuka uvāca svasur vadhān nivavṛte kaṃsas tad-vākya-sāra-vit vasudevo 'pi taṃ prītaḥ praśasya prāviśad gṛham
Sanskrit only: no published translation is held for this verse.
अथ काल उपावृत्ते देवकी सर्व-देवता पुत्रान् प्रसुषुवे चाष्टौ कन्यां चैवानुवत्सरम्
atha kāla upāvṛtte devakī sarva-devatā putrān prasuṣuve cāṣṭau kanyāṃ caivānuvatsaram
Sanskrit only: no published translation is held for this verse.
कीर्तिमन्तं प्रथमजं कंसायानकदुन्दुभिः अर्पयाम् आस कृच्छ्रेण सो ऽनृताद् अतिविह्वलः
kīrtimantaṃ prathamajaṃ kaṃsāyānakadundubhiḥ arpayām āsa kṛcchreṇa so 'nṛtād ativihvalaḥ
Sanskrit only: no published translation is held for this verse.
किं दुःसहं नु साधूनां विदुषां किम् अपेक्षितम् किम् अकार्यं कदर्याणां दुस्त्यजं किं धृतात्मनाम्
kiṃ duḥsahaṃ nu sādhūnāṃ viduṣāṃ kim apekṣitam kim akāryaṃ kadaryāṇāṃ dustyajaṃ kiṃ dhṛtātmanām
Sanskrit only: no published translation is held for this verse.
दृष्ट्वा समत्वं तच् छौरेः सत्ये चैव व्यवस्थितिम् कंसस् तुष्ट-मना राजन् प्रहसन्न् इदम् अब्रवीत्
dṛṣṭvā samatvaṃ tac chaureḥ satye caiva vyavasthitim kaṃsas tuṣṭa-manā rājan prahasann idam abravīt
Sanskrit only: no published translation is held for this verse.
प्रतियातु कुमारो ऽयं न ह्य् अस्माद् अस्ति मे भयम् अष्टमाद् युवयोर् गर्भान् मृत्युर् मे विहितः किल
pratiyātu kumāro 'yaṃ na hy asmād asti me bhayam aṣṭamād yuvayor garbhān mṛtyur me vihitaḥ kila
Sanskrit only: no published translation is held for this verse.
तथेति सुतम् आदाय ययाव् आनकदुन्दुभिः नाभ्यनन्दत तद्-वाक्यम् असतो ऽविजितात्मनः
tatheti sutam ādāya yayāv ānakadundubhiḥ nābhyanandata tad-vākyam asato 'vijitātmanaḥ
Sanskrit only: no published translation is held for this verse.
नन्दाद्या ये व्रजे गोपा याश् चामीषां च योषितः वृष्णयो वसुदेवाद्या देवक्य्-आद्या यदु-स्त्रियः
nandādyā ye vraje gopā yāś cāmīṣāṃ ca yoṣitaḥ vṛṣṇayo vasudevādyā devaky-ādyā yadu-striyaḥ
Sanskrit only: no published translation is held for this verse.
सर्वे वै देवता-प्राया उभयोर् अपि भारत ज्ञातयो बन्धु-सुहृदो ये च कंसम् अनुव्रताः
sarve vai devatā-prāyā ubhayor api bhārata jñātayo bandhu-suhṛdo ye ca kaṃsam anuvratāḥ
Sanskrit only: no published translation is held for this verse.
एतत् कंसाय भगवाञ् छशंसाभ्येत्य नारदः भूमेर् भारायमाणानां दैत्यानां च वधोद्यमम्
etat kaṃsāya bhagavāñ chaśaṃsābhyetya nāradaḥ bhūmer bhārāyamāṇānāṃ daityānāṃ ca vadhodyamam
Sanskrit only: no published translation is held for this verse.
ऋषेर् विनिर्गमे कंसो यदून् मत्वा सुरान् इति देवक्या गर्भ-सम्भूतं विष्णुं च स्व-वधं प्रति
ṛṣer vinirgame kaṃso yadūn matvā surān iti devakyā garbha-sambhūtaṃ viṣṇuṃ ca sva-vadhaṃ prati
Sanskrit only: no published translation is held for this verse.
देवकीं वसुदेवं च निगृह्य निगडैर् गृहे जातं जातम् अहन् पुत्रं तयोर् अजन-शङ्कया
devakīṃ vasudevaṃ ca nigṛhya nigaḍair gṛhe jātaṃ jātam ahan putraṃ tayor ajana-śaṅkayā
Sanskrit only: no published translation is held for this verse.
मातरं पितरं भ्रातॄन् सर्वांश् च सुहृदस् तथा घ्नन्ति ह्य् असुतृपो लुब्धा राजानः प्रायशो भुवि
mātaraṃ pitaraṃ bhrātṝn sarvāṃś ca suhṛdas tathā ghnanti hy asutṛpo lubdhā rājānaḥ prāyaśo bhuvi
Sanskrit only: no published translation is held for this verse.
आत्मानम् इह सञ्जातं जानन् प्राग् विष्णुना हतम् महासुरं कालनेमिं यदुभिः स व्यरुध्यत
ātmānam iha sañjātaṃ jānan prāg viṣṇunā hatam mahāsuraṃ kālanemiṃ yadubhiḥ sa vyarudhyata
Sanskrit only: no published translation is held for this verse.
उग्रसेनं च पितरं यदु-भोजान्धकाधिपम् स्वयं निगृह्य बुभुजे शूरसेनान् महा-बलः
ugrasenaṃ ca pitaraṃ yadu-bhojāndhakādhipam svayaṃ nigṛhya bubhuje śūrasenān mahā-balaḥ
Sanskrit only: no published translation is held for this verse.